Ziazia Kekeapai Rengbe Arengba Ka Aria Gaoni Raka

GINIHE nafõngbadu gu boro pambori i ayambaha nga Rastafaria ko kpe gu mangeriko nadu nibagbangaha na nikakaikaihe na ki mbu gu sogote ko adu nani kuti pusi aboro?a Na gine nasa kere paranga nanaarogoda agu abape nga ga abagi kere angua ko aria gako raka? Oni ginga agu apai agi akumba re agumbaha.

“Mi ambu soga pusi aboro.”​—HAFENI NGHAMA

GARÃRE: 34

GIMI RINGARA: ZAMBIA

MI ANGIA: BORO RASTAFARIA

AGU APAI MI AMANGI: I abatika re rogo gu bataya ani aoro be vura kurogoho Zambia yo. Nina aora be vura Namibia yo na ki kodi tiri na gu riigbu du rimoho nga South West Africa People’s Organization (SWAPO). Gi riigbu re aasovura kuti gu zogarago nangia ga aboro South Africa nga gu naazoga Namibia ti agu aregbo re.

Mi araki rogo dungu abataya aboro aoro be vura kurogoho mbu re nifogo gude daho garã re ada ni nga 15. Dungu agu aparanga nadu rogo gu riigbu nina adu rogoho re nangia gu bangbasia aboro naasongoda agu apai nangia ga gu riigbu re. I anaayugo wai furani si aida ani sogote pusi aboro.

Ho garãre aduni nga 11, mi aaida ka da nigu Kristano du rimoni nikekehe kanisa yo rogo gu kanisa nadu na agu aKristano rogoho nangia akatoriko, Lutheran, Angelican na aboro kura apambori. Gu pasita mi afura naako tipa gipai re agumba kina gupai fere naangarasanga re tipa ka manga gupai re ya. Natona ti gu regbo re kaa ndu kumbatayo, mi ada nigu boro aidanga kuti gupai nga Mbori ti ni ya. Ho garãre adani nga 15, mi atona ka kpinyemu manzigo (reggae), na kini berẽkurii wai mi nika undo bibiri aboro be gu gbegberẽ mangaapai pusi aboro anaamanga yó nani, na si ki sa re mi rimi gu riigbu nangia ga aRastafaria. Mi atona ka sonosa mangerire si du nibagbangaha na nikakaikaihe, kini vu baangi, ki mbu ri pasio, na kini nyakasipai tipa gu ranirii nga ga bibiri aboro. Ono tie, mi aambunga gu gbegberẽ sino raka mi arakaha te, watadu ka mbu bi agu avidio nga ga zuũ te. Na mi aambunga gbegberẽ afugo a te.

GU GENE ZIAZIA KEKEAPAI AʹARIA GIMI RAKA NGBAHA: Baraho garãre aduni nga 20 rogo 1995, mi atona ka berã nyanyakii kuriipa gupai si aida mi mangihe na gimi raka. Mi anaageda agu abuku dunduko nga ga aRastafaria mi anaagbiaha. Bete agu akuraha anaayugo bara apai kurogo Ziazia Kekeapai yo, ono gu gene i asakarogo apai ngbaha aarunga bangire te. Sidu, mi adiberã kaa geda Ziazia Kekeapai nitire.

Kusa, kura bakureami sa nangia boro Rastafaria afu buku fere du tipa wisigo Ziazia Kekeapai. ADezire Yekova nga agu aboro nakusi gu buku re. Mi anaawisigo gi buku re gbiati Ziazia Kekeapai nisare. Fuo bete aregbo kusa, mi agbia aDezire Yekova na mi ki susi kumbatayo na gimi wisigo Ziazia Kekeapai naayó.

Mi anyakasi tire ki mbu vu baangi gbiakuti bakere mbirabuda. (2 Akorindo 7:1) Mi agirisi tire, na ki kpe mangerire, ki mbu bi agu avidio nga ga wasiwasi kodaba na ga zuũ na ki mbu pe gbegberẽ afugo. (AEfeso 5:​3, 4) Niyangaraha, mi ambu soga pusi aboro. (Amokedi 10:34, 35) Tipa mi mangi agi ariapai re, si aidi mi mbu degature kuti agu amanzigo nanyakasapa soga kura ngbatunga aboro, na ki mbu koda tire na agu abakureami naʹasada ka zomia re tipa mi karaga tire kurogo gu raka mi aarakaha mbata.

