Oni Yugu gu Sino Berã Nga Ga Kristo

“Were, gu Mbori ninaafu hipai na wasa idingaha fu roni oni duna kina gu bangisa sino berã dagbaroni nadu ti Kristo Yesu.”—AROMO 15:5, NW.

1. Waigu rengbe ga boro sino ka duna ome kurii gani raka?

SINO aboro nasa raka si duna bakere kparakparapai tini. Gu sino nga ga du zezeree na gu sino nga ga du ngangaraa, gu sino nga ga berã weneapai na gu sino nga ga berã gbegbereapai, gu sino nga ga sovura na gu sino nga ga undo dagbatise, gu sino nga ga kpakanahe na gu sino nga ga duna tambuahe rengbe ka duna ome tini gbe kuriipa wai boro amanga apai na si rengbe ka du a na ome kurii ga kura aboro karagapai funi. Ho du boro ni na wene sino, ni rengbe ka duna ngbarago zavura rogo agu apai duni kpakarakpakaraha vurũ. Tipa gu boro duna gbegbere sino ti ni, pai ho duni wenehe bangiri ni te—zavura ho duhe ni nirengo nga—raka ni wenehe vurũ.

2. Waigu boro awirika asino?

² I rengbe arengba ka wirika sino—gu wenehe watadu gu gbegberehe. Nirengo, i du wa ka i wirikihe awirika. Ho gu buku nga Collier’s Encyclopedia afura ni tipa gu gude vungu yo ni bambedaa, si nayaa: “Agu asino ni yangaraha nika du ti gu gude re, ni du wa ka ni gbiaha agbia watadu ka wirikaha, a wa kina gu du ni wa ka ni gbia fugo aboro watadu ka wirikaha watadu ka wirika gu kura birĩ mangapai.” Waigu ani awirika asino? Wa vura duhe nga dungu apai gu duho nafubee tipa wirikaha, gupai duna ome tini gbe kurii boro nga gu rago du ni rogo na agu aboro ni akoda ti ni na yo. Gu buku gumba yo paha kuari re nayaa: “Gu sino nga ga agu aboro ani akoda tirani na yo dawedawe, ani nawirikaha watadu si narimo kurogoraniyo, wa ka i moi agude dagba akurayo i wirikipai be akurayo.” Kutu agarã kusayo, Baibiri agumbapai wa kina gure niyaa: “Gu boro nata na boro tatamana ni adú ni iratatamana a, ono gu badiata nga ga mumungo aboro, ima azía yo wa sa.”—Asanza 13:20; 1 AKorindo 15:33.

Kpiapai Tipa Ruru Sino

3. Da nangia wene kpiapai rogo gani sino, na waigu rengbe ani ka wirika ko?

³ A wa duhe rogo apai dunduko, kinawo a duhe nibipa sino, Yesu Kristo amoi bawene kpiapai. Ko ayaa: “Mi yugu [kpia]pai fu roni, oni nimangi wa mangi mi fu roni.” (Yoane 13:15) Tipa ka du wa Yesu, ani du wa ka ani wirikipai mbata tipa ko.a Ani nawirikapai tipa ga Yesu raka na gu berã nga kaa manga gupai gu mokedi nangia Petero ayaa ani nimangihe: “Gi nga gu pai i ayambu roni kuti ni re: [nga] Kristo ahi pai a tigako tipa roni, ki he kpia pai fu roni, oni peke fuo ko.” (1 Petero 2:21) Gaani sasa nga ka du bakere gbe wa kina Yesu, a wa rengbe omerani nani. Gure nakoda sonosa gako sino berã.

4, 5. Gini ngbatunga ga Yesu sino berã nyakasi yo paha rogo ARomo 15:1-3, na waigu rengbe aKristano ka wirika ko?

