Gu Irisombori Nga Ga Aborokporo Na Nyanyakipaha Tipa Bata!

ONI berẽnga pa wai “gu bakere rago nga ga Mbori, nga gu ko du na tandu apai dũ” nika iriwo! (Yugo. 16:14) Ka pepai nimasaku, gu nebi nangia Mika akepai ziazia tipaha ki yaa: “Abaagangara azáraga ku tii nduko yo angboongboorago adú ni sapusapu he, wa dada be we, wa agu aime ninafu ti bagitaime.” (Mika 1:4) Gini gbegberẽpai nika manga agu aboro airisonga Yekova ya? Fugo Mbori nayaa: “Agu yo Yekova ka imo yo ti gu uru re kangbayo adu tona ti digida kpotosende ku bani ki da ku bani.”​—Yere. 25:33.

Nibipa gu zahe re, si naida agu avunguagude adunga na gayo abadiarogatise ti ni ya sana tiyo tipa awiriyo nga aguyo ima sona ki yaa, ‘Ya mo awire abata ti regbo gi bakere gberangbii re?’ Ziazia Kekeapai nakidohe nga, i abata abata ka si du nga i adu na wene ngbanya dagbayó na Yekova ringbisihe kuti agarãyo ti gu regbo si nika manga.​—Mt. 24:21.

Ndu Gupai Nyakipa gu Irisombori Nga ga Aborokporo ti Ni

Wangia oni avunguagude, si naida oni bi gupai nga oni namanga ome kakaka tipa ka sonosa awironi na kini “mbu ti yo ni ga Gbia rabahe na rugahe.” (Ef. 6:4) Pa wirika oni Ziazia Kekeapai na awironi nga nyanyakipa pai. Ani naida awirani duwa agu aKristano nadu Firipoi yo nga aguyo Pauro atambua yó mbiko i aduna nyemu giasangba Yekova. Ko akepai ki yaa: “Amangure, wa oni agi sangbare dedede kina ho du ani ni na oni sa te ono awere oni gí he susi kindi wa adu nga mi na oni ya, oni mangi pa gaoni bata tigaoni ni gunde na kio.”​—Frp. 2:12.

Ya mo awironi nagiasangba Yekova zavura ho adunga oni ni ya? Na ginipai i naamangaha ho du yó ni sukuru yo? Ono wai rengbe oni ka undo awironi i bi gu tatamana du rogo ga Yekova andiko yo na kikiipaha tipa si naangbe fuyó kumbatayo zavura ho adunga oni ni naayo ya?

Gu irisombori nga ga aborokporo rengbe ka sonosa gu idapase nga ga gude rogo gi gene re. Sidu tie, ani sakingo memeapai biata nga gu rengbe ka sa gaoni wisigo Ziazia Kekeapai nga ga aborokporo si du na diabese.

Oni Naawisigoho Dedede Zanga Kpa

Ziazia Kekeapai nayugo gupai nga, rogo kura uru sa, Mbori aringbisi regbo fu agu awiriko nga amaraika i ye kubara bangiriko. (Eyo. 1:6) Kina gu bangisapai re si aida oni naamangaha na awironi a. Oni sia uru gbiati gu regbo oni nikaa manga gaoni Irisombori Nga ga Aborokporo ti ni dedede nyemu zanga kpa. Kurigure, oni sia gu kura uru ki moihe tipaha, mbiko ka tunguotunguopai mangi, ka si agberesanga pa gaoni wisigopai ya.

Wa adiwi kaa susa, ka oni tonanga gu sino nga, ani awisigoho awisigo rogo gu kura uru ya. Oni tingidi gupai nga, awironi nga gu nyanyakipa aboro dagba agu aboro oni awisigo wisigi Ziazia Kekeapai naayó. Ono tie, Satana naida ka zio yó rogo gako gbina. (1 Pet. 5:8) Ka si du nga oni mbu manga gaoni Irisombori Nga ga Aborokporo tipa ka bi kina terevizioni, vidio, watadu gu kura apai, gure nga oni zaki gene fu Satana ko du na diabese.​—Ef. 5:15, 16; 6:12; Frp. 1:10.

Oni Kodi agu Apai Oni Naamangaha Rogo Raka

Si aidanga gu Irisombori Nga ga Aborokporo nyemu du nga kina kungbo wirikapai gbua te. Oni asaditironi ka ye na gupai rengbe oni ka mangaha rogo raka. Rogo gini gene? Ti kura aregbo, oni rengbe ka sia gu riipai nabipa gu fudifudiapai awironi agbiatiyo nani. Nikpiapai, si naida oni rimisipa wai rengbe oni ka tungusapai fu kura aboro kurogo gaoni wisigopai? Rago naangba ti agude ho i amanga agu apai ni ini yó ka mangaha wenengai. Oni mangi kpia wai rengbe oni ka tungusapai fu boro, na ki berẽ tipa wai rengbe oni ka karagapai fu agu aboro natikango. Pa manga oni he wo nika ngarasa yó ho i nikaa manga sunge tungusapa Kindo ni ngba-arikoho.​—2 Tim. 2:15.

