Fugo Yekova Niungaha Memeapai Rogo gu Kitabu Nga Yugoti—Gu 2 Paparaha

GINIPAI napido agu aboro nairiso Yekova Mbori na aguyo airisongo ko ya? Ginipai nika manga tipa Satana na tipa adaimona? Gini amaku agu aboro nga agisangbaa nika gbiaha ti regbo ga Kristo Zogarago Tipa Agarã Kutu? Agu akaragapai du tipa agi asanahe re gbiati gu kura nyanyakipa asanahe, si rogo Yugoti 13:1–22:21.a Agi akapita re na yangara ayugoti rogoho 9 dagba agu ayugoti du 16 nga agu ayugoti Mbori afuhe fu gu mokedi nangia Yoane rogo bambata sa kama agarã nimbedi kuti digidoho yo Fuo Batikayo Kristo.

Yoane akepai ki yaa: “Boro maku nga gu ni nageda gi gumbapai re, na agu yo nagia ha, ki nika kuti agu apai du ni keke he rogo ho; bambiko ragoho nikada.” (Yugo. 1:3; 22:7) Pa geda ani agu apai du rogo Yugoti na kini mangihe nika fõngbaduraniyo ani naairiso Mbori, na si nika nyakasa gaani idapase kutiko na kuti Wiriko nga Yesu Kristo, na ki fu wene maabangirise furani tipa raka kumbatayo.b—Eb. 4:12.

MARAIKA AUKA GA MBORI ZINGA DU ROGO AKURUNGBU SABA

(Yugo. 13:1–16:21)

Yugoti 11:18 nayaa: ‘Arikaaboro azingi, ga [Mbori] zinga ki ye, na rago sapangbanga ka gbarasa agu yo nagbarasa kpotosende.’ Tipa ka ino ndu gupai ga Mbori zinga aye ti ni, gu 8 yugoti nayugo gu mangapai nga ga gu “nyarinde, . . . gbangaru adu bawe na ariru saba.”—Yugo. 13:1.

Rogo gu 9 yugoti, Yoane abi “Wiri Kandoro, ko ru ri gu bagangara nga Siona” gbiati gu kura aboro du bangeyo nga “144,000.” I “atumo . . . yo dagba aboro yo.” (Yugo. 14:1, 4) Amaraika atingidi aboro na apai fuo gure. Rogo gu yugoti naye tingbafuo gure, Yoane abi ‘amaraika saba nadu na agberãngbii saba beyo.’ Si ziazia tie nga, kina boro Yekova nitiko nazinahe fu agi amaraika re i uka “ga Mbori zinga du rogo akurungbu saba” ku auru ga Satana apapara zegino nibakiakia. Agu akurungbu re naapa ga Mbori asapangbanga rogoho nga gu ko nika mangaha. (Yugo. 15:1; 16:1) Agi ayuguyugupai du ue re nafura tipa kura asapangbanga nga gu nika ye tingbafuo vudo yó gu saba mbanya na tifuo biata gberãngbii.—Yugo. 11:14, 15.

Akaragapai sa agu Asanahe Nga ga Ziazia Kekeapai:

13:8—Gine nga gu ‘kitabu unga nga ga Wiri kandoro’? Si nga fugo masaku tipa rimo kina agu aboro nika zogarago na Yesu Kristo ngbangbaturũ yo.

13:11-13—Waigu nyarinde amangapai wa daragona ki sa we si ná ngbangbaturũ yo? Gu nyarinde duna agbangaru ue re, u narukuba ANgirisi-na-Amerikani nga agu arikaaboro duna bakere ome kisusi rogo zegino. Wa duhe nga i nafura wakina daragona, si nayugo gupai nga i nagundesi aboro kini mangiyo ngbaome na kini mangiyo na zuũ a i idi naapa gayó pagbia. I nasa we si ná ngbangbaturũ yo na gu rogoyo ngawee, i namanga tiyó wa anebi ya i aima diabe kereapai rogo zegino ti regbo agu avura ue nga ga zegino i asoho rogo 20 kama agarã na ki dibe gu vura a i asoho kuti gu zogarago kina irangbii abanda aũkumuko rogoho tipa kparakaha.

16:17—Gine nga gu “yuge” maraika auka gako kurungbu kurogoho? Gu “yugu” re narukuba ga Satana berã nga “gu toro namanga pai awere rogo agu awiri yo nakeretu.” Agu aboro dunduko du rogo ga Satana gbegberẽ zegino nagbida gi gbegberẽ yuge re.—Ef. 2:2.

