Ziazia Kekeapai Namanga Ariapai Rogo ga Aboro Raka

Tipagine gu dee naima mbu idapase kuti pambori adia bakere regbo ti ni awere tipa ka undo kura aboro i wirikipai tipa Mbori? Ginihe nasa gu kumba nakpinyemu agu ambaro nga ga zuũ ko da niboro zereda? Ginihe nasa gu kumba naadia kerengua kuti kpotokoyo, kini kpibuda, na kini takpata bangiri gene ko aria gako sino raka? Oni gedi gu pangbanga du tipa yó.

AGU APAI DU TIPA RI

RIMORI NGA: PENELOPE TOPLICESCU

GARÃRI NGA: 40

GU RINGARA I ABATIKARI ROGOHO NGA: AUSTRALIA

GU PANGBANGA DU TIPA RI: RI ADUNA BAKERE GBERARAGO BE PAMBORI

AGU APAI MI AMANGIHE: I abatika re rogo gu ringara nga Australia rogo gu gbata nga Sydney. Ho garã re aduni ue, avungure aguari ki ga kurogo gu gbata nga New Guinea. Ani araki tipa agarã ue rogo gu ba i ayambaha nga Rabaul na ki mangi garã muambe ku Bougainville yo. Ti agu aregbo re, terevizioni adunga New Guinea yo te, sidu, agu ambaro ani anaangihe na tooni kawire angia ba wagia na barindo.

Ho garã re aduni bawe, nyemu agu apai nga ga pambori atona ka zio re. Nina angia boro Katoriko. Ri angarasi re mi naandu ka wirika Ziazia Kekeapai be agu anarani nanaaraka rogo gu dagbaro ani adu rogoho. Mi aidi na gu pambori nga ga aKatoriko na i ki bapatiza re.

Ono tie, fuo karaga ani tirani berewe ku Australia yo ho garãre adani ti bawe-na-biata na kuari ti gure, mi atona kaa kapa kuti gimi pambori. Mi awirikipai sukuru yo tipa kuru pangbanga, na ani anaasakapai na buba tipa gbanga regbo riipa wai apambori aenge na riipa agu apai ani anaabihe rogo Ziazia Kekeapai wa paturẽ. Niyangaraha, mi asogo gu pambori nga ga aKatoriko.

Avungure ambutiyo ho garã re aduni nga 16. Raka adu fu nina nibakpakarakpakaraha mi kini mo ka guari ka ga fuo buba na gu nakureako ko aaida ka dia ri. Nina gbiati kawire aguari ki ga kurogo gu kura papara Australia. Rago atona ka gbera tire mbiko mi aaraka nisare. Si adi re nga agarã ue tipa mi du na wene ngbanya berewe dagbare na nina. Mi atona gbegberẽ mbira buda, dia kerengua kutii kpotoreyo, na kini do agbere. Mi ambu sukuru, na mi ki tona ka raka wasiwasi raka ho garãre asusi 20 ni.

Ho garãre adani nga 25, mi atona ka berã tipa Ziazia Kekeapai berewe. Mi atona manga gu kura vovo sunge na ki gbia Liene nangia gu degude sinori aima ngba fu bairari, zavura ho ko anaamanga ri ni gbegberẽe, ri anaapenga gbegberẽpai fuko te. Ho mi asana ri ni tipa ndu gupai ri naazinganga ti ni kutiko ya, ri agumba gupai fere nga ri nawirika Ziazia Kekeapai na aDezire Yekova na ri naaʹasada ka manga agu arugute ri awirikaha rogo gari raka. Liene asana re tipa ani wisigi Ziazia Kekeapai na ri. Mbiko wa mi aaruganga tire na gupai ri agumbaha fere ya, mi aberẽhe tigimi nga ri naida mi wiriki agu apai dunduko ri nainihe rogo Ziazia Kekeapai kina rogo saa sa. Rogo gu yuru nangiaha re, Liene adi asa biata tipa ka karagapai kuti agu asanahe mi adu nani rogo Ziazia Kekeapai. Gupai rago angba tire nani gbe angia gari akaragapai dunduko adu rogo Ziazia Kekeapai yo.

Mi natingidapa wai ngbadure aaima kuti Mbori ho mi aaoro ni na tarambiri yuru fuo saka ani pai na Liene. Ngbadure aaima kutiko mbiko ko aimanga yugo rengo fere tipa tiko mbata fu gu regbo re te. Mi aini gupai nga aDezire Yekova naraka wene gigiri raka na mi ki bihe nga regbo ima susa tipa mi aria gimi raka. Mi aberẽ gupai a nga mi arengbanga ka tungusapai kini tanga nani ti akporo wa aDezire Yekova te. Ono mi asusi kumbatayo kindi na wisigo Ziazia Kekeapai na aDezire Yekova, ono gupai mi aaidaha nga ka gbata irairapai ti gayó yugopai tipa si fu ndupai fere mi mbu koda tire naayo. Rogo gu kura uru sa, mi abi gupai nga, irairapai ho mi nika gbiaha ti gayó yugopai wagusa te.

