Sunge Sa Aboro Ni Abawiriki Naye Na Ngbarago
‘Oni ndú tie, ki sa arikaaboro ni abawiriki.’—MT. 28:19.
1-3. (a) Wai dungu aboro abipa wisigo Ziazia Kekeapai na akurayo? (b) Gini asanahe ani ka wisigopai tipaha?
WIRINA sa du rogo gu badona nga ga awirina namanga gayó adunguratise rogo pa-Hindi Amerika yo akepai ki yaa: “Tipa aposo 11, mi aima digo niwisigi Ziazia Kekeapai na agu aboro naye Pakistan yo.” Ri ape gu kurapai ki yaa, ‘Nirengo, ani adu niwene abakure. Kina aume naaga bangireyo ho mi aberãpa wai ni i nika mbu re nisare ki ga ku Pakistan yo. Anga kina gberarago sa du mi nani ka bi gupai nga i nambu re nisare te, ono mi a na ngbarago ka bi gupai nga mi ima yugupai fuyó tipa Yekova.’
2 Ya mo oni naadunga na ngbarago ho oni niwisigi Ziazia Kekeapai ni na boro wagu nadu tipa gi wirina re tee? Yesu gbiati gako abawiriki rogo bambata sa kama agarã agbia bakere ngbarago be sunge sa aboro nibawiriki. Ho gu ga Yesu abawiriki ko ayugupai fuyó nadu 70 akaraga tiyó ni na ki tingidi gupai fuko na ngbarago namangi fuyó, Yesu ‘angi rogo ziazia toro.’ (Ruka 10:17-21) Badungu aboro nagbia ngbarago areme be sunge sa aboro ni abawiriki. Gopai nayugoho wo nga, rogo 2007, agu abatungusipai naatungusapai kakaka, i aduna ngbarago kaa wisigo Ziazia Kekeapai na aboro bangeyo adu nga amirioni sita na beberehe na adiwi dunduko!
3 Ono gu kura abatungusipai kinaho adunga na aboro beyo tipa ka wisigopai naayo ya. Si rengbe kadu nga agarã ima susa nidunguhe zanga aguyo du na boro beyo kandara sa tipa ka wisigo Ziazia Kekeapai na ní. Gini kpakaraapai rengbe ani ka gbiatirani nani ho ani aʹasada tirani ni nyanyakii ka wisigo Ziazia Kekeapai na aboro? Wai rengbe ani ka diabe agu akpakarapai re? Na gini amosoro rengbe ani ka gbiaha ka si du nga ani naaʹasada tirani ka irisa gu ga Yesu zinahe nayaa: ‘Oni ndú tie, ki sa arikaaboro ni abawiriki’?—Mt. 28:19.
Agu Akpakarapai Rengbe ka Gbarasapa Gaani Ngbarago
4, 5. (a) Ga aboro mangapai nidu wai rogo kura aringara kuti gupai ani atungusaha? (b) Gini kpakarapai abatungusipai agbiatiyo nani rogo kura aringara?
4 Rogo gu kura aringara, aboro nidu adu na nyemu dia gaani awaraga kaa gedaha na kidu na nyemu ani wisigi Ziazia Kekeapai naayó. Kura arogotise naguari Australia yo ka ndu ka tungusapai tipa wiri guru regbo Zambia yo, ayaa: “Kina boro rengo du ani naagiaha tipa Zambia. Si nga wene mbudu sende tipa tungusapai. Manga dezirepai bangiri gene ima ngba kisusi! Aboro nisayo nanaaye fuo rani, aguyo kini sana rani singia ngbatunga agu amagazini i aidaha si ho berani.” Rogo gu garã nasusi barambeda kusayo, awirina awisigi Ziazia Kekeapai na aboro Zambia yo nga 200,000. Gure nayugo gupai nga, awirina dunduko nadu na aboro beyo i aawisigo Ziazia Kekeapai naayó.
