Gu Irisombori Nga ga Aborokporo Ya Mo Oni Rengbe ka Saha ni Wenehe?

Bagude Brazil aya: “Ani naadia regbo ni bakerehe ti regbo gaani Irisombori Nga ga Aborokporo, na dedede ka mi azanga gimi aborokporo ya, si nadia rani na gbanga regbo da ku yuru.” Kura baagude sa Japan yo aya wiriko du garãko 10 naainongo gupai nga regbo nasusa te, na ko naida gupai nga si naandu kindi kina ku mbatayo. Tipagine? Bako aya: “Si ngarasako, na kini fu ngbarago fuko.”

Rengo ngaha nga, anga agude dunduko du na ngbarago be gu irisombori nga ga aborokporo te, aguyo kinaho adunga na nyemuhe tiyo ya. Ono tipagine? Kura baagude Togo yo aya: “Si aidanga iriso Yekova du ni kpasirakpasira ha te.” Ka si duwo, ya mo si wo mbiko gu gene i amangaha ngbaha angbanga ya? Dungu aborokporo bi gupai nga gu irisombori nga ga aborokporo rengbe kadu wakina gupai Yesaya apehe tipa rago Sabiti nga “ngba ha angba gbe.”​—Yes. 58:13, 14.

Agu abaagude nga aKristano bihe nga, ka i aida gayo aborokporo gbia ngbarago ti regbo gayo irisombori nga ga aborokporo, si naida i saha taata. Ralf du na awiriko biama aya, gayo irisombori nga ga aborokporo nidu wa kungbo fugo angianga wa wisigopai ya; na aboro dunduko ni naafura. Nirengo, tipa ka sa aboro dunduko i du na nyemu gupai oni asakapai tipaha, si ima rengba kadu ni kpakarapai. Naagude sa aya: “Ome naadu nga tire ti aregbo dunduko tipa ka sa gu irisombori re si du ni wenehe wai mi aidaha te.” Ya mo oni rengbe ka diabe gi kpakarapai re?

KA ONI NYENGA KINA KUTI BANGISAPAI YA

Baagude sa Germani yo aya: “Ani anyenga kina kuti bangisapai sa te.” Natalia du na awiiri ue aya: “Gupai nyakipaha gbe tipa gaani irisombori nga ga aborokporo nga ani namangaha ni bakiakia.” Kura aborokporo nakparaka gayo irisombori ku rogo apaparaha ni dunguhe. Baagude Brazil yo nga Cleiton aya: “Gipai re nasa gu wisigopai re ni bawenehe na kini sa gupai nga aboro dũ du na pai beyo tipa ka mangaha.” Ho avunguagude akparaka regbo wisigopai ni, si nasayo i rengbe ka ino gupai du tipa agude ni basasa ka si du nga aguyo ima ngara ti akurayo. Si rengbe ka sa avunguagude i rugu agu apai du tipa agude ni basasa, na i sia apai ni bakiakia na kini mangihe ngba agene ni bakiakia.

Ginipai kura avunguagude amangaha tipa ka sa gayo irisombori du ni bawenehe? Aguyo na tona gayo irisombori na bia fu Yekova. Juan du Mekisiko yo aya: “Si nambakada apai na kini mbakadi berãrani tipa gupai ani ka wisigoho.” Awiriko ninaadia ndu gu bia nandu sa na gupai i nika wisigoho.

Gu kura aborokporo nasia papara Ziazia Kekeapai na ki sungu ka gedaha wa sa. Tipa ka saha ni wenehe, gu kura aborokporo nakparaka gu paparaha i nasia tipa ka gedaha fu aboro ni bakiakia i gedihe. Baagude sa Japan yo aya gipai re adu fuko “ni kpakarakpakaraha tipa ka geda Ziazia Kekeapai ngba gu gene re.” Ono awiriko ue adu na ngbarago ka bi gupai nga bayo na geda Ziazia Kekeapai nayo wa gure. Gu kura aborokporo namanga wiri adrama rogo gu pangbanga i gedihe. Baagude du na awiriko ue South Afirika yo aya: Agude “dedede nabi gu kura apai nga gu ani abingo ho ya rogo gu pangbanga ani agedaha rogo Ziazia Kekeapai.”

