Gu Nyemuse Duti Kristo Nasa Rani Ani Duna Nyemuse
“Yesu . . . nakpi nyemu gu gako aboro akpi nadu zegino, ko anakpi nyemu yo akpi kindi dati yangara rago.”—YO. 13:1.
1, 2. (a) Gini kpiapai Yesu amoihe rogo nyemuse? (b) Gini ngbatunga nyemuse ani nika wisigopai tipaha?
YESU amoi bawene kpiapai rogo yugo nyemuse. Agu apai nadu tipa ko, gu gene ko aamangapai ngbaha na wai ko aafura, gako yugopai, na pa kpiko nimotumo, ayugupa gako nyemuse. Ho gako raka aambeda ni ka digo auru kpotosende, ko aayugo nyemuse kindi fu agu aboro ko anaagbia yo, gbe, gako abawiriki.
2 Gu nyanyakipa kpiapai Yesu ayuguhe rogo nyemuse re, si angarasi apefuoko i naayugo kina gu bangisa nyemuse re a. Si nangarasa rani ani yugu kina gu bangisa nyemuse re fu akuarani aidipase gbiati gu kura aboro. Rogo gi papara kekeapai re, ani nika wisigo gupai rengbe agu abaakumba du rogo dungurati ka wirikaha be ga Yesu nyemuse rogo yugoyó nyemuse fu agu aboro namanga ingapai rogo dungurati. Ani nika wisigopai a tipa wai ga Yesu nyemuse narengbe ka ngarasa aKristano i yugu nyemuse fu awirinayo ti regbo fudifudiapai, ti regbo agberango, na ho du yó ni na akaza.
3. Wa si avura du nga Petero aima manga kere ingapai, gini bipai Yesu adu nani tipa ko?
3 Rogo gu yuru nadumbata fu kpio Yesu, gu gako bawiriki nangia Petero atikango ko bara biata. (Mk. 14:66-72) A wa Yesu aima agumbaha, ho Petero akaragatiko ni, ko ambupai ambu fuko na ki fu bakere sunge fuko. (Ruka 22:32; Amo. 2:14; 8:14-17; 10:44, 45) Ginipai ani awirikaha ti ga Yesu bipai koyo du gu boro ni mangi kere ingapai?
Ani Duna gu Bipai Yesu Adu Nani Tipa Ingiingi Aboro
4. Rogo gini gene rengbe ani ka yugu gu ngbatunga nyemuse Kristo adu nani?
4 Nibi agu apai naida ani du na gu bipai Kristo adu nani tipa ingiingi aboro, gu kpakara gbe nga gu du tipa gu boro mangi kere ingapai kporo watadu rogo dungurati. Si nafu kina gberarago nga, wa gi ga Satana zegino re ambeda ka digo, gu toro nga ga zegino nagberesa sino aboro kina kumbatayo. Gu sakparakpa du aboro nani na gu iraira bipai du yó nani tipa ruru mangapai na irairaha, si rengbe ka maapai kurirani wa du ani nibasasa dunduko, na ki ká na ani ti manga rurupai. Rogo bambata saka kama agarã, gu kura aboro kinaho i akusiyó kusayo rogo gu dungurati nga ga aKristano na i ki fu rugute fu agu akurayo. Kina gu bangisapai re du areme. (1 Kor. 5:11-13; 1 Tim. 5:20) Wa vura duhe wo, ho abaakumba ayugo nyemuse ni fu boro-ingipai, nga ngbatunga gu nyemuse Kristo adu nani, si na bakere sangbanaha kurii gu boro-ingapai re.
5. Wai rengbe abaakumba ka wirika gu bipai Yesu adu nani tipa ingiingi aboro?
5 Wakina Kristo, si naida abaakumba naabi gu ga Yekova arugute du tipa ruru mangapai na nyanyakipaha. Pa mangayó ho wa gure nayugopa gu zera, weneringise, gbiati nyemuse du Yekova nani. Ho boro namangi ndikidi saberã ni na ‘kpotoniyo kidu na rungo na toro ní kini imi aima’ mbiko gani ingahe, si arengbanga kadu nimbumbupai fu abaakumba i ‘rugu ngbatunga gu boro re rogo gu sino nga ga zera’ te. (Tam. 34:18; Gara. 6:1) Ono ginipai rengbeyó ka manga tipa gu boro naida kadu na ranirii zanga giasangbaa?
