Tipagine Si Aida Ti Ni Ani Naapekafuo “Kristo”?
“Gu ni nakpi nyemu peka re ni mbu gani apai, . . . ki nipeke re.”—RUKA 9:23.
1, 2. Tipagine du pekafuo “Kristo” ti ni ninyanyakipa pai furani?
NAIRIWO wai si afu ngbarago fu Yekova ka bi vovo aboro gbiati agude i susungu dagba airisiko auru kpotosende! A wa oni kaa ndu kumbatayo na wisigo Ziazia Kekeapai, na kini ndu kupati agu adunguratise nga ga aKristano dedede, na gaoni inohe kini moipai tipa agu arengo du tipa bata nga gu oni agbiaha rogo Fugo Mbori yo, si naida oni di ga Yesu yambahe kugume nga gu nayaa: ‘Gu boro nakpinyemu peka re, ní mbu gani apai, ki tumba gani wagiwagingua na aʹuru dunduko kini peke re.’ (Ruka 9:23) Yesu ape gupai nga, gu boro naida ka pekako, si naida ní mbu gani apai kini pekeko. Si furani ninyanyakipa pai ani rugu tirani na ndu gupai si aida ti ni ani naapekafuo “Kristo.”—Mt. 16:13-16.
2 Na ginipai du tipa agurani tigaani naima digo nipekefuo Yesu? I nangarasa rani ani ‘susi asusa nani’ kumbatayo. (1 Tesa. 4:1, 2) Singia ani adi ndikidi irisombori kugume bambeda watadu bakuruyo, ka ani berẽkurii gu nduapai si aida ani naapekafuo Yesu ti ni, si nika undo rani ani irisi ga Pauro arugute kaa pekafuo Kristo wenengai rogo gaani raka yo. Ani wisigingo nduapai bisue nga gu si aida ani naapekafuo Kristo ti ni.
Ani Kiisi Gaani Pagume na Yekova
3. Rogo gini agene ue rengbe ani ka ino Yekova wenengai?
3 Ho gu mokedi nangia Pauro ‘aru ni bebere Areopaga yo,’ ko afura fu aboro Atenai ki yaa: “[Mbori] aringbisi agu arago i afu fu yo, na ngbanda gayo banye. Mbori amangi he wo aboro gbata ko, wa i akpi nyemu ka ruga tiyo na pako, si ngia ka i da ti inida ko. Ono ko aturã nga na ani wa sa te.” (Amo. 17:22, 26, 27) Ani rengbe arengba ka gbata Mbori na ki biko nirengo. Nikpiapai, ho ani abi agu ahe ni Mbori akusihe, si nafura tipa asinoko gbiati agu atandu du beko. Pa berã ani kurii agu ahe ko akusihe naundo rani ani ini gupai nga ko nga Bakusiahe. (Rom. 1:20) Yekova nafura furani tipa tiko gbiati gu futufutuapai du tipa ko. Ko nagumba agi apai re rogo Fugoko nga Ziazia Kekeapai. (2 Tim. 3:16, 17) Ka ani ‘amákia pa ga Mbori sunge,’ na ‘kini bakibangirani tipa gako mangaapai,’ si nika sa gupai nga ani iniko wenengai.—Tam. 77:12.
