‘Mo Ye Kini Peke Re’
“Gu ni nakpi nyemu peka re ni mbu gani apai, ki tumba gani wagiwagingua na uru, ki nipeke re.”—RUKA 9:23.
1, 2. (a) Yesu nayamba rani ani mangi wai? (b) Gaoni karagapai nga gine kuti gu yambahe re?
HO Yesu ambedi ni ka digiso gako sunge tungusapai, ko aamanga dezirepai Perea yo, nga gu ringara nadu mbiti Yaradene yo, du bangbanda nodiyo na uroyo ti ringara Yuda. Paranga sa aye fuoko ki sanako tipa gupai ka ko mangihe tipa ka gbia nyenye unga. Fuo Yesu ini gupai nga gu paranga re aima digo niirisi ga Moize aNdiko, ko ape gupai fuko si aida ko mangihe. Ko ayaa: “Mo ndú, mo bági agu ahe dunduko du be ro, ki gagamu he fu rungorungo aboro, mo akúmuko ngbangbaturũ yo; mo ki ye ki nipeke re.” (Mk. 10:21) Oni bingo gu wenepai ngaha, nga ka peka bangisa Wiri gu Mbori nga Bahe Kisusi!
2 Gu paranga re aima ká gu ga Yesu yambahe re, ono gu kura aboro aima diaha kugume. Mbata fu gu regbo re, Yesu aya fu Firipo wee: “Mo péke re.” (Yo. 1:43) Firipo aima ida na gu yambahe re na ko ki da nimokedi. Yesu ayambu Matayo a, ko ki idi na gu yambahe re. (Mt. 9:9; 10:2-4) Fugo Yesu nayugo gupai nga, agu aboro dunduko nakpinyemu rurupai, i dunduko ko ayamba yó. Ko ayaa: “Gu ni nakpi nyemu peka re ni mbu gani apai, ki tumba gani wagiwagingua na uru, ki nipeke re.” (Ruka 9:23) Sidu, gu boro naida nzunzu ka peka Yesu, ní rengbe arengba ka peka ko. Ya mo oni na nyemu pekako? Badungu rani naima ida na gu yambahe re, na ho ani naatungusapai ni fu aboro, ani naape gupai fuyó nga Yesu nayamba yó a tipa i ye ka pekako.
3. Gine rengbe ka undo rani ka ani bitikpanga ti pekafuo Yesu ya?
3 Ono si nafu kina gberarago nga, badungu agu aboro nadu adu na nyemu rengo mbata, i aima mbu wisigo Ziazia Kekeapai. I atona ka mbu wisigo Ziazia Kekeapai tooni tooni, na niyangaraha, i ki “bitikpa.” (Eb. 2:1) Gine rengbe ka undo rani ka ani bitikpanga ya? Si naida ani sana tirani na agu asanahe nga: ‘Tipagine ani adiberã ti ni ka pekafuo Yesu? Pekafuo Yesu nga gine?’ Pa ino ani akaragapai kuti agi asanahe re na kini bandaha berãrani yo nika undo rani ani naapekafuo Yesu apeka kindi a wa ani adiberã ka mangaha. Si nika sa rani ani ngarasi gu kura aboro i pekefuo Yesu.
Tipagine Si Aida ti ni Ani Pekefuo Yesu?
4, 5. Tipagine rẽ Yesu ti ni kadu ni Bangbembatayo?
4 Gu nebi nangia Yeremaya ayaa: “Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te.” (Yere. 10:23) Ga aboro raka ima yugo gupai nga, kina rengo du Yeremaya agumbaha re. Si yugu gupai nga, aboro arengbanga ka ruga gayó apai watadu ka zoga tiyó nitiyo i kidu na diabese te. Ani aidi ka pekafuo Yesu mbiko ani aini gupai nga, kinako sa rẽ kadu nigaani Bangbembatayo. Ani wisigingo bete agu apai nayugo gupai nga ko rẽarẽ.
