Gu 4 Zire Yugopai: Mbori Nga Tirinita

Wari gi Ziree re Aenge Ni? “Aboro rengbe ka berãha nga gu yugopai nga ga tirinita, si akuru bara ti digido biama kama agarã. Kina rengo du ngaha. . . . Pa enga gupai nga ‘Mbori sa aboro kidu rogoko yo biata’ adunga nisigirasigiraha rogo gu raka nangia ga aKristano watadu rogo gayó idapase mbata fu digido biama kama agarã te.”​—New Catholic Encyclopedia (1967), Volume 14, kpewaraga 299.

“Gu rondo nga ga agu abakumba nadu Nicaea yo adunguratiyo rogo Merekoko ti rameru 20 rogo gu garã nangia 325 F.B.K. Kostatino nangia basunguriikiti nga ga gu rondo re. Ko nangia gu boro naagbekumbatayo na gu sakapai re na kini rugu agu apai . . . si aida i mangihe nibipa gu pagume du dagba Kristo na Mbori nga si nga gupai si aida gu rondo re idi kuti ni nga ‘Kristo kina sa na Bako.’ Mbiko gunde be Kostatino, abisopu dunduko namoi fuöbeyo ti gupai re kpara kina aguyo gbua ue naká ti maa fuöbeyo ti ni. Dunguyo amoifuöbeyo angianga ku kpotoyo yo ya.”​—Encyclopædia Britannica (1970), Volume 6, kpewaraga 386.

Ginipai Ziazia Kekeapai agumbaha tipa gipai re? ‘[Setefano] ahi be ziazia toro, kini ngere ku ngbangbaturũ yo, ki bi ga Mbori taarimo na Yesu, ko ru pati kumbabe Mbori. Ko ki yaa, “Oni ngére mi bi ngbangbaturũ nizazaha, Wiri boro ru pati kumbabe Mbori.” ’​—Amokedi 7:55, 56.

Ginipai gi yuguyugupai re ayugoho? Ga Mbori toro adu kugii Setefano ko ki bi Yesu ko ‘naru pati kumbabe Mbori.’ Si ziazia tie nga, Yesu adanga ni Mbori fuo zingako bekpio ki ga ku ngbangbaturũ yo te. Kuba gure, ko ada nigu boro nga toro. Gi pangbanga re afuranga tipa gu kura biata boro duho pati Mbori te. Wa vura duhe nga aboro naasada ka ba akpewaraga nga ga Ziazia Kekeapai tipa ka gbata bara gu ba nika songoda gu gayó yugopai nga ga tirinita, pasita sa rogo gu ringara i ayambaha nga Dominica du rimoko nga Marie-Émile Boismard akepai rogo gako buku ki yaa: “Gupai nga aboro biata rogo bangisa Mbori re, . . . boro arengbanga ka gbiaha rogo Vovo Ndika te.”—À l’aube du christianisme​—La naissance des dogmes (Tonatona gu Pambori Nga ga AKristano na Gaha Yugopai).

Gu yugopai Kostatino akusihe re, ko akusihe na gu berãpai nga ko naida ka nyasa riipa agu azangagiatise nadu rogo Kanisa rogo biama kama agarã. Ono tie, si akusi gu kurapai berewe nga: Ya mo navungu Yesu nga Maria angia “Navungu Mbori”?

Oni ringbisinga gipai re na agi averesi re: Matayo 26:39; Yoane 14:28; 1 AKorindo 15:27, 28; AKorosaio 1:​15, 16

RENGO NGA:

Gu yugopai nga ga Tirinita, si akuru bara ti digido biama kama agarã

[Gu kpiahe du ti kpewaraga 7]

Museo Bardini, Florence