⁴ Duna ga Kristo Yesu sino berã nakoda ginipai? Kapita 15 nga ga ga Pauro waraga fu aRomo naundo rani ani karagapai sa gu sanahe re. Rogo gu bambata bete averesi du rogo gi kapita re, Pauro nafura tipa gu sino Yesu gbaari akuraha ho ko agumba gupai ni nga: “Agu rani du nyanyaki ani ka hi gu mumungo pai ahi nga ga rurungbura aboro, ka ani amanga nga gu pai ngba ti kina rani ya. Ani mongo nimangi gu pai ngba angba ti akuarani sa wenepai, sa pa nyakasa [ni]. . . . Bambiko Kristo a, ko amanga nga gu pai [na]ngba ti kina ko te; ono, wa du he ni keke he ya, ‘Gu gayo gbarasarimo i agbarasa rimoro na ni si ati ku rire.’ ”—ARomo 15:1-3.

⁵ I nangarasa aKristano i mbakadi tiyo kaa mangapai ni umbasitise tipa agu azingo nga ga akurayo ni wirika yo sino Yesu, kuba gupai nga i ni kpinyemu ka sa ngbarago ti kina boroyo. Nirengo, ngbatunga gu umbasitise nga ga duna nyemu mangasunge kura aboro re nga sino aguyo “du nyanyaki.” Yesu, nga guko nanyaki rogo toroyo susi agu aboro dunduko naaraki, ayaa tipa tiko wee: “Wiri boro aye nga i nimangi pa ko te, . . . [ono ko aye] ka manga pa aboro, ka tumo dungu yo ni ungako.” (Matayo 20:28) Ni aKristano, ani naida ka da ti gupai a nga ka mangasunge akuarani, kodihe na aguyo nga “rurungbura aboro.”

6. Rogo gini gene rengbe ani ka wirika ga Yesu karagapai sa rungosi na wasiro?

⁶ Gu kura bawene sino Yesu ayuguhe angia gu kpiapai nga ga berã na mangapai nga gu dedede nanasonosa kura aboro. Ko aambunga gene fu gu gbegbere sino nga ga kura aboro si duna ome kurii gako wene sino tipa mangasunge Mbori te; si aidanga ani mbugene fuyo a te. Ho i amangi ko ni ni wasiro na kini rungosi ko mbiko iriso ko Mbori niruruhe, Yesu ahipai ni zerangbaduse zanga kpakanahe. Ko aini gupai nga agu aboro na’asada tiyo ka sa ngbarago ti gayo amurakporo nimanga yo “wenepai, sa pa nyakasa [yo],” i rengbe arengba kaa maabangiriyo tipa rungosi be gi zegino nga gu zanga ida na zanga rugatinapai re.

7. Waigu Yesu ayugu zerangbaduse, na tipagine si aida tini ani mangihe kinawo?

⁷ Yesu ayugu ruru sino rogo kura agene. Ko adunga ni gu boro zanga zerangbaduse na Yekova te, ono ni zerangbadusee, ko asungudi pa manga Gako aringbisapai. (Atambuahe 110:1; Matayo 24:36; Amokedi 2:32-36; AEbere 10:12, 13) Kurii gure, Yesu adunga na zanga zerangbaduse na apefuo ko te. Ko aya fuyo: ‘Oni wiriki pai bere’; mbiko wa ko adu ni “bayee boro,” gako rugute ananyakasa aboro na kini fu wasa fuyo. Na mbiko ko aduni “irazerangbaduse,” ko adunga ni irarẽkangose watadu iraruko te. (Matayo 11:29) Pauro nangarasa rani ani wiriki ngbatunga gi ga Yesu sino re ho ko aya ni wee: “Oni dú na gi berã rogo roni yo re, nadu rogo Kristo Yesu yo a, ko, wa ko adu ni kina Mbori [“wa ko avura du rogo kpia Mbori,” NW ]; rengba ko na Mbori adu nga bangiriko ni mosoro te, ono ko auka pa tiko ki du wa kina kanga, ki du wa boro.”—AFiripoio 2:5-7.

