Ginipai Gaoni Akpee Ayugoho Tipa Gaoni Pagume Na Yekova?
“Ako mo nga gu ko ninagia kpetambuahe! Aboro dunduko nikaye koyo du mo ni.”—TAM. 65:2.
1, 2. Tipagine ga Yekova amoyambu akpara ti ni fuko naa kido?
YEKOVA naahenga gia gu kparakpee nga ga gako ruru amoyambu te. Ani na gu kido nga Yekova nagia gaani akpee agia. Ka si vura du nga amirioni aboro nakpara fu Yekova ti bangisa regbo, boro ho sa ka ko zanga gia gani kpee te.
2 Ho gu bake Atambuahe nangia Davide aini gupai ni nga Mbori aima gia gako akpee, ko abibia ki yaa: “Ako mo nga gu ko ninagia kpetambuahe! Aboro dunduko nikaye koyo du mo ni.” (Tam. 65:2) Yekova akaragapai kuti ga Davide akpee mbiko ko angia gu boro nanaairiso Yekova ngba ruru gene. Ani sananga tirani ki yaa: ‘Ya mo gimi akpee naayugo gupai nga mi nakido kuti Yekova na ziazia irisombori nga guhe mi aberãpaha gbe? Ginipai gimi akpee ayugoho tipa gimi pagume na Yekova?’
Oni Kpari fu Yekova na Umbasitise
3, 4. (a) Gini sino si aida ani du nani ho ani akpara ni fu Mbori? (b) Ginipai si aida ani mangihe ka si du nga ani ‘naberãpa’ gu kere ingapai ani amangihe ani kidu nifudifudi rani gbe?
3 Ka ani aida Yekova karagapai kuti gaani akpee, si naida ani kpari fuko na umbasitise. (Tam. 138:6) Si naida ani sana Yekova tipa ko wisigi rani a wa Davide asanako ki yaa: “Ako Mbori, mo wísigi pa re, ki ini pa kpotore yo! Mo asádi re, ki ini gimi berã pa apai! Mo ki bi he, si ngia gene gbegberẽpai rogo re yo, ki ngbe ku mbata yo fere ngba nyenye gene!” (Tam. 139:23, 24) Si naida ani takpara kini mbu tirani fu Yekova ko wisigi rani na ani kini raki ringbisihe kuti agu arugute du rogo Ziazia Kekeapai. Yekova rengbe arengba ka nungusa rani ngba “nyenye gene,” du rogoyo nga ka undo rani ani ndu ngbagene nyenye unga.
4 Ono ginipai si aida ani mangihe ka si du nga ani ‘naberãpa’ gu kere ingapai ani amangihe ani kidu nifudifudi rani gbe? (Oni gedi Atambuahe 32:1-5.) Ka ani aaberã gbe kurii gu ingapai re, si rengbe arengba ka rungburasi rani. Davide aima zanga gu ngbarago ko adu nani mbiko berãko kurii gu ingapai ko amangihe, isoke kaza aima zioko a. Ono pa kusako gako ingapai fu Mbori aye na bakere wasa fuko. Oni makianga pa gu ngbarago Davide adu nani ho ko aini gupai ni nga Yekova ima ‘vu ko ti gako samungu’ na ki mbupai fuko. Pa kusa boro gani ingapai fu Yekova rengbe ka ye na wasa funi, ono gu undo nga ga abaakumba rengbe arengba ka undo ní a ní mbakadi gani pagume na Yekova kubaha.—Snz. 28:13; Yak. 5:13-16.
Oni Zungodi Tironi fu Mbori na Kini Tambuako
5. Gine nga zungodi Yekova?
5 Ka si du nga pai gudu ho nafu bakere bakabangirise furani, si naida ani mangi gupai Pauro agumbaha ki yaa: “Ka oni ídi nga fu pai si fudi roni wa sa ya; ono oni yúgu gaoni sanahe fu Mbori dunduko rogo kpe na zungaditise ni tambuahe.” (Frp. 4:6) Agu aregbo nzunzu si aida ani zungodi Yekova tipa undo nga agu aregbo du ani rogo kerepai na ho ani agbiatirani ni na rungosi.
6, 7. Gini nduapai du berãni tipa ani naatambua Mbori rogo kpee yo?
6 Ka si du nga ani nakpara fu Yekova kinaho du ani ni na zingo, ginipai si narengbe ka yugoho tipa gaani pagume na Yekova? Pauro ayawee si naida ani zungodi Mbori “ni tambuahe.” Ani na dungu nduapai berani tipa kaa ya fu Yekova wee: “Ako Yekova, ga pai du ni bahe, na tandu, na taarimo, na diabese, na irisa; bambiko agu ahe du ngbangbaturũ yo na auru kpotosende no dunduko nga gamo; ngbi nga gamo a, Ako Yekova, mo ni kiisikiisi pa ro ku ri ahe dũ. . . . Ani natambua ro nga gaani Mbori, ki nisambua taasitaasi rimoro.” Gure nga gupai Davide agumbaha fu Yekova.—1 Peka 29:11-13.
