Oni Susi Kumbatayo Kidu Ziazia, Mbiko “Gu Bakere Rago Nga Ga Yekova Du Mbembedi”
“Ani súsi ku mbata yo dati du ani ziazia.”—EB. 6:1.
1, 2. Gini momu nadu be agu aKristano nadu rogo bambata sa kama agarã Yerusarema yo na Yuda yo tipa i ‘oro ku pavuru abaagangara yo’?
HO Yesu aduni auru kpotosende, gako abawiriki asanako ki yaa: “Ni gini rago agi apai ka manga re? gine i ka ina pa ga ye ti ni, na pa digida rago?” Gu bambata digisidigisi gu sangbanebi Yesu agumbaha ho ko akaragapai ni sa gayó sanahe amangi rogo bambata sa kama agarã. Yesu agumbapa agu apai si adu nga si nikaa manga kini yugu gupai nga digido zegino ima mbeda. Si adu ngawee, ho agu apai re nika tona manga ni, ‘agu aboro kadu Yuda yo i ki oro aora ku pavuru abaagangara yo.’ (Mt. 24:1-3, 15-22) Si aidi ga Yesu abawiriki ima kparia agu apai ko agumbapaha re na ki mangipai ringbisihe kuti agu arugute ko afuhe.
2 Rogo gu garã nangia 61 F.B.K., agarã nasusi wa 30 tingbafuo gumba Yesu gipai re, gu mokedi nangia Pauro ake nyanyaki waraga fu agu aKristano nangia aEbere naaraka Yerusarema yo na pati ni. Pauro gbiati akurako aidipase aainongo gupai ngawee gupai Yesu agumbapaha ya si i nika inopa tona “bakere gberãngbi” ti ni, si nika tona fuo agarã gbua bisue te. (Mt. 24:21) Rogo gu garã nangia 66 F.B.K., Sesitosi Garosi aye na ga aRomo ariivura ki mbedi ka zio Yerusarema. Ono tie, ko aga nigiiko, momu kini du tie tipa aKristano rengbe ka zubo tipa ka bata.
3. Gini rugute Pauro afuhe fu agu aKristano nangia aEbere, na tipagine ko afu gu rugute re ti ni?
3 Si aidi agu aKristano re du na rubangirise tipa ka ino gupai nga, agu apai naamanga re angia agu apai Yesu agumbapaha kumbatayo na i ki zubo. Ono tie, aguyo aduna ‘tuyo nimumungoho.’ I adu wakina fogo-agude naida kina “momunya.” (Oni gedi AEbere 5:11-13.) Zavura agu aboro naima ta rogo rengo yo tipa dungu agarã, i aima tona ka “guari ti unga Mbori ku sa yo.” (Eb. 3:12) Gu kura aKristano aduna gu “sino” tiyó nga ga kpa agu adunguratise nga ga irisombori ho gu kere ‘uru re aambeda’ ni. (Eb. 10:24, 25) Pauro afu rugute fuyó nzunzu ti kina regboho, nga gu nayaa: “Ani mbú gumba pai tie tipa bambata tonatona apai nga ga Kristo, ani súsi ku mbata yo dati du ani ziazia [watadu ani susi kumbatayo ki nyaki].”—Eb. 6:1.
4. Tipagine nyakipa gupai ti ni nga ani naawisigo apai, na gine rengbe ka undo rani ani mangihe wo?
4 Ani naraka awere ti regbo yangara digisidigisi ga Yesu sangbanebi. “Gu bakere rago nga ga Yekova,” nga gu nika digiso gi ga Satana zegino re, si “mbembedi.” (Zef. 1:14) Si naida ani naawisigo apai tipa ka inopa agu asangbanebi nada ti rengo, na ki nye nyanyakii rogo toro yo. (1 Pet. 5:8) Ya mo ani namanga gipai re nzunzu? Pa nyaka ani rogo toro yo rengbe ka undo rani ani naangera angera kindi kini inipa agu apai namanga rogo zegino nidigisidigisi asangbaanebi.
Nyanyaki AKristano
5, 6. (a) Nyaka rogo toro yo nakoda ginipai? (b) Susa kumbatayo ki nyaki naida boro mangi asadatise rogo gini abangiriba ue?