Agu Apai Rengbe Ani ka Wirikaha:

13:1-4, 18. Gu ‘nyarinde’ re narukuba agu azogarago nga ga aboro. U nakura ‘baime yo’ na gu rogoyo ngawee gu zogarago re akuru dagba aboro du gayó apai ruguzuruguzu wa sungburosungburo baime. (Yes. 17:12, 13; Dan. 7:2-8, 17) Satana namangi gi nyarinde re na ko ki fu ome furu. U na gu namba tiru nga 666, du rogoyo nga u nga kpakpa he nikerehe. Pa ruga ani tirani na gupai du tipa gi nyarinde re naundo rani ka paru iriwongo tirani watadu ka iriso ru wa kura aboro airiso ru areme ya.—Yo. 12:31; 15:19.

13:16, 17. Ka ani vura ka gbiatirani na fudifudiapai rogo agu apai ani amangaha na aʹuru wa gu nga ‘ngbe ahe watadu ka baga ahe,’ si aidanga ani mbu nyarinde u moipai kurii gaani raka te. Ka ani mbu nyarinde u ‘nogodihe tirani watadu ka maa gau nimira tirani,’ gure nga ani mbu ru u naamaa arugute furani watadu kaa yugo gene furani.

14:6, 7. Gu sunge maraika amangaha nga ga takapande pangbanga, si nayugo gupai furani nga si naida ani naatungusapa ga Mbori Kindo zanga keesa nani. Si naida ani undo agu aboro ani ayugo Ziazia Kekeapai fuyó i naagunde ti Mbori na kini fu taarimo fuko.

14:14-20. Ho i nika batasa “gu zuzuhe nga ga kpotosende” ni, nga ka nyasa na dungura agu aboro i ka batasa yó, gure nikangia gu regbo maraika nika ba “gu bakakue nga ga kpotosende” “ku rogo bapiraahe yo, nga gu bakere bapiraahe nga ga ga Mbori zinga.” Gu bakakue re nga ga Satana zegino na gaha azogarago kurii aboro na kurii “akpura bakakue” nga apapara gu zogarago re. Si nga agu ahe i nika gbarasaha nyeanye kindi. Si naida ani diberã ka gu bakakue nga ga zegino gbarasinga parani ya.

16:13-16. Gu “gbigbita atoro” re narukuba gu takapande apai nga ga adaimona i amangaha tipa ka agu abakindo du auru kpotosende sanga gayó berã tingbafuo uka amaraika agu azinga nga ga Mbori du rogo akurungbu yo ya, ono si tipa ka sa yó i nye kindi kuti soga Yekova.—Mt. 24:42, 44.

16:21. Wa digido gi zegino re ambeda, takapande ga Yekova sapangbanga kuti ga Satana zegino rengbe ka koda gu nyanyaki afugo du tipa ga Yekova asapangbanga i aagumbanga ha mbata ya nga gu morogumba arukubaha. Wa vura duhe wo, dungu aboro nikaa gberã ngbayo yo kindi fu Mbori.

BAKINDO NAZOGARAGO

(Yugo. 17:1–22:21)

“Babera Duna Bakere Ome Ti Ni,” nga bariwara ngbii zire pambori, si nga gu papara ga Satana zegino du nigbegberẽhe. I nayugoho rogo gu 11 yuguyugupai nigu wasiwasi dee nga “debari,” “sungu auru zamba nyarinde.” Gu mbakadapai duho tipa gu dee sungu rii nyarinde re, si nga, agu ‘agbangaru du bawe’ nika dewa ri ki gbarasi ri. (Yugo. 17:1, 3, 5, 16) Gu yuguyugupai naye fuo gure nafura tipa ri ni “bakere bakporo” na kini takipande pa tigo ri na kini ngarasi ga Mbori aboro i “kúru yo du ri ni.” Dungu aboro narungo be pa tigo gu bakporo re. Ono tie, amaraika nangi angi tigayo ngbangbaturũ yo mbiko “gu rago diade nga ga Wiri Kandoro da.” (Yugo. 18:4, 9, 10, 15-19; 19:7) Rogo gu 13 yuguyugupai, bandurii “pusi farasi” nandu ka sovura na rikaaboro. Ko nagbarasa ga Satana zegino naabaha.—Yugo. 19:11-16.

Ginipai tigaha du tipa “gu bakuru wo, nga Bakitingbanga, nga Satana”? Gini regbo i ka bako ‘kurogo ngirimo we’? Si nga gupai fura yó tipaha rogo gu 4 yuguyugupai. (Yugo. 20:2, 10) Gu yangara yuguyuguapai du ue, si nafura tipa wai raka nikadu ti regbo ga Yesu zogarago tipa agarã kutu. Wa “yugoti” ambeda kuti digidoho, Yoane abi ‘di si nifu ti gene bakporo,’ na ko ki gi fugo i niyambu agu aboro ‘gomoro ime amanga yó’ i ye ka mbira ime rogo gu di re.—Yugo. 1:1; 22:1, 2, 17.

