“Abadiangbare Nga Oni”
“Ka oni amanga agu apai mi arugu roni kuti ni, abadiangbare nga oni.”—YO. 15:14.
1, 2. (a) Gini ngbatunga aboro nangia ga Yesu abawiriki? (b) Tipagine duhe ti ni ninyanyakipa pai ani du ni abakurea Yesu?
APAI adu nibakiakia tipa agu akumba nasungu na Yesu rogo gu vurubambu nadu kuari. Agu awirina nangia aPetero na Yoane, i angia abaziatĩo. Matayo adumbata nga barogo marã-ngbeti dagba agu aboro aYuda anaabisira payo abisira. Si nawira gupai nga, Yakoba gbiati Yoane aima ino Yesu mbuko kindi nigude. Ono tipa Natanaere tigako, si nawiraha wa ko ainiko tipa kina wiri bete agarã gbua. (Yo. 1:43-50) Wa si avura duwo, agu aboro dunduko nadu ti regbo Pumbo Susiri rogo gu yuru re Yerusarema yo aima ida kuti gupai nga Yesu nangia gu Masiya i akido pako nga Wiri Unga Mbori. (Yo. 6:68, 69) Nirengo, rago aima ngbatiyo ka gia gupai ko agumbaha fuyó niyaa: “Mi yambu roni ni abadiangba; bambiko agu apai dũ mi agi ngba Buba mi yugu he fu roni.”—Yo. 15:15.
2 Agu afugo Yesu agumbaha fu gako ruru amokedi re, si adu fu mbedimbedi aKristano dunduko, ono “kura akandoro” rengbe arengba ka mangasunge nani a tipa yó. (Yo. 10:16) Ka si vura du nga gini ngbatunga apai du tipa rani, ani rengbe arengba ka gbia irisa nidu ani ni abakurea Yesu. Pa gaani bakure naako ima nyaka mbiko si nasa rani ani du nibakurea Yekova. Nirengo, si nikpakarapai ka mbeda koyo du Yekova ni mbata fu mbeda na Kristo. (Oni gedi Yoane 14:6, 21.) Ginipai tie rengbe ani ka mangaha tipa ka zio bakure na Yesu na ki nye ni abakureako? Ono mbata fu saka ani pai tipa gi nyanyakipa pai re, si naida ani wisigingo ga Yesu kpiapai tipa kadu niwene bakure, na ki bi ginipai rengbe ani ka wirikaha ti gu gene gako abawiriki amangihe tipa gipai re.
Yesu Nga Wene Bakure
3. Ginipai aboro aini Yesu tipaha?
3 Bakindo Soromo ayaa: ‘Irakumuko duna dungu abadiangbani.’ (Snz. 14:20) Gipai re nayugo gu bipai du kpakpa aboro nani, nga aboro nazio bakure tipa agu ahe i nika gbiaha angianga tipa agu ahe i nika fuhe ya. Yesu aamanganga pai wa gure te. Padu boro na marã beni watadu gani ba dagba aboro, si aamaanga pai rii Yesu te. Kina rengo du nga Yesu akpinyemu kura kumukokumuko kumba sa na ki yambuko tipa ko ye ka pekafuoko. Ono tie, Yesu aruguko tipa ko ndu ka baga agu ahe nadu beko na ki gamu gu kuraha fu rungorungo aboro. (Mk. 10:17-22; Ruka 18:18, 23) Aboro aainongo Yesu mbiko ko angia gu boro nanaakoda tiko na airakumuko watadu abaworimo te, ono i ainiko nigu boro nanaazio bakure na agu aboro payo adu kusende.—Mt. 11:19.