5 Ono rogo gu kura aringara, si nikpakarapai fu abatungusipai i fu kandara magazini fu boro, ka ani afuranga tigaha tipa gu nga ga wisigo Ziazia Kekeapai na ní dedede ya. Tipagine? Si wo mbiko gupai nga, si nikpakarapai ka gbia aboro kporo, ono zavura aguyo i agbia yó kporo, i na nyemu agu apai du tipa pambori te. Si rengbe kadu nga avunguyo aangianga aKristano te watadu gu biriki i abihe si nimangi rogo zire pambori nasayo ka i idinga nani ya. Si rengbe kadu a nga badungu abarumbatayo rogo zire pambori arungosi yó rogo toro yo na kini gbandaka yó. (Mt. 9:36) Si nirengo nga ngbatunga agu aboro re nagunde agunde ti gu sakapai du tipa wisigo Ziazia Kekeapai.
6. Gini ngbatunga kpakarapai rengbe abatungusipai ka gbiatiyo nani?
6 Kura akpakarapai kinaho abatungusipai agbiatiyo nani nga gu rengbe arengba ka gbarasapa gayó ngbarago. Wa vura duhe nga i adumbata ni agu abatungusipai nanaamangasunge sa aboro ni abawiriki kakaka, akaza watadu gbinza ima dingiso yó awere ti manga agu apai i anaamangaha mbata. Ani bingo gu kura dingisoro rengbe kina rani ka ye nani kuti rani. Nikpiapai, ya mo oni naabi tironi nga oni arẽnga ka wisigo Ziazia Kekeapai na aboro tee? Si rengbe kadu nga oni nabi tironi wakina gu Moize abi tiko ho Yekova akedi ko ni ko ndu ka fura na Faro. Moize ayaa: “Ako gi Gbia, zaza bagumbapai nga mi te, mi adu nga wo mbata te.” (Gate 4:10) Ka ani abi tirani nga ani arẽnga te, si rengbe ka sa rani ani naagunde kini yawee ani amanganga pai wenengai te. Si rengbe ka sa rani ani naagunde kini yawee gu boro ani awisigopai na ní, ní adanga nibawiriki te mbiko wa ani arengbanga ka yugopai funi wenengai ya. Ka ani abi tirani nga ani arengbanga ka yugopai fu boro te, si nika sa rani ani dakuti gupai nga ndupai ho tipa ka wisigo Ziazia Kekeapai na boro te. Wai rengbe ani ka diabe gi kpakarapai fura ani tipaha re?
Oni Mbakadi Ngbaduroniyo
7. Ginipai nafõngbadu Yesu yo ho ko aatungusapai ni?
7 Gu bambatapai si aida ani mangihe nga ka mbakada ngbaduraniyo. Yesu ayaa: “Ngba boro nagumba pai mbiko gu pai du ngbaduni yo kpaima.” (Ruka 6:45) Nunga aboro afõngbadu Yesu yo si ki sa ko ko tungusipai fuyó. Nikpiapai, ho ko abi gupai ni nga aYuda airisonga Mbori ngba ruru gene berewe te, ‘nungayo amangi ko.’ Ko agumbapai fu gako abawiriki ki yaa: “Zuzuhe ni bakere he . . . Oni kpári tie fu gu Gbia du zuzuhe ni gako, ko kedi abamangisunge ku rogo gako ati zuzuhe.”—Mt. 9:36-38.
8. (a) Ginipai si aida ani berẽkuriihe wenengai? (b) Ginipai rengbe ani ka wirikaha ti afugo gu dee nawirika Ziazia Kekeapai re?
8 Wa ani amanga sunge sa aboro ni abawiriki, si adu niwenepai ka ani berẽkurii agu amaku ani nagbiaha mbiko gupai nga boro awisigi Ziazia Kekeapai na ani. Ngbaha angba a ani berẽ tipa agu aboro ani ka gbiayo gene sunge tungusapai yo na gu ngbarago i nikadu nani mbiko gia yó gu pangbanga ani nika tungusaha fuyó. Dee sa ake waraga kurogo gu be-basunge du rogo gari ringara ki yaa: “Mi naida ka gumbapa gu ngbarago du mi nani be gupai awirinaroni ni adee ayugoho fere kpure no. Mi ima inoho nga ti kura aregbo, i naambuambu be gu dungu asanahe du ngbare, na mi naazioyo azio i sungu tipa gbanga regbo susi gu regbo si aida i sunguhe. Ono i na zerangbaduse tipa ka yugo agu apai fere i awirikihe rogo Ziazia Kekeapai. Mi natambua Yekova na Yesu mbiko keda yó gi gayó amoyambu re fuore.”