4. Wai pa peka ani fuo Kristo narengbe ka undo rani ani ini Yekova wenengai?
4 Gu bawene gene rengbe ani ka inido tirani na Yekova ngbaha si nga, peka ani fuo Kristo. Ani berãnga pa gu taarimo Yesu adu nani ho ko aduni fuo Bako “mbata zegino nikadu”! (Yo 17:5) Ko “nga enge[enge] gu mangimangi ahe nga ga Mbori.” (Yugo. 3:14) Mbiko wa du “ko nga bambata vungu fu agu ahe dũ i afu,” ko aima duho na bako nga Yekova mbata tipa gbanga regbo ngbangbaturũ yo. Ti gu regbo Yesu aaraka mbata fu duko niboro, kura apai kinaho ko anaamangaha kupati gu nga kaa sungo na Bako. Ko angia ga Mbori badiasungo i kini mangisunge sa na kidu na dawedawe pagume dagbayó nga gu pagume naadunga dagba kura aboro ya. Anga Yesu anaabi kina wai Bako anaamanga apai na kini kparia Gako aberã na asino sa te, ono ko aima dia agu apai kugume ko abihe na ki wirikihe be Bako. Nisangbana gipai re, gi gude nangia boro giasangbaa re ada wakina Bako si ki sa gupai nga Ziazia Kekeapai ya tipa ko wee ko ‘nayugokpia Mbori nga guko ka i abinga ko ya.’ (Koro. 1:15) Ka ani apekafuo Kristo teketeke, si nika sa gupai nga ani ini Yekova wenengai.
Oni Wiriki Mangapai Wa Yekova
5. Gine rengbe ka undo rani ani naawirika Yekova wenengai, na tipagine?
5 Mbori ‘amangi rani nikpiako wakina ko’ tipa ani rengbe kaa yugo sino Mbori. (Bam. P. 1:26) Gu mokedi nangia Pauro angarasi aKristano i ‘niiwíriki Mbori wa du yó ni awiri manguse.’ (Ef. 5:1) Pa peka ani fuo Kristo naundo rani ani wiriki gu Barani du ngbangbaturũ yo. Si wo mbiko Yesu ayugukpiapai tipa agu aberã gbiati asino nga ga Mbori susi gu kura aboro arengbe ka yugoho. Ho Yesu aduni auru kpotosende, anga kina rimo Yekova gbua ko ayuguhe fu aboro te. Kuba gure, ko ayugukpiapai tipa gu boro du gu rimo re ri ní. (Oni gedi Matayo 11:27.) Yesu amangi gipai re rogo gako afugo, gako mangaapai, rogo agu apai ko anaayugo na rogo kpia apai.
6. Agu apai Yesu anaayugoho nayugo ginipai tipa Yekova?
6 Yesu ayugupai tipa agu apai Mbori aidaha berani na gu ko aberãha tipa airisiko. (Mt. 22:36-40; Ruka 12:6, 7; 15:4-7) Nikpiapai, fuo Yesu di rugute sa dagba agu ARugute du Bawe ki gumbaha nga, “Ka mo mángi nga bari ya,” ko afura tipa gupai Mbori nainihe du ngbadu aboro yo mbata fu i mangi bäri. Ko ayaa: “Gu . . . [boro] nangana de ni nyemu ri ni ima manga bari na ri kpotoni yo.” (Gate 20:14; Mt. 5:27, 28) Fuo Yesu fura tipa wai aFarusi anaasakarogo ga Mbori Ndiko yo, nga gu ndiko nayawee “oni akpí nyemu akuaroni wa oni akpi nyemu tironi,” ko agumba gupai Mbori aidaha rogo gu rugute re nga: “Oni kpí nyemu avuraroni, ki kpari tipa aguyo narungosi roni.” (Mt. 5:43, 44; Gate 23:4; Pa Mot. 19:18) Pa ruga ani tirani naapa wai Mbori aberã naapa agu apai ko akpinyemuhe berani nasa rani ani wirikiko wenengai gbe.
7, 8. Ginipai ani awirikaha tipa Yekova be ga Yesu kpiapai?
