Ginihe Nga Ziazia Toro?

YESU asana gako abawiriki ki yaa: “Gini bakumba du dagba roni, ka wirini sana ni tipa kpokuta, ni ki fu mbia fu ni? si ngia tipa tĩo, ni ki fu wo fu ni? Ka ni sana he tipa parakondo ni ki fu ngerembia fu ni?” (Ruka 11:⁠11, 12) Ri atĩo na aparakondo aima ngba ti agu agude nadu Gariraya yo. I aima ino guhe nangba tiyo.

Yesu ayawee si naida ani kpatagara kuti sanahe kindi tipa ziazia toro, wakinagu gu gude duna gomoro naasanahe tipa riahe. (Ruka 11:⁠9, 13) Pa ruga ani tirani naapa ziazia toro, naundo rani ani ini nyakapaha rogo gaani raka. Ani wisigingo pai tipa gupai nzunzu Ziazia Kekeapai ayugoho tipa ziazia toro.

“Tandu Nga ga gu Ko Zogo Aboro Dũ”

Ziazia Kekeapai nayugo gupai ziazia nga, ziazia toro nga gu ome Mbori amangasunge nani tipa ka nyasa gupai ko akpinyemuhe. Ho gu maraika nga Gaburere atingidi gupai ni fu Maria nga ri nika vunga kumbagude wa ri avurangia ngasudee, ko ayaa: “Ziazia Toro nikaye sa ro, [watadu] gu tandu nga ga gu ko zogo aboro dũ nikadada ro; si du i ka ya ti ni ti gu gude mo ka vunga ko, Ziazia ko, nga Wiri Mbori.” (Ruka 1:35) Ringbisihe kuti afugo Gaburere, ziazia toro nga gu “tandu nga ga gu ko zogo aboro dũ.”

Kina ngbatunga gu bipai re a du rogo Ziazia Kekeapai rogo kura aba. Gu nebi nangia Mika ayaa: “Mi du na tandu, [watadu] gu Toro nga ga Yekova hisi re.” (Mika 3:8) Yesu akido gako abawiriki ki yaa: “Oni adía tandu ho Ziazia Toro ka ye ni ku ri roni.” (Amokedi 1:8) Gu mokedi nangia Pauro agumbapa “tandu Ziazia Toro.”—ARomo 15:⁠13, 19.

Fuo duhe tie were, gini digisopai da ani kuti ni nibipa gupai gumba ani he kuari re? Bakere kparakparapai ho dagba ziazia toro na ga Mbori ome te. Ziazia toro nga ga Mbori ome-mangaapai. Nairiwo wai kii gu ome re! Ani arengbanga ka rugatirani naapa gu ome i ambakadi haurago nani te. Vurube gu nebi nangia Yesaya, Yekova agumba fugo nangarasa rani ani berẽ kurii gupai naye re ki yaa: “Oni túka bangironi ku ari yo gbe ka bi nga: da nafu agi ra re? Ko nakusi ra na rimbasara ni gedigedi ra, ko nayamba ra dunduko ti rimora; mbiko gu babakere ome nga ga gako tandu, na mbiko ko nanyaka rogo tandu yo, a nga gu ru sa nakpa te.”—Yesaya 40:26.

Ziazia Kekeapai nayugo gupai nga, haurago na agu ambakadapai du rogoho dunduko, si ho mbiko gu “babakere ome nga ga gako tandu,” watadu gu ome nga ga gu Mbori duna tanduapai dũ. Si tie ziazia nga, ga Mbori zaaza ome nibakerehe, naapa raka ani naru riihe.—Oni bi gu sanduki du riihe nga, “Ga Mbori Toro Tingba Sunge.”

Yekova rengbe ka mangasunge na gako ziazia toro tipa ka manga dungu apai wa gu ko amangisunge nani ka kusa agu ahe du rogo haurago. Ono ko namangasunge amanga nani tipa ka undo aboro. Ziazia Kekeapai na badungu akpiapai rogoho nayugo wai ga Mbori toro afu ome fu gako amoyambu.