4. Tipagine rengbe ani ti ni ka ya abakurea Yesu anaaingapai ainga?
4 Nirengo, abakurea Yesu angia agu aboro nanaaingapai ainga. Ti kura regbo sa, Petero adunga na gu bipai nga ga Mbori te. (Mt. 16:21-23) AYakoba na Yoane aduna bakere nyemu pagbia ho i asana Yesu ni tipa ko fu pagbia fuyó rogo gako Kindo. Gupai i amangihe re aima imisa ngbadu kura amokedi. Na gupai nga ga pagbia re, si angia gu nyanyakipa sogote nanye dagbayó kindi. Ono tie, Yesu aʹasadi ka ruga gu iraira berã abakureako adu nani na ka ngbaduko aimanga fuyó niipo ya.—Mt. 20:20-28.
5, 6. (a) Tipagine Yesu anye ti ni kuti bakure na dungu gako yangara amokedi? (b) Tipagine Yesu ambu zio bakure ti ni na Yuda?
5 Yesu anyenga kuti zio bakurea na gu kpakpa aboro re mbiko gupai nga bangiriko aima vurari ka gene adunga beko tipa ka bi gayó azangarengba ya te. Kuba gure, gupai ko asiaha nga ka maa berãko fuo agu asinoyo nadu niwenehe. Nikpiapai, aPetero, Yakoba gbiati Yoane ati nirame rogo gu yuru i azi Yesu ka gene adunga beyo tipa ka undoko ti gu regbo asada aye fuko ya. Yesu aima ino gupai re na rago ki gberẽ tiko nani. Ono wa si avura duwo, ko abi gupai nga, i aduadu na nyemu manga wenepai, sidu, si ki sako ko yaa: “[Toro] nakpi nyemu he ni rengo, bororoni anyaka nga ya.”—Mt. 26:41.
6 Ono tipa Yuda Keriota tigako, Yesu aima mbu zio bakure naako. Wa si avura du nga Yuda amangi tiko i biko wakina wene bakure, Yesu aima inoho nga agu abakureako ko adu naayo mbata aima gberesa ngbadukoyo. Pada Yuda nibakurea zegino, asako ko du nivura Mbori. (Yak. 4:4) Sidu, Yesu aima fu gene fu Yuda ho Yesu afura ni tipa gako ruru amokedi nadu 11.—Yo. 13:21-35.
7, 8. Rogo gini gene Yesu ayugu gako nyemuse fu abakureako?
7 Yesu aamaanga berãko fuo gu ingahe nangia ga abakureako te, ono ko amangi gupai nangba tipa yó dunduko. Nikpiapai, ko akpari fu Bako tipa ko banda yó ti regbo asada. (Oni gedi Yoane 17:11.) Yesu anaaberã aberã tipa gu gayó azingo nga ga borose. (Mk. 6:30-32) Na ko anaakpinga nyemu ka pe kina agu apai ko anaaberãha fuyó te, ono ko anaadegatuko adega kuti agu apai i anaagumbaha.—Mt. 16:13-16; 17:24-26.
8 Yesu amangisunge na gako raka gbiati kpioko tipa ka undo abakureako. Nirengo, ko aima inoho nga si naida ko fu ungako ringbisihe kuti gupai ndiko aidaha tipa ka digiso gu ga Bako andiko du tipa ruru sarangbanga. (Mt. 26:27, 28; Eb. 9:22, 28) Ono Yesu afu ungako tipa ka yugo gako nyemuse. Ko yaa: “A nga boro sa du na bakere nyemuse susi gi nga, boro bagi kpioni tipa abadiangbani te.”—Yo. 15:13.
Ga Abawiriki Karagapai Angia Gine?
9, 10. Ginipai aboro amangihe tipa gu weneringise nadu ti Yesu?
9 Yesu ayugu gako weneringise rogo wai ko anaadia regbo tipa ka ndusunge aboro rogo nyemuse na rogo gama agu ahe nadu beko. Nisangbana gipai re, si ambedisi aboro koyo du ko ni na si ki sayo i nigamu ahe fuko a. (Ruka 8:1-3) Nibi agu apai naamanga fu Yesu re, si asako ko yaa: “Oni fu he, i ki fu he fu roni; si ki rengbe gbe, i asi he asi, nizigizo ho, si ki niuka auka, kina wo i ka fu he fu roni. Bambiko na gu moduka oni ka nduka he na ni, i anduka he na kina ha fu roni berewe.”—Ruka 6:38.