GU GENE ZIAZIA KEKEPAI AʹARIA GIMI RAKA NGBAHA: A wa mi aawirika agu arugute nga ga Ziazia Kekeapai du tipa ruru mangapai bakere gbe, kinawo a bakere gbe sangbakpotoreyo anye kindi kuti fuda re. Gu yangarapai mi amangihe tipa ka sa sangbakpotoreyo si zeredi angia mbu dia kerengua kutii kpotoreyo. Mi aguari ki ga kurogo gu kura ringara na ki nye yo kuti mbira abuda gbiati do agbere. Si nawira gupai nga, agu aregbo dunduko mi anaaʹasada ka sona kumbatayo tipa ka raka ringbisihe kuti agu arugute nga ga Ziazia Kekeapai, mi anikaraga tire kina kurogo gimi kuru mangapai. Si angia pazee fere mbiko mi anikpari fu Yekova na ki bihe nga runga gupai mi amangaha re te.

Gupai naundo re angia pa wirika mi gupai nadu tipa Bakindo Davide nibi gupai nadu dagbako na Bataseba na wai Yekova ainipai fuyó. Davide aima idapa gako ingahe ho i afu arugute ni fuko zanga ko rugusipai kubara ko yo. Na ko aima dia agu arugute i afuhe fuko kugume niumbasitise. (2 Samuere 12:1-13) Ti agu aregbo dunduko mi animangi ingapai, mi anitingidipa gupai namangi Davide re na si ki saha fere taata mi ho mbupai be Yekova. Fuo gure, mi adiberã tipa kaa kparakpee mbata fu mi mangi ingapai, angianga fuo manga mi he ya, na si aima manga bakere ariapai rogo gimi raka.

GU UNDO MI AGBIAHA: Mi angia boro kere imisiringbaduse. Ono tie, agu averesi du rogo AEfeso 4:29-31 undo re mi mbu “zinga, na erã, na paa.” Mi atona banda tire ti imisiringbaduse. Si aida mi bandatire a ti wai mi afura. Kurigure, gu ga Yesu arugute nayaa, ‘fugoroni du nga, “Ii, ii;” na “Oó, oó,”’ si undore mi da nigu boro namanga ruru diaberã.—Matayo 5:37.

Nina nanaasogote pa gimi kodatise asogote mbata na aDezire Yekova, ri ape gupai fere kusa nga ri na ngbarago awere bere. Ri ayaa, “Mi ini gupai nga padu mo awere niwene sino dee ayengo mbiko gupai nga ani nasonosi ro ngba wene gene te, ono mbiko agu apai wiriki mo ho tipa Yekova.” Gupai nina apehe re afu bakere ngbarago fere.

Mi nabihe nga gimi raka niwenehe awere na kidu na rogoyo ti ni. Tipa agarã awere wa ribua, ani namangasunge tungusapai ti aregbo dũ na kumbaami ni abayugu Ziazia Kekeapai. Ii, mi naandu awere kini tungusipai nitanga nani ti akporo, na mi nabihe awere nga si nga gu sunge mosoro mangi mi he rogo gimi raka.

AGU APAI DU TIPA KO

RIMOKO NGA: DENIS BUSIGIN

GARÃKO NGA: 30

GU RINGARA I ABATIKAKO ROGOHO NGA: RUSSIA

GU PANGBANGA DU TIPA KO: BAKERE NYEMU KARATE

AGU APAI MI AMANGIHE: I abatika re rogo gu gbata nga Perm na mi ki sono rogo gu gbata nga Furmanov nadu na aboro rogoho nga 40,000 rogo gu ringara nga Ivanovo du Russia yo. Furmanov nga bawene gbata kuti bibihe na wene angua rogoho akpehe asatihe wa kpenongaa watadu nizambaha bara rogo Mbirinvuo, Tanvuo, na Ngbangba. Rogo gu garã nangia 1980 na 1990 kuondiko aima kio rogo gu gbata re. Gimi aborokporo anaaraka rii wiri umba marã. Buba na nina gbiati re na tooni kawire anaaraka kina rogo bangisa wiri tooni bambu, sidu, ka ba arengbanga tipa rani ya.

