Wai Ziazia Kekeapai Aundo Rani Areme?

“Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai.”—2 Timoteo 3:16.

TONA ti agu aregbo i aake Ziazia Kekeapai kada ku awere, gu kitabu re aima undo ngbatunga aboro dunduko i aria gayó raka si du niwenehe. Gu veresi du kuari re, si nayugo gupai du Ziazia Kekeapai ti ni na ome ti ni wa gure. Si wo mbiko gupai nga, agu apai du rogoho, si aye be Mbori. Wa vura duhe nga aboro du nake Ziazia Kekeapai, i akehe na ga Mbori berã. Ziazia Kekeapai nitihe nayaa: “Aboro agumba pai be Mbori, wa Ziazia Toro arugu yo.”—2 Petero 1:21.

Ani bingo apai ue nasa Ziazia Kekeapai si du nigu kitabu rengbe ka undo aboro. Bambataha nga, si nayugo agu apai rengbe ka sa raka si du niwenehe. Uehe nga, si na ome ti ni ka sa aboro i mangi agu apai si aida i mangihe ka gbia gu wene raka re. Ani wisigingo agu apai du ue re.

Agu Arugute Naundo Rani Ani Dati Gaani Asásá

Mbori naya furani wee: “Mi arába ro ki yugu pai foro ngba gu gene mo ka ndu ngba ha; mi arúga ro ni maa bangire ti ro.” (Atambuahe 32:8) Oni bingo gupai nga, Mbori nafu agu arugute furani rengbe ka undo rani ani mangi wene adiaberã. Pa gbia ani agu arugute re naundo rani tipa ani naamanga agu adiaberã rengbe ka fu undo furani, na ki banda rani ka ani gberesinga gaani raka tipa kungboapai ya.

Nikpiapai, badungu aboro naberã kina pa gbia worimo watadu aũkumuko. Agu abuku du tipa boro undo tiní nani nisani, si naafura tipa wai rengbe boro ka biriko akurani tipa ka gbia wene sunge-marã watadu kadu ni irakumuko. Ono tipa Ziazia Kekeapai tigaha, si nape gupai furani nga: “Kpi boro ga kurani apai . . . nga kina kungba pai na wa pa peka fuo yuge.” “Gu ni nakpi nyemu marã, marã anyasa nga gani nyemuhe te.” (Batungusipai 4:4; 5:10) Ya mo agu arugute re arengbanga ka undo rani areme tee?

Ani bingo gu kpiapai nayugo wai rengbe agu arugute nga ga Ziazia Kekeapai ka undo aboro, a wa duhe tipa kumba du Japan yo du rimoko nga Akinori. Akinori agbia gupai ko aakpinyemuhe nga ka nyasa yunivasiti na ki gbia sunge rogo bakere basunge. Ko abi gupai nga apai dunduko naandu kubarako yo wenengai. Ono tie, agi apai re aasanga gu ngbarago tiko ko aaberãpaha te. Ko adu nifudifudiko berãko yo na ko kidu na kina mbugo ti aregbo dũ. Agu abakureako i aamangasunge naayó, ko anaagbia kina bete wasa gbua beyo. Si ki tadu were, ko kini fu tiko sa bakere mbira buda na kini berẽpa imo tiko a. Fuoho, ko atona ka wirika Ziazia Kekeapai na aDezire Yekova. Agu apai ko awirikihe asako ko ini gupai nyakipaha nzunzu rogo raka. Fuo regbo ngbutuko, gako bakere gberarago atona ka go. Akinori aini gupai nga, kina rengo du Ziazia Kekeapai agumbaha kini yaa: “Wene zezeredi berã nafu unga fu boroboro.”—Asanza 14:30.

Gini sásá bi oni he nga si nga gu bawene sásá kisusi si aida boro moihe rogo gani raka? Gini bakerepai rengbe mo ka mangaha si ki fu ngbarago foro nzunzu? Ya mo si nga wene ramukporo? Sí mburu wene raka fu awironi kumbatayo? Zio bakure na badungu aboro? Raka wene raka? Agi apai re dunduko nga kina wene apai. Agu apai re dunduko ni agu apai Mbori aida aida ani gbiaha, ono tie, anga si nga gu memeapai si aida ani peresipaha mbatayo rogo gaani raka te. Ziazia Kekeapai nagumbapa agu apai furani si aida ani mangihe tipa ka gbia gu gene raka ngba kisusi. Si nayaa: “Oni gúnde ti Mbori, ki ka kuti gako arugute; bambiko gere nga gu pai dunduko nga ga boro.” (Batungusipai 12:13) Ho ani aidanga ni ka gunde ti Mbori kini kakuti gako arugute ya, gaani raka nadu zanga rogoyo ti ni, na ani kidu na kina gberarago. Ziazia Kekeapai nakido rani berewe kini yaa: “Ngbarago du fu gu ni nakida kuti Yekova.”—Asanza 16:20.

Wai Ziazia Kekeapai Asa Aboro I Sa Sinoyo

Gu mokedi nangia Pauro akepai ki yaa: “Gu pai nga ga Mbori du na unga, ki du na tandu.” Si nitítíhe wakina gu basape duna arindihe ue. Si narimo kina boro ku ngbadu boro yo ki ini agu apai du yo. (AEbere 4:12) Ziazia Kekeapai na ome ti ni ka aria gu gene boro araka ngbaha bambiko si nasa boro ní ini gu boro nga ní nzunzu. Agu aboro duna wene ngbaduyó yo, i naino gupai nga apai kinaho si aida i mangi ariapai rogoho. Nikpiapai, Pauro afura tipa agu aKristano nadu Korinda yo nga aguyo nadumbata ni airadĩ, akpibuda, airabäri, na ni amangi gu kura gbegberẽ apai. Ko aya tipa yó wee: “Agu yo dagba roni yo a nadu ni amangi agi apai re, ono i azundu roni, . . . i asa roni ni ziazia roni, . . . i adi pai ri roni ni rimo Gbia Yesu Kristo, na rogo Toro gaani Mbori.” (1 AKorindo 6:9-11) Ga Mbori ziazia toro na ome ti ni areme wakinagu si adu nani mbata, na si nasa aboro i mangi ariapai rogo gayó raka.

