Ginipai Baibiri Apehe Tipa Ba Gude Kusayo Vuseyo?

Gu karagapai nga ga Baibiri

Baibiri amanganga sunge na gu fugo nga “gude ki ti” watadu ba gude kusayo vuseyo rogo gu gene yo nga kita ino aino ni bagude kusayo rogo wia yo te. Wa vura duhe wo, dungu averesi nga ga Baibiri nayugo gu bipai du Mbori na ni tipa raka aboro kodihe na raka gu gude i ata batikanga ru ya.

Unga nga gamahe be Mbori. (Bambata Pai 9:6; Atambuahe 36:9) Ko nabipa ai raka na nyanyakipaha kodihe na gu raka nga ga gu gude du kindi rukumbu yo. Sidu, ka si du nga boro ata ino aino kini imi gu gude i ata batikanga ru ya, gure sa wa ka i ya mo ima imo boro.

Ga Mbori Andiko fu aYisaraere agumba gupai nga: “Ka akumba ta kpata dagba yo ki mangi fu de gbegberẽ, nga gu ri du na vuse, gari gude ki ti ti ri, ono ka kurapai adu nga ya, ni ki tumo wa kumbari ka ringbisa ha; ni ki fu he a wa abasapungbanga ka gumba ha. Ono ka gbegberẽ pai ye fuo ho, boro ki tumo ni kina ungani tipa unga gu boro re.”—Gate 21:22, 23.a

• Gini regbo raka boro atona?

• Ya mo Mbori rengbe ka mbupai fu gu boro naima ba gude kusayo vuseyo?

• Ya mo gbegberẽpai du ka ba gude kusayo vuseyo ka si dunga raka nagude watadu raka gude ngbapai yo?

Gini regbo raka boro atona?

Mbori nabihe nga raka boro natona nibasa ti kina boro gu regbo i nadu na vuni. Rogo Fugo Mbori nga Baibiri, ko nafura dedede tipa gu gude i ata vunga nga ru ya nga u kia ti nai. Mo bingo bete akpiapai nga gu nayugo gupai nga Mbori amaanga kparakparapai bangbanda raka gu gude i ata vunga nga ru ya na gu ru i naima vunga ru te.

• Vurube ziazia toro, Bakindo Davide aya fu Mbori wẽ: “Bangiro abi kpotore wa si adu ni iwo ho.” (Atambuahe 139:16) Mbori aabihe nga Davide adu ni kina boro mbata fu i vungu ko.

• Kurii gure, Mbori aima ino gupai nga ko nika kpara gu nebi nangia Yeremaya tipa ko mbata fu i vungu Yeremaya. Mbori aya fuko wẽ: “Mi aini ro mbata mi nikambakada ro kú rukumbu yo, mi akpara ro tipa re mbata i nikavunga ro. mi aasia ha foro mo du ni nebi fu arikaaboro.”—Yeremaya 1:5.

• Gu bake Baibiri ni munganga nangia Ruka, amangisunge na kina bangisa pa-Giriki ka sakapai tipa gu gude i ata vunga nga ru ya na gu gude i naima vunga ru.—Ruka 1:41; 2:12, 16.

Ya mo Mbori rengbe ka mbupai fu gu boro naima ba gude kusayo vuseyo?

Agu aboro naima ba gude kusayo vuseyo ima rengba ka gbia mbupai be Mbori. Ka si du awere nga i ima ida kuti ga Mbori bipai tipa raka boro, si aidanga i mbu tiyo ome gu ingapai i amangihe kusayo fu ri yo te. “Yekova du na nunga aboro na inapai a . . . wa turũ ku uroyo na dioyo, wo ko naturũsa gaani tiandika ti rani a.”b (Atambuahe 103:8-12) Yekova nika mbupai fu agu aboro dunduko mangi ndikidi saberã ti agu aingapai dunduko i amangihe kodihe na ba gude kusayo vuseyo.—Atambuahe 86:5.

Ya mo gbegberẽpai du ka ba gude kusayo vuseyo ka si dunga raka nagude watadu raka gude ngbapai yo?

Ringbisihe kuti gupai Baibiri apehe tipa raka gu gude i ata vunga nga ru ya, si arengbanga ka ru boro ba gude kusayo vuseyo mbiko gu kpakarapai nga kpotose nga gu rengbe ka maa raka nagude watadu raka gude ngbapai yo te.

Ginipai tigaha du tipa gupai ninaamanganga dedede ya nga ti regbo vungu tunguotunguopai naye ka kura si kini idi gupai nga i mangi siapai dagba batasa raka nagude watadu raka gude? Rogo ngbatunga bangiriba wa gure, agu aboro namangapai sa ni si aida i mangi gayo diaberã nitiyo nibipa gini raka si aida i batasi he.