Asanahe be Agedihe

Ya mo maabangirise ho nga i azingisa agu agude azingisa nakpiki vuseyo?

Agu aboro naabatikanga kangba gude ya watadu gude atinga beyo ya, i arengbanga ka inopa gu ima gipai re aye nani te. Gu kura avunguagude narungo be gupai re bakere gbe. Dee sa abatika agude bisue nikina kangba ra. Fuo bete regbo kusa, ri abatika akumbagude ue nga aguyo nabati. Wa si avura duwo, ri anaatingidapa agu awiiri atingida kindi nakpiki re. Wa ri aaraka, ri anaatingidapa wai ka garãyo adu wa ka i adu tiunga. Ya mo ngbatunga agu aKristano re na maabangirise ya i azingisa agu awiriyo azingisa nakpiki re?

Gu karagapai du taata sa gu sanahe re nga, ani ainongo ho te. Ziazia Kekeapai afuranga zukazuka singia Mbori azingisa agu agude nati ti adee watadu agura i vungu ra nikangba ra te. Wa vura duhe wo, Fugo Mbori na gu bangua arugute rogoho nafura tipa gupai re na kini fu wasa a.

Ani makianga asanahe ue nawiratihe awira. Bambata sanahe nga, gini regbo Yekova abi gupai nga boro tona ka raka, ti gu regbo du yó na mobara ni watadu ti gu regbo vunguyo ní? Ue sanahe nga, wai Yekova abi gu gude du vuseyo? Ko nabi ru nigu boro du nisani watadu niguhe du rukumbu yo nipapara gu dee re? Gu bangua arugute nga ga Ziazia Kekeapai nafu akaragapai sani ziazia.

Ga Moize aNdiko ayugu gupai ziazia nga, gude natona raka mbata fu i vungu ru. Wai duhe wo? Si ayawee ka boro imi gu kpedakpeda gude du vuseyo, si aida i imi ní aimo a. Gu ndiko re ayaa: ‘Ka boro mangi gbegberẽpai [si aida ní] tumo nikina ungani tipa unga gu boro ní aimi ni re.’a (Gate 21:22, 23) Sidu, gu gude du vuseyo re, u nga unga boro naraka araka. Gupai re ima undo badungu aKristano i sogo gu mangapai nga ga ba gude kusayo vuseyo, mbiko si nga kere ingapai kuti Mbori.

Rengo ngaha nga gu gude i atabatikanga ru re ya, u naraka araka, ono wai Yekova abi ru? Gu ndiko fura ani tipaha kuari re ayawee i imi gu boro aimo ka imi gu gude i atabatikanga ru ya. Si tie ziazia nga, Yekova nabi gu unga nga ga gu gude i atabatikanga ru ya na kikii paha. Kurigure, dungu averesi du rogo Ziazia Kekeapai nayugo gupai nga Yekova nabi gu gude i atabatikanga ru ya nigu boro du nisani wakina sosono boro. Nikpiapai, ga Mbori toro adu kugii Bakindo Davide ko ki kepai tipa ko ki yaa: “Mo naazungure rukumbu nina yo. Mi nafu atambuahe foro, bambiko mo ambakadi re na iiriwo banaru pai. Iiriwo ahe nga gamo mangaapai! Mo naina pa re nzunzu wenengaĩ; kpotore adu nga ni okooko ho ti ro te, ho i amangi re ni rogo gbuko, ki mbakadi re ni iiriwo pai rogo gu dudungura arago nga ga kpotosende. Bangiro abi kpotore wa si adu ni iwo ho; i ake pa apare dunduko ku rogo ga kitabu, na agu arago i ambakadi re tipa ha.”—Tam. 139:13-16; Eyo. 31:14, 15.

Yekova nabi gu gude i atabatikanga ru ya nigu boro duna asino ní kia ti ga kura aboro na rengbe arengba ka raka kumbatayo. Ho dia Yisaka aduni na abi vuriyo, Yekova agumbapai tipa agu agude re nga gu nayugu gupai kumbatayo si adu nga si nikadu tipa asinoyo gbiati gu ariapai agu asinoyo re nika mangaha rogo ga aboro raka.—Bam. P. 25:22, 23; Rom. 9:10-13.

Gupai namangi tipa Yoane Bafu Bapatiza, si nagbeberã rani a. Gu pangbanga re nayaa: “Ho Erizabeta agi fugo Maria ni, fogo gude ki gu rukumbu yo; Erizabeta ki hi be Ziazia Toro.” (Ruka 1:41) Gu bafungua nangia Ruka amangisunge na gu fugo-Giriki rengbeyo ka mangasunge nani tipa kpedakpeda gude vuseyo watadu tipa gu gude i naima batika ru. Ko amangisunge na kina gu fugo re ho ko aafura ni tipa Yesu ho ko aduni nifogoko ko napi rogo sanduki bariko anyaa.—Ruka 2:12, 16; 18:15.

