Oni Nga “Wene Babanda Gu Dungu Agamahe Nga Ga Mbori”?
“Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.”—ROM. 12:10.
1. Ginipai Fugo Mbori akido rani nani?
FUGO MBORI nakido rani dedede ya ko aundo rani aundo ho du ani ni na gberarago tirani. Nikpiapai, ani kparianga agi afugo wasa naye re: “Yekova nasongoda agu yo nati dunduko, ki nitumba agu yo nanugadi dunduko a.” “Ko nahusa agu yo du na rungo kpotoyo yo, ki vodi gayo aoro a.” (Tam. 145:14; 147:3) Kurigure, gu Barani du ngbangbaturũ yo nayaa: “Mi nga Yekova nga ga Mbori, nazada kumba bero; mi du naya foro, ‘Ka mo gúnde nga ya, mi aúnda ro [aundo].’”—Yes. 41:13.
2. Wai Yekova aundo gako amoyambu?
2 Ono wai Yekova ‘azada berani’ nga gu boro naraka ngbangbaturũ yo? Wai ko ‘atumba rani ho ani nanugodi ni’ be fudifudiapai? Ko namanga agu apai re ngba dungu agene. Nikpiapai, ko nafu “gu bakere tandu susi” rogo gako ziazia toro. (2 Kor. 4:7; Yo. 14:16, 17) Ga Mbori amoyambu nabi gupai abi a nga Fugoko nafu ome afu fuyó. (Eb. 4:12) Ya mo gu kura gene kinaho Yekova afu ome furani ngbaha? Ani nabi karagapai sa gi sanahe re rogo gu bambata waraga Petero akehe.
“Gu Dungu Agamahe Nga ga Mbori”
3. (a) Ginipai gu mokedi nangia Petero agumbaha tipa asada? (b) Ginipai Petero asakipai tipaha rogo gako bambata waraga ti digidoho yo?
3 Wa gu mokedi nangia Petero aake waraga fu mbedimbedi aKristano, ko aya fuyó wee i adu na wene ndupai kadu na ngbarago mbiko agu amosoro naapido yó. Ko agbia gupai kuti ni nga: “Awere, ka si du wo, oni avura rungo ngbutuko be dungu aasada.” (1 Pet. 1:1-6) Oni kparia gu fugo nga “dungu.” Si nayugo gupai nga, agu aʹasada re nikadu nibakiakia. Ono tie, Petero aonganga kina ku ane, ki mbu awirinako i naabaka bangiriyo singia i arẽ na agu aʹasada re te. Ko aya fu aKristano wee Yekova aundo yó aundo ka i vura gbiatiyó na kina gini ngbatunga asada vurũ. Petero akido yó na gupai re rogo yangara gako waraga ho ko aafura ni tipa agu apai nadu tipa “digida apai dunduko.”—1 Pet. 4:7.
4. Wai agu afugo du rogo 1 Petero 4:10 afu wasa furani?
4 Petero ayaa: “Wa i agama he fu boro kina wo a ni mangi pa akurani na ni, wa wene babanda gu dungu agamahe nga ga Mbori.” (1 Pet. 4:10) Berewe a, ko amangisunge na gu fugo nga “dungu.” Gupai nzunzu ko aaida ka gumbaha nga, ‘Aʹasada na dungu angbatungaha ti ni, ono ga Mbori mangaapai nga ga weneringise arẽnga aboro tipaha ya, si a nidunguhe.’ Wai agu afugo re afu wasa furani? Si nayugo gupai ngawee, ka aʹasada vura du kina wai, Mbori ayeaye na gako weneringise arẽnga aboro tipaha ya fu aKristano tipa i mangipai nani kuti gu asada ka i du rogoho. Ono tie, oni kparia pa wai Yekova afu gako weneringise furani? Ko nafuhe vurube akuarani aKristano.
‘Mangapa Akurase’
5. (a) Ginipai si aida aKristano nibasasa mangihe? (b) Gini asanahe nakura?
5 Wa Petero aafura fu agu aboro nadu rogo dungurati, ko ayaa: “Oni du na bakere nyemuse dagbaroni.” Ko agbia kurapai kuti gure ki yaa: “Wa i agama he fu boro kina wo a ni mangi pa akurani na ni.” (1 Pet. 4:8, 10) Sidu, agu aboro dunduko du rogo dungurati si aida gupai nga i koditiyo ka sonosa tiyó dagbayó. Ani dunduko Yekova nafu gako nyanyakipahe furani tipa ani kparakaha fu kura aboro. Ginihe du ngaha i afuhe furani re? Petero ayawee si nga ‘gamahe.’ Wai ani ‘amangapa akurani nani’?
