Oni Bandatironi Be Gbegberẽ Atoro

I ASONOSI kumba nga James rogo gbata nga Malaita, du rogo gu kisanga nga Solomon Islands. I atona ka raba ko mbuko tooni tipa ko naafu irisa fu atoro. Ko nayaa: ‘Mi aaidanga ka sana atoro i imisi aboro te, ono mi abihe nga boro arengbanga ka raka wene raka zanga manga rarafono te [nga ka rãdatise tipa ka bandatise be gbegberẽ atoro].’

A wa kura aboro amangaha rogo apapara zegino, agu aboro du rogo gu kisanga nga Solomon Islands, i idi kuti gupai nga atoro rengbe arengba ka undo boro watadu ka imisa ní. Tipa agu aboro naraka Melanesia yo tigayo, i agundenga be atoro te, ono i nakpinyemu aguyo i aya tipa yó wee i nga wene sino atoro.

Gi ida du aboro nani kuti atoro re, si na angbatungaha nibakiakia. Nikpiapai, ho James aduni nigude, adee anaaora na awiriyo ku dimoyo ho i agia kpe kura wiri zire ni du rimoru nga korokoro. Tipagine i anaamanga gupai re ti ni? Gupai nadu berãyo yo ngawee, kpe gu zire re nga kperẽ.

Gu kura aboro rogo gu gbaria re anaamaa kura pusi mbia rii gayó ngua-ngbadimo. James anaamanga gipai re amanga a kini berẽ gupai ngawee si nika bandako be gbegberẽ atoro. Ho ko aniduni basunge yo, ko anidungura mbusuru riahe ki moihe rogo mangu tipa ka baha kusayo tipa amangu ka bihe ki noko tipaha.

Ka si du nga aboro amanganga gipai re rogo gaoni dagbarago te, isoke si rengbe kadu nga gu kura ngbatungaha kinaho oni amangaha tipa ka bandatironi be gbegberẽ atoro. Si rengbe kadu nga oni nabihe nigupai daada tipa oni naamangaha, ka oni amanganga ha ya, kerepai gbia roni agbia.

Kangia oni nabi Ziazia Kekeapai na kikiipaha, si nawiraha nga oni naida aida ka ino agu akaragapai du kuti agu asanahe nga: (1) Gini gbegberẽ apai rengbe gbegberẽ atoro ka manga roni nani? (2) Ya mo ka oni amanga gu kura sino atitase, si rengbe ka sa gupai nga gbegberẽ atoro duna ome kurironi? (3) Wai rengbe oni ka bandatironi nzunzu be gbegberẽ atoro na kidu na ngbarago?

Gu Gene Gbegberẽ Atoro Aimisa Aboro Ngbaha

Ziazia Kekeapai nayugo gupai ngawee gbegberẽ atoro arengbanga kadu nga agu atoro i aya tipa yó wee i nga atoro kpikpi aboro te. Fugo Mbori nayaa: “Agu yo du ni ungayo i ini he ya i akpí akpi, ono kpikpi aboro aina nga pai te.” (Batungusipai 9:5) Gbegberẽ atoro nga agu amaraika nasamungu ki koditiyo na Satana kaa ingisa aboro.—Yugoti 12:9.

Ziazia Kekeapai nagumbaha furani ziazia ya si naida ani gbata gene ka bandatirani be gbegberẽ atoro. Gu mokedi nangia Pauro akepai fu agu aKristano nadu Efesa yo ki yaa: “Gaani kenahe sa borose na kure te kina . . . sa rimbasa agu atoro nga ga gbegberẽpai yo rogo agu arago du ngbangbaturũ yo.” Gu mokedi nangia Petero aringbisipa baira gbegberẽ atoro nga Satana Bakitingbanga ya ko wakina gu “bahu nata ki nipoi, nigbata boro ka rita ni.”—AEfeso 6:12; 1 Petero 5:8.

Gu bangua gene Satana aimisa aboro ngbaha nga ka ingisa yó, ka biriko yó watadu ka ba asada fuyó i ti ki mangi gupai angbanga ti Mbori ya. Ziazia Kekeapai nayawee Satana “nambakada tiko ni maraika imarago.” (2 AKorindo 11:14) Ko namanga tiko nigu toro nabanda aboro baraho du ko ni nzunzu nga gbegberẽ boro. Ko aidanga aboro ini gu rengo du tipa ko te, na ka ino gu rengo a du tipa Mbori te. (2 AKorindo 4:4) Tipagine ko aingisa aboro ti ni nzunzu?