Wa duhe tie were, ya mo Ziazia Kekeapai nafu gu ndupai furani rengbe ani mbikoho ka manga kparakapai dagba gu gude du vuseyo na guru vunguyo ru naraka? Ako, si awiranga nga si nafuhe te. Na gupai re na ngbanya kuti gupai du rogo gu birĩ-inohe du awere. Nikpiapai, agu aboro nawisigo apai, i bi gupai nga gu gude du vuseyo, u ima inopai tipa agu apai namanga zagi na kini mangipai amanga tipaha. Si du nga gu ndupai nagude nizi ngbanya ti ni na gu gude nasona rukumbu ri yo.

Anga ringbisiringbisi aregbo ho i naabatika agude kina boro bangirihe yo te. Ani bingo gi kpiapai re: Dee sa abatika gude ni agbaa-vungu u kidu niunga ru, ono ki kpi fuo bete arame. Gu kura dee aduna mobara ki yangata, ono gu gude re akpi mbata fu i batika ru. Ya mo i nika zingisa wiri gu bambata dee re mbiko kina gupai gbua nga ri abatika ru ni agba ru, ono ka i azingisanga wiri gu kura dee re ya mbiko ri abatika ru nikina kangba ru?

Ani gurusingo gipai re. Ziazia Kekeapai nayugo gupai ziazia nga, ga boro unga natona ho du yó ni na mobara ní na Yekova kini bi gu gude re nigu boro du nisani na apai tipa ní akia. Ringbisihe kuti agu averesi re, kura aboro nabihe nga ndupai ho tipa i naatikango kini yawee Mbori azingisanga agu agude nakpiko ku vuseyo ya te. Nirengo, i nayawee ngbatunga agu akango re naumbasipa agu apai ani naanyakasaha kini yawee runga ha fu boro ni ba gu gude du vuseyo te, nga agu apai ani amaamburuhe rii kina agu averesi re.

Mbata kusayo, gi magazini re anaafuka agu aberã nanaaye na kina akapa singia i azingisa agu agude nakpiko mbata fu i batika ra. Nikpiapai, ya mo gu gude nati ati, nangia kina kure gbua, Mbori nika maa gu gude re ku rukumbu dee yo rogo Paradizo tipa ri batika ru? Ani ayanga si wo te, mbiko gu wisigopai Riigbu Bipasunge amangihe berewe tipa gupai re asa yó i dakuti gupai nga, kangia pai wa ngbatunga gure nika manga, anga si dagba gu ka i yambuhe nga zingabekpio te. Ono si dagba gu Yesu agumbapaha nga: “Ka Mbori mangi apai amanga dunduko.” (Mk. 10:27) Gupai namangi tipa Yesu nayugo gupai nga kina rengo ko agumbaha re. Gupai namangi tipa ko nga Mbori adi gako unga ngbangbaturũ yo ki moihe rukumbu ngasu dee yo, nga gupai ka boro amanganga ha ya.

Ya mo agi apai gumba ani he re, si nayugo gupai nga agu agude dunduko nakpiko mbata fu i batika ra, i azingisa ra azingisa? Ziazia Kekeapai agumbanga gupai re ngburungburu te, sidu, ndupai ho be boro ní nyakasi gupai re ya si nga rengo te. Gipai re rengbe ka kusa dungu asanahe nibakiakia. Si aidanga ani gumba sangba riraniyo tipaha te. Gupai ini ani he nga: Gipai re kube Yekova Mbori, nga gu boro duna weneringise nga ga nyemuse gbiati inapai. (Tam. 86:15) Kango ho ti gupai nga ko na nyemu ka digiso kpio ki zingisi kpikpi aboro bekpio te. (Eyo. 14:14, 15) Ani naa kido nga apai dunduko ko amangaha nikina ruruhe. Ko nika husa rani ahusa be agu apai dunduko namangi rani rogo gi zegino re. Ko nika manga gipai re ho ko ka sa Wiriko ni ko “gbarasi ga bakitingbanga mangaapai.”—1 Yo. 3:8.

[Gu rukutu kekeapai du bandu kpewaraga yo]

[Gu kpiahe du ti kpewaraga 23]

Yekova nika husa agu apai dunduko naye na aima fu aboro