Ho garã re adu ni nga saba, mi atona ka wirika karate. Karate aima ngba tire, gimi raka naabaha dunduko adu nga karate. Uru anaati re kina rogo gu bambu ani anaawirika karate rogoho. Abakureami naabayo dunduko angia kina awiriki karate. Ho garã re adani nga 15, mi adi zamba gire rogo karate yo na fuo garã sa tingbafuo gu regbo re, mi ki di gu kuraha berewe nga gu nayugopa gimi sona kumbatayo. Mi angia papara agu aboro karate nangia ga Russia yo nanaamanga abaangira na aboro Putu gbiati aboro Asia. Apai aangba fere kina kumbatayo, ono ho garãre adani nga 17, gimi raka naabaha dunduko aʹariatihe.

Rogo kura uru sa, ani amangi gbegberẽpai na abakureami i ki zi rani ku bambukiso yo. I azire na agarã ue ku bambukiso yo. Raka aima du nikpakarakpakaraha bambukiso yo. Ono tie, bambata regbo fere tipa mi bi Ziazia Kekeapai adu bambukiso yo. Mi agedi Bambata Pai, Atambuahe, gbiati Vovo Ndiko. Mi anaape Barani kina ngbarire mbata fu mi ndu ka pi, kini berẽ gupai nga pa manga mi he wo nika undo re.

I akusi re bambukiso yo rogo 2000, ono mi ainongo gupai ka mi amangihe na gimi raka te, na kini bihe nga wiri ndupai ho tipa mi niiraki te. Mi atona ka dia kerengua kutii kpotoreyo. Nina akpi bara kina ti agu aregbo re. Ri angia gu boro mi aima kpinyemu ní, na si adu fere nimbumbupai mi hi pakpio ri. Ono tie, mi ambu dia kerengua kutii kpotoreyo na ki tona ka ndu berewe kuba karate yo. Mi aguari ki ga kurogo gu gbata nga Ivanovo. Mi agbia sunge ba baga riahe yo. Bangerekurii sunge angia Dezire Yekova. Ri asakipai fere tipa bete gu bangua arengo du rogo Ziazia Kekeapai na ki mangi mbakadapai tipa kura Dezire Yekova niye kaa yugo Ziazia Kekeapai fere dedede.

GU GENE ZIAZIA KEKEPAI AʹARIA GIMI RAKA NGBAHA: Ti gu regbo mi aawisigo Ziazia Kekeapai, mi aduna bakere ngbarago ka wirika gupai nga, Mbori nika sa kpotosende niparadizo, na si asa re mi mangi gupai nika sa re mi raki kumbatayo. Mi aini gupai a nga Yekova na kina andiko beko ko aida aboro raki kuti ni. Rogo gimi raka naabaha, mi anaaberã kina pa tire sa. Ono mi awiriki gupai nga Yekova naida mi naaberãpa kura aboro aberã na kini sonosi agu asino mi adunga nani tire ti gu regbo re ya nga gu nakoda weneringise na zereda.

Ho mi atona ka berã ni dudunguroo kurii agu apai dunduko Yekova namangihe fere wa gu nga ka keda wiriko nimotumo tipa gimi ingaapai, gu nyemuse mi adu nani tipa ko afõngbadureyo mi mangi ariapai rogo gimi raka. Nikpiapai, mi awirikipai rogo Atambuahe 11:5 nga Yekova nasoga gu mangaapai nga ga zuũ. Mi ambu biko agu avidio du rogo terevizioni nataasapa zuũ gbiati sogote. Na mi amangi ome ka mbu agu ambaro nga ga zuũ. Gu bangua arugute du rogo 1 AKorindo 15:33 aundo re mi bi gupai nga, agu aboro mi akoda tire naayó, i rengbe arengba ka ye na gbegberẽ sangbanapai kurire. Nirengo, i azire ku bambukiso yo mbiko gbegberẽ kpamiatise nga gu nadigiso sangbana gu rugute re. Mi adiberã ka mbu kodatise na agu aboro gayó raka angia ngi kina agu ambaro nga ga zuũ.

GU UNDO MI AGBIAHA: Pa koda mi tire na aDezire Yekova na kini wiriki Ziazia Kekeapai naundo re mi du niruru boro. Nikpiapai, rogo AEbere 13:5, mi awirikipai tipa wai kadu na wene bipai tipa agu ahe du bere na ka sovura kuti nyemu marã. Pa manga mi agi rugute re rogo gimi raka aundo re mi mbu pe ziree na dii.

Mi naabipa zio bakure ninyanyakipa pai. Mbata kusayo, mi abi gupai nga pabakure agbere mbiko ngbaduse watadu gunde. Anga rengberengbe aboro nga aDezire Yekova te, ono mi ini gupai nga, i nairisa ga Mbori arugute na i naʹasadatiyo ka manga fu akurayó ringbisihe kina kuti gu gako arugute re. Mi awere na ndikidi abakure dagbayó.