Fuo manga mi agu aʹariapai re, mi atona ka ngera tipa gu Bambu Kindo nga ga aDezire Yekova na ki sana yó tipa ka tona wirika Ziazia Kekeapai naayó. Ho mi adiberã ni tipa ka zio bapatiza, rago angbanga ti gimi aborokporo te. Nina ape gupai fere nga, si naida mi sia kura pambori kia nga ga “aKristano” angianga ga aDezire Yekova ya. Gu kura gumere sa nangia boro birĩ zogarago atona ka bisirapa gu gimi diaberã mi adihe tipa kaa koda tire na aDezire Yekova.

Ono tie, pa wirika mi wai Yesu anaamangapai na aboro, na kini mangi gako arugute rogo gimi raka aundo re mi hi agu asogote aboro aasoga re nani gbiati asawia. Ho mi aaringbisa gupai ni aDezire Yekova anaayugoho fere na gu du rogo Ziazia Kekeapai, mi abi gupai nga mi ima gbia ndikidi pambori. Nikpiapai, i nga agu aboro namangasunge kuti gu zinahe du rogo Ziazia Kekeapai nga aboro tungusipai fu akurayó. (Matayo 28:19, 20; Amokedi 15:14) Na i arimisongo tiyo kurogo agu apai nga ga birĩ zogarago te.​—Atambuahe 146:​3, 4; Yoane 15:17, 18.

GU UNDO MI NAGBIAHA: Pa wirika mi wai ka raka ringbisihe kuti agu arugute nga ga Ziazia Kekeapai ima undo re ngba dungu agene. Nikpiapai, pa mbu mi vu baangi aima undo re ti gbarasa bakere marã gene baangi yo na adiwi dunduko. Maere baangi naayengo na akpiapai berewe ku bangire yo te. Berãre gbiati kpotore ima ngba kisusi gu nadumbata.

Gimi raka awere na rogoyo ti ni, na si nga gupai mi aima tona ningere tipaha tona kinaho mi aduni niwiri paranga. Na gu nyakipaha dagba agi apai re dunduko nga, mi nabi tire awere nga mi ima mbeda na Mbori.​—Yakoba 4:8.

AGU APAI MI AMANGI: Ho mi aduni tooni, avungure aarakanga rogo bangisa ba sa te. Mi araki rogo rukutu agbata, rogo kikindigihe, na ki raki a misioni yo tuturũu na gbata tipa bete regbo. Wo mi naatingidapa gu wene aregbo ani anaadiaha na aunvura nina na awiriyo kaa bafa ime, kaa manga anyaa, na kaa tuko abaga na kini seke angua, gbiati gu kura apai.

Buba angia wene batakpata, na ko atona ka yugo takpata fere mbure kindi nikina wiri gude. Zuũ nangia gimi sino raka. Ho garãre aduni nga bawe na biata ka dakuti bawe na ribua, gimi sunge angia bakere mbira buda ba mbiraha yo. Wo ani anaagbata aboro tipa ka takpata naayó. Ani anaamangasunge na asape gbiati akari tipa ka ta aboro 20 watadu susihe.

Mi agbia marã rogo baga kere angua gbiati baga agu ahe abamangisunge ba rugusa akurungba yo anaadĩhe. Agi ababagi kere angua re anaafu gu sunge fere nga mi naarogoda gayó abape be aboro, na mi kini ba iriwo re tiyo nigundesi mi yó na abundu. Gimi sásá adu nga, mi naida kadu nibaimi aboro. Gu diaberã mi ada kuti ni angia i naimo re watadu mi naimo boro.