Akaragapai sa agu Asanahe Nga ga Ziazia Kekeapai:

17:16; 18:9, 10—Tipagine “abakindo zegino” nika rungo ti ni tipa pakpio guhe kina yó nika gbarasaha? Nduhe nabi agu apai du tipa kina yó. Fuo gbarasa yó Babera Duna Bakere Ome Ti Ni, i nika kparia gupai nga, atika i gbarasi guhe nanaafu undo fu kina yó. Pambori nangia guhe i anaamaaha kumbatayo kini mangi gbegberẽ apai kugiihe. Si a nanaaundo yó i naaraba aparanga i naandu tipa vura kaa soho nirimo pambori. Kurigure, si nangia guhe nanaasa aboro i naara fu abakindo.

19:12—Wai duhe nga kina Yesu sa ini gu rimoko i ayambanga ha aboro ki gihe re ya? Si nawira gi rimo re narukuba gu ba gbiati sunge nga ga Yesu gumbayo paha rogo Yesaya 9:6 ya ko nikadu nani rogo ga Gbia uru. Kina Yesu sa ini gi rimo re na gu rogoyo ngawee kinako sa inipai tipa agu asunge du rimoho kuriko re. Ono tie, Yesu nika kpara bete agi asunge re akpara fu agu aboro nika zogarago naako si kidu wa ko ‘nake gi vovo rimo re riyo.’—Yugo. 3:12.

19:14—Ada nika sovura na Yesu ti regbo Aramegido? “Agu arikavura du ngbangbaturũ yo” nga amaraika gbiati mbedimbedi aKristano fuo ga yó ku ngbangbaturũ yo, i nika kodatiyo na Yesu ka so gi ga Mbori vura re.—Mt. 25:31, 32; Yugo. 2:26, 27.

20:11-15—Ada du arimoyo nikekehe rogo “kitabu unga”? Gi kitabu re na rimo agu aboro dunduko rogoho du tipa gbia nyenye unga. Si nakoda rimo mbedimbedi aKristano, rimo agu aboro du dagba gu bakere rimbasa aboro Ziazia Kekeapai nafura tipa yo, gbiati gu ga Mbori ruru amoyambu i nika ‘zingisa yo bekpio.’ (Amo. 24:15; Yugo. 2:10; 7:9) I ake rimo agu aboro ake a i nika zingisa yo bekpio ti regbo ‘zingisa ruru aboro’ ka i amanga agu apai du ‘nikekehe rogo kitabu’ nga agu akitabu i ka zakaha ti regbo ga Yesu zogarago tipa agarã kuku. Ono tie, i akenga agu arimo re nyeanye kindi te. Ho mbedimbedi aKristano anye ni niruruyo dati kpio, i nake rimoyo nyeanye kindi rogo gu kitabu re. (Yugo. 3:5) Tipa agu aboro nika raka auru kpotosende, i nika ke rimoyo nyeanye kindi fuo susa yó rogo yangara asada ti digido agarã kutu nga ga ga Yesu zogarago.—Yugo. 20:7, 8.

Agu Apai Rengbe Ani ka Wirikaha:

17:3, 5, 7, 16. “Gu tatamana naye ari yo” naundo rani ani rugu tirani naapa ‘gu gbugbupai nga ga dee, na gu nga ga gu nyarinde natinda ri a.’ (Yak. 3:17) Gi nyarinde narukuba kurapai re, si atona na gu rimo nga Kodatise nga ga Aringara (League of Nations) na i ki aria rimoho kusa nga Yu-eni. Wa duhe awere tie nga i ima yugo gi okõokõpai re furani, ya mo si aidanga ani du zaaza tingba sunge tungusa gu wene pangbanga du tipa ga Mbori Kindo na kini takipande ga Yekova sapangbanga tee?

21:1-6. Anga kapa ho du ani nani ya agu amaku fura yó tipaha ya si nikadu tiibe ga Mbori Kindo ahe manga te. Tipagine? Bambiko i naya tipaha wee: “Si ni mangimangi he!”

22:1, 17. Gu ‘di nga ime unga,’ si narukuba ga Yekova mbakadapai ka batasa agu aboro nga agisangbaa be ingapai na bekpio. Bete gi ime re kina ti ni wa du rago re. Ani idinga pa gu yambahe i ayamba rani nani re ki “di ime unga gbua” na ki fuhe fu kura aboro a!

[Gu rukutu kekeapai du bandu kpewaraga yo]

[Gu kpiahe du ti kpewaraga 25]

Gini amaku agu aboro nga agisangbaa nika gbiaha tiibe ga Mbori Kindo?