5 Pauro angarasi agu aKristano nangia aEbere nadu rogo bambata sa kama agarã tipa i nyaki rogo toro yo na ko ki pe agu apai pa nyaka boro rogo toro yo akodaha. (Oni gedi AEbere 5:14.) “Sosono aboro” arengbanga be kina mbira “momunya” te, i natambiraha kini ri “nyanyaki riahe” a. Sidu, i ima ino “gu tonatona apai” nga ga rengo gbiati “gu dudungura apai” nga gaha a. (1 Kor. 2:10) Kurigure, i naraba gayó berã nimangayo agu apai iniyo ho, si kini undoyo i kpara wenepai ti gbegberẽpai. Ho i aida ka manga diaberã ni, i nawisigopa gu bangua arugute nga ga Ziazia Kekeapai rengbe ka undoyo rogo gupai re.
6 Pauro akepai ki yaa: “Si du ani ka fu berãpase ti ni kakaka susi tipa agi apai i agi he re, rago ka da ani ki bitikpa pati he.” (Eb. 2:1) Ani rengbe ka bitikpa kusayo ti idapase ka ani ainongo nga ani nabitikpa ya. Gupai rengbe ka undo rani ka ani bitikpanga ya nga, ka ani ‘aberãpase kakaka susi,’ watadu ka ani amaaberã rani susi gu nidumbata ho ani awisigo agu apai ni nga ga toro. Sidu tie, ani dunduko nibasasa si aida ani sana tirani ki yaa: ‘Ya mo mi nawisigo kina gu tonatonaapai kindi nga ga Ziazia Kekeapai? Ya mo si naida mi naamanga apai gbua zanga ino ndu gupai mi amangaha ti ni nzunzu? Wai rengbe mi ka sona rogo toro yo wenengai?’ Pa susa ani kumbatayo ki da ziazia, watadu ki nyaki, si naida gupai nga ani mangi asadatise rogo abangiriba ue. Bambataha nga, si naida ani inidi tirani na Fugo Mbori wenengai. Uehe nga, si naida ani wiriki giasangbaa.
Inidotise na Fugo Mbori
7. Wai rengbe ani ka gbia undo be inido ani tirani na Fugo Mbori wenengai?
7 Pauro akepai ki yaa: ‘Gu boro nadia momunyaa ní ainanga pa gupai nga ga rurupai te; bambiko ni nga fogo gude.’ (Eb. 5:13) Tipa ani nyaki rogo toro yo, si naida ani inidi tirani na fugo Mbori wenengai. Wa duhe nga fugo Mbori nga Ziazia Kekeapai, si naida ani du niwene abawisigi Ziazia Kekeapai na agu awaraga ‘ruru kangara moyambu’ akusaha. (Mt. 24:45-47) Ka ani awisigopai wa gure, si nika undo rani ani ini ga Mbori aberã na ki undo rani ani raba gaani aberã. Oni bingo gupai gu Kristano du rimori nga Orchida agumbaha. Ri ayaa: “Gupai naundo re gbe rogo gimi raka nga pa geda Ziazia Kekeapai dedede. Mi agedi Ziazia Kekeapai tipa garã ue ki nyasihe, na si adu fere wa bambata regbo tipa mi inipai tipa Bakusire. Mi awirikipai tipa gako agene, tipa agu apai ko akpinyemuhe na agu ko asogaha, naapa gako ome gbiati gako tatamana. Pa geda mi Ziazia Kekeapai na aʹuru dunduko undo re mi niidibe gu kereapai namanga re.”
8. Wai du Fugo Mbori na tandu kurirani?
8 Ka ani ageda Ziazia Kekeapai dedede, gure nga ani nasa sangbaha si du na “tandu” kurirani. (Oni gedi AEbere 4:12.) Gu ngbatunga gedapai nisase re nambakada rani tipa ani mangi agu apai nafu ngbarago fu Yekova. Ya mo oni na ringbisiringbisi regbo beroni tipa geda Ziazia Kekeapai na kini berẽkurii agu apai du rogoho?
9, 10. Pa inido boro tiní na Fugo Mbori nakoda gini kura apai? Oni yugungo ho na kpiapai.