6. Gine nga bete agu agamahe fuku yó ho fu aKristano tipa i mangisunge nani?
6 Fugo Mbori nayaa: “Wene gamahe dunduko, na ziazia ũgamahe dunduko i nagama ha, si naye ari yo.” (Yak. 1:17) Nirengo, agu agamahe dunduko Yekova nafukuhe fu gako aboro, si nga yuguyugupai tipa gu gako weneringise arẽnga aboro tipaha ya. Nyanyakipa gamahe sa Yekova afuhe furani, si nga ziazia toro. Gu gamahe re naundo rani ani sonosi ngbatunga agu asino duwa nyemuse, wene sino, na zezeredi sino. Agu asino re tigaha nasa rani ani du na awirinarani wesewese na kini songodi yó. Ndikidi tatamana gbiati inohe du dagba gu wene agamahe ani agbiaha be gu undo ziazia toro afuhe. (1 Kor. 2:10-16; Gara. 5:22, 23) Nirengo, aomerani, agu atandu du berani, na agu abirĩ inohe du berani, si naida ani naamangasunge nani kaa sambuo gu Barani du ngbangbaturũ yo. Mbori naida ani mangisunge na agu atandu gbiati abirĩ inohe du berani ka undo akuarani aidipase. Ka ani mangisunge na agi apai re wa gure, si nika yugopa gako weneringise fuyó, nga gu weneringise arẽnga aboro tipaha ya.
Ani ‘Mangipa akuarani na Ni’
7. (a) Gu fugo nga, ‘wa i agama he fu boro,’ rogoyo nga gine? (b) Gini asanahe si aida ani sana tirani nani, na tipagine si aida ani sana tirani ti ni na agu asanahe re?
7 Nibipa agu agamahe Mbori nafukuhe furani, Petero ayaa: ‘Wa i agama he fu boro kina wo a [si aida] ni mangi pa akurani na ni.’ Gu fugo nga, ‘wa i agama he,’ si nayugo gupai ngawee agu asino gbiati abirĩ Mbori agamaha fu aboro re, si nibakiakia na abakioho a nibakiakia. I nangarasa aboro dunduko i ‘mangipa akurayó na gu gamahe’ i afuhe fuyó re. Berewe a, gu fugo nga, “ni mangi pa akurani na ni,” si nga zinahe. Sidu, si naida ani sana tirani ki yaa: ‘Ka pe kina rengo nzunzu, ya mo mi namangasunge na gu gamahe Mbori afuhe fere ka nyakasa akuare aidipase nani?’ (Oni ringbisinga ha na 1 Timoteo 5:9, 10.) ‘Watadu mi namangasunge na agu abirĩ inohe Yekova afuhe fere tipa ka undo kina tire nani, wa gu nga ka dungura aũkumuko watadu ka tumbasi pare kuari dagba aboro?’ (1 Kor. 4:7) Ka ani ‘mangipa akuarani na [agu abirĩ du berani],’ si nika sa gupai nga ani fu ngbarago fu Yekova.—Snz. 19:17; Oni gedi AEbere 13:16.
8, 9. (a) Gine nga gu bete aundo aKristano rogo zegino dunduko afuhe fu akurayó aidipase? (b) Wai agu awirina du rogo gaoni dungurati aundo tiyó dagbayó?
8 Fugo Mbori nafura tipa dungu agene nga gu agu aKristano nadu rogo bambata sa kama agarã aundo akurayó ngbaha. (Oni gedi ARomo 15:25, 26; 2 Timoteo 1:16-18.) Wakina gure areme a, ndikidi aKristano namangasunge na ngbaduyó yo dunduko na agu agamahe du beyo ka ndusunge akurayó aKristano. Ani makianga pa agu agene i amangaha ngbaha.