5 Bambatapai nga, kina Yekova nitiko nasia Yesu ko duni Masiya nga Bangbembatayo. Gini kura boro duho susi Bakusirani rengbe ka sia Bangbembatayo furani? Uepai nga, Yesu na agu asino tiko si aida si du ti barumbatayo. (Oni gedi Yesaya 11:2, 3.) Ko nga bawene kpiapai furani. (1 Pet. 2:21) Biatapai nga, Yesu naberãpa agu aboro aberã bakere gbe napekafuo ko a wa ko ayuguhe nifuko ungako tipa yó. (Oni gedi Yoane 10:14, 15.) Ko nangerafuo rani wa wene bangerefuo akandoro wa ko angbe furani kumbatayo sa gu raka nika ye na ngbarago furani gbiati nyenye unga. (Yo. 10:10, 11; Yugo. 7:16, 17) Mbiko agi apai re na agu akuraha a, ani amangi wene diaberã ho ani aidi ni ka pekafuo Yesu. Ono gine tie nga pekafuo Yesu?
6. Gine nga pekafuo Yesu?
6 Anga pa yamba ani tirani gbua nga aKristano nayugo gupai nga ani napekafuo Yesu te. Badungu aboro du bangeyo wa abirioni ue naya tipa tiyó wee i nga apefuo Yesu, watadu aKristano, ono, gayó mangaapai nayugo gupai nga, i nga “amangi irairapai.” (Oni gedi Matayo 7:21-23.) Ho ani agbia agu aboro ni duna nyemu peka Yesu, ani nasaka rogo gupai yo fuyó nga, ndikidi aKristano naaʹaria gayó raka si niindu sa na agu apai Yesu ayuguhe gbiati gako kpiapai, na i namanga gipai re na aʹuru dunduko. Ani wisigingo bete agu apai ini ani he tipa Yesu
Oni Wiriki ga Yesu Tatamana
7, 8. (a) Gine nga tatamana, na tipagine Yesu adu nani ti ni gbe? (b) Wai Yesu ayugu gako tatamana, na wai rengbe ani ka wirika ko?
7 Yesu aduna bawene asino tiko, ono ani furanga tipaha gbua biama, nga: gako tatamana, gako umbasitise, gako nyemu sunge, na gako nyemuse. Nibambatapai, ani makianga pa gako tatamana, nga gu ome nadu tiko ka mangasunge na gu inohe ko adu nani gbiati giarogopaiyo. Gu mokedi nangia Pauro akepai tipa Yesu ki yaa: “Rogo ko yo i aoko gu ũkumuko du ti tatamana na inahe dũ.” (Koro. 2:3) Wari Yesu agbia gi gako tatamana re ni? Ko nitiko ayaa: “Kina gu Buba ayugu fere, si mi agumba.” (Yo. 8:28) Gako tatamana aenge ti Yekova si du ko adu ti ni na ruru berã kisusi.
8 Nikpiapai, Yesu aduna ruru berã ho ko asia gu ngbatunga raka ni ko aida ka rakaha. Ko adiberã ka raka taata raka gbua, kini moiberãko gbe tipa bangisapai, nangia manga gupai Mbori akpinyemuhe. Ko anaadia gako regbo na kini mangisunge na gu ome nadu tiko tipa ka manga agu apai nga ga Kindo. Ani napekafuo gu kpiapai nga ga Yesu ho ani ambu bangirani ni si du “ni ruru he,” ki mbu rãasa tirani na agu apai anyakanga paha ya, nga gu nadia omerani na ani kini moiberã rani kina fuoho. (Mt. 6:22) Badungu aKristano naima sa gayó raka si du taata tipa wa ka i rengbe ka dia bakere regbo kutingba sunge tungusapai. Aguyo aima rimo sunge abazakigene. Ka si du nga oni dagba agu aboro mangi gipai re, ani natambua roni. ‘Gbata ga Mbori ngbii mbata’ nafu bakere ngbarago na wasa fu boro.—Mt. 6:33.
Oni Duna Umbasitise Wa Yesu
9, 10. Wai Yesu ayugu gako umbasitise?
9 Gu kura sino Yesu berewe ani ka wisigopai awere tipaha nga, gako umbasitise. Ho aboro agbia pagbia ni, i naakiiso patiyo kini bi gu kura aboro dunduko nga sunge tiyó te. Yesu aadunga wa gure tigako te! Wa Yekova avura maa Yesu rogo kikiipa bangiriba tipa ka digiso gako ringbisapai, Yesu aakiisongo patiko wagu tooni te. Si naida ani wiriki ko rogo gi bangiriba re. Gu mokedi nangia Pauro akepai ki yaa: “Oni dú na gi berã rogo roni yo re, nadu rogo Kristo Yesu yo a, ko, wa ko adu ni kina Mbori [“wa ko avura du nga kpia Mbori,” NW]; rengba ko na Mbori adu nga bangiriko ni mosoro te, ono ko auka pa tiko ki du wa kina kanga, ki du wa boro.” (Frp. 2:5-7) Gupai re akodi ginipai?