8, 9. (a) Tipagine si aida gupai tini nga ani mangisunge amanga tipa ka sonosa gu sino nga ga zanga gbangbati? (b) Tipagine si aidanga tini kpotoraniyo zere ka ani kpa ti manga gu kpiapai Yesu ambuhe ya, na waigu Pauro adu ni wene kpiapai rogo gipai re?

⁸ Si ni taatapai ka yaa ani naida ka mangasunge akuarani na ani naida ka maa pa gayo azingo kumbatayo fu gaani. Ono ndikidi wisigo gaani sino berã rengbe ka yugo gupai nga ngbaduraniyo aidanga ka manga gupai re nabaha te. Tipagine adungaha tini wo ya? Mbiko ni bambata pai, ani aima dia gbangbati be Adamu na Eva; ni ue pai, mbiko ani naraka rogo gu zegino nazugasi gbangbati. (AEfeso 4:17, 18) Ka sonosa gu sino nga ga zanga gbangbati nayugo gupai dedede nga ka sonosa gu gene berãpai du kia ti gaani zangarengba nga gu i abatika rani nani. Si naida nyakasatise na nyanyaki asadatise.

⁹ Gaani zangarengba nga gu du gbayaga na duna bakere kparakparapai dagbaha na gu rengberengbe kpiapai Yesu ambuhe fu rani, rengbe ka sa rani ti kura aregbo kpotoraniyo zere. Ani rengbe ka kapa a ya duna sino berã wa ga Yesu nga gasigasipai. Ono oni kparianga agu afugo Pauro nangarasa rani nga gu nayaa: “Mi ini ya rogo re yo nga borose ka wene he nye nga yo te, bambiko kpi nyemu he du na mi sa, ono manga gu pai ngba angba adu nga ya. Bambiko gu wene he mi akpi nyemu he mi amanga nga ha te ono gu gbegberẽpai mi akpi nga nyemu he ya si mi amanga. Bambiko rago nangba ti re na ga Mbori rugute ku kpotore yo. Ono mi bi kura rugute rogo apare yo, si niso vura na gu rugute du berãre yo, ki ye na mi ni zizi boro ku tii gu rugute nga ga ingapai du rogo apare yo.” (ARomo 7:18, 19, 22, 23) Rengo ngaha, ga Pauro zangarengba anakiso gene beko ti manga gupai Mbori akpinyemuhe kuho ko aidaha kuho ni, ono gako sino—nga gu gene ko anaberãpai rogo na kini mangipai rogo tipa Yekova na Gako ndika—angia wene kpiapai. Gaani kpiapai rengbe arengba a ka duni wenehe.

Ruga Iraira Asino

10. Gini sino berã Pauro angarasi AFiripoio i sonosihe?

¹⁰ Ya mo si rengbe ka du nga gu kura aboro ho na iraira berã nga gu si aida i mbakadihe? Ii. Gere nangia gupai nayugutihe gbayaga dagba bete agu aKristano nadu rogo bambata kama agarã. Rogo gako waraga fu AFiripoio, Pauro afura tipa duna ruru sino. Ko akepai ki ya: “Si adu nga wa mi ima bi he te [gu unga nga ga ngbangbaturũ mbiko bambata zingabekpio], mi ata du nga ni ziazia re a te. Ono mi nadusia ha ku mbata yo, ka ngia mi adía gu a tie nga gu i adi re kuti ni rogo Kristo Yesu yo. Awirina, mi aberã nga ha ya mi aima dia ha tigimi te. Ono gi pai sa re mangi mi nga mi natingida nga pa agu ahe nadu sa yo te, ono mi ki ndu ku mbata yo sa agu ahe du ku mbata yo. Mi nadusia gu ringbisiringbisi he du ku mbata yo sa dia gu mosoro du ti ga Mbori yambahe ari yo rogo Kristo Yesu yo. Agu rani du ziazia, ani du na berã tie kina wo.”—AFiripoio 3:12-15, pigipigi kekeapai nga gaani.