9 Anga inidotise na Ziazia Kekeapai nga ino agu apai gbua si agumbaha te. Agu aboro nadu wa fogo-agude ti rago Pauro, anga si angia wee i azanga ino Fugo Mbori te. Wa si avura duwo, i amanganga agu apai i awirikihe tipa ka bihe singia si ngbaangba watadu si angbanga te te. Na i ainidongo tiyó na agu apai nadu rogoho tipa si sa yo i naamanga agu adiaberã nga ga tatamana rogo gayó raka te.
10 Pa inido boro tiní na Fugo Mbori naida gupai nga ní ini gupai si agumbaha na ní kini mangihe. Gupai namangi tipa wirinarani du rimori nga Kyle nayugo wai rengbe ani ka manga gipai re. Kango akuru dagba Kyle na gari badiasunge. Ginipai ri amangihe ka mbakada gu tagbagapai re? Fugori nga: “Gu veresi naye niipo ku berãre yo angia ARomo 12:18 nga gu nayaa: ‘Oni dú zezeredii na aboro dũ, kina ro tigamo ka si du wa ka mo mangihe.’ Apai atadu were, mi kini mbakadipai tipa ani fura riipa gupai re naari fuo nyasa sunge.” I azeresi gupai nadu dagbayó re na kina ngba gu dee re nazere ka bi gupai nga Kyle aguari ka manga gupai ri amangihe re. Ri ayaa: “Mi akparia gupai nga, irairapai ho ti manga gu bangua arugute nga ga Ziazia Kekeapai te.”
Oni Wiriki Giasangbaa
11. Ginipai nayugo gupai nga si nimbumbupai kadu na giasangbaa ho du kpakarapai ni?
11 Anga taatapai ngaha ka manga agu apai ani awirikaha rogo Ziazia Kekeapai te, gbe, ho angbanga agu apai ni du tipa rani ya. Nikpiapai, ngbutuko tingbafuo gu regbo Yekova akusi aYisaraere Ezipeta yo, i “akpakana Mose” na ki tona ka ‘asada Yekova.’ Tipagine aYisaraere akpakana Moize ti ni? I akpakanahe mbiko zingo ime. (Gate 17:1-4) Mbata fu adiwi da ue fuo aYisaraere mangi mozunga na Mbori, na ki idi kaa manga ‘agu apai dunduko ko agumbaha,’ i akuo gu ndiko ko arũhe nibipa irisokpiahe. (Gate 24:3, 12-18; 32:1, 2, 7-9) Ya mo pa ima Moize kurii bagangara Orebe yo du naba gunde tiyó i kini tona ka irisokpiahe? Ya mo si rengbe kadu nga i aberẽ gupai nga aMareko nika zubo yó azubo na vura ka i arẽnga ya wa adunga Moize naayó nga gu boro nabatasi yó mbata ya? (Gate 17:8-16) Si rengbe kadu nga wo i aberẽhe, ono ka si vura du nga wo si adu te, gupai nga rengo nga i ‘aagianga sangba Yekova’ te. (Amo. 7:39-41) Pauro angarasi aKristano ‘i futiyo nyanyakii’ tipa ka he ‘ti kurogo kpia gu basapai’ nangia ga aYisaraere ho i aagunde agunde ni ti rimo kurogo Ringara Mokido.—Eb. 4:3, 11.
12. Wai Yesu awiriki giasangbaa, na gini undo ko agbiaha mbiko gipai re?
12 Tipa ani susi kumbatayo ki nyaki, si naida ani fu tirani nyanyakii tipa ka giasangba Yekova. A wa ga Yesu Kristo kpiapai ayugoho, boro nawirika giasangbaa be agu apai fudi ní. (Oni gedi AEbere 5:8, 9.) Mbata fu ye Yesu ku auru kpotosende no, ko anaagiasangba Bako agia. Ono tie, tipa ko mangi gupai Bako akpinyemuhe auru kpotosende no, si aidi ko hi fudifudiapai ahi. Wa Yesu adu kindi na giasangbaa ti regbo kere arungosi, si asako ko da “ni ziazia ko” tipa kadu rogo gu vovo bangiriba Mbori afuhe fuko nga ga zogarago ni Bakindo na ka mangasunge nigbiamotumo.
