Oni Moi Bangironi Tipa Mosoro

“Mi nadusia gu ringbisiringbisi he du ku mbata yo sa dia . . . mosoro.”—FRP. 3:14.

1. Gini mosoro Mbori agumbapa fuhe fu Pauro?

GU MOKEDI nangia Pauro, i anaayamba ko a nga Saura, ko angia wiri kikiipa boro. Gu bayugu andiko nangia Gamariere nayugu ga atitako pambori fuko. (Amo. 22:3) Pauro aduna gu sunge beko ka ko asaha nigako nyenye sunge, ono tie, ko ambu gako pambori na ki sa tiko ni Kristano. Fuo gure, ko aduna maabangirise tipa gu mosoro Mbori agumbapa fuhe fuko nga nyenye unga na kadu nibakindo na niboromotumo rogo ga Mbori Kindo ngbangbaturũ yo. Gu Kindo re nika zogarago auru paradizo kpotosende.—Mt. 6:10; Yugo. 7:4; 20:6.

2, 3. Wai duhe nga Pauro abi gu mosoro nga ga raka ngbangbaturũ yo na kikiipaha?

² Pauro afura tipa pa wai ko abi gu mosoro re. Ko ayaa: “Agu ahe nakiisi pa re, si adu nga bangire ni he te, mbiko Kristo. Ii, ni rengo, ahe dunduko . . . adu nga bangire ni he te mbiko gu wene pai nga inida Kristo Yesu gi Gbia. Mbiko ko ahe aingi be re dunduko si ki du bangire wa kina mirĩ ahe, ya mi bi Kristo.” (Frp. 3:7, 8) Agu ahe aboro naabihe na nyanyakipaha gbe nga ga boro ba dagba akurani, aũkumuko, nyenye sunge-marã, na gupai nasa boro ní du niʹiriʹiri ní dagba aboro, Pauro abihe nikungbo mirĩ ahe fuo wirikako pai tipa ga Yekova ringbisapai tipa aboro.

³ Natona ti gu regbo re kaa ndu kumbatayo, gupai paha anyaki gbe bangiri Pauro angia gu inohe du tipa Yekova na tipa Kristo, nga gu Yesu afura tipaha rogo kpee fu Mbori ki yaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yo. 17:3) Agu apai Pauro akehe du rogo AFiripoio 3:14, si nayugo gupai nga ko aduna kakaka nyemu ka gbia nyenye unga. Si nayaa: “Mi nadusia gu ringbisiringbisi he du ku mbata yo sa dia gu mosoro du ti ga Mbori yambahe ari yo rogo Kristo Yesu yo.” Ii, ko amoiberãko kina kuti gu mosoro nga nyenye unga ngbangbaturũ yo tiibe ga Mbori Kindo.

Raka Nyeanye Kindi Auru Kpotosende

4, 5. Gini mosoro i nika fuhe fu agu aboro namanga gupai Mbori akpinyemuhe?

⁴ Tipa badungu agu aboro sia gupai nga ka manga gupai Mbori akpinyemuhe, gu mosoro si aida i mangi asadatise ka gbiaha, si nga nyenye unga rogo ga Mbori vovo zegino. (Tam. 37:11, 29) Yesu ayawee pai ho rengbe ka gbarasapa gi maabangirise re te. Ko ayaa: “Aboro maku nga bayee aboro, bambiko i adú ni adikumbo zegino.” (Mt. 5:5) Yesu nga gu bangbasia boro nika dia zegino a wa Atambuahe 2:8 ayugoho, na ko azogarago na kura aboro du bangeyo nga 144,000. (Dan. 7:13, 14, 22, 27) Agi aboro duwa akandoro nika raka auru kpotosende re, i nika ‘diakumbo’ gu ngbii nga ga kpotosende ‘i ambakadihe tipa yó ho rago aenge ni.’ (Mt. 25:34, 46) Ani naa kido nga agi apai re nika manga amanga mbiko Mbori ‘ninaarenga zire ya,’ ko kido rani. (Tito 1:2) Ani rengbe kadu naa kido wakinagu Yosua adu nani ho ko ayani fu aYisaraere wee: “A nga wenepai nakpa sa dagba agu apai dunduko Yekova gaoni Mbori akido pa ha fu roni te; si amangi dunduko fu roni, a nga pai sa nakpa te.”—Yos. 23:14.