11, 12. Rogo gini agene Yekova ayugo ruru sino berã fu rani?

¹¹ Afugo Pauro nayugo gupai nga gu boro da ni Kristano, ono nga guni aberãngaha ya si naida ni sono kumbatayo ya, ni na iraira berã tini. Ni ima kpa ti dia ga Kristo sino berã. (AEbere 4:11; 2 Petero 1:10; 3:14) Ya mo gure nayugo gupai nga maabangirise ho berewe tipa ga gu boro pai re tee? Wa gu sa te. Mbori rengbe arengba ka undo rani ani aria gaani sino ka ani aida nirengo ka mangaha wo. Pauro nandu kumbatayo niyaa: “Ka oni berẽ gu pai [du] akia, Mbori ayúgo kina ha fu roni.”—AFiripoio 3:15.

¹² Ono tie, ka ani aida Yekova yugu ruru sino fu rani, ani du wa ka ani mangi gu paparaha nga gaani. Kparakpee kini wisigi Fugo Mbori mbiko gu undo naye rogo agu abuku nga ga aKristano nga gu ‘ruru kangara moyambu’ afuhe nika undo agu aboro ‘naberã gupai du kia’ tipa i sonosi ruru sino. (Matayo 24:45) Agu abaakumba nga ga aKristano yo, nga aguyo ziazia toro asia yo ‘ni ababanda ga Mbori dungurati,’ aduna ngbarago ka fu undo fu agu aboro re. (Amokedi 20:28) Nga gu tambuahe du ani nani tipa gupai nga Yekova naberãpa gaani zangarengba aberã na kini fu undo na nyemuse! Ani di gu undo re kugume.

Wirikapai ti Kura Aboro

13. Ginipai ani awirikaha tipa ruru sino rogo ga Baibiri pangbanga tipa Eyobo?

¹³ Rogo ARomo kapita 15, Pauro nayugo gupai nga berãkurii agu akpiapai naima manga bakuruyo rengbe ka undo rani ani rugu gaani sino. Ko nakepai niyaa: “Agu apai i ake mbata rogo Ziazia Kekeapai i ake he tipa gaani wirikapai, ani moi bangirani mbiko gu zera nga ga kekeapai na wasa.” (ARomo 15:4) Si aidi bete gu ga Yekova ruru amoyambu nadu mbata rugu kura gayo asino. Ni kpiapai, Eyobo adu gbe na wene sino tiko. Ko aazionga pa gbegberepai kuti Yekova te, na ko ambunga rungosi si zigizo gako kido kuti Mbori wa gu sa te. (Eyobo 1:8, 21, 22) Si ki vura du wo, ko aduna gu berã nga ga diapai riko kusayo ni rugusa pa wene sako. Yekova akedi Eriu ko undo Eyobo rogo mbakada gi sino re. Kuba Eyobo berẽ gupai nga i senge ko, ko aidi gupai ni umbasitise nga si naida ko aria gako sino berã na ko ki tona kaa manga ariapai nibasa.—Eyobo 42:1-6.

14. Waigu rengbe ani ka du wa Eyobo ka i rugu rani tipa gaani sino?

¹⁴ Ya mo ani rengbe ka karagapai wa Eyobo amangihe ka kuarani nga Kristano gumba gupai fu rani ni weneringise nga iraira sino tona kaa yugotihe tirani? Wa kina Eyobo, ka ani ya ‘zinga pa gbegberẽpai kuti Mbori’ wa gu sa ya. (Eyobo 1:22) Ka ani arungo zanga ruru ndupai, ka ani ya kpakananga he watadu kaa bi Yekova wa ko gu fudifudiapai re aye beko ya. Ani nenga gupai tie nga ga dia apai kusayo rirani, kini tingidi gupai nga ka gaani amamu vurangia kina gine rogo ga Yekova riigbu, ani kindi nga “mumungo amoyambu.”—Ruka 17:10.