Mario naraka Putu yo, ko angia kere boro nanaavu baangi na kini bagihe. Rogo kura uru sa, borisi azi gako baangi. Ko azingi gbegberẽe ki zubo gu borisi re na kpata ki bubuna gako tarambiri. Kurigure, Mario aadunga na sunge-marã beko te, sidu, ko kidu na bakere bape riko. Fuo ko kparia gupai nga ko aarengbanga ka nyasa gu fudifudiapai nadu tipa ko nisako te, ko aidipa tona wirika Ziazia Kekeapai. Fuo Mario tona ka ino dungu apai rogo Ziazia Kekeapai, ko agirisi tiko, ki mbu vu baangi gbiati bagaha, na ki mbu manga agu apai nga ga zuũ. Agu aboro nainiko mbata, kina ngbayo nanizere ho i anibiko ni. I anirugusiko ki sanako ki yaa, “Kina boro mo du du re Mario?”

Gine nafõngbadu aboro yo wa Akinori na Mario i mbu manga irairaapai ki tona ka manga agu apai nafu ngbarago fuyó rogo gayó raka? Si ziazia nga, si aye be gu inohe i agbiaha rogo Ziazia Kekeapai nga fugo Mbori. Kina Mbori sa rengbe ka fu agu arugute rengbe ka undo rani rogo raka awere na si ki fu maabangirise furani tipa nyenye unga kumbatayo. Wakina baagude, Yekova Mbori nafura furani rogo Ziazia Kekeapai yo kini yaa: “Ako wire, mo gi gimi apai ki di he ku gume, garã ungaro ki du ni dungu he. . . . Ho mo ka ta ni, he ho nikaza ro te; ka mo aóra, mo akóta nga a te. Mo ká kuti rugute nyanyaki, ka mo nimbú nga ha si merẽ ya; mo nibánda pa ha bambiko si nga ungaro.” (Asanza 4:10-13) Ya mo arugute ho ngba kisusi gu Bakusirani afuhe furani?

[Gu kpiahe du ti kpewaraga 5]

Gu sura du ku garebee yo nga Akinori ho ko agbia sunge ni. Gu kuraha nga ko na diako i nitungusipai

Agu Arugute Rengbe ka Undo Rani Areme

Ziazia Kekeapai nafu agu abangua arugute furani rengbe ka undo rani rogo agu apai dunduko du tipa rani. Bete agu arugute re du re:

• Wene pagume na aboro

“Gu ni bérẽ pa kura ni rogo umbasi gani berã ya ni ngba susi ni.”—AFiripoio 2:3.

“Oni dí agu yo ku gume naye koyo du oni ni.”—ARomo 12:13.

• Mbu gbegberẽ mangaapai

“Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.”—Asanza 13:20.

“Ka mo dú nga dagba abambiri imekakue yo ya.”—Asanza 23:20.

“Ka mo nimángi nga badia ngbanya na gu boro inidi zinga ya.” —Asanza 22:24.

• Wene ramukporo

“Gu ni nikpí nyemu diani wa du oni ni ba sa sa, wa kina tini; dia boro nigunde agunde ti kumbani.”—AEfeso 5:33.

“Oni úkadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni.”—AKorosaio 3:12, 13.

• Undo agude

“Oni sónosi gude rogo gu pai ka ni ndu ngba ha, ho ni ka gbinza ni ka ni agúari nga ngba ha ya.”—Asanza 22:6.

“Oni, aba, ka oni wí nga ngba awironi i zingi ya, kina mbu ti yo ni ga Gbia rabahe na rugahe.”—AEfeso 6:4.

• Mbu papaya

“Zezeredi karagapai nazeresa zinga, ono iimi fugo nazingisa zinga.”—Asanza 15:1.

“Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.”—ARomo 12:10.

Zavura dagba abakure, i nane gu tagbagapai rengbe ka kura nibipa marã nike yó pa gu giatise du tipaha rogo waraga. Sidu, gu ga Mbori moyambu nangia Yeremaya aya tipa gu giatise i amangihe wee: “Mi ki ke rimore ti waraga ngbehe, ki dika ha, ki du na adezire he, ki niringbisi gu marã re ti ũringbisaahe.”—Yeremaya 32:10.

• Ruru Berã

“Agu apai du ni rengo, agu apai rengbe na irisa, agu apai du ni ruru he, agu apai du ni wene sino, agu apai nangba bangirise, agu apai i naya ti ni si ngba; ka ngia ziazia pai du ho, ka ngia he ho rengbe i fu tambuahe ti ni, oni bérẽ pa agi apai re.”—AFiripoio 4:8.

Ziazia Kekeapai nayawee ka ani nasungongo na iraira aberã ya, na ka ani dunga ni “akpakana aboro” ya, ono ‘rago ngba tirani na maabangirise.’—Yuda 4, 16; ARomo 12:12.

Ka ani amanga agi abangua rugute re, si nika sa rani ani raki na pazereda na ki gbia amaku be Mbori. Ziazia Kekeapai nayaa: “Ruru aboro adía kumbo ringara, ki nye anye kindi.”—Atambuahe 37:29.