⁵ Raka rogo ga Mbori vovo zegino adunga wagu duhe areme kpasiaka te. Si adu tigaha kia: avura adunga yo te, kuondiko te, arungo tipa aũzegino te, iraira mangaapai te, akaza te, na kpio a te. Aboro adu na akpotoyo pongopongo na kini raki auru kpotosende i naʹariaha niparadizo. Gu raka re nika ngba kisusi gu ani aberãha nga wo si nikadu. Ii, aʹuru nibasasa nikangia aʹuru ngbarago. Nangbaa gu mosoro re!

6, 7. (a) Wai Yesu amangi kpia agu apai nika manga rogo ga Mbori vovo zegino? (b) Wai aboro nika tona vovo raka zavura gu kpikpiyo?

⁶ Ho Yesu aduni auru kpotosende, Mbori afu ome fuko ko mangi kpia gu weneapai ko nika mangaha auru kpotosende rogo vovo zegino. Nikpiapai, Yesu azinahe fu gu kumba nadu nigbãrigbãriko tipa agarã 38 ko guari ki tona nduge. Ziazia Kekeapai nayawee gu kumba re aguari ki tona nduge nirengo. (Oni gedi John 5:5-9.) Ti kura regbo, Yesu agbia “kumba i avungu ko na vurari” na ko ki hasi bangiriko. Kusa, aboro asana gu kumba Yesu ahasi bangiriko re. Ko akaragapai fuyó ki yaa: ‘Wa rago aenge aenga kindi, i agianga pai mbata ya boro ahasi bangiri guni i avunguni na vurari te. Kangia gi kumba re aayenga yo du Mbori ni te, ka ko manginga pai wa gure te.’ (Yo. 9:1, 6, 7, 32, 33) Yesu arengbe ka manga agi apai re dunduko mbiko Mbori nafu ome fuko. Rogo agu arago dunduko Yesu anaandu kurogoho, ko ‘anaahusa agu aboro nanaaida ka hu be akaza.’—Ruka 9:11.

⁷ Anga Yesu ahusi kina airawokote na gbarigbari aboro sa te, ono ko azingisi kpikpi aboro a bekpio. Nikpiapai, degude akpi garãri adu 12. Pakpio ri aye na bakere rungo fu agumeri. Ono Yesu andu kupati kangbari ki yaa: “Degude, ya mi foro, mo gúari.” Ri aguari kuari nirengo! Oni berẽnga pa gu ngbarago avunguri adu nani gbiati agu aboro nadu pati gupai re. (Oni gedi Marako 5:38-42.) Rogo ga Mbori vovo zegino, aboro nikadu na bakere ngbarago ho gu ‘iiriwopai’ nika manga ni nga badungu abirioni aboro nika zingabekpio, bambiko Ziazia Kekeapai nayawee “ruru aboro azinga [azinga] be kpio na iraira yo a.” (Amo. 24:15; Yo. 5:28, 29) I nika tona vovo raka na kini moi bangiriyo ka raka nyeanye kindi.

8, 9. (a) Ti regbo ga Kristo Zogarago Tipa Agarã Kutu, ginipai nika manga tipa gu ingapai ani adihe ti Adamu? (b) I nika sapangbanga agu aboro i nika zingisayo bekpio ringbisihe kuti gini apai?