15. (a) Gini iraira sino bete apefuo Yesu ayuguhe? (b) Waigu Petero ayugu wene sino?

¹⁵ Rogo bambata kama agarã, bete agu aboro nanagia ga Yesu yugopai ayugu iraira sino. Ti kura regbo sa, Yesu agumba gupai nadu ni kpakarakpakaraha ka giarogoyo. Ni karagapai kuti ni, “ho dungu gako abawiriki agi gi ni re, i ki nimo ka ya, ‘Nyanyaki pai nga gere; da ka gi he?’ ” Ziazia tie, agu aboro nafura ngba gi gene re aduna iraira sino tiyo. Sidu gayo iraira sino andu na yo i mbu degatuyo kuti Yesu. Gu tangarapai re nayaa: “Dungu gako abawiriki ki karaga tiyo be gere, ka i ata nga na ko berewe ya.” Ya mo i dunduko nadu na iraira sino tiyo? Oó. Gu kekepai re nandu kumbatayo niyaa: “Yesu ki nimo ka ya fu agu yo nadu bawe na ue, ‘Oni naguari a tigaoni?’ Simona Petero ki karaga ha fu ko ki ya, ‘Gbia, ani andú koyo du da ni?’ ” Ni gumbaha wo, Petero akaragapai sa gako sanahe nitiko, niyaa: “Mo du agu apai be ro nga ga nyenye unga.” (Yoane 6:60, 66-68) Nga gu bawene sino! Ho ani agbia tirani ni na asakarogopaiyo watadu mbakada gaani giarogo Kekeapai yo nga gu rengbe ani ti bambataha ka bihe ni kpakarakpakarapai ka idaha, anga si rengbe ka duni wenepai ka yugo gu sino Petero ayuguhe tee? Nga gu mumungopai kangiaha ka mbu mangasunge Yekova watadu kaa fura kia tipa ‘kpia wene afugo’ mbiko kina gupai gbua nga bete apai gu duho du ti tonatonaha ni kpakarakpakaraha ka rugatise nani!—2 Timoteo 1:13.

16. Gini bagbegbere sino agu abarumbatayo rogo pambori nangia ga aYuda yo nga aguyo nadu rogo ga Yesu uru ayuguhe?

¹⁶ Agu abarumbatayo rogo pambori yo nangia ga aYuda yo nga aguyo nadu rogo bambata kama agarã akpa ti yugo gu sino berã nadu ti Yesu. Gayo nyanyaki diaberã ka zanga degatuyo sa agu apai Yesu anayugoho ayugutihe ho ko azingisi Razaro ni bekpio. Tipa agu aboro dunduko duna ruru sino tiyo, ka gu iiriwopai re aduni ndikidi gopai nga Mbori nakedi Yesu. On tie, ani nageda gupai nga: “Abairamotumo ki nimo ka dungura abororondo na aFarusi, ki ya, ‘Ani amánga wãi? Bambiko gi kumba [re] namanga dungu agu apai i aina pai ti ni. Ka ani he ko were, aboro aida pa ko aida dunduko; aRomo ki ye ki di ba rani na ngbatungarani a.’ ” Ginipai i amangihe? “I atona ta bura ko . . . ni gu rago re ka imo ko.” Kurii taburo ka imo Yesu, i adiberã ka gbarasa gu unga gopai kusayo nga gu naayugo gupai nga ko angia bamangi iiriwoapai. “Abairamotumo ki ta bura ya i imi Razaro a.” (Yoane 11:47, 48, 53; 12:9-11) Nga gu gbegberepai kangiaha ka ani sonosi ngbatunga gu sino re na kini zingi watadu rago kini gbere tirani mbiko agu apai nirengo ka sa rani ani duna ngbarago! Ii, na nga gu kerepai kangiaha!

Wirika ga Kristo Wene Sino

17. (a) Rogo gini apai Daniere ayugu gu sino nga ga zanga gunde? (b) Waigu Yesu ayugu gupai nga ko aduna wingbaduse?