Gu kura gene rengbe oni ka saha ngbaha si ngba nga ka asada ka mbakada ga Noa kurungba watadu ga Soromo yekaru. Ngbatunga agu apai re ni bawenehe, na ka oni mangi wene wetekapai oni nadu na ngbarago. Ni kpiapai, kura aborokporo Asia yo asungu na wiriyo du garãri nga bisue gbiati titari nga dee kini gbaki kpia gu nunguro gu mokedi nangia Pauro anduhe. Agu akurayo naasada ka gbaka kpia agu apai du rogo gu pangbanga nga ga Gate. Paranga kumbagude du garãko nga 19 nga Donald Togo yo aya: Mangaha ni bakiakia “ima ye na vovo raka ku rogo gaani ngbadimokporo.” Ya mo oni rengbe ka berãpa gu pangbanga nga ga Ziazia Kekeapai rengbe ka sa gaoni irisombori nga ga aborokporo si du ni wenehe?

MBAKADATISE NA NYANYAKIPA HA

Wa vura duhe nga zanga konga kuti bangisapai sa nasa gupai nga gu irisombori nga ga aborokporo du ni wenehe, tipa aboro gbia undo ti ni, si naida aboro dunduko mbakadihe ambakada. Ti kura aregbo, rukutu agude nadu na mbugo, sidu, baagude du si aida ko berẽkurii gupai ko nasiaha na ki mbakadihe wenengai. Baagude sa aya: “Gu regbo mbakadi mihe wenengai, aboro dũ nagia tiyo na ni wenengai.” Gu kurako sa Germani yo naatingida gako aborokporo mbata fu regbo na gupai i nika wisigoho rogo gu poso re. Gu kurako sa Benin yo nasia DVD du mburuhe rii Ziazia Kekeapai ni papara gu irisombori nga ga aborokporo na ki ima fu asanahe fu wiriko tipaha mbata fu regbo. Nirengo, mbakadatise mbata fu regbo nasa gupai nga gu irisombori nga ga aborokporo du ni bawenehe.

Ho aborokporo aino gupai i nika wisigoho mbata fu regbo, i rengbe kaa fura tipaha vuru gu poso re na kini mbakaditiyo. Na ka si du nga i ni basasa du na sunge beyo tipa ka mangaha, boro na boro nika bihe nga gani irisombori nga ga aborokporo du.

ONI MANGI OME TIPA KAA MANGAHA DEDEDE

Dungu aborokporo duhe fuyo ni kpakarapai tipa kaa mangaha dedede.

Dungu abaagude namangasunge kugii regbo yo tipa ka raka. Ni kpiapai, baagude sa Mekisiko yo nakura saa sita nga ga wiso na kini karagatiko kina saa muambe nga ga yuru. Ti gu kura aregbo, si rengbe kadu nga oni mangi ariapai rogo gaoni Irisombori Nga ga Aborokporo mbiko gu kurapai nga ga toro.

Ono wa vura duhe wo, si naida ani diberã tipa ka zanga kpa gaani irisombori. Loïs du garãri nga bawe-na-sa Togo yo aya tipa gayo irisombori nga ga aborokporo wẽ: “Wa vura duhe nga kura aregbo kinaho ani atona gaani irisombori nga ga aborokporo gii regbo yo mbiko gupai nimangi, gaani irisombori naakpanga te.” Gipai re nayugo ndu gupai kura aborokporo asia ka manga gayo irisombori nga ga aborokporo ti ni ti tonatona poso. Ka pai kuru sayo i naaberãnga paha ya, i ima rengba ka mangaha rogo kura uru kusa.

A wa rimoho ayugoho nga gu irisombori nga ga aborokporo, si nga papara gaoni irisombori fu Yekova. Gaoni aborokporo dunduko ye na ‘gu zuzuhe nga ga ngbayo’ na aposo dunduko. (Osea 14:2) Na gi regbo re dunga adu ni regbo ngbarago fu aborokporo ni basasa, “bambiko ga Yekova ngbarago nga gaoni ome.”​—Nem. 8:9, 10.