⁸ Agu aboro nika zingabekpio, i arengba arengba ka raka nyeanye kindi ka i amanga rurupai. Mbori asaranga ngbanga agu aboro nika zingabekpio ringbisihe kuti agu aingapai i amangihe mbata fu kpiko yó te. (Rom. 6:7) Ti regbo ga Kristo Zogarago Tipa Agarã Kutu, ho i nika mangasunge ni na agu aundo duti ga Kristo motumo tumorii, aboro giasangba nikaa da tooni tooni nirengberengbe aboro. Na niyangaraha, agu apai dunduko naye nisangbana ga Adamu ingapai, si nika go kusayo tiyó. (Rom. 8:21) Yekova “adígisa pa kpio nye anye kindi, Gbia Mbori awéga aume ti bangirise ku sa yo dunduko.” (Yes. 25:8) Fugo Mbori nayawee ‘i nika zaka akitabu.’ Gupai re nayugo gupai nga, agu aboro nikaa raka ti gu regbo re, Mbori nika fu vovo arugute afu fuyó. (Yugo. 20:12) Wa aboro nika sa kpotosende niparadizo, i ‘awirikapa rurupai.’—Yes. 26:9.

⁹ Mbori nika sapangbanga agu aboro i nika zingisayo bekpio ringbisihe kuti gu mangaapai kina yó nitiyo nika siaha kaa mangaha fuo zinga yó bekpio, angianga ka sapangbanga yó kuti gu ingapai i adihe ti Adamu ya. Yugoti 20:12 nayaa: “I ki sapu ngbanga agu yo naima kpika kuti agu apai du ni keke he rogo akitabu, ringbisi he kuti gayo mangaapai,” nga gu gayó mangaapai nikadu tifuo zinga yó bekpio. Nangbaa gu ga Yekova kpiapai nga ga ruru sarangbanga, inopai, na nyemuse re! Kurigure, gu kereapai namangi aboro mbata fu kpiko yó, i ‘atingidanga paha te, si ayenga ku berãyo yo a te.’ (Yes. 65:17) Mbiko gu weneapai nikaa manga, i aberãnga pa gu gbegberẽ apai namangi mbata kusayo te. Bangiriyo nika go ago ti agu apai re. (Yugo. 21:4) Kina gu bangisapai re nikadu tipa gu “bakere rimbasa” aboro nika bata ti regbo Aramegido.—Yugo. 7:9, 10, 14.

10. (a) Raka nikadu wai rogo vovo zegino? (b) Ginipai rengbe oni ka mangaha si ki undo roni oni moi bangironi tipa mosoro?

¹⁰ Rogo vovo zegino, aboro nikaa raka zanga kaza mangiyo na zanga i kpiki. Si wo mbiko Ziazia Kekeapai nakidohe niyaa: “A nga boro kporo sa ayá, ‘Mi nawoka’ te.” (Yes. 33:24) Agu aboro nika raka rogo vovo zegino, i nikaa zinga wiso kpotoyo kidu wenengai susi gu si adu rogo gu uru susi na i kidu na maabangirise tipa kura wene uru berewe. I nikaa manga wene asunge, na kini sungu na agu aboro nakpinyemu yó. Gu raka re nikangia bakere mosoro nirengo! Ka gene du beroni, oni zaranga gaoni Ziazia Kekeapai rogo Yesaya 33:24 na 35:5-7 ka bingo agu apai si agumbaha nika manga kumbatayo. Oni moingo tironi kurogo gu rago gumbayo paha re. Si nika undo roni oni moi bangironi tipa mosoro.

Agu Aboro Pa Mosoro Ago Bangiriyo

11. Oni gumbapa wai tonatona ga Soromo zogarago adu.

¹¹ Fuo wirika ani pai tipa gu mosoro du kumbatayo, si naida ani asaditirani nyanyakii kaa berãpa gu mosoro re kindi. Nikpiapai, ho Soromo adani nibakindo rogo gu ringara aYisaraere nadumbata, ko akpari fu Yekova niumbasitise tipa ko fu giarogopaiyo fuko gbiati rugatinapai tipa ko nisapungbanga niruruhe. (Oni gedi 1 Abakindo 3:6-12.) Nisangbana gipai re, “Mbori afu tatamana na rugatinapai fu Soromo susi ba ringbisa ha.” Nirengo, “ga Soromo tatamana akii akia ki susi gu tatamana nga ga agu awiri aboro naadu ku uroyo [ti ringara aYisaraere] dunduko, na gu tatamana nangia ga aEzipeto dunduko a.”—1 Aba. 4:29-32.