6. Ginipai si aida abaakumba nehe ho i mangapai ni na gu boro mangi irairapai, na tipagine?
6 Ho bamangi irairapai asoga agu arugute ni nga ga Ziazia Kekeapai watadu ka asada ka bira kina kura aboro tipa gani irairapai, si rengbe arengba ka imisa ngbadu abaakumba. Pa inoyó gu gbegberẽpai gu boro re namangihe, si rengbe ka sayo i gumba kina gu bipai du yó nani tipa ga gu boro re mangapai na asino ní. Ono tie, zinga naye na gbegberẽpai, si ayugongo “ga Kristo berã” te. (1 Kor. 2:16; oni gedi Yakobo 1:19, 20.) Yesu aza agu aboro nadu ti ragoko na agu afugo nadaada ki zanga pe gupai fuyó ka imisi yó watadu ka fudi yó. (1 Pet. 2:23) Kuba gure, fugoko gbiati gako mangapai azakigene fu amangi irairapai i saberã yó na ki karagatiyó koyo du Yekova ni tipa ko idi na gayó pai. Nirengo, gu banguapai Yesu aye ti ni ku auru kpotosende no nga “ka batasa aboro ingapai.”—1 Tim. 1:15.
7, 8. Gine rengbe ka undo abaakumba ho i asarangbanga ni?
7 Wai rengbe ga Yesu kpiapai ka aria gu bipai du ani nani koyo du agu aboro ni i nafu rugute fuyó rogo dungurati? Oni tingidi gupai nga, agu arugute nga ga Ziazia Kekeapai i asarangbanga gu boro mangi irairapai rogo dungurati kuti ni, si tipa ka banda akandoro na ka undo gu boro mangi ingipai tipa ní sa gani berã. (2 Kor. 2:6-8) Si nafu kina gberarago nga, agu aboro aidanga ka sa gayó berã ya, i nakusa yó kusayo rogo dungurati. Ono wa vura duhe wo, ani nagbia ngbarago agbia ho ani abi bakere bange agu aboro ni i akusiyó rogo dungurati i nikaragatiyó fuo Yekova berewe kurogo gako dungurati. Ho abaakumba ayugo gu sino ni duwa ga Kristo fu gu boro re, i nasaha funi taata ní mbakadi asino ní na ki sa gani berã. Gizo kumbatayo, agu amangi irairapai re arengbanga ka tingidapa agu arugute abaakumba afuhe fuyó rogo Ziazia Kekeapai dunduko te, ono gupai i nika tingidaha nikangia wai abaakumba afu irisa fuyó na ki mangiyó rogo nyemuse yo.
8 Abaakumba duwa ka i duna “zuzu toro” tiyo gbiati gu nyemuse duwa ga Kristo ho i amangapai ni na gu boro mangi ingapai ka ní aidanga ka sa gani berã ya. (Gara. 5:22, 23) Si aidanga i gu agu nibasa tipa ka kusa gu boro mangi irairapai kusayo rogo dungurati te. Si naida i yugu gupai fu gu boro re nga, i nakpinyemu gupai akpi nga ní karaga tiní berewe fuo Yekova. Sidu, ho gu boro-ingapai re asa gani berã ni kusa wa gu dunguyo naamangaha, ní natambua Yekova gbiati agu ‘agamahe du rogo aboro yo’ nga agu abaakumba nasaha funi taata ní karaga tiní kurogo dungurati.—Ef. 4:8, 11, 12.