9. Ginipai Yesu amoiberãko fuoho, na wai rengbe ani ka wirika gako kpiapai?
9 Kina rengo du nga, anga aboro dunduko naidi na ga Yesu yugopai te. (Mt. 23:37) Aguyo apefuoko tipa wiri guru regbo, ono ka i aidanga na gu kurapai sa ko agumbaha ya, sidu, i ‘ki karaga tiyó behe, ka i atanga naako berewe ya.’ (Yo. 6:66) Ono tie, Yesu aambunga gupai gi gako abawiriki re amangihe si karaga ko kusayo ti tungusa gu nyanyakipa pangbanga ko aatungusaha re te. Wa si avura du nga gu tunga Yesu amihe anga si dunduko nazuku te, ko amoi berãko fuo kina gu wenepai si aidi ko mangihe. Ko abi gupai nga aũati aima zama kini idi i kehe na ko agbia ngbarago ti koda beko kuti sunge ke agu aũati re. (Oni gedi Yoane 4:35, 36.) Kuba gupai nga ani naabi aũati abi gbua ku ati yo, anga si naida ani ndu ka tona sunge ke ahe atiyo tee? Ani bingo wai si aida ani du na ruru berã wa gure.
Oni Ta Rũhe Kini Berẽpa Kehe
10, 11. Ginipai rengbe oni ka mangaha tipa ka gbia ngbarago?
10 Asopo bino naarũ hee na gu maabangirise nga i ake agu ahe re ake. Kina gu bangisapai re si aida ani du nani nga, ho ani atungusapai ni, si naida ani tona wisigopai na aboro nibasa rogo Ziazia Kekeapai. Ono ginipai ka oni mangihe ka si du nga agu aboro oni agbia yó gene tungusapai yo, oni nakaraga tironi ka oni abingo yó berewe ya? Si rengbe ka ba kina gberarago tironi. Ya mo gure nga si naida oni mbu tungusapai ki zanga tanga nani ti akporo? Oó, wo duhe te! Dungu aboro ani naagbia yó agbia ho ani naatanga ni na sunge tungusapai ti akporo.
11 Ono tie, tipa oni nye kindi na ngbarago tingba sunge tungusapai, si naida oni gbata kura agene agbata nga gu rengbe oni ka gbia aboro ngbaha. Nikpiapai, ya mo oni aʹasadingo manga dezirepai fu aboro bangiri agene watadu ba gayó asunge yo? Ya mo oni rengbe ka yamba aboro rogo terefuni watadu ka dia anamba aterefuni nga ga agu aboro oni nafura naayó gene tungusapai yo tipa kaa fura naayó? Ka oni kpatagara kindi kuti tungusapai na kini aria asinoho kuti gupai si aida oni mangihe, oni du adu na ngbarago ho ka oni gbia boro ni naida na gu pangbanga nga ga Kindo.
Sovura Kuti Sakparakpa
12. Ginipai rengbe ani ka mangaha ka si du nga dungu agu aboro du rogo gaani dagbarago i na nyemu gupai ani atungusaha fuyó te?
12 Ginipai rengbe oni ka mangaha ka si du nga agu aboro du rogo gaoni dagbarago, dunguyo aidanga ka fura riipa agu apai nga ga pambori te? Ya mo oni rengbe ka aria gaoni riipai kina kuti agu apai i akpinyemuhe? Pauro kepai fu agu akurako aidipase nadu Korinda yo ki yaa: “Fu aYudo mi ki du wa Yudo, . . . fu agu yo du tii rugute yo, wa ka mi adu tii rugute yo, wa adu nga mi tii rugute yo tigimi ya.” Ginipai Pauro aaida ka mangaha? Ko ayaa: “Mi ye ka du ni apai dunduko fu aboro dunduko, si ngia ka mi batasi agu yo.” (1 Kor. 9:20-22) Ya mo si aidanga ani tona fugo na aboro kina riipa agu pai idi ani kuti ni naayó tee? Dungu agu aboro adunga rogo pambori ya naida ka mbakada gayó ramukporo. Si rengbe kadu nga i naida ka ino ndu gupai aboro araka ti ni. Ya mo oni rengbe ka tungusa gu pangbanga nga ga Kindo fu aboro ngba gu gene rago nika ngbatiyo nani?
13, 14. Wai rengbe ani ka kiiso gaani ngbarago rogo sunge sa aboro ni abawiriki?
