Tipagine Si Aida Ga Mbori Toro Ngbe Ti Ni Furani Kumbatayo?

“Mo nga gi Mbori! Mo niídi he ga wene toro ngbe fere ku mbata yo.”​—TAM. 143:10.

1. Gini undo si aidaha ho boro andu ni kurogo gu ba ní aadanga mbata rogoho ya?

ONI berẽnga gupai nga oni nandu kurogo gu ba oni aadanga mbata rogoho ya. Oni nandu na gu boro oni akido akido kutini na ní aima da mbata rogo gu ba re. Ka si du nga ní ima ino gu gene nandu kurogo gu ba re wenengai, ní yuguhe ayugo furoni. Ka oni degeturoni wenengai sa gani rugute, oni ingi nga te.

2, 3. (a) Gini he Yekova amangisunge nani bakuru kusayo? (b) Tipagine si aida ga Mbori toro ngbe ti ni furani kumbatayo rogo raka yo areme?

² Ani naida he aida si ngbe furani mbatayo rogo gaani raka. Tonatona averesi nga ga Ziazia Kekeapai nafura tipa gu he rengbe ka ngbembatayo furani. Gu kitabu nga Bambata Pai nafura tipa gupai Yekova amangihe bakuru kusayo niyaa: “Ho rago aenge ni Mbori afu ngbangbaturũ na kpotosende.” Ko amangisunge na gako toro tipa ka kusaahe. Ziazia Kekeapai nayaa: “Ga Mbori Toro ki niyanga ayanga.” (Bam. P. 1:1, 2) Gu toro re nga gako bakere zaza ome mangaapai ko amangisunge nani tipa ka kusa ahe. Ani na ngbarago mbiko Yekova amangisunge na gako ziazia toro tipa ka fu unga furani na ka kusa ahe.​—Eyo. 33:4; Tam. 104:30.

³ Anga Yekova amangisunge gbua na gako toro tipa ka kusa rani te, ono ko namangasunge nani a tipa si niingbe furani kumbatayo. Wiri Mbori nga Yesu aya fu gako abawiriki wee: “Toro . . . angbe fu roni mbata yo sa rengo dunduko.” (Yo. 16:13) Gine nga gu toro re, na tipagine si aida ti ni si ngbembatayo furani?

Gu He Nga Ziazia Toro

4, 5. (a) Agu aboro idi kuti gu yugopai nga ga tirinita, gini iraira bipai du yó nani tipa ziazia toro? (b) Gini he nzunzu nga ziazia toro?

⁴ Si nawira wa agu aboro oni naagbiayo ba tungusapai yo, gayo bipai tipa ziazia toro kia ti gu nga ga Ziazia Kekeapai. Agu aboro naida kuti gu yugopai nga ga tirinita, i naberã gupai nga ziazia toro nga boro du wa kina Mbori. (1 Kor. 8:6) Ono gu yugopai nga ga tirinita re natagbagatihe atagbaga na gu yugopai nga ga Ziazia Kekeapai.

⁵ Gine he tie nzunzu nga ziazia toro? Rogo Bambata Pai 1:2, gu pa-Ebere i asaha nga “toro,” si wa ka i ya “yuge.” Wa vura duhe nga ka ani bingo yuge te, ani ima rengba ka bi gaha mangaapai. Kina wai ani abingo yuge ya ono kini bi agu apai abi si amangaha, kinawo a duhe tipa ziazia toro, ka ani bingoho te, ono ani nabi gu badungu apai abi si amangaha. Gi toro re nga ga Mbori ome ko amangaapai nani rogo aboro watadu ahe tipa ka digiso gupai ko akpinyemuhe. Ya mo si kpakarakpakara ka ida kuti gupai nga gi iiriwo ome re naye be gu Mbori Duna Tanduapai Dũ? Wagusa te!​—Oni gedi Yesaya 40:12, 13.

6. Gini nyanyakipa pai Davide asana Yekova tipaha?

⁶ Ya mo Yekova rengbe kaa namangasunge kindi na gako toro tipa si niingbe furani kumbatayo rogo gaani raka? Ko akido gu bake papara Atambuahe nangia Davide ki yaa: “Mi arába ro ki yugu pai foro ngba gu gene mo ka ndu ngba ha.” (Tam. 32:8) Ya mo Davide aidi Mbori rugu ko? Ii, bambiko ko asana Yekova ki yaa: “Mo rába re mi mangi gu pai ngba ti ro, bambiko mo nga gi Mbori! Mo niídi he ga wene toro ngbe fere ku mbata yo.” (Tam. 143:10) Si naida ani du a na kina gu bangisa nyemupai nga ga Mbori toro ngbembatayo furani. Tipagine? Ani makianga nduapai biama.