9 Dungu awirina nadia gbanga regbo rogo adiwi dunduko kaa mbakada agu apai i andu ka gumbaha rogo gayó adungurati. Ho i agumba apai ni ti regbo adunguratise nga agu apai i ambakadihe ti regbo gayó wisigo Ziazia Kekeapai, si nangarasa agu aboro dunduko du rogo dungurati i naahipai. (1 Tim. 5:17) Dungu awirina nidu wesewese na akurayó aidipase na kini mangi yó rogo nunga. (Rom. 12:15) Kura awirina nandu ka bi aguyo duna bakere gberarago tiyó. (1 Tesa. 5:14) Gu kurayo nakeka awaraga na gu wene afugo naye ngbaduyó yo tipa si ngarasi agu akurayó du rogo fudifudiapai. Aguyo naundo agu awirinayo duna adingisoro ka gene adunga beyo ka ye kupati adunguratise ya. Dungu akutu aDezire Yekova namanga gi sunge re, kini undo awirinayo i dudua gu gayó abambu kubaha nagbataka be gu gberango naye be gu mangapai nga ga ome zegino. Gu beedi ngbanya gbiati gu wene undo du agi awirina re nani rogo ngerafuo awirinayo, si nayugopa ‘gu dungu agamahe nga ga Mbori.’—Oni gedi 1 Petero 4:11.
Ginigu Nyakipaha?
10. (a) Ginipai Pauro aabakabangiriko nani tipa gu sunge Mbori afuhe fuko nadu na apaparaha ue? (b) Waigu ani apekafuo Pauro areme?
10 Anga ga Mbori amoyambu namangasunge sa na agu agamahe du beyo ka undo akurayó aidipase te, ono i na wene pangbanga a beyo i atungusaha fu aboro. Gu mokedi nangia Pauro aima rugatiko naapa gi sunge duna paparaha ue ko amangaha fu Yekova re. Ko akepai fu gu dungurati nadu Efesa yo nibipa ‘gu mangapai Mbori afuhe fuko mbiko gako undahe’ tipa si undoyo. (Ef. 3:2) Wa si avura duwo, ko ayaa: “Mbori angba na ani ka asia pa wene pangbanga furani.” (1 Tesa. 2:4) Wakina Pauro, ani ima rugatirani na gupai nga i afu gu sunge furani nga ga tungusapa ga Mbori Kindo. Wa ani atungusapai zaaza, gure nga ani namanga asadatise nyanyakii ka pekafuo gu kpiapai Pauro amoihe nigu batakipande wene pangbanga nanaambunga be mangaha ya. (Amo. 20:20, 21; 1 Kor. 11:1) Ani ima inoho nga, tungusa gu pangbanga nga ga Kindo rengbe arengba ka batasa aboro. Ono tie, ti kina gu bangisa regbo re, ani namanga asadatise nyanyakii ka pekafuo Pauro nigbata ani amomu tipa ka “fu ga Ziazia Toro ũgume fu” akuarani aidipase.—Oni gedi ARomo 1:11, 12; 10:13-15.
11. Wai si aida ani naabi gaani sunge tungusapai gbiati ngarasa awirina?
11 Gi ga aKristano sunge du ue re, ginigu nyakipaha ti kuraha? Gu sanahe re wakina gu sanahe nga: Gini popo zire nyakipaha? Aboro dunduko ima ino karagapai sa gu sanahe re. Tipa zire naagu wenengai, si naida u du na apoporu ue dunduko. Wakina gure a, si naida ani naamanga gu sunge Mbori afuhe furani duna apaparaha ue tipa kadu nindikidi aKristano. Sidu, kuba gupai nga ani naabi sunge tungusa wene pangbanga gbiati ngarasa awirinarani ni agu asunge du nibakiakia, si naida ani du na gu bangisa bipai agu amokedi nangia aPetero na Pauro adu nani tipaha, nga agi asunge re, gu nanyasa gu kpa ti kuraha. Wai du si amangaha?
12. Wai du ani ni aũsunge kpabe Yekova yo?
12 Wangia ani abatungusi wene pangbanga, ani namangasunge na gu birĩ-sunge du berani tipa ka rimiso gu pangbanga nga ga ga Mbori Kindo ku ngbadu aboro yo. Rogo gi gene re, ani naundo yó i da niga Yesu abawiriki. Ono tie, ani namangasunge na gaani ome gbiati agu atandu du ani nani ka ngarasa akuarani aidipase. Agi apai re nayugopa ga Mbori weneringise arẽnga aboro tipaha ya. (Snz. 3:27; 12:25) Rogo gi gene re, ani naundo akuarani i nye niga Yesu abawiriki. Rogo gu mangaapai du ue re, nga tungusapai fu aboro na ‘mangapa akurani,’ si nga momu furani ani du ni aũsunge kpabe Yekova yo.—Gara. 6:10.