Oni rengbe arengba a ka manga kpia gupai rengbe ka undo awironi i sovura kuti gu soapai naye be akurayó. Oni rengbe ka mangasunge na gu buku nga Questions Young People Ask​—Answers That Work, Volume 2, kapita 15 nimburu gaoni sakapai nga ga aborokporo. Gu riipai du rogo kpewaraga 132 na 133 nga “Peer-Pressure Planner [Sovura Kuti gu Soapai Naye be Akurase],” si nafu aberãpai na momu fu agude tipa wai rengbeyó ka fu gu karagapai biyo ho nga si niwenehe. Gu kekeapai du kusende ti kpewaraga 133, si nangarasa paranga aboro niyaa: “Oni asadi ka manga kpia wai rengbe oni ka karagapai fuyó mbata na avunguroni watadu agu abakurearoni ima nyaka.” Ti kura aregbo nga ga gaoni Irisombori Nga ga Aborokporo, oni asadi ka manga kpiapai tipa gipai re mbata fu regboho.

Gu Irisombori Nga ga Aborokporo nafu wene momu fu avunguagude i nyakasipa wai nyakipa maa agu asásá nga ga toro. Nibi gipai re, gu buku nga Young People Ask, Volume 2, na bawenepai rogo kapita 38 du riihe nga “What Will I Do With My Life? [Ginipai Mi Aida ka Mangaha Rogo Gimi Raka Yo?]” Ho oni kaa wisigo gu kapita re ni, si naida oni undo awironi i bi gupai nga mangasunge fu Yekova nga gu bawenepai si aida boro mangihe rogo gani raka yo. Oni undo awironi i sonosi nyemu mangasunge ni abazakigene, mangasunge Betere yo, ndu tipa gu Sukuru Du Tipa Yugopai fu Amoyambu, watadu mangasunge Kindo ti aregbo dũ.

Oni duna rubangirise mbiko gu kura avunguagude nanyakasa kina gupai ngba bangiriyo i aida awiriyo mangihe kisusi ka i aberãnga pa gupai awiriyo amangaha awere ya. Kina rengo du ngaha nga, ngbaha angba ka nyakasa awironi tipa i moi agu asásá duwa mangasunge Betere yo na sunge amokedi. Ono tie, ho oni amangaha ni wa gure, oni duna rubangirise oni ka imisa ngbaduyó na kina gupai oni aidaha na ki ba gberãrago tiyo. (Koro. 3:21) Oni tingidi gupai nga, anga oni du nika sa awironi i kpinyemu Yekova te, si naida kina yo nitiyo kpinyemu Yekova kpotoyo yo. (Mt. 22:37) Si naida oni gbata agu agene rengbe oni ka tambua awironi ngbaha tipa gu wenepai i amangaha, na ki bandatironi ti maaberã roni fuo kina gu gbegberẽ apai i amangaha. Oni undo yó i du na tambuahe tipa agu apai dunduko Yekova namangihe. Fuani, oni ki mbu ngbadu awironi nisaha si karagapai kuti gu wene sino nga ga Yekova.

Oni Saha Nigupai Nafu Ngbarago

Gu biata memepai rengbe ka sa gaoni Irisombori Nga ga Aborokporo nyemu si du niwenehe nga ka saha nigupai nafu ngbarago. Wai rengbe oni ka manga gipai re? Ti kura aregbo, oni rengbe ka maa kasete nga ga drama tipa ka degaturoni kuti ni watadu ka bi vidio sa dagba agu avidio aDezire Yekova akusihe. Watadu oni rengbe ka geda Ziazia Kekeapai ti regbo sa, nga ka kparaka apaparaha fu aborokporo nibasasa tipa i gedihe na agu aworo afugoho du nibakiakia.

Gu kura apapara kekeapai kinaho rogo gaani Ngbaõbambu Sinziri na Awake!, nga gu du niwene mburupai fu aborokporo tipa sakapai. Nikpiapai, oni rengbe ka mangasunge na gu papara kekeapai nibasasa du riihe nga “How Would You Answer? [Gaoni Karagapai Nga Gine?]” rogo Awake! ti kpewaraga 31. Na rogo gu kura apapara kekeapai nga ga Ngbaõbambu Sinziri tii gu riiapai du rogoho nga, “For Our Young People [Fu Paranga Aboro].” Gu papara kekeapai re naaye na tangaratangara riiapai rogoho nafura tipa akumbagude na adegude du riihe nga, “Teach Your Children [Oni Yugupai fu Awironi].”