7 Yesu ayugukpiapai tipa Bako a rogo agu apai ko anaamangaha. Ho ani agedapai ni rogo abuku Wene Pangbanga tipa gu nunga Yesu adu nani, gu rungo ko adu nani tipa agu aboro naaima, gu imisiringbaduse ko adu nani ho gako abawiriki aza rukutu agude ni ti ye fuoko, ya mo si asanga rani ani inipai tipa agu aberã du ngbadu Mbori yo tee? (Mk. 1:40-42; 10:13, 14; Yo. 11:32-35) Oni bingo wai ga Yesu mangaapai ayugopai tipa bangua asino Mbori. Ya mo gu iiriwoapai Kristo amangihe ayugongo pai tipa gu banaru ome du beko ka mangasunge nani tee? Ono tie, ko aamanganga sunge na gu bakere ome re tipa ka gbia ahe tipa tiko watadu ka imisa kura aboro nani te. (Ruka 4:1-4) Ho ko ado ababagiahe ni kusayo yekaru yo, nga agu ababagiahe nangia aboro-ngbaduse, si ayugupa gu ruru sarangbanga ko adu nani! (Mk. 11:15-17; Yo. 2:13-16) Agu apai ko anaayugoho gbiati gu wene afugo ko anaagumbaha ka rimiso apai ku ngbadu aboro yo ayugu gupai nga ko nga “bahe ti Soromo” rogo tatamana. (Mt. 12:42) Anga fugo ho ka ani gumbaha ka yugopa gu nyemuse Yesu ayuguhe nibagako ungako tipa kura aboro te fuo kinagu nga, “a nga boro sa du na bakere nyemuse susi gi” nadu tiko re te.—Yo. 15:13.
8 Wiri Mbori ayugukpiapai tipa Bako teketeke rogo agu apai dunduko ko anaagumbaha na kini mangihe si ki sa ko ko yaa: “Gu ni bi re ni bi Buba.” (Oni gedi Yoane 14:9-11.) Ka ani apekafuo Kristo, gure nga ani nawirika Yekova.
Yesu Nga ga Yekova Mbedimbedi Boro
9. Gini regbo Yesu ada niga Mbori Mbedimbedi Boro na wai si amangi?
9 Oni kparianga gupai namangi rogo Mbirinvuo watadu Tanvuo rogo gu garã nangia 29 F.B.K. garã Yesu nada ti 30 ko nayee fuo Yoane Bafu Bapatiza. “Ho i abapatizi ko ni, ko ki guari ime yo ni ba sa. Ngbangbaturũ ki za fu ko, ko ki bi ga Mbori Ziazia Toro nazorã wa mbipo ki ye ku ri ko.” Ko ada ti gu regbo re nga Kristo watadu Masiya. Gu regbo re du Yekova atakipande ko nigako Mbedimbedi Boro kini yaa: “Wire du re, nyemuko namanga re, ngba ko ti re gbe.” (Mt. 3:13-17) Gure nga wene ndupai nirengo ani du na nyemu kaa pekafuo Kristo!
10, 11. (a) Wai mangiyo sunge na gu rimo nga “Kristo” tipa Yesu? (b) Tipagine si aidanga ani he pekafuo Kristo ti ni ya?
10 Gu rimo nga “Kristo,” i namangasunge nani rogo Ziazia Kekeapai tipa Yesu ngba dungu agene wa gu nga Yesu Kristo, Kristo Yesu, na Kristo. Yesu nitiko nangia gu bambata boro namangisunge na gu rimo nga “Yesu Kristo,” nga Yesu naye mbata fu gu nga Kristo. Wa ko aakparakpee fu Bako, ko ayaa: “Nyenye unga nga gere, nga i ini ro nga bangisa ndikidi Mbori, na gu ko mo akedi ko, nga Yesu Kristo.” (Yo. 17:3) Yambuyambuhe wa gere nagbeberã kutiko nigu boro Mbori akedi ní na ní ki da nigako mbedimbedi Boro. Ho gu rimo nga Kristo ayeni mbata fu gu nga Yesu, nga “Kristo Yesu,” gure nayugo gupai nga i nanyakasapai ane tipa gako sunge angianga pako ya. (2 Kor. 4:5) Ho i ayamba ko ni gbua nga “Kristo,” gure nga i nafura tipa ko ni Masiya.—Amo. 5:42.