Ani Arengbanga ka Ruga Gaani Agene Nitirani Te

7, 8. (a) Tipagine ani arengbanga ti ni ka ruga gaani apai ya? (b) Gini kpiapai naundo rani ani rugu tirani na ndu gupai si aidanga ani asadi ti ni ka ruga gaani apai nitirani rogo gi gbegberẽ zegino re ya?

⁷ Bambata ndupai si aida ani mbu ga Mbori toro ti ni si niingbe furani mbatayo, si nga ani arengbanga ka ruga gaani agene nitirani te. Gu fugo nga ka ruga ga boro gene, rogoyo nga ka yugo ruru gene funi ní ndu ngbaha. Ono tie, Yekova akusanga rani na gu rengba nga ani rugu gaani apai te. Na ani nga kpakpa aboro nainga dedede ho ani aida ka ruga gaani apai ni. Gu nebi nangia Yeremaya akepai ki yaa: “Ako Yekova, mi ini he ya gu pai nga ga boro si rogo ni yo te, gu boro nata, pa ruga gani apai si rogo ni yo te.” (Yere. 10:23) Tipagine ka ani aruganga gaani apai ti ni ya? Mbori aima pe ndu gupai ani arengbanga ti ni ka ruga gaani apai ya vurube Yeremaya. Ko ayaa: “Kpotoboro yo nangi ahe ki susi ahe dunduko, si na kere kaza.”​—Yere. 17:9; Mt. 15:19.

⁸ Ya mo si arengbanga kadu nipa mungo fu boro ní guari ka ndu ku ngbakungbo yo nisani zanga ndu na gu boro ini gu rago re wenengai te? Zanga ino raka ngbakungbo yo watadu zanga ino gene rengbe ka maa gani raka ngbapai. Teketeke a, gu boro naberã gupai nga ní ima rengba ka ruga gani apai rogo gi gbegberẽ zegino re zanga mbu Mbori ko yugu ruru gene funi, ní namaa gani raka ngba kerepai. Si naida ani kpari fu Yekova tipa undo a wa Davide amangihe. Ko ayaa: “Ndure aka kuti gamo agene nyanyaki, ndure azerenga nga te.” (Tam. 17:5; 23:3) Wai rengbe ani ka gbia gi rugahe re?

9. A wa duhe ti kpewaraga 19, wai ga Mbori toro narengbe ka ngbe furani kumbatayo?

⁹ Ka ani du na umbasitise na kini kido kuti Yekova, ko fu gako ziazia toro afu si ngbe furani kumbatayo. Wai rengbe gu ziazia toro re ka undo rani? Yesu aya fu gako abawiriki wee: “Gu Mounda, nga Ziazia Toro, gu ko Buba ka keda ko ni rimore, ko ayugo apai dunduko fu roni, ki ye na agu apai ku bangironi dunduko mi agumba fu roni.” (Yo. 14:26) Ho ani akparakpee ni kini wisigi Fugo Mbori kodihe na agu ayugopai nga ga Kristo, ziazia toro naundo rani aundo ani rugutirani na gu dudunguro tatamana nga ga Yekova tipa wa ka ani ruho ka irisa sangbako. (1 Kor. 2:10) Ho gupai amanga rani ni ani naasonga gimaha aso rogo gaani raka ya, ga Mbori toro naundo rani ani ini gupai si aida ani mangihe. Gako toro naundo rani ani tingidi gu bangua arugute nga ga Ziazia Kekeapai nga gu ani aima wirikaha na ki undo rani ani ini wai rengbe ani ka mangasunge nani tipa ka manga wene adiaberã.

Ga Mbori Toro Naangbe kumbatayo fu Yesu

10, 11. Ginipai Yesu aida ziazia toro mangihe fuko, na wai gu ziazia toro aundo ko?

¹⁰ Gu ue ndupai si aida ani mbu ga Mbori toro ti ni si niingbe furani mbatayo, si nga Wiri Mbori nitiko ambu he si ngbe fuko kumbatayo. Mbata fu ye bangisa Wiri Mbori ku auru kpotosende no, ko aima ino gu sangbanebi i akehe tipa ko nga gu nayaa: “Ga Yekova Toro anyé ri ko, gu toro nga ga tatamana nga toro rugatinapai, nga toro rugapai nga toro tandu, nga toro inahe nga toro gunde ti Yekova.” (Yes. 11:2) Yesu aima ino nga raka aadunga taata auru kpotosende no fu ko te, sidu, ko aima du na nyemu gu undo nga ga ga Mbori toro kina ti gu regbo re. Oni berẽnga pa wai ko adu na kakaka nyemu gu undo nga ga ga Mbori toro!