13 Badungu abatungusipai ima kiiso gayó ngbarago rogo sunge sa aboro ni abawiriki zavura rogo agu aba aboro aidanga na gaani tungusapai rogoho ya. Waigu mangiyo ho? I mangihe niwirika yó gu fugo aboro dukia ti gayó. Sosono arogotise ue abi gupai nga aboro China ima nge rogo gu dagbarago i afuhe fu gayó dungurati si nitungusipai rogoho. I ayaa: ‘Fuo bi ani gipai re, si angarasi rani ani wiriki pa aboro China. Wa si avura du nga ani anaadia bakere regbo tipa ka wirika gi fugo re, sangbanaha angia ani adu na badungu aboro berani tipa ka wisigo Ziazia Kekeapai naayó dagba agu aboro China nadu rogo gaani dagbarago.’
14 Ka si vurangia oni arengbanga ka wirika fugo gu kura aboro te, oni rengbe arengba ka mangasunge na gu wiri buku du rimoho nga Good News for People of All Nations ho bi oni agu aboro ni nagumba gu fugo dukia. Oni rogodi agu awaraga na oni du rogo fugo kura aboro tipa ka ndu ka kparakaha fuyó. Kina rengo ngaha nga si naida regbo gbiati asadatise ka fura na agu aboro du fugoyo na gayó asino raka a kia ti gaani. Ono tie, oni tingidi gu rugute du rogo Fugo Mbori nayaa: ‘Guni ka mi tunga gbe, ní akehe a gbe.’—2 Kor. 9:6.
Dungurati Naabaha Dũ
15, 16. (a) Tipagine duhe ti ni nga dungurati naabaha dũ naundo bangisa boro ní da nibawiriki? (b) Gu sosono awirina du rogo dungurati, gini sunge i amangaha?
15 Ono tie, sunge sa aboro ni abawiriki nga ga bangisa boro sunge te. Kuba gure, dungurati naabaha dũ naundo bangisa boro ní da nibawiriki. Tipagine gumba ani he ti ni wo? Yesu ayaa: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) Nirengo, ho agu aboro ani ayugo Ziazia Kekeapai fuyó ayeni kurogo dungurati, gu bambatapai rago naangba tiyó nani ningia gu nyemuse du dagbarani. Dee sa nawisigo Ziazia Kekeapai ayaa: “Mi nidu na ngbarago ka ye kupati gaoni adunguratise. Agu aboro du yo dunduko ninaakpinyemu re!” Yesu ape gupai nga, agu aboro naida kadu ni apefuoko, agumeyo asoga yó asoga. (Oni gedi Matayo 10:35-37.) Ono tie, ko akido yó nga i agbia badungu “awirina [agbia], na adawiri, na ana, na awiri” rogo dungurati.—Mk. 10:30.
16 Sosono awirina rogo dungurati namanga bakere sunge ka undo agu aboro nawisigo Ziazia Kekeapai tipa i sono rogo toro yo. Rogo gini gene? Ka si vurangia gi sosono awirina re arengbanga ka wisigo Ziazia Kekeapai na aboro te, gu gayó akaragapai i afuhe ti regbo adunguratise nanyakasa gu idapase nga ga agu aboro dunduko nagiaha. Pa ta yó kina rogo “rurupai” nasa dungurati si du niʹiriʹirihe na kini gbe agu aboro duna nyemu rengo i ye kurogo ga Mbori riigbu.—Snz. 16:31
Diabe Gunde
17. Ginipai rengbe ani ka mangaha tipa ka do gu berã kusayo nga ani arẽnga te?
17 Ginipai si aida oni mangihe ka si du nga oni nabi tironi nga oni arengbanga ka wisigopai na boro rogo Ziazia Kekeapai te? Oni tingidi gupai nga Yekova afu ziazia toro fu Moize na ki fu moundo fuko nangia wirinako nga Arona. (Gate 4:10-17) Yesu Kristo aima kidohe nga, ga Mbori toro nika undo rani aundo tingba gaani sunge dezirepai. (Amokedi 1:8) Kurigure, ko akedi abamangisunge niba-ue-ue i ndu ka tungusapai. (Ruka 10:1) Sidu, ka oni bihe nga si nikpakarapai furoni tipa ka wisigo Ziazia Kekeapai na boro, oni sana Mbori tipa gako toro si fu tatamana furoni. Fuo gure, oni rengbe ka dia gu kura boro du na inohe ní gasi roni ku gene sunge tungusapai yo tipa ka songoda roni. Gaani idapase nanyaka anyaka ho ani aberã ni kurii gupai nga, Yekova nasia agu aboro du payo kusende na du ‘nirurungbura ahe nga ga zegino’ i mangi gi sunge re.—1 Kor. 1:26-29.