10 Rengo ngaha nga, kura aboro anaakoda tiyó na Yesu mbiko agu ahe i anaagbiaha beko. Gi gbegberẽ abakureako re aima mbuko ho i agianga tiyó ni na gupai ko agumbaha ti kura regbo ya. Kuba gupai nga, i kido kuti gupai Yesu agumbaha, i adi kina gbegberẽ aberã ki moihe kuriyó yo na ki mbu pekafuoko. Ono tipa amokedi tigayo, i adu niruruyo. I anaagbia tiyó na aʹasada dedede mbiko padu yó nibakurea Yesu. Ono wa si avura duwo, i amangi ome nyanyakii tipa ka songoda ko ti wene aregbo na agbegberẽhe a. (Oni gedi Yoane 6:26, 56, 60, 66-68.) Rogo gu yangara yuru Yesu aduna abakureako, ko atambua yó ki yaa: “Oni nga agu yo naadu na mi ho i aasadi re ni.”—Ruka 22:28.
11, 12. Wai Yesu akido gako abawiriki, na gayó karagapai angia gine?
11 Fuo tambua Yesu gako abawiriki tipa padu yó niruruyo, i nyenga naako te, i ambuko ki oro. Ka gumbaha niwiri guruhe, gunde be aboro nasayo i mbu gu nyemuse i adu nani tipa Yesu. Ono wa si avura duwo, Yesu aima mbupai fuyó. Fuo zingako bekpio, ko akuru fuoyo na ki kidoyo nga ko kindi nga kina bakureayo. Kurigure, ko afu ziazia sunge fuyó nga i ndu “ki sa arikaaboro . . . ni abawiriki” na kadu ni adezireko ku “digida sende yo.” (Mt. 28:19; Amo. 1:8) Gayó karagapai angia gine kuti gupai re?
12 Agu abawiriki re atungusi gu pangbanga nga ga Kindo na omeyo dunduko. Mbiko gu undohe naye be ga Yekova ziazia toro, i ahiisi Yerusarema na gayó yugopai. (Amo. 5:27-29) Gunde bekpio asanga yó i mbu manga gu sunge Yesu afuhe fuyó nga ka sa aboro ni abawiriki te. Fuo dungu agarã susi tingbafuo gu regbo Yesu azinahe fuyó re, gu mokedi nangia Pauro akepai tipa wene pangbanga ya i aima tungusaha “rogo arago tii ngbangbaturũ yo dũ.” (Koro. 1:23) Nirengo, agi amokedi re ayugu gupai nga i nabipa gayó bakure na Yesu na nyanyakipaha!
13. Rogo gini gene ga Yesu abawiriki ambu gako yugopai si aria gayó raka?
13 Agu aboro nada ni abawiriki, i ambu ga Yesu yugopai si mangi ariapai rogo gayó raka yo. Tipa dunguyo, gipai re adu fuyó nga ka aria gayó raka gbiati asinoyo. Bete gu vovo abawiriki re angia agu aboro nanaakodaba dagbatiyo na akurayó, nangia airabäri, ni akpibuda, watadu niʹairadii. (1 Kor. 6:9-11) Si adu fu aguyo nga i aria gu bipai i adu nani tipa gu kura angbatunga. (Amo. 10:25-28) Wa apai avura du tipa yó wa gure, i aima giasangba Yesu. I ambu gu kuru boroyo na ki ukadi gu vovoho. (Ef. 4:20-24) I aima inidotiyo na “gu berã nga ga Gbia,” na ki ima giarogoyo wenengai na kini asadi ka wirikako na gako aberã.—1 Kor. 2:16.