7 Yesu tambua Yekova tipa gu kpakuto na imekakue i arihe rogo gu yuru nadumbata fu kpiko. (Mt. 15:36; Rk. 22:18, 19) Si naida ani ‘naatambuako atambua’ a tipa “gako iiriwo mangaapai fu awiri aboro,” tipa gako “ruru asarangbanga,” na tipa fugoko nga gu du rogo Ziazia Kekeapai.—Tam. 107:15; 119:62, 105.
Oni Kpari Tipa Kura Aboro
8, 9. Tipagine si aida ti ni ani nikpari tipa akuarani aKristano?
8 Zanga kapa, ani naakpara akpara tipa tirani, ono si naida ani nikpari akpara a tipa kura aboro kodihe na agu aKristano ani ainongo yó ti rimo yó ya. Wa vura duhe nga Pauro aainongo agu awirina nadu Korosai yo dunduko te, ko akepai ki yaa: “Ani nafu tambuahe fu Mbori [nga] Ba gaani Gbia Yesu Kristo, ki nikpari tipa roni dedede. Bambiko ani agi pa gaoni idapase rogo Kristo Yesu yo, na pa gaoni nyemuse fu ga Mbori aboro dũ.” (Koro. 1:3, 4) Pauro aima kpara a tipa agu awirina nadu Tesaronike yo. (2 Tesa. 1:11, 12) Gu ngbatunga akpee re nayugopa gu wene sino du ani nani koyo du agu awirinarani ni du ani naayó rogo idapase yo.
9 Pa kpara ani tipa mbedimbedi aKristano na “kura akandoro” nayugo gupai nga, ani naberãpa ga Mbori riigbu aberã. (Yo. 10:16) Pauro aya fu awirinako wee i kpari tipa ko wa ka ko ‘ini wai ka yugo gu gbugbu apai nga ga wene pangbanga zukazuka.’ (Ef. 6:17-20) Ya mo ani naakpara tipa kura aKristano wa ngbatunga gure?
10. Gini undo rengbe ani ka gbiaha ka ani akpara tipa akuarani?
10 Pa kpara ani tipa akuarani rengbe arengba ka aria gu bipai du ani nani tipa yó. Ka ani akpara tipa gu boro angbanga tirani ya, gu gbegberẽ sino du tirani re rengbe arengba ka guari kusayo. (1 Yo. 4:20, 21) Ngbatunga agu akpee re nasonosa awirina asonosa na kini ye na zereda kurogo dungurati. Kurigure, si nayugo gupai nga, ani na ngbatunga gu nyemuse tirani nga ga Kristo. (Yo. 13:34, 35) Gu sino re nga papara zuzu ga Mbori toro. Ya mo ani naakpara tipa ga Mbori toro tipa si undo rani ani duna nyemuse, zereda, hipai nigbangaha, wene sino, idapase, zera, na rugatise? (Rk. 11:13; Gara. 5:22, 23) Ka ani amangaha wo, gaani afugo na gaani mangaapai nika yugoho ayugo nga ani napeka toro.—Oni gedi AGaratio 5:16, 25.
11. Tipagine rengba ani ti ni ka ya ruhe aru ka sana kura aboro i kpari tipa rani?
11 Ka oni bi gupai nga awironi rengbe arengba ka dĩpai sukuru yo ti regbo asada, si naida oni kpari tipa yó na ki rugu yó ringbisihe kuti Ziazia Kekeapai tipa i mangi asada ngba ruru gene ki zanga dĩpai. Pauro aya fu agu awirina nadu Korinda yo wee: “Ani nakpara fu Mbori ya ka oni mangi nga gbegberẽpai wa sa ya.” (2 Kor. 13:7) Gu ngbatunga akpee re nafu ngbarago fu Yekova na ki yugu gupai nga gaani pagume naako wenengai. (Oni gedi Asanza 15:8.) Ani rengbe arengba ka sana kura aboro tipa i kpari tipa rani a wa Pauro asanahe ki yaa: “Oni kpári tipa rani, bambiko ya ani tigaani ani na wene sangba kpoto yo, nikpi nyemu ka sunga na rurupai rogo apai dunduko.”—Eb. 13:18.