10 Yesu adu rogo wene ba ngbangbaturũ yo wa ko aasungo pati Bako, ono tie, ko “auka pa tiko,” watadu ka zogosa patiko ka ye ku sende no. Mbori amoi gako unga ku rukumbu gu ngasudee yo nangia Maria, ko ki sono vuse yo tipa adiwi ribua, fuoho, ri ki vunguko wakina wai i naavunga agude a, na ko kidu kua gu bakpengua yo nangia Yosefa, nga gu boro naangianga irakumuko ya. Ko ki tona ka arãga, ki tona nduge taakputaakpu, ki da nitooni kumbagude, na ki tona kada niparanga. Yesu aadunga na ingapai tiko te. Ono wa si avura duwo, ko anaagia sangba avunguko agia nangia aboro-ingapai, ko kini raki kutiibeyo. (Ruka 2:51, 52) Nairiwo gu bakere umbasitise nangiaha re!
11. Rogo gini agene rengbe ani ka wirika ga Yesu umbasitise?
11 Ani nawirika gu umbasitise nangia ga Yesu ho ani aida ni ka manga gu sunge fuuyó ho furani, nga gu sunge rengbe aboro kaa bihe nga iriiri sunge ngaha te. Nikpiapai, ani bingo gu gaani sunge nga tungusa wene pangbanga. Boro rengbe ka bi gu sunge re nga iriiri sunge ngaha te, na si nigu sunge du paha kusende, gbe, ho adunga aboro ni na nyemu gupai ani agumbaha fuyó ya, na ho aboro asawia rani asawia ni, watadu ho aboro adianga rani ni kugume nani ya. Ono tie, ka ani duna hipai ba gaani sunge tungusapai yo, si nika undo kura aboro i idi na gu yambahe Yesu ayamba yó nani tipa i ye kaa pekako. Si ki tadu wo, ani ki rengbe ka batasa aboro. (Oni gedi 2 Timoteo 4:1-5.) Gu kura kpiapai berewe nga kaa giriso gaani Bambu Kindo na kini mbakadihe. Gi sunge re rengbe kadu nga tinda gugudo kusayo, wegarago, giriso bambu-agino yo, gbiati gu kura asunge du paha kusende. Ani ima rugutirani na gupai nga, gaani Bambu Kindo nga ba ndikidi irisombori, sidu, ka ani agirisoho na kini mbakadihe, gure nga kina irisombori a. Ka ani fu tirani ka manga agu asunge du paha kusende, si nika yugo gupai nga, ani nga aboro-umbasitise na ani napekafuo Kristo.
Oni Du Zaaza Wa Yesu
12, 13. (a) Wai Yesu adu zaaza tingba gako sunge, na gine nafõngbadukoyo ko duwo? (b) Gine rengbe ka fõngbaduraniyo ani du zaaza tingba sunge tungusapai?
12 Ani wisigingo wai Yesu adu zaaza tingba gako sunge. Yesu amangi badungu apai ho ko aduni auru kpotosende ane. Ho ko aduni kindi nigude, ko awiriki sunge kpengua be Yosefa nasonosi ko. Ho ko atona gu gako sunge ni ko aye tipaha, ko amangi iiriwoapai, betehe angia husa aborokaza na zingisa kangba aboro bekpio. Ono gako bakere sunge angia tungusa wene pangbanga na kini yugupai fu agu aboro nanaaida nani. (Mt. 4:23) Wangia ani apefuoko, kina gu bangisa sunge re a du berani si aida ani mangihe. Wai tie rengbe ani ka wirika ga Yesu kpiapai rogo gi bangiriba re? Ani rengbe ka wirika gako kpiapai ka ani wisigi agu apai nasako ko naatungusa wene pangbanga.