11 Ka i vura mangasunge kina wai na gu rimo nga “Kristo” tipa Yesu, gipai re si anyakasaha nga: Wa Wiri Mbori aye ku sende no ki vura yugo gupai fu aboro Mbori akpinyemuhe, ko angianga kina boro gbua watadu nebi te; ono ko angia ga Yekova mbedimbedi Boro. Si aidanga ani he pekafuo gi boro re te.
Yesu Nga Yangara Gene Tipa Bata
12. Gini nyanyakipa pai Yesu agumbaha fu gu mokedi nangia Toma ngbutuko mbata fu kpioko?
12 Ani nabi gu kura nyanyaki ndupai tipa ani naapeka fuo Masiya rogo agu afugo ko agumbaha fu gako amokedi ngbutuko mbata fu kpioko. Ho Toma asana Yesu ni tipa gupai Yesu agumbaha ya ko nandu ka mbakada ba fuyó ngbangbaturũ yo, Yesu akaragapai fuko ki yaa: “Mi nga gene, nga rengo, nga unga a; a nga boro sa ka ye koyo du Buba ni gbua te, kina mbiko re.” (Yo. 14:1-6) Ti gu regbo re, Yesu aafura fu gako ruru amokedi nadu 11. Ko akido yó nga i nikadu na aba beyo ngbangbaturũ yo, ono agu afugo re a na nyanyakipaha fu agu aboro duna maabangirise ka gbia nyenye unga auru kpotosende. (Yugo. 7:9, 10; 21:1-4) Wai duhe wo?
13. Wai duhe nga Yesu nga “gene”?
13 Yesu Kristo nga “gene.” Rogo gu fugoyo re ngawee ko nga gu yangara boro rengbe ani ka mbeda na Mbori rogo ní yo. Wo duhe nibipa kparakpee, mbiko kina rogo ko yo sa ka ani kpari fu Mbori ani kidu na gu maabangirise nga ko nika gia gaani akpee agia nga agu akpee ani afuhe na ngbanya kuti gupai ko akpinyemuhe. (Yo. 15:16) Yesu nga “gene” na gu kura rogoyo berewe. Ingapai aima nyaga aboro kusayo ti Mbori. (Yes. 59:2) Yesu aye “ka manga pa aboro, ka tumo dungu yo ni ungako.” (Mt. 20:28) Ziazia Kekeapai nayaa: ‘Kure Yesu nagirisa rani ti ingapai dũ.’ (1 Yo. 1:7) Yesu azakigene tipa aboro mbakadipai dagbayó na Mbori. (Rom. 5:8-10) Ani rengbe kadu na ngbanya na Mbori kinagu ka ani du na idapase kuti Yesu na kini irisi sangbako.—Yo. 3:36.
14. Wai du Yesu nga “rengo”?
14 Anga Yesu nga “rengo” mbiko kina gupai nga ko anaagumba kina rengo ti aregbo dunduko na kini raki ringbisihe kuti ni sa te, ono gu kura nduhe nga agu asangbanebi dunduko i akekehe tipa Masiya, si adigi kutiko. Gu mokedi nangia Pauro akepai ki yaa: “Wa du ga Mbori kidohe dunduko, kina rogo ko yo du Ii ni.” (2 Kor. 1:20) Zavura “kirima gu wene apai [si adu nga si] nikaye” nga gu nadu rogo ga Moize aNdiko, si adigi kuti Kristo Yesu. (Eb. 10:1; Koro. 2:17) Yesu nga gu boro asangbanebi dunduko agbeberã kutiko, na si kini fura tipa gako sunge rogo ga Yekova ringbisapai. (Yugo. 19:10) Tipa ani rengbe ka gbia undo be digisidigisi agu apai Mbori aringbisipai tipaha re, si naida ani naapefuo Masiya.
