Ga Satana Zogarago Nika Ti Ati
“Pai angbá nga fu gbegberẽ boro te.”—BATU. 8:13.
1. Tipagine du pa sarangbanga gbegberẽ aboro ti ni nigupai nafu wasa?
BARAMBEDA kumbatayo, i nika sarangbanga gbegberẽ aboro. Gbegberẽ aboro nika karagapai tipa gu gbegberẽ apai i amangihe. (Snz. 5:22; Batu. 8:12, 13) Gere nga gu pangbanga nafu wasa, gbe, fu agu aboro nakpinyemu rurupai na aguyo narungo be iraira mangapai be gbegberẽ aboro. Gu boro si aida i saringbanga ní nibambataha dagba gu gbegberẽ aboro re nga Bakitingbanga, nga baira abamangi gbegberẽ apai.—Yo. 8:44.
2. Tipagine si adu ti ni nga, gu ngbaanga nakuru ati Edene yo aaida regbo tipa i rugusihe?
2 Bakuru kusayo ati Edene yo, rukö aima gbarasa Satana mbiko ko abi tiko nga pako ima nyaka na ko ki sa aboro i sogo gu pagbia nga ga Yekova. Nisangbana gipai re, bambata avungurani akoditiyo na Satana ka soapai kuti gu rengo du Yekova nani tipa ka zoga aboro na si ki sa yó i da niʹingiʹingi aboro bangiri Yekova. (Rom. 5:12-14) Rengo ngaha nga, Yekova aima ino gupai gayó zanga giasangba na samungu aye nani kuriyó. Ono tie, si aaida gupai re du niyuguyuguhe fu agu aboro dunduko nga airatatamana Mbori akusiyo. Sidu, si aaida si di regbo adia tipa i ruho ka mbakada gipai re na tipa ka yugo gupai ziazia nga, ga agu abasamungu pai re aarunga te.
3. Gaani bipai nga gine tipa gu zogarago nga ga aboro?
3 Aboro atasoga gu pagbia nga ga Yekova, i kini tona gayó zogarago nitiyo. Gu mokedi nangia Pauro afura fu agu awirinako nangia aKristano nadu Roma yo tipa ngbatunga agu abazogo re ki yawee i nga “abaira tandu.” Ti rago Pauro, abaira tandu angia agu abazogo nadu rogo gu zogarago nangia ga aRomo nakodi gu bakindo nangia Nero nazogorago rogo 54 ki da kurogo 68 F.B.K. Pauro ape gupai nga, ngbatunga agu abaira tandu re, “kina Mbori namoi yo.” (Oni gedi ARomo 13:1, 2.) Ya mo gupai re nayugo gupai nga, Pauro atumbasipa ga aboro zogarago kuari ya si ngbaa kisusi gu nga ga Mbori? Oó, anga wo si adu te. Kuba gure, gupai ko agumbaha gbua nga, wa duhe nga Mbori idihe fu aboro i zogo tiyo, aKristano duwa ka i irisi ga “Mbori ndika” na ki idi na gu zogarago re.
Gu Gene Nandu Sa Gbegberẽpai
4. Oni sakingo ndu gupai ga aboro zogarago nika ti ti ni?
4 Wa vura duhe wo, gu zogarago nga ga aboro, si tiibe Satana, sidu, si nika ti ati. Tipagine? Mbiko pai sa nga, mburuhe rii gu tatamana naye be Mbori te. Kina Yekova sa duna rengberengbe tatamana beko. Sidu, kinako sa nga gu boro rengbe ka sigira gu zogarago rengbe kadu na diabese. (Yere. 8:9; Rom. 16:27) Yekova tigako wa aboro ninaangbuo angbuo rogo gayó mangapai te. Ko ima ino boro gu ndikidipai si aida ko mangihe. Agu azogarago naabaha nga ga aboro andunga kuti gako arugute ya, si adunga na diabese wagu sa te. Gere nga gu bambata ndupai nika sa gu zogarago nga ga aboro si ti, na gu kura nduhe nga si nigbegberẽhe.
5, 6. Ginihe nasa Satana ko tona ka sovura kuti ga Yekova pagbia?
5 Gu boro naberã aberã wenengai, ní arengbanga ka manga gupai ní niima inoho nga si nika gberã agberã te. Ka ní nye kindi kuti manga gupai re, ní aino gani ingahe aino kumbatayo. Gu pangbanga du tipa aboro, si ima yugoho nga si aadanga fu aboro i sogote gu pagbia nga ga Bakusiyo te. (Oni gedi Asanza 21:30.) Ono tie, rukö nakisi bangiri Satana ko bi tiko nga pako ima nyaka kisusi ga Yekova ko kini ru ka zinga kuti Yekova. Rogo gi gene re, Satana asia gu gene naandu ka digo naako nikina gbegberẽhe.