13 Gu bambatapai nasa Yesu ko naatungusapai na kini yugupai fu aboro, si angia gako nyemuse tipa Mbori. Ono Yesu anaatungusa wene pangbanga a mbiko gupai nga, ko aima kpinyemu agu apai nga rengo ko anaayugoho. Ko anaabi agu apai re wa kikiipa aũkumuko na ko aduna nyemu ka fu agu aũkumuko re fu aboro. Wangia ani ‘abakeapai,’ watadu abayugupai, si naida ani du wakina Yesu. Ani berẽnga tipa bete agu apai nga rengo ani nawirikihe rogo Ziazia Kekeapai, wa gu nga gu ngbanga du tipa gu bakere pagbia nga ga haurago, na wai i nika sara gu ngbanga re. Ani ima ino gupai a wenengai Ziazia Kekeapai agumbaha tipa agu aboro naima kpiko, gbiati agu amaku ga Mbori Kindo nika ye nani kurogo vovo zegino. Singia ani awiriki agi apai nga rengo re bambeda kusayo watadu bakuruyo, si kindi na nyanyakipaha. Si kindi nga kikiipa aũkumuko. (Oni gedi Matayo 13:52.) Ka ani atungusapai zaaza na nyemuhe, gure nga ani nayugo gaani nyemuse tipa agu apai Yekova nayuguhe furani.
14. Wai rengbe ani ka wirika gu gene Yesu anaayugopai ngbaha?
14 Ani bingo gu gene a Yesu anaayugopai ngbaha. Ko anaayugopai kini yugu baraha kurogo Ziazia Kekeapai. Ho ko aniidi ni ka gumba nyanyakipa pai, ko aniya: “Si ni keke he ya.” (Mt. 4:4; 21:13) Ko anaadia apai rogo gu papara Ziazia Kekeapai i akehe mbata fu ye ko ku auru kpotosende no na kini gumbaha. Wakina Yesu, ani narogoda apai kina rogo Ziazia Kekeapai kini gumbaha ho ani atungusipai ni, na kini asaditirani ka gedapai rogo Ziazia Kekeapai ho rengbehe ni. Ho ani amangaha ni wo, gure nga ani naundo agu aboro duna wene ngbaduyó yo i bi gupai nitiyo nga, ani nayugo sangba Mbori angianga sangba rirani yo ya. Nairiwo gu ngbarago ani nidu nani ho ani agbia gu boro ni idi ka gedapai rogo Ziazia Kekeapai nga sangba Mbori na ki sakipai riipaha na ani! Na ho ngbatunga gu boro re aida ni na gu yambahe du tipa pekafuo Yesu, gaani ngbarago nakio kumbatayo gbe.
Kpinyemu Aboro Nga Pekafuo Yesu
15. Gini sino Yesu naima iriwo kisusi, na wai rengbe pa berã ani kuriihe ka undo rani?
15 Gu yangarapai ani ka wisigoho tipa Yesu nga, gako nyemuse tipa aboro. Pauro akepai ki yaa: “Gu nyemuse duti Kristo tipa rani, si nasoda rani.” (2 Kor. 5:13-15, NW) Ho ani aberã ni kurii gu nyemuse du Yesu nani tipa Yekova, tipa ngbatunga aboro dunduko, na tipa rani nibasasa, kina iriwoho nati tirani, na si kini fõngbaduraniyo ani pekefuo gako kpiapai.
16, 17. Rogo gini agene Yesu ayugu gako nyemuse tipa aboro?
16 Wai Yesu ayugu gako nyemuse tipa aboro? Pa ida ko ka baga ungako tipa aboro nayugo gupai nga, ko aduna bakere nyemuse tipa aboro. (Yo. 15:13, NW) Ono ti regbo gako sunge auru kpotosende, ko aima yugo nyemuse tipa aboro ngba gu kura agene a. Nikpiapai, ho ko abi agu aboro ni naarungo, ko arungo naayó sa. Ho ko abi Maria ni gbiati gu kura aboro nadu na ri i nikpari tipa Razaro nakpi, kina nungayo nazi ko, na ko kidu na bakere rungo kpotokoyo. Wa ko avura inoho nga ko nika zingisa Razaro azingisa bekpio ti kina gu regbo re, ko ‘akpari ni aume.’—Yo. 11:32-35.
17 Bara ti gu regbo Yesu atona gako sunge, boro ngbataka aye koyo du ko ni ki zungodi tiko fuko ki yaa: “Ka mo kpi nyemu he, mo húsi re ahusa.” Ginipai Yesu amangihe? Gu pangbanga re nayaa: “Rungoko ki nimangi Yesu amanga.” Fuo gure, Yesu amangi baiiriwopai. ‘Ko atãi beko ki zadi ko, ki ya fuko, “Mi nakpi nyemuhe; mo hú.” Ngbataka ki go ago tiko nibasa, ko ki hu.’ Ringbisihe kuti ga Moize aNdiko, aboro ngbataka angia bibiriko aboro, na Yesu arengbe arengba ka husa gu kumba re zanga zada kpotoko. Ono wa si avura duwo, Yesu azadi kpoto gu kumba re azada tipa rago ngba tiko, bambiko si aima dia bagbanga regbo ka boro azadanga kpotoko ya. Nairiwo gu bakere nunga nadu ti Yesu re!—Mk. 1:40-42.