13. Ginipai nayugo gupai nga ani ima wirika giasangbaa?
13 Ginipai tigaha du tipa rani areme? Ya mo ani ima diaberã kaa giasangba Yekova zavura ho du ani ni rogo fudifudiapai? (Oni gedi 1 Petero 1:6, 7.) Ga Mbori arugute ziazia tipa iriiri mangapai, manga rurupai zanga biriki, iriiri afugo, geda Ziazia Kekeapai, ndu kupati adunguratise, na tungusapai. (Yos. 1:8; Mt. 28:19, 20; Ef. 4:25, 28, 29; 5:3-5; Eb. 10:24, 25) Ya mo ani nagiasangba Yekova rogo agi apai re zavura ho du ani ni rogo fudifudiapai? Gaani giasangbaa nayugo gupai nga ani ima sona ki nyaki rogo toro yo.
Wai Nyaka Rogo Toro yo Aundo Rani?
14. Oni funga gu kpiapai nayugo gupai nga, pa susa boro kumbatayo ki nyaki rogo toro yo rengbe arengba ka banda ní.
14 Ho Kristano araba berani ni wenengai tipa ka kpara rurupai ti irairapai rogo gi zegino du ‘nibirikobirikoho’ re, si nabanda ní abanda. (Ef. 4:19) Nikpiapai, wirina nga James ninaageda Ziazia Kekeapai dedede na kini bi agu awaraga kangara moyambu akusaha na kikipaha, ko agbia sunge rogo gu ba abamangisunge adu rogoho dunduko nga kina adee. Ko ayaa: ‘Wa si avura du nga dunguyo aadunga na iriiri mangaapai te, guri sa adu wa iriiri boro, na kini idi ka ino rengo nga ga Ziazia Kekeapai. Ono ho ani aduni dimoyo nisarani na ri basunge yo, ri agbisi koyo du mi ni ki tona ka manga tiri fere rogo sino pa kodaba yo. Mi aberẽhe tigimi nga mbaro du ri aangihe, ono mi arengbanga ka rugusa ri te. Mi atingidi kpiapai nga ga wirina sa mi agedihe rogo Ngbaõbambu Sinziri nga guko nagbia tiko na ngbatungapai wakina gimi re basunge yo. Gupai re afura tipa gu kpiapai nangia ga Yosefa na dia Potifaro.b Si atadu were, mi kini mo ka turã gu degude re kusayo, ri kini zubo.’ (Bam. P. 39:7-12) James aduna tambuahe mbiko gupai nga gbegberẽpai ho ko amangihe te, na ko anye na gigiri sangbakpotoseyo.—1 Tim. 1:5.
15. Wai nyaka rogo toro yo aundo rani ani du nyanyakii ngbaduraniyo?
15 Nyaka rogo toro yo nigupai naundo rani aundo mbiko si nasa rani ani du nyanyakii ngbaduraniyo na ki sa gupai nga ka i ‘rógonga rani kusayo nigu ngbatunga yugopai dukia ya.’ (Oni gedi AEbere 13:9.) Ho ani amanga asadatise ni tipa ka nyaka rogo toro yo, si nasa gupai nga ani moiberã rani kuti “agu apai duna nyanyakipaha gbe.” (Frp. 1:9, 10, NW) Rogo gi gene re, ani kini yugu gaani tambuahe fu Mbori tipa agu apai ko namangihe furani. (Rom. 3:24) Agu aKristano du “nisosono aboro rogo gu tandu nga ga rugatinapai,” i nga agu aboro duna ngbatunga gu tambuahe re na i nagbia ngbarago mbiko i na dawedawe pagume dagbayó na Yekova.—1 Kor. 14:20, NW.