12. Gini zahe Yekova afuhe fu agu aboro naada ni abakindo ringara Yisaraere yo?

¹² Ono tie, mbata fu Soromo da nibakindo, Yekova aima zahe ya gu boro i amaa ní nibakindo, ka ní ‘ngeesinga afarasi tipa ní’ na ka ní ‘rogonga dungu adee ya, ngbaduni ka sa tihe.’ (Pa Rug. 17:14-17) Ka ní angeesi afarasi, ka si ayugu gupai nga, ní nakido kina kuti rimbasa aborovura tipa i banda gu rikaaboro nangia aYisaraere re, kuba kido ní kuti Yekova, nga gu boro nabanda gani aboro. Kurigure, pa roga abakindo dungu adee arengbe ka ye na kina kerepai, mbiko agu adee ka i arogoyo nga airisikpiahe, ka i asayo asa kusayo ti ndikidi irisombori.

13. Wai bangiri Soromo ago ti agu apai Mbori agumbaha fuko?

¹³ Soromo aairisanga sangba Yekova te. Ko amangi agu apai Yekova aima za abakindo ti ni ziazia. Ko adungura badungu akutu afarasi gbiati abandurii afarasi. (1 Aba. 4:26) Ko arogo adee 700, na kidu na adebadia beko 300, na badungu agi adee re ko arogoyo dagba agu arikaaboro nangia apagano. Agi apagano re ‘asa kpotokoyo fuo kura kungba ambori; ka kpotokoyo adunga berewe niziaziaha fu Yekova’ ya. Soromo atona iriso kungba ambori, nga agu ambori adiako ayugu payo fuko. Nisangbana gi ga Soromo mangaapai re, Yekova aya fuko wee ko nika ‘kpára ngbii beko’ ki fuhe fu gako moyambu.—1 Aba. 11:1-6, 11.

14. Ga Soromo basasangbaa gbiati gu basasangbaa nangia ga aYisaraere aye na ginipai?

¹⁴ Soromo aaberãnga pa gu momu berewe nadu beko nga ga manga gu sunge nga ga ndikidi Mbori te. Ko arimisitiko naabako dunduko kurogo kungbo irisombori. Fuo bete regbo kusa, gu rikaaboro nangia aYisaraere dunduko asamungu kuti ndikidi irisombori, na si nasa gupai nga i gbarasi gayó ringara rogo gu garã nangia 607 M.B.K. Wa si avura du nga agu aYuda re aima tona ndikidi irisombori berewe, Yesu aya fuyó fuo badungu agarã wee: “Gu ngbi nga ga Mbori, i adía ha adia be roni, i ki fu he fu gu rika aboro nikazu kina gaha zuzuhe.” Gupai re aima manga nirengo. Yesu aya fuyó berewe wee: “Oni ngére, i he gaoni kporo fu roni ni bate.” (Mt. 21:43; 23:37, 38) Wa gu rikaaboro re aayenga niruruyo ya, Mbori adi gu momu beyo i adu nani nga ga mangasunge kubako. Rogo gu garã nangia 70 F.B.K., ga aRomo riivura agbarasi Yerusarema na gaha yekaru, na i ki sa yangara aYuda nigayo akanga.