GU GENE ZIAZIA KEKEAPAI AʹARIA GIMI RAKA NGBAHA: Mi agipai tipa aDezire Yekova ho mi aasona ni. Mi natingidapa wai mi asana nina ho garãre asusi 20 ni singia ri iningo wiripai tipa wari du aDezire Yekova ni. Fuo susa arame ue, Dezire Yekova du rimoko nga Dixon angoka gaani ngbadimo. Fuo fura ani naako tipa wiri guru regbo, ko ayambu re tipa mi ye kupati gu dunguratise nga ga aDezire Yekova. Mi andu kupati gu dunguratise re, na agarã susi awere 20 wa mi atona nduge koyo. Agu asanahe dunduko nadu ngbare, aDezire Yekova amangisunge na Ziazia Kekeapai tipa ka karagapai fere kuti ni.

Rago angba tire ka ino gupai nga, Yekova na kina nyemu aboro tiko wa du yó dunduko nibasasa, zavura azanga sinombori a. (2 Petero 3:9) Mi aye ka ino gupai nga, ko nga gu Buba nangerafuo re ninyemuse, na ho a ka boro adunga ni ka ngerafuo re ya. Mi aukaga kina omere ho mi aini gupai nga, ko rengbe arengba ka mbupai fere ti gimi ingapai ka mi mbuhe. Gupai du rogo AEfeso 4:​22-​24 amangi ariapai rogo gimi raka. Agu averesi re anyakasi re mi mbu ‘gu sinore nadumbata’ na ki “ukadi gu vovo boro, fu yo ni ku sangba Mbori yo.”

Si adire nga gbanga regbo mi aria gimi sino raka. Mi anaasungo vuru poso yo naabaha zanga dia kerengua kutii kpoto re yo, ono fuo koda mi tire na abakureami ti digido poso, mi anidihe berewe. Mi akparia gupai nga, si naida mi guari pati agu abakureami re kusayo ka si du nga mi naida ka giriso gimi sino raka, sidu, mi adiberã ka ga kurogo gu kura gbata. Kura abakureami asana re tipa ka gasa re kurogo gu ba mi andu kurogoho na mi ki idihe fuyó. Ho ani aandu ni, i atona ka vu baangi, na i ki fuhe fere. Mi agumba gupai fuyó nga, ako, mi ima mbu ngbatunga gu raka re, na ani akparaka naayó ho ani adani ngbanda kporo yo. Fuoho aaturongo te, mi ki gi payo nga i ndu na bundu ki dĩ marã baigo marã yo.

GU UNDO MI NAGBIAHA: Fuo kpara mi tire kusayo ti agu abakureami re, si adu fere taata tipa mi mangi ariapai rogo gimi raka. Mi azi bapatiza rogo gu garã nangia 1989. Fuo zio mi bapatiza, dawire, nina, gbiati buba akoditiyo na mi tipa ani naairiso Yekova.

Mi mangi garã awere 17 fuo dia mi dee na mi awere na bawene agude bere biata. Mi ima wirika wai rengbe mi ka za tire ti zinga, zavura ho boro naimisi ngbadure ni. Na mi wirikipai tipa ka kpinyemu aboro dunduko na angbatungayo dunduko gbiati afugoyo nibasasa. (Yugoti 7:9) Mi naabi tire nga afugo Yesu nga kina boro rengo tipa pare. Ko ayaa: “Ka oni nye na gi pai, oni du adu tie ni gimi abawiriki ni rengo; oni aína rengo aina, ki ra ni rironi be rengo.”​—Yoane 8:31, 32.

[Gu rukutu kekepai du bandu waraga yo]

[Gu kpiahe du ti kpewaraga 9]

“Mi ima wirika wai rengbe mi ka za tire ti zinga.”​​—MARTINO PEDRETT

[Gu kpiahe du ti kpewaraga 9]

GARÃRE: 43

[Gu kpiahe du ti kpewaraga 9]

GIMI RINGARA: AUSTRALIA

MI ANGIA: BABAGI KERE ANGUA

[Gu kpiahe du ti kpewaraga 9]

Tipa mi mangi ariapai, si aidi mi mbu degature kuti agu amanzigo nanyakasapa soga kura ngbatunga aboro

[Gu kpiahe du ti kpewaraga 10]

Wo ani anaagbata aboro tipa ka takpata naayó. Ani anaamangasunge na asape gbiati akari tipa ka ta aboro 20 watadu susihe