15. Rogo gini gene du Yesu “nga unga”?
15 Yesu “nga unga” mbiko ko angbe ngbatunga aboro na kureko na nyenye unga nga gamunihe Mbori afuhe “rogo Kristo Yesu yo gaani Gbia.” (Rom. 6:23) Yesu a “nga unga” fu agu aboro kpiki. (Yo. 5:28, 29) Oni berẽnga berewe kurii gupai ko nika mangaha ho ko kaduni nigbiamotumo ti regbo gako Zogarago Tipa Agarã Kutu. Na berewe, ko nika batasa avuruko nyeanye kindi be ingapai na bekpio!—Eb. 9:11, 12, 28.
16. Gini nduapai du berani tipa kaa pekafuo Yesu?
16 Gu karagapai Yesu afuhe fu Toma, si na rogoyo ti ni furani. Yesu nga gene nga rengo na nga unga a. Ko nga gu boro Mbori akedi ní ní ye ku zegino ka batasa aboro. (Yo. 3:17) Aboro rengbe ka zio pagume na Mbori kina rogo ko yo. Ziazia Kekeapai nagumbaha ziazia niyaa: “[Aboro] abata nga mbiko kura boro te; bambiko kura rimo [ho rogo] zegino fu yo [ho] ku dagba aboro ani abata mbiko ho te.” (Amo. 4:12) Ka kina gini apai vura du tipa rani, si nipatatamana ani idi kuti Yesu kini pekefuoko tipa ka gbia unga.—Yo. 20:31.
I Nazinahe Furani Ani Naapekafuo Kristo
17. Tipagine duhe ti ni ninyanyakipa pai ani gisangba Wiri Mbori?
17 Ho kpoto Yesu asatihe ni, aPetero na Yoane na Yakoba adu kinaho kini bihe. Ti gu regbo re, i agi fugo ngbangbaturũ yo naayaa: “Wire du re, nyemuko ti re gbe; oni gi pako!” (Ruka 9:28, 29, 35) Pa gia ani sangba Masiya nga nyanyakipa pai.—Oni gedi Amokedi 3:22, 23.
18. Wai si aida ani naairisa sangba Yesu Kristo?
18 Pa gia ani sangba Yesu nakoda ‘ngera koyo du Yesu ni na kini makia pako.’ (Eb. 12:2, 3) Sidu, si naida ani ‘fu berãrani kakaka tipa agu apai’ ani agedaha rogo Ziazia Kekeapai na rogo agu abuku ‘ruru kangara moyambu’ akusaha, kodihe na agu apai ani agiaha ti regbo adunguratise. (Eb. 2:1; Mt. 24:45) Wangia ani gako akandoro, si naida ani duna nyemu ka giasangbako na kaa pekafuoko.—Yo. 10:27.
19. Ginipai rengbe ka undo rani ani naapekafuo Kristo apeka kindi?
19 Ya mo ani rengbe kadu na diabese rogo pekafuo Kristo kindi apai ki vura nimangi rani vurũ? Ii, ani rengbe arengba ka ani “ká kuti kpia . . . wene apai” kini mangi agu apai ani awirikaha “ni idapase na [ni]nyemuse du rogo Kristo Yesu yo.”—2 Tim. 1:13.
Ginipai Wiriki Oni He?
• Wai pa peka ani fuo “Kristo” asa rani ani ini Yekova wenengai?
• Wai duhe nga ka ani aapekafuo Yesu, gure nga ani nawirika Yekova?
• Wai du Yesu nga gene, nga rengo, na nga unga a?
• Tipagine si aida ti ni ani gisangba ga Yekova Mbedimbedi Boro?
[Gu kpiahe du ti kpewaraga 28]
Agu apai Yesu anaayugoho angia agu aberã nga ga Yekova
[Gu kpiahe du ti kpewaraga 29]
Si naida ani naapekafuo ga Yekova Mbedimbedi Boro
[Gu kpiahe du ti kpewaraga 31]
Yekova ayaa: ‘Wire du re, oni gisangbako’