Gu papara kekeapai nakura rogo Awake! du riihe nga “Young People Ask,” si niwenehe fu agu avunguagude duna rukutu awiriyo, wakina gu buku nga Young People Ask, Volume 2. Ho oni ka mangasunge ni na gu buku re, ka bangironi gonga ti gu sanduki nga “What Do You Think [Gaoni Bipai Nga Gine]?” ya du ti digido gu kapita re. Anga gu sanduki re nga kina kungbo fugöpai gbua te. Agu asanahe du rogo gu sanduki re, oni rengbe ka mangasunge nani nimburu gaoni sakapai nga ga aborokporo.

Ono tie, si naida oni du na rubangirise, ka oni sanga gu wisigopai nga ga aborokporo kurogo dungu asanahe ya. Nikpiapai, ka oni mangingo wironi ngbaome u gedi gupai u nikekehe rogo gu ba du riihe nga “My Journal” ya, watadu rogo gu kura ba nga gu u nake gupai du tipa ru rogoho. Rogo gupai du tii gu riipai nga, “A Note to Parents,” du rogo gu buku re ti kpewaraga 3, si nayaa: “Tipa ka ngarasa awironi i keke agu apai du tipa yó rogo gayó buku gbaiga zanga gunde, oni mbu yó nisayo i kekehe. Kusa, i rengbe ka fura na oni gbaiga tipa agu apai keke yó ho tipa tiyo.”

Ka oni amanga gaoni irisombori nga ga aborokporo dedede zanga kpa, na kini mangihe rogo mangimangipai yo na niwenehe, Yekova nika fu maku afu furoni kurii gaoni bakere asadatise. Gu regbo sia oni he tipa gaoni aborokporo naasungo sa tipa ka wisigopai re, si nika undo yó i du nyanyakii rogo toro yo.

[Gu kpiahe du ti kpewaraga 31]

Oni Kusi Vovoapai

Dee du rimori nga J. M. du Amerika yo ayaa: “Ho kumbaami gbiati re naawisigopai ni na rukutu awirina nga adegude, ani naasungo sa naayó tipa ka mbakada dunguratise, fuo nyasa ani he, ani naasana yó i fugu gupai furani ani nawirikihe. Ti gu kura aregbo, ani naamanga gupai gedi ani he rogo Ziazia Kekeapai rogo mangimangipai yo, watadu ka manga kpia wai ani ka tungusaha fu boro. Ani naamanga gu wisigopai re ringbisihe kina kuti wai du gayó giarogopaiyo, na niwenehe tipa rago ngbangba tiyo nani.”

Kumba du rimoko nga Y. T. du Japan yo ayaa: “Tipa ka undo wiri gu dee mi naawisigo Ziazia Kekeapai na ri tipa ko rugutiko na guhe nangia gu buku i aakaaha akaa ti agu aregbo i ake Ziazia Kekeapai, ani ade kpia gu kitabu nga ga Yesaya rogo makana na ki rogodi akapita na averesi dunduko kusayo. Ani arungu agu akpewaraga re dunduko kina sa na ki kaihe kuti wiri ngua. Gu kumbagude re aʹasadi ka manga gupai Yesu amangihe rogo gu bambutiria nadu Nazareta yo. Gu pangbanga nga ga Ruka 4:​16-​21 nape gupai nga, Yesu “ki ba waraga ki gbata ho si adu ni ni keke he were,” nga gu paparaha ko angera tipaha. (Yes. 61:1, 2) Ono tie, ho gu gude re aʹasadi tiko ni ka manga gu bangisapai Yesu amangihe, si adu fuko nimbumbupai tipa ko bi Yesaya kapita 61 wa ko aazaka gu kaikai waraga naadunga na kapita gbiati averesi re ya. Iriwoho aziko ka bi wai Yesu amangisunge na gu kaikai waraga re na ko ki yaa: ‘Yesu aima du na bakere inohe nirengo!’ ”

[Gu kpiahe du ti kpewaraga 30]

Yugo oni kpia wai ka sovura kuti gu soapai naye be akurase rengbe arengba ka undo awironi

[Gu kpiahe du ti kpewaraga 31]

Oni asaditironi ka manga gaoni Irisombori Nga ga Aborokporo niguhe nafu ngbarago