Satana naida aboro naairisoko singia kita ino aino watadu zanga inoho. Ho Wiri Mbori nga Yesu aduni auru kpotosende ane, Satana aya fuko wee ko ‘ti sande ki irisiko.’ Yesu aya fuko: “Satana, mo gúari erẽ! bambiko si ni keke he ya, ‘Mo irisi Gbia nga gamo Mbori mo rá fu kina ko.’” (Matayo 4:9, 10) Yesu aaidanga na gupai re te.

Yekova na ome tiko ki susi agu aboro dunduko nga atoro, sidu, anga gbegberẽpai ho ko nika mbuhe si mangi gako aboro nyeanye kindi te. (Atambuahe 83:18; ARomo 16:20) Ono ka si du nga ani naida ka fu ngbarago fu Yekova wa gu Yesu amangihe, si aidanga ani irisi Satana watadu adaimona te. Tipa ani rengbe ka manga gupai re, si naida ani ini gu sino atitase nasa aboro i naairiso gbegberẽ atoro. Wai rengbe ani ka mangaha?

Si Naida Ani Ini agu Apai Nafu Gberãrago fu Mbori

Yekova Mbori aza gu gako aboro nadumbata ti manga agu apai agu aboro nadu rogo agu aringara nadu pati yó anaamanga. Ko ayaa: ‘Si aidanga boro du dagbaroni yo nasoroka, nadoavure, namangasunge abinza, nazia boro nibirĩ, nasana sangbaatoro, nano aboro na mangu te.’ Tipa gu boro namanga gipai re, Ziazia Kekeapai naya tipa ní wee: “Ni bangiri Yekova ni kere gbegberẽ sino boro.”—Pa Fu Rugute ni Ue he 18:10-12.

Nibipa gu sino atitase du rogo gaoni dagbarago, oni kparianga agi asanahe re: Ya mo gu sino re nangarasa aboro i idi kuti gupai nga hee kinaho nga kperẽ naye sa aboro? Si nayawee hee kinaho rengbe ka banda boro be gbegberẽ atoro? Si nafura tipa banda boro tiní be mangu watadu pa no boro kurani na mangu? Ya mo si nakodapa ra boro kutiibe gbegberẽ atoro kuba gupai nga ní ra fu Yekova watadu fu Yesu nga gu boro Yekova amoi ní nigbia?—ARomo 14:11; AFiripoio 2:9, 10.

Si ninyanyakipa pai oni ne ngbatunga gu sino atitase nangarasa aboro kuti gu mangaapai re. Tipagine? Bambiko Ziazia Kekeapai nasoga gupai re kini yaa: “Ka oni mbiri nga he ti ngba gu inga nga ga Gbia, na gu inga nga ga adaimona te.” Ko ayawee agu aboro naida ka fu ngbarago fu Mbori na kini idi ka fu ngbarago fu gbegberẽ atoro ti kina gu bangisa regbo re, gure nga i “nawo ti Gbia sa de ringo.” (1 AKorindo 10:20-22) Yekova Mbori naida aboro fu tiyó fu kinako sa mbiko kinako sa rẽ aboro ra fuko nigoyo.—Gate 20:4, 5.

Ani bingo gi sanahe re: Ya mo gu sino mangaapai aboro amangaha rogo gaoni dagbarago re, si nakusa goro boro kusayo be gupai ni amangihe? Nikpiapai, bäri watadu koda boro ba na gu kurani angianga gani badiarogatise ya, dungu aboro nabihe nga irairapai du watadu ingapai du na Ziazia Kekeapai aidanga nani a te. (1 AKorindo 6:9, 10) Ono tie, rogo kura aba, ngbatunga gu mangaapai re niʹirairaha te. Ka gu degude i “arãdi ri arãda na ngua akumba” mangi bäri, i nayawee anga irairapai ngaha te mbiko gene adunga beri te.a

Ono tie, Ziazia Kekeapai nayawee ani aringbisapa tirani aringbisa fu Mbori tipa agu apai ani amanga. (ARomo 14:12; AGaratio 6:7) Nikpiapai, gu bambata dee nangia Eva ayawee Satana anangi ri ananga ri basa sangba Mbori, mbiko ri ayaa: “Wo ninangi re, mi ki ri he.” Ono tie, Mbori aaidanga na gu gari pai re te, ko abira ri abira tipaha. (Bambata Pai 3:13, 16, 19) Kina gu bangisapai re a du tipa rani, ani ko nika sana rani tipa agu apai ani amangaha.—AEbere 4:13.