18. Wai rengbe ani ka yugo gupai nga, ani na ‘nunga akuarani’?
18 Wangia ani apefuo Kristo, Ziazia Kekeapai naya furani wee si naida ani yugu gaani nyemuse nidu ani na ‘nunga akuarani.’ (1 Pet. 3:8) Si arengbanga kadu nitaatapai tipa ka ino pa gu rungo du kuarani nani nga guni nambu be bangabanga kaza watadu guni duna bakere gberarago te, gbe, ka si du nga ngbatunga gupai re aamanganga rani mbata te. Ono si naida ani ini gupai nga, Yesu arungo sa na aborokaza si ki vura du vurũ nga ko aawokanga kandara bara sa te. Wai rengbe ani kadu na ngbatunga gu nunga re? Ani rengbe kadu nani ka ani sungu zezeredii kini degeturani fu agu aboro nagumbapa gayó akaza, ambugo, gbiati arungo furani. Si naida ani sana tirani ki yaa, ‘Ka si nidu nga mi du pai amanga re wa gure, ka mi du wai?’ Ka ani amaaberã rani tipa agu apai nambusa akuarani, si nika sa gupai nga ani rengbe ka ‘nyakasa agu aboro nawo, [watadu agu aboro duna bakere gberarago tiyó].’ (1 Tesa. 5:14) Si nika yugo gupai a nga, ani napekafuo Yesu.
19. Gini aundo ani agbiaha mbiko agu apai Yesu agumbaha na agu ko amangihe?
19 Nairiwo gu bawene apai ani awirikaha be agu apai Yesu Kristo agumbaha na agu ko amangihe! Ka ani awirikapai tipa ko bakere gbe, kinawo a ani kadu na nyemu kadu wa ko bakere gbe. Na si ki sa gupai a nga ani duna bakere nyemu ka undo kura aboro i mangi kinawo. Ka kina ginipai vura kaa manga amanga vurũ, si naida ani naapeka gu Bakindo apeka kindi nga Masiya, awere, na nyeanye kindi!
[Gu kpiahe du ti kpewaraga 10]
Oni Rengbe ka Sakarogoyo?
• Wai rengbe ani ka yugo gupai nga, ani na tatamana a wa Yesu adu nani?
• Wai rengbe ani ka yugo gupai nga, ani na umbasitise?
• Gine rengbe ka undo rani ani du zaaza tingba sunge tungusapai?
• Rogo gini agene rengbe ani ka wirika Yesu nikpi ani nyemu aboro?
Gu Buku Naundo Rani Ani Wiriki Kristo
Ti regbo gu bakere dunguratise nga ga aʹuru biata namangi rogo 2007, i akusi gu buku nga “Come Be My Follower [Mo Ye Kini Peke Re].” I ake gi buku re tipa si undo aKristano i naaberãpa Yesu gbe, kini berẽpa asinoko gbiati gako mangaapai. Fuo agu akapita du ue ti tonatonaha, bambata papara gu buku re fura tipa abangua sino Yesu, nga gako umbasitise, gako wingbaduse, gako tatamana, gako giasangbaa, na gako hipai.
Fuo gure, si tona ka fura tipa agu apai Yesu anaayugoho na wai ko anaatungusa wene pangbanga, na bete agu agene ko ayugu gako bakere nyemuse ngbaha. Agu apai du rogo gu buku re, tona ti tonatonaha ki da ti digidoho, si tipa ka undo aKristano i niimangipai wa Yesu.
Ani namaabangirani nga, gi buku re nika fõngbaduraniyo afõ wa du ani nibasasa dunduko ani wisigi tirani na ki sana tirani na gu sanahe nga: ‘Ya mo mi napekafuo Yesu nzunzu? Wai rengbe mi kaa pekafuoko wenengai gbe?’ Si nika undo agu aboro aundo a ‘duna nyemu gbia nyenye unga’ i sa tiyó ni apekefuo Kristo.—Amo. 13:48, NW.
[Gu kpiahe du ti kpewaraga 11]
“COME BE MY
FOLLOWER”