¹⁷ Ga Yekova amoyambu aduna wene sino tiyo. Ho asogo Daniere aasogima gupai ni nga bakindo kusi ndika nga gu naka na pa kpara boro kpee fu kura mbori watadu fu kura boro kparakusayo fu kina bakindo tipa arame 30, Daniere aini gupai nga gere arimi kurogo gako ngbanya dagbako na Yekova Mbori. Ya mo ko arengbe ka mbu kpara fu Mbori tipa arame 30? Oó, ko andu kumbatayo kindi kaa kpara fu Yekova bara biata rogo uru sa zanga gunde, a wa sinoko adu. (Daniere 6:6-17) Kinawo a, Yesu aidanga asogoko gundesi ko te. Rogo kura uru Sabiti sa, ko agbia kumba nga guko nadu na sonzorasonzora beko. Yesu aima ino gupai nga ka ko husi boro rago Sabiti, rago ngbanga ti dungu agu aYuda nadu ho te. Ko asana yo ziazia i gumba gupai i aaberãha tipa gupai re. Ho i aka ni, Yesu andu kumbatayo na husa gu kumba re. (Marako 3:1-6) Yesu akaraganga tiko kusayo ti manga gu sunge ko ainihe ya si nga rurupai ka mangaha te.

18. Tipagine kura aboro naasoga rani tini, ono waigu si aida ani karagapai sa gayo gbegbere sino?

¹⁸ Areme a, aDezire Yekova ini gupai nga si aidanga gu gbegbere karagapai naye be asogoyo gundesi yo te. Ka i amangangaha wo ya, i yugunga ga Yesu sino berã te. Dungu aboro gu duho nasoga aDezire Yekova, gu kura yo nasoga yo mbiko i na ruru inohe tipa yo te, na gu kura yo nasoga kina boro aDezire watadu gayo pangbanga. Ono ka ani mbunga gene fu gayo sino nga ga sogote si gbarasi gaani wene sino ya. Ka ani ya mbunga kura aboro i nifu rugute fu rani tipa gu gene ani amanga gaani irisombori rogo ya.

19. Waigu rengbe ani ka yugo sino berã wa kina gu nangia ga Yesu Kristo?

¹⁹ Dedede, Yesu anayugo wene sino berã tipa apefuo ko na tipa ga Mbori aringbisapai, pa mangaha wo ki vura kpakara wa kina gine vurũ. (Matayo 23:2, 3) Si naida ani wiriki gako kpiapai. Rengo ngaha, awirinarani nga kpakpa aboro, ono ani a kinawo. Na wari berewe rengbe ani ka bi wene abakure ni nga aguyo nirengo duni ruruyo, susi aguyo nga awirinarani rogo zegino dunduko? Yekova atasanga gupai nga ani girogo keke Fugo ko yo dunduko te, ono gini badona pambori duho duna giarogopaiyo susi gure? Ani bandanga ruru sino berã tie dedede, nga gu ruru sino berã nadu ti Yesu Kristo. Dagba kura apai, gere nakodapa ino wai rengbe ani ka sungudo Yekova, a wa ani ka sakapai tipaha rogo gu paparaha naye fuo gere.

[Gu rukutu kekeapai du bandu kpewaraga yo]

Oni Rengbe ka Sakarogoyo?

• Waigu du gaani sino na ome kurii gaani raka?

• Oni ringbisinga pa gu sino berã nga ga Yesu Kristo.

• Ginipai rengbe ani ka wirikaha be ga Eyobo sino?

• Gini ruru sino si aida ani du nani barabangiri rungosi?

[Gu kpiahe du ti kpewaraga 18]

Gu Kristano duna ruru sino ti ni naida ka undo kura aboro

[Gu kpiahe du ti kpewaraga 20]

Kparakpee kini wisigi Fugo Mbori naundo rani ani di ga Kristo sino berã