Ginipai Si Aida Oni Mangihe?

Ka oni aida ka fu ngbarago fu Mbori na kini raki kuti gu bangua arugute nga ga Ziazia Kekeapai, si naida oni mangi agu apai dunduko rengbe oni ka mangaha tipa ka bandatironi be Satana. Agu aboro nadu na ruru ngbaduyó yo naaraka Efesa yo rogo bambata sa kama agarã amoi wene kpiapai rogo gipai re. Mbiko wa i aaidanga ka kodatiyo na gu mangaapai nga ga sangbaatoro ya, i adungura gu gayó akitabu nangia ga sangbaatoro ki “zo ho . . . ku bangiri aboro dũ.”—Amokedi 19:19.

Mbata fu i zokodi agu akitabu re, agi aboro re ‘aye nidunguyo kita kusa gayo apai nigumbapa agu apai i amangi.’ (Amokedi 19:18) Gupai Pauro agumbaha azi ngbadu agu aboro yo re. Fuo si zi ngbaduyó yo, si asa yó i zokodi gi gayó akitabu nangia ga sangbaatoro re na ki mbu gu kura gbegberẽ apai.

Rengo ngaha nga, si taata boro mbu gu mangaapai nga ga sino atitase te. Wo si adu tipa gu kumba nga James ani nifura tipa ko mbata. Ko atona wisigo Ziazia Kekeapai na aDezire Yekova na kini gbia ngbarago be agu apai ko aawirikaha. Ono tie, ko anaarãda tiko arãda kindi tipa ka banda tiko be gbegberẽ atoro. Ono fuo ko wisigi tiko nibipa agi apai ko aamangaha re, ko abi gupai nga ko ima ida kuti agu apai Yekova agumbaha, ono tipa ka gbegberẽpai mangingo ko be gbegberẽ atoro ya, si aidi ko naamanga sino atitako amanga kindi.

Ginipai naundo James ko aria gako berã? Ko nayaa: “Mi akparikpee fu Yekova tipa ko naabanda re na tipa undo mi naakido kina kutiko. Si atadu were, mi kini mbu sino atitase. Ya mo kerepai amangiko? Ko nayaa: ‘Oó, gupai mangi nga mi wiriki wai ka kido kuti Yekova. Mi bi wai rengbe boro ka zio bakure na Yekova.’ Vuru agu agarã bawe susi, James naamangasunge Kindo ti aregbo dũ kini undo aboro i ini agu apai Ziazia Kekeapai ayugoho.

Ya mo si arunga ani pefuo gu kpiapai nga ga James re tee? Oni wisigi gu sino mangaapai aboro amangaha rogo gaoni dagbarago, fuo gure, oni ki ‘mangisunge’ na gaoni berã ka bihe singia gupai re na ngbanya na “gu he nga ga Mbori.” (ARomo 12:1, 2) Ka oni bihe nga gupai re na ngbanya dagbaha na sangbaatoro, si naida oni mbuhe. Ka oni mangihe wo, oni du adu naa kido nga Yekova nika ‘dia roni adia kugume’ tipa kaa banda roni. (2 AKorindo 6:16-18) Wakina James, oni aino rengo gupai aino Ziazia Kekeapai agumbaha kini yaa: “Rimo Yekova nga nyanyaki tumbatumba gbata; ruru boro naora koyo ki du zezeredi.”—Asanza 18:10.

[Gu rukutu kekeapai du bandu kpewaraga yo]

[Gu kpiahe du ti kpewaraga 30]

Courtesy of Dr. Bakshi Jehangir

“Korokoro”

Degude nadungura mbusuru riahe tipa airamangu andu ka no yó tipaha