6 Gu ga Satana gbegberẽ aberã nga ga rukö re adu niyuguyuguhe rogo gu zogarago nangia ga gu bakindo nangia ga Babera ko nata ngbaduko ki yaa: “Mi adakpa ku ngbangbaturũ yo; mi akiisa gi mbatabakindo ku ri agu akerekuru nga ga Mbori ra; mi ki sungu ri bagangara nga ga dungurati, rogo gu tuturũ papara rago du ku nodiyo; mi adakpa ku ri tuturũ adubo yo, mi adu wa gu Ko nga Bahe ki susi.” (Yes. 14:13-15) Gu gako zogarago re aima ti, ka Babera adunga berewe na taarimo ya. Teketeke a, Satana nika ti ati barambeda na gako zogarago.
Tipagine Mbori Afu Ranirii ti ni fu Aboro?
7, 8. Gini aundo nakuru mbiko pa mbu Yekova gene fu gu gbegberẽ zogarago nga ga aboro si zogarago tipa bete aregbo?
7 Gu kura aboro rengbe kaa baka kina bangiriyo nga, tipagine Yekova ambugene ti ni fu aboro i ngbe na Satana na kini pekefuo gu zogarago nga gu Yekova nitiko aima inoho nga si adunga na diabese te? Nidu Yekova nigu Mbori Duna Tanduapai Dũ, ko aima rengba ka zayo. (Gate 6:3) Wa si avura duwo, ko aká aká naa pako ki ongo zanga fugo. Gako tatamana aima yugoho fuko nga, pa ongako aonga nika ye na wene sangbanaha gizo kumbatayo. Si adu nga, Yekova nika dia gbarasarimo adia kusayo ti rimoko niyangaraha, na ki yugu gupai nga, ko nga gu bazogo du niruruko na kidu na nyemuse, si ki tadu were, ruru aboro ki rengbe ka gbia undo be gako diaberã.
8 Anga gbegberẽpai ho ka mangi aboro te, wa ka aboro azingi kuti Satana na ki he samungu kuti Mbori tipa kadu na ranirii! Ono wa si avura duwo, pa ida Yekova pai fu aboro i zogo tiyo tipa wiri bete regbo aima fu undo. Si aima yugo gupai fu agu aboro duna ruru ngbaduyó yo nga, si nipatatamana i degatuyo fu Mbori na kini kido kutiko. Tipa dungu kama agarã, aboro aima asada badungu ngbatunga azogarago, ono zogarago ho kandara sa dagba agu azogarago re naadunga niwenehe te. Gere nga gu gopai ninaangarasa airisimbori i idi kuti gupai nga, ga Mbori zogarago nga wene zogarago. Nirengo, pa mbu Yekova gene fu ga Satana gbegberẽ zogarago aima ye na rungo fu aboro, kodihe na agu aboro nairisombori niruru yó. Ono tie, pa mbu Yekova gene fu gu gbegberẽ zogarago re tipa bete regbo aima kusa wene sangbanaha fu airisombori. Rogo gini gene?
Samungu Aima Taasarimo Mbori
9, 10. Ani sakingo pai tipa wai ga Satana zogarago asa gupai nga rimo Yekova du nitaasitaasihe?
9 Pa mbu Yekova gene fu Satana na gako zogarago kurii aboro ayugongo gupai nga, gu gene Yekova azoga aboro ngbaha aangbanga te te. Kuba gure, gu kuru pangbanga du tipa aboro, si nandu sa na agu afugo ga Mbori toro adu kugii Yeremaya ko kehe nibipa gu zingo tandu du be aboro ka zoga tiyo wenengai. (Oni gedi Yeremaya 10:23.) Kurigure, ga Satana samungu aima zakagene fu Yekova tipa ko yugu asinoko ngba wene gene. Wai si azakigene?
10 Wa duhe nga ani nabi sangbana ga Satana gbegberẽ zogarago abi ziazia, si nasa gupai nga ani bi asino Yekova gbaiga susi gu ka ani abihe wa ka Satana ayenga na gbegberẽ apai ya. Apai atadu were, agu aboro nakpinyemu Yekova kini taasirimoko. Nirengo, ga Satana zogarago aye na taarimo fu Mbori, nga gupai nawira kina ziree. Si aima yugo gu bawene gene Yekova amangipai ngbaha kuti gu soapai nakuru sa gako bakere pagbia. Ani wisigingo apai tipa bete asino Yekova niwiri guruhe, na ki bingo wai ga Satana gbegberẽ zogarago asa Yekova ko yugu agi asinoko re nibakerehe.