¹¹ Fugo Yekova ada nirengo. Gu kitabu Wene Pangbanga nga ga Ruka nagumbapa gupai naamangi nibasa tifuo zio Yesu bapatiza, si nayaa: “Yesu ki ta hi be Ziazia Toro, nikaraga tiko Yaradene yo, Ziazia Toro ki ngbe mbata yo fu ko ku ngbakungba yo.” (Rk. 4:1) Ho Yesu agino riahe ni ngbakungbo yo, ko akpari na kini berẽkuriipai, si nawira wa Yekova aima ruga ko ki yugu agu apai fuko naandu ka manga ko kumbatayo. Ga Mbori ziazia toro amangisunge na berã Yesu gbiati kpotoko yo, ki rugu gako berãpai ko mangi wene adiaberã. Nisangbana gipai re, Yesu aima ino agu apai Bako aida ko nimangihe, na ko amangihe kina wo.

12. Tipagine si aida ani sana Mbori ti ni tipa gako toro tipa si niingbe furani kumbatayo?

¹² Pa ino Yesu gu undo ga Mbori toro adu nani rogo gako raka yo asako ko ngarasi gako abawiriki i sana Mbori tipaha na ki mbuhe si ngbe kumbatayo fuyo rogo gayo raka. (Oni gedi Ruka 11:9-13.) Tipagine si aida ani sana Mbori ti ni tipa gako toro si ngbe furani kumbatayo? Bambiko si rengbe ka sa berãrani si duwa ga Kristo. (Rom. 12:2; 1 Kor. 2:16) Ka ani mbu ga Mbori toro si ngbe furani kumbatayo, ani rengbe arengba kaa berã wa Kristo na kini wiriki gako kpiapai.​—1 Pet. 2:21.

Gu Toro Nga ga Zegino Ima Rengba ka Ingisa Rani

13. Gine he nga gu toro nga ga zegino, na ginipai si asa aboro i niimangihe?

¹³ Gu biata ndupai si aida ani mbu ga Mbori toro ti ni si niingbe furani kumbatayo, si nga gu toro nga ga zegino andu ka ingisa rani. Badungu aboro areme du gu toro nga ga zegino na ome kurii yó. Gi toro nga ga zegino re nasa aboro i naamanga agu apai du kia ti gupai ziazia toro asa rani ani mangihe. Kuba gupai nga gu toro nga ga zegino undo aboro i duna gu berã nga ga Kristo, si nasayo i naaberã na kini mangiapai wakina Satana nga bazogo gi zegino re. (Oni gedi AEfeso 2:1-3; Tito 3:3.) Ho boro ambu gu toro nga ga zegino ni si naaruga ní na ki tona kaa manga agu apai nga ga borose, gbegberẽ sangbanaha nakura, na kumbatayo, si ki sa gupai nga ka ní dinga kumbo ga Mbori ngbi ya.​—Gara. 5:19-21.

14, 15. Wai rengbe ani ka sovura kuti gu toro nga ga zegino?

¹⁴ Yekova ima fu gu he furani ani aidaha tipa ka sovura kuti gu toro nga ga zegino. Gu mokedi nangia Pauro ayawee, “oni nyáki anyaka rogo Gbia, na rogo gu ome nga ga gako tandu . . . ka nyaka anyaka rogo gbegberẽ uru.” (Ef. 6:10, 13) Yekova nafu ome furani vurube gako toro tipa wa ka ani sovura kuti gu bakere asadatise Satana amangaha tipa ka ingisa rani. (Yugo. 12:9) Gu toro nga ga zegino na bakere ome ti ni, ani arengbanga ka nehe dunduko te. Ono ani ima rengba ka sovura kuti ni. Ziazia toro ima du na ome ti ni, na si nika undo rani aundo!

¹⁵ Gu mokedi nangia Petero afura tipa agu aboro naambu rengo rogo bambata sa kama agarã ki yaa: “I ahe ruru gene, ki ningbuo angbuo.” (2 Pet. 2:15) Nairiwo gu ngbarago du ani nani nga “ani adi gu Toro nga ga Mbori, gu nga ga zegino te”! (1 Kor. 2:12) Ka ani mbu ga Mbori toro si ngbe furani kumbatayo na kini mangisunge na agu ahe Yekova afuhe furani tipa si banda gaani pagume naako nyanyaki, ani rengbe arengba ka manga gupai du niruruhe na ki sovura kuti gu toro nga ga gi gbegberẽ zegino re.​—Gara. 5:16.

