Gupai Ani Awirikaha Be Yesu

Tipa “Digido Rago” Ginihe Nika Digo?

Ga Yesu abawiriki asanako ki yaa: “Gine i ka ina pa ga ye ti ni, na pa digida rago?” (Matayo 24:3) Ho Yesu akaragapai ni sa gu sanahe re, ko ayanga wee kpotosende nika digo te. Mbata fu gu regbo re, gupai ko aafura tipaha angia “ho zegino ka nyasa ni.” Ko atagumba gipai re kini berẽpa agu apai du rogo zegino gbiati agu apai nga ga pambori du Satana nga bairaha. (Matayo 13:22, 40, 49) Sidu, gi zegino re du ko apepa digoho ho ko ayani wee: “Ragoho ki digi adiga.”—Matayo 24:14.

Wai Yesu aringbisipa digida rago?

Pa digo gi zegino re nga “wene pangbanga.” Si wo mbiko Yesu ayaa: ‘Gi wene pangbanga nga ga ngbii re, i atungusaha atungusa rogo zegino dunduko mbiko ndika fu arikaaboro dũ; ragoho ki digi adiga [“digido zegino ki da,” NW].’ Yesu aringbisipa digido gi zegino re were: ‘Nigu rago re bakere gberãngbii nikadu, wa zegino aenge aenga kindi kada ku awere si aadunga wo te, oó, si adúnga wo berewe a te. Ka Mbori agurusanga gu rago re ya, boro ho ka bati te.’—Matayo 24:14, 21, 22.

Ada i ka imoyo?

Kina agu aboro akpingo nyemu Mbori na Yesu na kini mangisunge fuyó ya, i Mbori nika imo yó. Ngbatunga agu aboro re adeganga tuyo fu Mbori te. Yesu aya tipa yó wee: “Wa si adu rago Noa, wo pa ye Wiri boro nikadu. Bambiko, wa si adu ni gu rago naadu mbata fu ngirimo akangbi re, . . . ka i aina nga ha ya daho ngirimo akangbi aye ni ki nirogo yo dunduko ku sa yo.” (Matayo 24:36-39) Yesu ayawee dungu aboro nandu ngba gu gene nandu sa kpio. Ono tie, ko akidohe ki yawee “pangipangi ngbadimo [kinaho] nangbe [na boro] koyo du unga ni.”—Matayo 7:13, 14.

Gini regbo gi zegino re nika digo?

Ho i asana Yesu ni tipa gupai nika yugo padu ko ho na ome kindo beko gbiati pa “digida rago,” ko akaragapai ki yaa: “Rika aboro azínga kuti gu rika aboro, ngbi ki zingi kuti gu ngbi; angbongi nikadu na abazigizo rogo agu arago. . . . Gu nyemuse du ti agu yo ni dungu yo si azéra azera bambiko ingapai amaa pai amaa.” (Matayo 24:3-16) Sidu, gu gbegberẽ apangbanga dunduko ani agiaha areme, wene paha kina ti ni nga, mbembedii kumbatayo, ga Mbori Kindo nika ye na zereda fu aboro. Gumba ani gupai re wo mbiko Yesu ayaa: “Ho oni ka bi agi apai ni re si [na]da, oni ini he ya ga Mbori ngbi mbedi.”—Ruka 21:31.

Ginipai si aida oni mangihe?

Yesu ayawee Mbori “akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Tipa oni rengbe ka ida kuti Mbori na kuti Wiriko, si naida oni ini yó wenengai. Si du Yesu aya ti ni wee: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.”—Yoane 17:3.

Oni bandatironi abakabangirise gbiati akpakarapai andu ka kiso gene beroni. Yesu ayaa: “Oni bánda tironi, oni ka hisa kpotoroni yo na . . . berã pa gi unga re, gu rago ki da re ni ba sa wa kina gbina naza; bambiko wo si ka da.” Ka oni irisi fugo Yesu, si nika sa gupai nga oni “di be pai ka bata be agi apai nikamanga dunduko re.”—Ruka 21:34-36.

[Gu kpiahe du ti kpewaraga 11]

Ka oni aida ka ino kura apai, oni zara gu buku nga What Does the Bible Really Teach? kuti kapita 9 du riihe nga, “Are We Living in ‘the Last Days’?”a

[Gu kpiahe du ti kpewaraga 11]