Zio Bakure na Yesu
14. Ginipai Yesu akidohe tipa ka mangaha ho ko nika “ye” ni?
14 Badungu agu aKristano nadu rogo bambata sa kama agarã aima ino Yesu watadu i aima biko fuo zingako bekpio. Si ziazia nga, gu momu re berãni te. Ono wai tie, rengbe ani kadu ni abakurea Kristo? Gene sa dagba agu akuraha nga ka degaturani kuti agu arugapai naye be kangara moyambu, nga agu arugapai agu awirina Yesu du nimbedimbediyo nitoro du kindi auru kpotosende afuhe. Yesu akidohe ki yawee, ti gu regbo ko ka “ye” ti ni, ko amaa gako moyambu kurii “gako ahe dunduko.” (Mt. 24:3, 45-47) Gu badungu aboro naida ka zio bakure na Kristo areme, i rogo gi riko te re. Rogo gini gene i akaragapai kuti agu arugute i agbiaha be gi riko re, nga gu mangapai nanyakasapa gayó bakure na Kristo?
15. Gine nayugo nani nga boro nikadu nikandoro watadu nimeme?
15 Oni gedi Matayo 25:31-40. Yesu ayambu gu riko nga ga ruru kangara moyambu ni awirinako. Rogo gu kpiapai du tipa kparaka akandoro ti ameme, Yesu agumbaha ziazia nga ka ani aundo awirinako, si sa wa ani naundo kinako. Nirengo, Yesu ayawee gupai rengbe ka kparaka akandoro ti ameme, si nga gu gene aboro nibasasa amanga ‘awirinako’ ngbaha. Sidu tie, gu bambata gene agu aboro duna maabangirise tipa ka raka auru kpotosende ayugopa gayó bakure na Kristo ngbaha nga ka undo gu riko nga ga ruru kangara moyambu.
16, 17. Wai rengbe ani ka yugo gaani nyemuse tipa awirina Kristo?
16 Ka si du nga oni namaabangironi tipa ka raka auru kpotosende rogo ga Mbori Kindo, rogo gini agene si aida oni yugu gaoni pabakure fu awirina Kristo? Ani makianga pai tipa agene biata. Bambata gene nga tungusapai na ngbaduraniyo dunduko. Kristo azinahe fu awirinako i tungusi wene pangbanga rogo zegino dunduko. (Mt. 24:14) Ono tie, si rengbe kadu nimbumbuhe fu gu yangara awirina Kristo du auru kpotosende i digisi gayó sunge zanga gu undo nga ga agu abadiangbayo nga kura akandoro. Nirengo, ho gu riko nga ga kura akandoro atungusapai ni, i naundo awirina Kristo i digisi gayó ziazia sunge. Gu riko nga ga ruru kangara moyambu na ngbarago be gu sunge abadiangbayo amangaha wakinagu Kristo amangaha.
17 Gu ue gene rengbe kura akandoro ka undo awirina Kristo ngbaha, si nga fu marã tipa si undo sunge tungusapai. Yesu angarasi apefuoko i zi bakure na Mbori nimangayó sunge na “gu ũkumuko nga gbegbere he.” (Ruka 16:9) Anga rogoyo nga ani rengbe ka ngbe Yesu na Yekova tipa ka zio bakure naayo te. Kuba gure, ho ani amangasunge ni na agu ahe du berani tipa ka songoda gu sunge nga ga Kindo, gure nga ani nayugo gaani nyemuse “rogo mangapai yo na rogo rengo yo,” angianga rogo kina fugo gbua ya. (1 Yo. 3:16-18) Ani nasongoda gu sunge re ho ani atungusapai ni na kini fu marã i naadudua aBambu Kindo nani na kini mbakadi agu nagberã, na ho ani afu marã ni tipa gu sunge tungusapai awirina amangaha rogo zegino dunduko. Singia gu marã ani afuhe si niwiri umbaha watadu si nikikiihe, aYekova na Yesu na ngbarago be gu gaani agamunihe ani afuhe na ngbaduraniyo dunduko.—2 Kor. 9:7.