Oni Yugu gu Nyemuse Duwa ga Kristo Rogo Gi Yangada Areme Re
9. Oni funga kpiapai sa naayugopa wai Yesu anaamanga gako bawiriki rogo nyemuse.
9 Ruka akepa gu bangua mangapai nadu rogo ga Yesu nyemuse. Yesu aima inoho nga, fuo bete regbo ngbutuko, agu abanzengere nga ga aRomo yo nika ke Yerusarema kirikiri ka ba kura kusayo adunga ya. Mbiko nyemuse, ko aza gako abawiriki ki yaa: ‘Ho oni ka bi Yerusarema ni i nakisihe kirikiri na aborovura, oni ki inihe ya, rago gbarasaha mbedi.’ Ginipai si aaida i mangihe? Yesu afu wene arugute fuyó tipa gupai nika manga kumbatayo. Ko ayaa: “Agu aboro ka du Yuda yo i ki oro ku abaagangara yo; agu yo ka du bakporo yo i guari yo; agu yo ka du ringara yo ka i rimi nga ku rogo bakporo yo ya. Bambiko gi rago re nga rago irabape, ya i digisi agu apai du ni keke he dunduko.” (Ruka 21:20-22) Fuo ke aRomo pati Yerusarema rogo 66 F.B.K., kina agu aYuda sa nadu na giasangbaa nairisi agi arugute re.
10, 11. Wai pa makia ani gu gene agu aKristano nadumbata akuru Yerusarema yo ngbaha aundo rani ani mbakaditirani tipa gu “bakere gberãngbi” du kumbatayo?
10 Ho aKristano aakura ni kusayo Yerusarema yo, si aidi i yugu gu nyemuse fu akurayó duwa ga Kristo a wa ko anaayugoho fuyó. Si aidi i undo akurayó aundo na agu ahe zingoho anaamanga yó. Ono gi ga Yesu sangbanebi re adu na gu kura paparaha si adu nga si nika digo gizo, angianga kina pa gburuwa Yerusarema gbua ya. Yesu afura a tipa pai kumbatayo ki yaa: “Ni gu rago re bakere gberãngbi nikadu, wa zegino aenge da [ku] awere si adu nga wo te, oó, si adú nga wo berewe a te.” (Mt. 24:17, 18, 21) Si rengbe kadu nga mbata fu “bakere gberãngbi” na ti gu regbo si nikaa manga, ani nika gbiatirani agbia na akpakarapai gbiati zingo agu ahe nasongoda raka. Padu ani na gu bipai duwa ga Kristo nika undo rani ani hi agu akpakarapai re.
11 Ti regbo gu bakere gberangbii re, si aida ani yugu kina boro ndikidi nyemuse fu akuarani wagu nadu ti Yesu. Nibi gipai re, Pauro afu arugute ki yaa: “Ani mongo nimangi gu pai ngba angba ti akuarani sa wenepai, sa pa nyakasa he. Bambiko Kristo a, ko amanga nga gu pai ngba ti kina ko te. . . . Were gu Mbori nga ga zera ko na wasa, ko idi ya oni mongo du adu na akuaroni ti berã sa ku sangba Kristo Yesu yo.”—Rom. 15:2, 3, 5.
12. Gini ngbatunga nyemuse si aida ani sonosihe awere na tipagine?
12 Petero, nga gu boro Yesu ayugu gu nyemuse re fuko, ko azungadi akurako aKristano i ‘nikpinyemu awirinayo’ wenengai na kini ‘gisangba rengo.’ Si adu nga i ‘kpínyemu akurayó akpi kakaka kpotoyo yo.’ (1 Pet. 1:22) Areme, si naida ani sonosi gu nyemuse duwa ga Kristo susi gu ani du nani mbata. Fudifudiapai namanga ga Mbori aboro awere susi gu nidumbata. Si aidanga boro kido kuti agu apai du rogo gi zegino re te, a wa duhe niyuguyuguhe tipa gu zingo mosoro namanga rogo zegino awere. (Oni gedi 1 Yoane 2:15-17.) Kuba gure, wa duhe nga digido gi zegino re nambeda nikina boro ipo, si naida ani mbedi na Yekova gbiati awirinarani rogo dungurati na kidu na wene pagume naayó. Pauro afu arugute ki yaa: “Tipa gu nyemuse nga ga awirina oni ngbá angba yee na akuaroni; tipa irisa, oni mói kina akuaroni mbata yo.” (Rom. 12:10) Petero anyakasi gu kurapai berewe niyaa: “Ti ri apai dunduko oni du na bakere nyemuse dagba roni; mbiko nyemuse nadada badungu ingaapai.”—1 Pet. 4:8.
13-15. Wai awirina ayugu gu nyemuse duwa ga Kristo fuo gberango ti kurii awirinayo?