18. Wai rengbe ani ka diabe gu gunde nga ani arẽnga ka wisigopai na aboro te?
18 Wai rengbe ani ka diabe gu gunde nga ani arẽnga ka undo boro ní wiriki Ziazia Kekeapai te? Gupai si aida ani moihe ku berãrani yo nga, sunge sa aboro ni abawiriki wa sunge manga riahe ninaabi kina bangisa boro te. Sidu, ani arengbanga ka mangaha niʹomerani nitirani te. Yekova namanga gu nyanyaki paparaha, mbiko ko nagbe aboro koyo du ko ni. (Yoane 6:44) Ani, gbiati kura aboro rogo dungurati naundo agu aboro ani awisigo Ziazia Kekeapai naayó tipa i sono rogo toro yo. (Oni gedi 2 Timoteo 2:15.) Na gu boro nawirika Ziazia Kekeapai, si naida ní nimangi agu apai amanga ní awirikaha. (Mt. 7:24-27) Ka si du nga ní ima mbu wisigo Ziazia Kekeapai, si rengbe ka ba kina gberarago ti gu boro nawisigopai na ní. Agu aboro nawisigo Ziazia Kekeapai, si naida i mangi ruru diaberã, mbiko i ‘aringbisapa tiyó aringbisa fu Mbori nibasasa.’—Rom. 14:12.
Amosoroho Nga Gine?
19-21. (a) Gini ngbatunga amosoro ani agbiaha ti wisigopai na aboro? (b) Wai Yekova abi agu aboro dunduko natungusapai?
19 Wisigopai na aboro nasa rani ani gbata Kindo mbata. Na si nasa rani ani rimisi Fugo Mbori kurirani yo na ku ngbaduraniyo. Rogo gini gene wisigo Ziazia Kekeapai na aboro amanga gupai re? Bazakigene nga Barak ayaa: “Wisigopai na aboro nasa rani ngbaome ani du ni abawiriki Fugo Mbori. Mi bi gupai nga si naida mi ini rengo wenengai mbata mi nika yugoho fu kura boro.”
20 Ka si du nga boro ho awere beroni oni awisigo Ziazia Kekeapai na ní te, ya mo gure nayugo gupai nga gu sunge oni amangaha fu Mbori kiingo paha tee? Oó, wo duhe te! Yekova nabi gu sunge ani amangaha fuko na nyanyakipaha. Agu aboro dunduko natungusapai, i dunduko nga “ga Mbori abadiasunge.” Ono tie, wisigo Ziazia Kekeapai nakiiso gaani ngbarago ho ani abi gupai ni nga Mbori nasonosa gu tunga ani arũhe. (1 Kor. 3:6, 9) Kura nazakigene sa du rimori nga Amy ayaa: ‘Ho boro abi gu boro ni ní awisigo Ziazia Kekeapai na ní ní nisono kumbatayo rogo toro yo, ní nadu na bakere tambuahe fu Yekova mbiko wa ko aundo ní ní undo boro ní inipai tipa ko na ki gbia nyenye unga.’
21 Ho ani amanga asadatise ni kaa wisigo Ziazia Kekeapai na aboro, si naundo rani ani moiberã rani fuo mangasunge fu Mbori awere na si nanyakasa gaani maabangirise nga ga raka rogo vovo zegino. Mbiko gu undohe nga ga Yekova, ani rengbe arengba ka undo agu aboro nadegatuyo furani. (Oni gedi 1 Timoteo 4:16.) Nairiwo gu ngbatunga ngbarago ani agbiaha be gi sunge re!
Oni Natingidaha?
• Gini ngbatunga akpakarapai nadingiso kura aboro ti wisigo Ziazia Kekeapai na aboro?
• Ginipai rengbe ani ka mangaha ka si du nga agu aboro du rogo gaani dagbarago i na nyemu agu apai ani atungusaha fuyó te?
• Gini amosoro ani agbiaha ti wisigopai na aboro?