18. Tipagine si aida ti ni ani irisi agu arugute du mburuhe rogo Ziazia Kekeapai abaakumba afuhe furani rogo dungurati?
18 Gu biata gene ani ayugo nani nga ani nga abakure Kristo, si nga degaturani sa agu arugute abaakumba afuhe furani rogo dungurati. Ziazia toro nasia agi akumba re tiibe gu rugapai nga ga Kristo. (Ef. 5:23) Pauro akepai ki yaa: “Oni gí sangba gaoni abaakumba ki nira fu yo.” (Eb. 13:17) Ti kura aregbo, si rengbe kadu furani nikpakarapai tipa ka degaturani kuti sangba agu arugute abaakumba afuhe furani rogo Ziazia Kekeapai. Pa ruga ani tirani na agu azangarengba du yó nani rengbe ka sa rani ani naabi agu apai i amangaha nga si niirairaha. Wa vura duhe wo, Kristo nga barii dungurati, ko na ngbarago ka mangasunge na agi akumba re. Sidu tie, gu gene ani amangapai kuti gayó pagbia ngbaha, si na bakere ome kurii gaani pagume na Kristo. Ho ani amaanga berã rani ni kuti gayó azangarengba ya ono kini degeturani na ngbarago kuti agu arugute i afuhe, gure nga ani nayugo gaani nyemuse tipa Kristo.
Wene Abakure
19, 20. Gine rengbe ani ka gbiaha rogo dungurati, na ginipai gu papara kekeapai naye fuo gere nika sakapai tipaha?
19 Anga Yesu nangerafuo rani kina rogo gu gene nga ga abaakumba sa te, ono ko ima fu agu anarani na awirinarani rogo dungurati ima nyaka rogo toro yo i naangerafuo rani. (Oni gedi Marako 10:29, 30.) Wai gu mangapai nga ga agumeroni adu na oni ho oni atona kodatironi ni na ga Yekova riigbu? Ani naberãha nga i aima songoda roni tipa oni mbedi na Mbori gbiati Kristo. Ono Yesu agumba gupai nga, ti kura aregbo, “avura boro angia kina gani aborokporo.” (Mt. 10:36) Ono si nafu wasa ka ino gupai nga, ani rengbe arengba ka gbia agu aboro rengbe ka mbeda na ani wa awirinarani rogo dungurati.—Snz. 18:24.
20 Wa duhe niyuguyuguhe rogo ga Pauro digisidigisi waraga fu gu dungurati nadu Roma yo, ko aima duna dungu abakure beko. (Rom. 16:8-16) Gu mokedi nangia Yoane adigisi gako waraga na agi afugo du re nga: “Mo sanango abadiangba ti rimoyo.” (3 Yo. 14) Nirengo, ko aima duna dungu abakure a beko. Wai rengbe ani ka wirika gu kpiapai nga ga Yesu na ga agu abawiriki nadu bakuru kusayo rogo zio bakure na awirina rogo dungurati? Gu papara kekeapai naye fuo gere nika sakapai tipa gu sanahe re.
Gaoni Karagapai Nga Gine?
• Gini kpiapai Yesu amoihe tipa zio wene bakure?
• Rogo gini gene ga Yesu abawiriki akaragapai kuti gako sino nga ga bakure?
• Wai rengbe ani ka yugo gupai nga, ani nga abakurea Kristo?
[Gu kpiahe du ti kpewaraga 21]
Yesu aduna nyemu ka degatuko kuti agu apai abakureako anaagumbaha
[Gu kpiahe du ti kpewaraga 23]
Wai rengbe ani ka yugo gu nyemupai du tirani kadu ni abakure Kristo?