Ziazia Toro Nakusa Wene Zuzu He

16. Gini asino rengbe ziazia toro ka sarani ani du nani?

¹⁶ Gu biama ndupai si aida ani mbu ga Mbori toro si niingbe furani kumbatayo ti ni nga si nakusa wene zuzu he rogo ga agu aboro raka yo nambuhe si niingbe fuyo kumbatayo. (Oni gedi AGaratio 5:22, 23.) Nirengo, ani dunduko naida ka yugo nyemuse fu akuarani, ka du na ngbarago, gbiati pazereda. Ani dunduko naida ka hipai nigbangaha, na kini yugu weneringise, gbiati wene sino. Si adu niwenepai ka ani du dunduko na bakere idapase, zera, gbiati zatise. Ga Mbori toro nasa rani ani duna wene asino tirani nga gu naundo rani kini undo gaani aborokporo gbiati agu aboro du rogo dungurati. Si naida ani naamangasunge amanga nyanyaki kindi tipa ka sonosa gi wene asino re, bambiko anga ngbanda gu duadu ho rengbe ani ka da ti ni ani ki ya ani ima rengba be zuzu toro watadu ani ima yugoho da ku ane te.

17. Wai rengbe ani ka manga asadatise nyanyaki tipa ka yugo agu asino nga ga zuzu toro?

¹⁷ Si adu nipatatamana ani sana tirani nga: Ya mo gaani afugo na gaani mangaapai nayugo gupai nga ziazia toro nangbe furani kumbatayo na ani nakusa gaha zuzuhe? (2 Kor. 13:5a; Gara. 5:25) Ginipai si aida ani mangihe ka ani bi gupai nga ani naida undo aida tipa kadu na bete agu asino nga ga zuzu toro tirani? Si naida ani mangi bakere asadatise tipa ziazia toro ngbe furani kumbatayo wa ka ani du na agi asino re. Ani rengbe ka manga gipai re niwisigo ani pai nibasasa tipa agu asino re, nimanga ani sunge na Ziazia Kekeapai gbiati agu abuku nga ga aKristano.a Wa ani kaa bi sangbana zuzu gi ga Mbori toro re rogo gaani raka na ga akuarani, ani nika ino ndu gupai aino si aida toro ngbe furani kumbatayo ti ni.

Ya Mo Oni Nambu ga Mbori Toro Si Niingbembatayo Furoni?

18. Gini kpiapai Yesu amoihe furani nimbu ko ga Mbori ziazia toro si niingbe kumbatayo fuko?

¹⁸ Ziazia Kekeapai nagumba gupai furani nga, ho Yesu adu ni niboro ko aima inopa gu ome ziazia toro adu nani kurii gako raka. Ko aima ida si niingbe fuko kumbatayo. Ho si ani rugu ko ni ko mangipai, ko ani di agu arugute re kugume na ki mangipai kutini. (Mk. 1:12, 13; Rk. 4:14) Ya mo oni nambu ga Mbori toro si niingbembatayo furoni wa Yesu amangihe?

19. Ginipai duwa ka ani mangihe tipa ziazia toro ngbembatayo furani?

¹⁹ Areme, ga Mbori zaaza ome naruga agu aboro kindi nambuhe si niingbembatayo fuyo. Wai rengbe oni ka mbuhe si ngbembatayo furoni ngba ruru gene? Oni kpari fu Yekova ti aregbo dũ tipa ko kedihe furoni si undo roni oni mangipai kuti gaha rugahe. (Oni gedi AEfeso 3:14-16.) Oni mangipai na ngbanya kuti gaoni kparakpee nigbata oni arugute rogo Fugo Mbori yo nga Ziazia Kekeapai gako toro adu kugiipa kehe. (2 Tim. 3:16, 17) Oni irisi agu arugute si afuhe na ki mbuhe si ngbembatayo furoni. Ka oni amanga agi apai re, si nika yugo gupai nga oni na idapase kuti Yekova ko ngbembatayo furoni wenengai rogo gi gbegberẽ zegino re.

[Gu rukutu kekeapai du bandu kpewaraga yo]

Oni Natingida Memeapai?

• Wai rengbe ziazia toro kadu na ome kurii gaani raka?

• Gini nduapai duho biama si aida ti ni ani mbu ga Mbori toro si niingbe kumbatayo furani?

• Ginipai si aida ani mangihe tipa ka gbia undo dudunguro be gu ngbembatayo nga ga ziazia toro?

[Gu sura du ti kpewaraga 17]

Ziazia toro adu na ome kurii ga Yesu raka

[Gu sura du ti kpewaraga 19]

Ga Mbori toro namangasunge na berãse gbiati ngbaduse ka nungusaha