16. Ginipai naundo wirina sa ri nyakasi ngbaduriyo?
16 Wirinarani du rimori nga Louise ayawee ho ri azi bapatiza ni, ri aidi ka tungusapai na gu nduhe gbua nga kaa sa ngbarago ti aboro. Ri ayaa: ‘Mi aamanganga gbegberẽpai te, ono ngbadureyo aafõnga re mi naamangasunge fu Yekova te.’ Ri aya berewe wee: ‘Mi aini gupai nga si naida mi mangi ariapai rogo gimi raka tipa ka mangasunge fu Yekova wa rengbe omere nani. Gu bakere ariapai mi amangihe nga ka futire na ngbadureyo dũ tipa ka mangasunge fu Yekova.’ Wa Louise amangi ariapai wa gure, ri ‘anyakasi ngbaduriyo’ na gupai re naundo ri ho ri aduni na kere kaza. (Yak. 5:8) Luoise ape gupai nga, ‘mi amangi bakere asadatise tipa ka mbeda na Yekova.’
‘Ani Duna Giasangbaa Kpotoraniyo’
17. Tipagine si aidi ti ni aboro duna giasangbaa, gbe, rogo bambata sa kama agarã?
17 Ga Pauro rugute tipa aboro ‘susi kumbatayo ki nyaki’ abatasi agu aKristano naaraka Yerusarema yo rogo bambata sa kama agarã. Agu aboro nairisi gu zinahe re angia agu aboro nadu na rugatinapai ki kparia gupai Yesu agumbaha fuyó ki yawee i ‘oro ku pavuru abagangara yo.’ Si adu nga ho i ka bi “gu gbegberẽ kere gbarasa rago ni, . . . si [na]ru rogo ziazia ba yo,” nga gu riivura nga ga aRomo i narunguru pati Yerusarema na ki rimi kurogoho, gure nga si naida i oro. (Mt. 24:15, 16) AKristano airisi gupai Yesu agumbaha i ki kuru kusayo Yerusarema yo mbata fu gbarasayo ho na ki ndu ka raka rogo gu bakporo nangia Pera rogo gu ringara abaagangara nga ga Girada, wo gu bakeke kuru apangbanga nangia Uzebio agumbaha. I atamanga ha were i kini bati be gu bakere gberangbii kisusi naye kurii Yerusarema.
18, 19. (a) Tipagine nyakipa giasangbaa ti ni areme? (b) Ginipai ani ka wisigoho rogo gu papara kekeapai naye fuo gere?
18 Ka ani duna giasangbaa mbiko nyaka ani rogo toro yo, si rengbe ka batasa rani ti regbo bakere digisidigisi gu ga Yesu sangbanebi nadu tipa gu “bakere gberãngbi” ngbatungaha aamanganga mbata ya. (Mt. 24:21) Ya mo ani aduna giasangbaa nibipa gu rugute rengbe “kangara buruku” ka fuhe furani kumbatayo? (Ruka 12:42) Nairiwo wai nyakipa gupai nga, ani duna ‘giasangbaa kpotoraniyo’!—Rom. 6:17.
19 Pa nyaka ani rogo toro yo naida gupai nga, ani raba gaani aberã. Ani namanga gipai re niʹasada ani tirani ka inido tirani na Fugo Mbori na niwirika ani giasangbaa. Si nikpakarapai fu paranga aboro i sono ki nyaki rogo toro yo. Gu papara kekeapai naye fuo gere nika yugo wai furani rengbe paranga aboro ka sovura kuti gu kpakarapai re ki dibehe.
[Gu rukutu kekeapai du bandu kpewaraga yo]
a I aima aria bete agu arimo keke yó ho ane re.
b Oni bi gu papara kekeapai du riihe nga, “Fortified to Say No to Wrongdoing,” du rogo gu Ngbaõbambu Sinziri nangia ga Tanvuo 1, 1999, (rogo pa-Ngirisi).
Ginipai Wiriki Oni He?
• Gine nga nyaka rogo toro yo, na wai rengbe boro ka nyaka rogo toro yo?
• Wai pa inido ani tirani na Fugo Mbori aundo rani ani nyaki rogo toro yo?
• Wai ani awirika giasangbaa?
• Rogo gini agene nyaka rogo toro yo aundo rani?
[Gu kpiahe du ti kpewaraga 15]
Irisa gu bangua arugute nga ga Ziazia Kekeapai naundo rani ani nimangipai wa nyanyaki aboro
[Gu kpiahe du ti kpewaraga 16]
Irisa ga Yesu rugute nabatasi agu aKristano nadumbata