Mi naabaka kina bangire nga ka mi awirikanga Ziazia Kekeapai ya, mi ainongo wai ka gimi raka nidu awere te. Ka mi du awere kina bambukiso yo watadu ka mi naimisa kura aboro na kini rungosi yó. Wa vura duhe nga mi awere na bawene diare ti ni na awirani ue ni akumbagude, gupai nzunzu ani agbia ngbarago behe nga gu sunge ani amangaha ka undo aboro i wiriki rengo tipa Mbori.

AGU APAI DU TIPAKO

RIMOKO NGA: JOSÉ CARLOS PEREIRA DA SILVA

GARÃKO NGA: 31

GU RINGARA I BATIKAKO ROGOHO NGA: BRAZIL

AGU APAI MI AMANGIHE: TAKPATA BANGIRI AGENE

AGU APAI MI AMANGIHE: Mi asono rogo gu bibiriko rago nadu rogo gu gbata i ayambaha nga Americana São Paulo. Wene mbirimbiri ime adunga yo berani te watadu wene gigiri rago a te. Aboro aini gu dagbarago re nigu rago nangia ga zuũ na ki hi be kuondiko.

Ho mi aasona ni, mi angia kere boro-zuũ na kidu na gbegberẽ sino. Gimi sunge angia takpata bangiri agene. Agu aboro naaraka rogo gu dagbarago re dunduko anaagunde agunde bere. Gimi vo rokoo, mbakadarii gbiati gu gene mi aamangaapai ngbaha, si aayugo gupai nga kere boro nga mi. Mi anaambira buda dedede nikerehe daho mi anikpihe ni ki pi sande. Mi anaadia kerengua kutii kpotoreyo wakina aunvurami. Nirengo, gu kura unvurami sa akpi mbiko gupai nga ko ambiri kerengua si ki furii omeko.

GU GENE ZIAZIA KEKEAPAI AʹARIA GIMI RAKA NGBAHA: Ho mi agbia aDezire Yekova ni, i ape gupai fere nga Yekova nika sa kpotosende dunduko niparadizo. (Ruka 23:42, 43; Yugoti 21:3, 4) Mi awiriki gupai a nga kpikpi aboro ainongo pai te, na Mbori ambusanga gbegberẽ aboro iferno yo te. (Batungusipai 9:5, 6) Gipai re aima undo re nibakerehe gbe. Gupai mi awirikihe tipa Mbori aundo re mi mbu ngbatunga gu raka mi aarakaha. Ono si adunga fere nitaatapai tipa mi mbu dia kerengua kutii kpotoreyo, kpibuda, takpata, gbiati pe gbegberẽ afugo te.

Ono tie, fugo gu mokedi nangia Pauro du rogo 1 AKorindo 6:9-11 angarasi re bakere gbe. Gu veresi re ayugu gupai nga, bete agu aKristano nadu rogo bambata sa kama agarã adu na kina ngbatunga gu gbegberẽ mangapai re tiyo. Papara agu averesi re naya: “Agu yo dagba roni yo a nadu ni amangi agi apai re, ono i azundu roni, ono i asa roni ni ziazia roni, ono i adi pai ri roni ni rimo Gbia Yesu Kristo, na rogo Toro gaani Mbori.” Agu afugo du rogo agu averesi re afu maabangirise fere nga mi rengbe arengba ka manga agu aʹariapai re tipa ka fu ngbarago fu Mbori.

Ho mi atona ka koda tire ni na aDezire Yekova, mi aima ino gupai nga i naraka gu ndikidi raka si aida aKristano rakihe. Wa i vura ino gupai nga, mi angia kere boro-zuũ na nigbegberẽ sino boro, i ahenga dia re kugume na ngbarago rogo nyemuse yo te.

AGU AUNDO MI AGBIAHA: Ka mi aawirikanga Ziazia Kekeapai na ki sa sino re ya, ka mi ima kpi wadu regbo re. Kuba gure, mi na ngbarago nga mi ima undo unvurami tipa ko wiriki Ziazia Kekeapai na ki mbu dia kerengua kutii kpotokoyo. Na mi ima undo kura agumere i tona wirika Ziazia Kekeapai. Mi na bakere ngbarago nga mi aima fu gimi raka fu Mbori, nga gu boro naberã pare aberã.

[Gu kpiahe du ti kpewaraga 23]

“Mi adiberã tipa kaa kparakpee mbata fu mi mangi ingapai, angianga fuo manga mi he ya, na si aima manga bakere ariapai rogo gimi raka.”