13 Rogo zegino dunduko, aboro ini aDezire Yekova ni agu aboro duna ndikidi nyemuse dagbayó. Oni makianga gu kpiapai du tipa agu awirina nafutiyo tipa ka ndu ka undo agu aboro bakere bavugumo agbarasipa gayó akporo Amerika yo rogo 2005. Gu kpiapai Yesu ayuguhe rogo nyemuse afõngbadu agu aboro bangeyo adu nga 20,000, i ndu ka undo awirinayo, na badungu agu aboro re araka wene raka kpuyo yó na kini mangi wene asunge-marã.
14 Rogo gu kura papara rago sa, gu bavugumo re agbarasi rago nga amairo 50 tona tingba baime ki da ku pia yo na basona kpotongba gu ime naafu ku pia yo re adu nga amitiri 10. Ho gu ime re augudi ni, badungu akporo gbiati gu kura abambu aima gburuwa. Badungu aDezire Yekova naye rogo dungu aringara ka mangasunge, aguyo aye na aũsunge na aguyo ki ye na aũdudua abambu na kidu na nyemu ka manga gu ngbatunga asunge dunduko si aaida i mangihe. Awirinarani ni adee nga awiri vuse sa ni adekurugbo arogo gayó ahe ki moihe kurogo gayó tooni tarambiri na ki mangi nunguro susi amairo 3,000 kurogo gu bangisa ba re tipa ka undo sunge yo. Guri nga tame anye kina rogo gu dagbarago re tipa ka undo sunge na gu rondo du tipa undo aboro, na ri awere namangasunge ni nazakigene.
15 Akporo bangehe nasusi 5,600 nga ga aDezire Yekova gbiati gu kura aboro i aduduaha kubaha watadu ka mbakadaha. Gini bipai nadu ti agu aDezire Yekova nadu rogo gu dagbarago re nibipa gu bakere nyemuse awirinayo ayuguhe fuyó? Wirina sa kpuri agburuwa aga kurogo gu bambu duna anduhe wa ga tarambiri rihe yo anaatoga atoga na gari kanunu adu nikina kpataha. Awirina adua bawene tooni bambu furi. Ri aru barangba gari bawene vovo bambu kini kpari ni aume mbiko ri aduna bakere tambuahe fu Yekova na fu awirina. Rogo gu kura aba, agu aDezire Yekova akpuyo agburuwa anye kina rogo agu abasura i adu rogoho tipa garã sa. Tipagine i amangihe ti ni wo? Mbiko i ambu gu gayó vovo abambu re fu agu awirina naye ka undo sunge. Nairiwo gu wene kpiapai nayugo wai si aida ani du na gu bipai duwa ga Kristo re.
Oni Duna gu Bipai Kristo Adu Nani Tipa Aborokaza
16, 17. Rogo gini gene rengbe ani ka yugo nani nga ani na gu bipai Kristo adu nani tipa aborokaza?
16 Kina bete rani gu gberango naye be ome zegino namangi rani. Nirengo tie, ani dunduko nibasasa gu fudifudiapai nga ga kpotose namanga rani amanga, watadu ninaamanga gaani aborokporo. Gu bipai Yesu adu nani tipa aborokaza, si nga wene kpiapai furani. Nyemuse afõngbadukoyo ko niibiyo na nunga. Ti kura regbo sa, rimbasa aboro aye na aborokaza fuko, “ko ki husi gayo akaza.”—Mt. 8:16; 14:14.
17 AKristano areme na gu ome Kristo adu nani tipa ka husa akaza ngba iiriwo gene te, ono i na kina gu bipai Yesu adu nani tipa aborokaza. I nayugoho rogo gini gene? Gu gene i ayugoho ngbaha nga abaakumba namanga mbakadapai tipa ka ndu ka bi agu awirina du rogo dungurati nawoka na ki bi gupai nga, agu awirina re nagbia gu undo agbia si aida i fuhe fuyó, nipeka yó fuo gu bangua arugute du rogo Matayo 25:39, 40.a (Oni gedihe.)