Gu Kura Apai Gaani Akpee Ayugoho Tipa Rani
12. Gini apai si aida ani peresipaha mbatayo rogo gaani akpee yo?
12 Ya mo gaani akpee nayugo gupai nga ani na ngbarago na ani ni agu aDezire nga ga Yekova yó du zaaza? Ya mo ani naakpara gbe tipa pa manga gupai Mbori akpinyemuhe, pa tungusa gu pangbanga nga ga Kindo, pa dia gbarasarimo kusayo ti ga Yekova bakere pagbia, naapa ziasi rimoko? Si nga gu banguaapai si aida ani peresihe mbatayo ho ani akpara ni a wa Yesu ayugukpiaha ki yaa: “Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, Wa du he ngbangbaturũ yo.”—Mt. 6:9, 10.
13, 14. Gaani akpee nayugo ginipai tipa rani?
13 Gaani akpee nayugopa agu apai du ngbaduraniyo na agu apai ngba tirani. Yekova ima ino gini ngbatunga aboro nga ani nzunzu. Asanza 17:3 nayaa: “Pere du tipa girisa feda, gbigiwi ki du tipa dahabu, ono Yekova nawisiga kpoto yo.” Mbori nabi gupai abi du ngbaduraniyo. (1 Sam. 16:7) Ko ima ino wai ani abi adunguratise, gaani sunge tungusapai, na akuarani aidipase. Yekova ima ino wai ani abi ‘awirina Kristo.’ (Mt. 25:40) Ko ima inoho singia guhe ani asanahe tipaha nzunzu, si nga guhe ani aidaha watadu ani nadogoda afugo adogoda gbua. Yesu ayaa: “Wa oni akpara ka oni kpari nga ni dogodi gu kpe ni ba sa sa wa aGendiria namanga ya; bambiko i naberã ha tigayo ya i agia fugoyo mbiko gumba ha ni badungu he.”—Mt. 6:7.
14 Agu afugo ani agumbaha rogo gaani akpee, si nayugo wai ayugo a ani akido kuti Mbori. Davide ayaa: “Mo du ni gi bagbuko, ni nyanyaki tumbatumba kirikiri gbata be iravura. Mo ídi he fere mi raki rogo ga bamburoko nye anye kindi! Ako, ka mi gbu rogo gu bagbuko du tii puporo.” (Tam. 61:3, 4) Ho Mbori agbaraga ‘gako bamburoko’ ni rirani, barani nangba angba mbiko ko nabanda rani. (Yugo. 7:15) Nangbaa gu wasa ani agbiaha ho ani ambeda ni na Yekova rogo kparakpee yo ki ini gupai nga ko nikadu adu na ani ka ani du rogo asada!—Oni gedi Atambuahe 118:5-9.
15, 16. Ginipai rengbe kparakpee ka undo rani ani inihe tipa gu nyemupai du ani nani tipa ka mangasunge rogo dungurati?
15 Ndikidi kparakpee fu Yekova rengbe arengba ka undo rani ani ini gupai nzunzu du ngbaduraniyo. Nikpiapai, ya mo ani namanga ome niumbasitise tipa ka manga gu sunge nga ga ngerakurii ga Mbori aboro tipa ka undoyo na tipa ka sa ga Mbori sunge si nindu kumbatayo? Watadu ani naida kadu ni “barumbatayo” watadu kadu ‘wa abazogo’ kurii akuarani? Anga wo si aida apai nimangi dagba ga Yekova aboro te. (Oni gedi 3 Yoane 9, 10; Rk. 22:24-27.) Ka si du nga ani na gbegberẽ aberã, ndikidi kparakpee rengbe arengba ka undo rani ani sa sino rani mbata fu si rimi dudunguroo ku kpotoraniyo.
16 Gu diakumba nga Kristano, ri rengbe kadu na nyemu gupai nga kumbaari mangisunge nimoundo abaakumba na ki da nibakumba. Si naida gu diakumba re moi wene kpiapai rogo dungurati kini raki ringbisihe kuti agu apai ri akpara tipaha rogo gari akpee. Gi gari kpiapai re na nyanyakipaha mbiko gari mangaapai gbiati gu nga ga gako aborokporo, si na sangbanaha ti ni kuti wai aboro abiko rogo dungurati.
Kpara Kuba Dungu Aboro
17. Tipagine si aida ti ni ani guari dagba aboro kusayo ho ani aida ni ka kpara fu Yekova nisarani?
17 Yesu anaadia tiko adia dagba aboro kusayo tipa ka kpara fu Bako. (Mt. 14:13; Rk. 5:16; 6:12) Si naida kina gu bangisapai re du tipa rani a. Ho ani akpara ni fu Yekova ani kidu nisarani, ani rengbe arengba ka manga gu diaberã nika fu ngbarago fuko na ki nyakasi rani ani nye nyanyakii rogo toro yo. Ono tie, Yesu anaakpara akpara a kuba kura aboro. Ani makianga wai rengbe ani ka mangaha ngba wene gene.