“Ga Gbia Toro ti Re”

Gu sunge tungusapai Yesu amangihe nafu mboimboi wai ga Mbori toro narengbe ka undo gako amoyambu. Yesu aya fu aboro Nazareta wee: “Ga Gbia Toro ti re.” (Ruka 4:18) Ginipai Yesu adigisihe “ni gu tandu nga ga Ziazia Toro” re? (Ruka 4:14) Ko ahusi akaza ki rugusi abazigizo na ki rigi akutu aboro nadu na gomoro na tooni kpakuto na bete atĩo na ko azingisi aboro bekpio. Gu mokedi nangia Petero aringbisipa Yesu ki yawee ko “nga gu kumba Mbori anayugo . . . agu apai du na tandu na iiriwo apai na agu apai i aina pai ti ni” rogo ko yo, mbiko “Mbori anamanga ha rogo ko yo.”—Amokedi 2:22.

Ziazia toro arengbanga ka manga gi iiriwoapai re ti gi gaani regbo re te. Wa vura duhe wo, si rengbe arengba ka manga iiriwo apai tipa rani. Yekova nafu gako toro fu gako amoyambu na nyemuhe a wa Yesu akido gako abawiriki. (Ruka 11:13) Were, gu mokedi nangia Pauro ayaa: “Mi rengbe na manga apai dunduko rogo gu ko nanyakasa re.” (AFiripoio 4:13) Ya mo ziazia toro rengbe ka mangapai rogo gaoni raka? Gu kekepai naye fuo gere nika karagapai sa agi asanahe re.

[Gu kpiahe du ti kpewaraga 5]

Ndu gupai adunga ziazia toro ti ni niboro ya

Ziazia Kekeapai naringbisa ziazia toro kuti ime. Ho Mbori akido avuruko ni naapa agu amaku du fuyo kumbatayo, ko ayaa: “Mi aúka ime ku ringara gomoro ime, na mai kpaima ku ri ugusende; mi aúka Torore ku ri ngbatungaro, ki fu gi maku fu atitaro.”—Yesaya 44:3.

Ho Mbori aúka ga toro ni kurii gako amoyambu, i ‘nahi be ziazia toro.’ Yesu, Yoane Bapatiza, Petero, Pauro, Barunaba, gbiati agu abawiriki dunduko nadunguratiyo rago Pendekote rogo gu garã nangia 33 F.B.K., i naringbisa payo ya i angia agu aboro dunduko nahiki be ziazia toro.—Ruka 1:15; 4:1; Amokedi 4:8; 9:17; 11:⁠22, 24; 13:9.

Ani makianga gupai nga: Ya mo i rengbe ka ‘uka’ boro kurii dungu aboro nibasasa? Ya mo bangisa boro rengbe ka ‘hiiso’ badona nga ga aboro? Ka pe rengo, ka pai mangingo wo te. Ziazia Kekeapai nafura tipa aboro ya i ahiki be tatamana, be giarogopaiyo watadu be ndikidi inohe, ono si ayanga wee boro ahi be kura boro te.—Gate 28:3; 1 Abakindo 7:14; Ruka 2:40; AKorosaio 1:9.

Gu fugo Giriki i asaha nga “toro,” si nga pneuʹma du rogoho yo a nga, gu ome i abingo ho ya. Buku sa nayaa: “Bambata rogoho yo nga yuge . . . onga; gbe, guhe du wa yuge i abingo ya du na bakere ome ti ni.”—Vine’s Expository Dictionary of New Testament Words, gu fugo nga pneuʹma.

Si ziazia tie nga, ziazia toro nga boro te.a

[Gu rukutu kekeapai du bandu kpewaraga yo]

[Credit Line]

Photodisc/​SuperStock