“Oni Ngbá Angba Yee na Akuaroni”
13. Ginipai ka mangi ka ani mbu ‘mangapa akurani’?
13 Pauro angarasi akurako aidipase ki yaa: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” (Rom. 12:10) Nirengo, padu ani na nyemu awirinarani tirani nasa gupai nga ani mangi payo, si kini yugupa ga Mbori weneringise arẽnga aboro tipaha ya ko amangaha rogo rani yo. Ani ima rugatirani na gupai nga, ka Satana ká na ani ti ‘mangapa akurani,’ ani dunga berewe rogo kodatise naayó te. (Koro. 3:14) Zanga kodatise tigaha rengbe ka sa rani ka ani naatungusanga pai zaaza ya. Satana ima ino gupai nga, ka ko kuo poporani gbua kina sa, pai ho berewe ka ani rengbe ka mangaha te.
14. Ada nagbia undo ho ani ‘amangapa akuarani’ ni? Oni funga kpiapai sa.
14 Anga kina agu aboro i ‘amanga payo’ nagbia undo sa te, ono agu aboro namangapa akurayó nagbiaha agbia a. (Snz. 11:25) Ani bingo gupai nadu tipa kumba du rimoko nga Ryan na rimo diako nga Roni naraka Amerika yo rogo gbata nga Illinois. Ho i agi gupai ni nga bakere bavugumo agbarasi akporo nga ga akurayó aidipase, i ambu gayó asunge ki guari rogo gu ba i aaraka rogoho, ki ngbe bambu duna anduhe wa ga tarambiri, ki mbakadihe, na ki ndu gbanga nunguro nani nadu nga amairo 900 ku Louisiana yo ka undo agu awirinayo bavugumo amangi yó. I aundo awirinayo yo tipa garã sa. Ryan, du garãko 29, ayaa: ‘Pa fu mi tire ka undo gu sunge re asa gupai nga mi mbedi na Mbori. Mi abi wai nibangire Yekova angerafuo gako aboro.’ Ko aya berewe wee: “Pa manga mi sunge na agu awirina nangia aunvuru fere ayugu wai fere si aida ani naangera fuo awirinarani. Mi aini gupai a nga, bakere sunge gudu kinaho tipa rani nga aparanga rogo ga Yekova riigbu si aida ani mangihe.” Roni, du garãri 25, nayaa: “Mi na tambuahe mbiko mi akodi tire na awirina ka fu undo. Mi awere na bakere ngbarago tire susi gu nidumbata. Gupai ini mi he nga, gipai re nikaa undo re aundo rogo agu agarã nika ye kumbatayo.”
15. Gini wene ndupai du berani tipa ka mangapa akuarani?
15 Nirengo, pa irisa ani ga Mbori zinahe tipa tungusa wene pangbanga gbiati sonosa akuarani aidipase nigupai naundo rani aundo. Agu aboro ani aundo yó, i nanyaka rogo toro yo ani kini gbia ngbarago tigaani, nga gu ngbarago boro agbiaha kinaho ní namangi wenepai ni fu kurani. (Amo. 20:35) Dungurati naabaha nadu na ngbarago ho agu aboro du rogoho nibasasa akpinyemu akurayó ni. Kurigure, gu nyemuse du dagbarani, si nayugo rani nindikidi aKristano. Yesu ayaa: “Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:35) Nibambatapai, Yekova nga gu boro si aida i tambua ní mbiko ko nayugopai fu gako amoyambu i naayugo kpia gako nyemuse fu akurayó. Fuo duhe were, ani na wene ndupai berani ka ‘mangapa akuarani’ na agu agamahe du berani. Ya mo oni nikaa manga gipai re kindi?—Oni gedi AEbere 6:10.
Oni Natingidaha?
• Rogo gini gene Yekova anyakasa gako amoyambu?
• Gini sunge fuuyó ho furani?
• Gini agene rengbe ani ngbaha ka mangapa akuarani aidipase?
• Gine nafõngbaduraniyo ani ‘naamangapa akuarani’?
[Gu kpiahe du ti kpewaraga 17]
Oni naamangasunge na agu “agamahe” du beroni tipa kina tironi watadu tipa ka undo kura aboro?
[Gu kpiahe du ti kpewaraga 19]
Ani natungusa wene pangbanga fu aboro na kini undo akuarani aKristano
[Gu kpiahe du ti kpewaraga 20]
Si naida ani fu tambuahe fu agu aboro naye ka fu undo furani mbiko wa i ambupa kura gayó apai ka manga gu sunge re