18. Gini apai si aida awirina moihe ku berãrani yo ho i akpara ni kuba kura aboro?
18 Ti regbo gaani adunguratise, ruru akumba nakpara kuba aboro rogo dungurati. (1 Tim. 2:8) Agu aboro i akpara kuba yó, si naida i yaa, “amina” ti digido kpee; du rogoyo nga “si mangi kinawo.” Ono tie, tipa i ya amina, si naida i idi aida kuti gupai wirina nagumbaha rogo gu kpee re. Pai ho iriwo rogo gu kpia kparakpee Yesu ayuguhe te. (Rk. 11:2-4) Ono ko afuranga tipa gu futufutuapai dunduko nadu tipa agu aboro ko afura fuyó te. Agu apai nafuda rani nisarani, si dagba agu apai yo si aida ani kpari tipaha nisarani angianga dagba aboro ya. Ho ani akpara ni kuba kura aboro, si aidanga ani fura tipa okõokõapai te
19. Gini apai angbanga mangaha ti regbo kpee ya?
19 Ho boro akpara ni kuba rani, si naida ani duna bakere “gúnde ti Mbori.” (1 Pet. 2:17) Kura apai kinaho angbanga mangaha ba gu dunguratise yo nga ga aKristano ya. (Batu. 3:1) Nikpiapai, ka si du nga boro ho naida agu aboro du ti gene basungo sa zi beyo naabayo ti regbo kpee, si rengbe arengba ka gbeberã aboro kodihe na gu vovo aboro niye tipa dunguratise. Kura arogotise rengbe arengba ka zio beyo, ono ka i dungo tiyó ti regbo kparakpee, si rengbe arengba ka kotosa agu aboro ka de mboimboihe. I rengbe ka berã gupai nga agu arogotise re naberã kina pa gayó nyemuse dagbayó kuba berã yó pa fu irisa fu Yekova. Si naida gaani irisa tipa Mbori sa rani ani ‘nimangi apai dunduko sa taasarimoko,’ na ki mbu agu apai rengbe ka kotosa aboro watadu ka gbeberã yó kusayo ti kparakpee.—1 Kor. 10:31, 32; 2 Kor. 6:3.
Ginipai Si Aida Ani Kpari Tipaha?
20. Wai rengbe oni ka sakarogo ARomo 8:26, 27?
20 Ti kura aregbo, ani ainongo gupai ka ani gumbaha ho ani akpara ni nisarani te. Pauro ayaa: “Ani aina nga waĩ ka ani akpara te; ono kina Ziazia Toro ni tiko nakpara tipa rani niukaga ome nga gu ka i agumba nga ha agumba ya. Gu ko nawisiga kpoto yo ko ini ga Toro berã.” (Rom. 8:26, 27) Yekova aidihe i keke dungu akpee rogo Ziazia Kekeapai. Ko nabi fugo agu akpee re ni agu apai ani aida ida ko mangihe furani, sidu, ko kini mangihe furani. Mbori ima ino rani, na ko ima ino rogo agu apai yo ko asa gako ziazia toro si gumbaha fu agu aboro nake Ziazia Kekeapai. Yekova nagia gaani akpee agia ho ziazia toro ‘akpara’ ni tipa rani. Ono ho ani ainido tirani ni na Fugo Mbori, apai naye ku berãrani yo nikina ipo.
21. Ginipai ani nika wisigoho rogo gu kekepai naye fuo gere?
21 Ani wiriki gupai nga, gaani kparakpee nayugo dungu apai tipa rani. Nikpiapai, si rengbe ka yugo wai nyaki gaani pagume na Yekova na wai ani naini Fugoko. (Yak. 4:8) Rogo gu kekeapai naye fuo gere, ani nika wisigo bete agu akpee du nikekehe rogo Ziazia Kekeapai. Wai pa wisigo ani agu akpee re nika undo rani ani mbedi na Mbori rogo kpee yo?
Gaoni Karagapai Nga Gine?
• Gini sino si aida ani du nani ho ani akpara ni fu Yekova?
• Tipagine si aida ti ni ani nikpari tipa akuarani aKristano?
• Gaani akpee nayugo ginipai tipa rani?
• Gini apai angbanga mangaha ti regbo kpee ya?
[Gu kpiahe du ti kpewaraga 11]
Ya mo oni naataasarimo Yekova na kini tambuako dedede?
[Gu kpiahe du ti kpewaraga 13]
Agu apai ani amangaha ti regbo kpee, si naida si du ni agu apai nafu irisa afu fu Yekova