15. Oni gumbapa agu aboro bangiriyo ago ti gupai paha anyaki gbe.

¹⁵ Yuda Keriota angia boro sa dagba gu ga Yesu amokedi naanidu 12. Yuda aima gia agu apai dunduko Yesu ayuguhe, na ki bi gu iiriwoapai ko amangihe mbiko gu ome nga ga ziazia toro. Ono tie, ko aabandanga ngbadukoyo te. Ko nga gu boro i asiani ní naabanda gu mangu nadu na marã rogoho tipa Yesu na tipa gako amokedi nadu 12. Ono tie, “iradĩ nangia ko, mangu anidu be ko ko ki nidĩ agu ahe i anamaa koyo.” (Yo. 12:6) Gako ngbaduse andu naako ki da ti gupai nga, ko taburõ na agu agbiamotumo nangia airabiriki tipa ka baga Yesu fuyó tipa marã feda 30. (Mt. 26:14-16) Gu kura boro berewe natona gbegberẽpai angia Dema, nangia ga Pauro badia-nunguro. Dema aabandanga ngbadukoyo te. Pauro aya tipa ko wee: “Dema aguari pati re, nikpi nyemu gi zegino re.”—2 Tim. 4:10; oni gedi Asanza 4:23.

Gupai Ani Awirikaha

16, 17. (a) Wai igirã gu asada Satana aye nani sa rani? (b) Gine rengbe ka undo rani ani ru nyanyakii sa agu aʹasada dunduko rengbe Satana ka ye nani sa rani?

¹⁶ Si naida ga Mbori amoyambu di agu akpiapai dunduko kugume du rogo Ziazia Kekeapai, bambiko Fugo Mbori naya furani wee: “Agi apai [re] amangi yo ni kpia pai; si ki du ni keke he tipa za rani, nga agu yo ye digida rago ku auru yo.” (1 Kor. 10:11) Ani naraka awere ti yangara arame.—2 Tim. 3:1, 13.

¹⁷ Satana Bakitingbanga nga “mbori gi zegino re,” ko ima ino gupai nga, “kina bete rago [watadu regbo] nye fu ko.” (2 Kor. 4:4; Yugo. 12:12) Ko nika manga agu apai dunduko rengbe omeko nani tipa ka sa aKristano i mbu manga rurupai. Satana du du gi zegino re ku vuru beko, na ko a dukurii aũgbandaka apangbanga dunduko. Ono tie, Yekova nafu “bakere tandu” afu fu gako aboro tipa i dibe Satana. (2 Kor. 4:7) Si naida ani naakido kuti Yekova tipa ko fu gi ome re furani ani ru nyanyakii Satana ki vura ye na kina gini apai kuti rani vurũ. Si nga ndu gupai si aida ti ni ani naakpara akpara kindi, kidu naa kido nga, Yekova ‘nagama ziazia toro agama fu agu aboro nasanako’ tipaha.—Ruka 11:13.

18. Wai si aida ani naabi gi zegino re?

¹⁸ Ho ani atingida gupai ni a nga Mbori ima mbeda ka gbarasa ga Satana zegino naabaha dunduko, ono ndikidi aKristano nika bata abata, si nanyakasa rani anyakasa. Ziazia Kekeapai nayaa: “Zegino napaya apaya [“nago ago kusayo,” NW], na gaha nyemuhe: ono gu ni ka amanga gu pai Mbori akpi nyemu he ni [a]nye anye kindi.” (1 Yo. 2:17) Wa duhe tie were, si adu nipamungo ka ga Mbori amoyambu berẽ gupai nga, ahe kina rogo gi zegino re kiipaha kisusi gayó pagume na Yekova! Gi zegino du tiibe Satana re, si nago ago kusayo, ono gu dungurati nga ga aKristano, si nga guhe Yekova nafuhe furani tipa si undo rani. Wa ani apido vovo zegino, si naida ani du naa kido kuti agu afugo nga: “I agbandaka amangi gbigbitapai agbandaka; ono agu yo nasunguda Yekova i adia kumbo ringara.” (Tam. 37:9) Sidu, oni moiberã roni kina kuti gi wene mosoro re!

Oni Natingidaha?

• Wai Pauro abi gu mosoro nadu fuko kumbatayo?

• I nika sapangbanga agu aboro i nika zingisayo bekpio ringbisihe kuti gini apai?

• Gini wene diaberã si aida oni mangihe awere?

[Gu kpiahe du ti kpewaraga 13]

Ya mo oni naabi tironi rogo vovo zegino ho oni naageda Ziazia Kekeapai ni?