18. Rogo gini gene awirina ue ayugu gayó ndikidi nyemuse fu wirinayo, na sangbanaha angia gene?
18 Kina rengo ngaha nga, si aidanga boro du adu mbata nibakumba tipa ka manga weneapai fu kura aboro te. Oni bingo gu kpiapai du tipa Charlene garãri adu 44, naawoka be gu kaza nga kenisa na i ki pe gupai furi nga areme nye koyo furi gbua 10 ri ki kpi. Gu zingo ri adu nani gbiati gu bakere tindiro nadu kurii kumbaari asa awirina ue ni adee nga Sharon na Nicolette i ye kaa undo ri vuru gu bete areme nanye furi koyo re. ASharon na Nicolette ayugu gayó nyemuse fu Charlene dati kpiori. I angere fuori tipa aposo sita, angianga tipa arame bawe wagu munganga agumbaha ya. Sharon ayaa: ‘Si nafu kina gberarago ho boro naini gupai ni nga gi gani boro re arakanga kumbatayo te. Ono wa vura duhe wo, Yekova aima ngarasa rani. Gipai re asa rani ani mbedi na Yekova na ki nyakasi gu pagume nadu dagbarani.’ Kumbaku Charlene ayaa: “Wo mi naatingidapa gu wene undo agi awirina re afuhe furani rogo mangimangipai yo. Gupai i amangihe re anyakasi re vuru gu yangara arungo diare adu rogoho nga Charlene na ki ngarasi re ka mi dunga na bakere nunga kisusi ya. Mi nikaa tambua yó nyeanye kindi. Pa mbu yó kura gayó apai tipa ka ye ka undo rani anyakasi gimi idapase kuti Yekova na gu nyemuse du mi nani tipa gu kodatise nga ga awirina.”
19, 20. (a) Gini ga Yesu berã duna apaparaha bisue wisigi ani pai tipaha? (b) Ginipai oni nadiberã tipa kaa mangaha?
19 Rogo agu apapara kekeapai du biata re, ani wisigipai tipa ga Yesu berã duna apaparaha bisue nga gu ko adu nani tipa aboro, na wai rengbe ani ka wirika gako bipai tipa ka mangaha rogo gaani raka yo. Si naida ani du ‘nibayee aboro na ni airazerangbaduse’ a wa Yesu adu. (Mt. 11:29) Ani asadi ka manga weneapai fu akuarani, zavura ho ani abi gayó azangarengba abi ni gbiati gayó arungbura. Na si naida ani gisangba Yekova agia na kini mangi agu apai dunduko ko akpinyemuhe berani zavura ho du ani ni rogo asada.
20 Niyangaraha tie, si naida ani yugu gu nyemuse duwa ga Kristo fu awirinarani dunduko, a wa Kristo nitiko amangihe “dati yangara rago.” Ngbatunga gu nyemuse re nayugo rani nindikidi apefuoko. (Yo. 13:1, 34, 35) Nirengo, “nyemu awirina nye[nga anye] dagba roni.” (Eb. 13:1) Ka oni karaganga tironi kusayo ti yugo gu nyemuse re ya! Oni mangisunge na gaoni raka tipa kaa iriso Yekova na kini undo kura aboro! Yekova nika fu bakere maku afu furoni tipa gaoni bakere asadatise.
[Gu rukutu kekeapai du bandu kpewaraga yo]
a Oni bi gu papara kekeapai du riihe nga, “Do More Than Say: ‘Keep Warm and Well Fed’ ” rogo gu Ngbaõbambu Sinziri nangia ga Tanvuo 15, 1986, rogo pa-Ngirisi.
Oni Rengbe ka Sakarogoyo?
• Wai rengbe abaakumba kadu na gu bipai Kristo adu nani tipa ingiingi aboro?
• Tipagine duhe ti ni furani ninyanyakipa pai ani wirika gu nyemuse Kristo adu nani rogo gi yangara areme re?
• Wai rengbe ani ka yugu gu bipai Kristo adu nani tipa aborokaza?
[Gu kpiahe du ti kpewaraga 19]
Abaakumba na nyemu gupai nga ingiingi aboro karagatiyo koyo du Yekova ni
[Gu kpiahe du ti kpewaraga 21]
Wai agu aKristano nadu Yerusarema yo ayugu gupai nga, i aduna gu bipai Yesu adu nani?
[Gu kpiahe du ti kpewaraga 22]
Aboro ini aDezire Yekova ni agu aboro duna gu nyemuse nadu ti Kristo