11. Wai du ga Yekova nyemuse niyuguyuguhe?
11 Nyemuse. Ziazia Kekeapai nape gupai furani nga “Mbori nga nyemuse.” (1 Yo. 4:8) Pa kusa Mbori aboro ayugupa gu nyemuse ko adu nani tipa yó. Kurigure, pa mbakada Mbori rani ngba iiriwo gene nga dezirepai tipa gako nyemuse. Mbiko gu nyemuse du Mbori nani koyo du aboro ni, si asako ko fu bawene kporo fuyó nga gu duna ahe dunduko rogoho tipa ka sayo i duna ngbarago. (Bam. P. 1:29-31; 2:8, 9; Tam. 139:14-16) Ono fuo kura gbegberẽpai ku dagba aboro, Mbori ayugu gako nyemuse berewe rogo gu kura gene kia. Rogo gini gene? Gu mokedi nangia Yoane adi fugo Yesu ki gumbaha ki yaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yo. 3:16) Ya mo kura gene adu kinaho ka Mbori ayugu gako nyemuse fu aboro ngbaha kisusi gu gene ko amangihe nga ka keda bangisa Wiriko ko ye ku auru kpotosende no ka tumo rii aboro-ingapai re? (Yo. 15:13) Gi bakere nyemuse Mbori ayuguhe re, si nga gu kura kpiapai berewe nafu gu momu fu aboro nga i niiyugu nyemuse na aʹuru dũ rogo gayó raka yo nimbuyó pa kura gayó apai a wa Yesu amangihe ka undo akurayo.—Yo. 17:25, 26.
12. Rogo gini gene du ga Yekova ome niyuguyuguhe?
12 Ome. Gu boro duna ome tiní tipa ka kusa ahe, ní nga kina gu “Mbori, du na tandu apai dũ.” (Yugo. 11:17; Tam. 36:9) Ho i abatika boro ni, ní nidu ti tonatona gani raka wakina gu kpewaraga adunga kekepai ti ni ya. Ono ho ní akpi ni, gure nga ní ima hiiso gu kpewaraga adunga kekepai ti ni re ya na adiaberã, gbiati agu apai ní amangihe rogo gani raka gbiati asinoni. Agu apai du tipa ní re, si niʹigiʹigihe kurogo berã Mbori. Ho regbo ka da ni be Mbori, ko nika karaga ungani akaraga berewe funi, si kidu a wa ní adumbata. (Yo. 5:28, 29) Sidu, wa vura duhe nga, ga Yekova bambata ringbisapai tipa aboro angianga kpio te, kpio afu momu fuko ko yugu gupai nga, ome kina beko ka zingisa aboro bekpio. Nirengo, Yekova nga gu “Mbori du na tandu apai dũ.”
13. Rogo gini gene ga Yesu motumo tumorii ayugupa ga Yekova ruru sarangbanga?
13 Ruru Sarangbanga. Yekova apenga ziree te; ko naamanganga irairapai a te. (Pa Rug. 32:4; Tito 1:2) Dedede, ko nabi gu gako arugute du tipa rengo gbiati ruru mangapai na kikiipaha, zavura ho duhe ni nga ka ko mangipai ringbisihe kuti gu gako arugute re, si rengbe ka ye na kina rungo fuko vurũ. (Rom. 8:32) Nairiwo gu gberarago nadu ti Yekova ho ko abi gu Wiriko ni ko akpinyemuko gbe ko nikpi rii ngbunduru ngua-rungosi wa bamangi gbegberẽ apai! Ono tie, mbiko gu nyemuse Yekova adu nani koyo du kpakpa aboro ni, si asako ko mbugene Wiriko kpi wa ka gu gako arugute du tipa ruru sarangbanga du nitumbatumbaha. (Oni gedi ARomo 5:18-21.) Gi zegino hi be iraira sarangbanga re, si asa Yekova nigu bangbasia boro nga ga ruru sarangbanga ní.
14, 15. Gini kura agene Yekova ayugu gako banaru tatamana gbiati hipai ngbaha?
14 Tatamana. Fuo Adamu na Eva mangi ingapai, Yekova ayugu gu gene nibasa ko aaida ka nyasa sangbana gayó samungu ngbaha. (Bam. P. 3:15) Ngbatunga gu ipiipi mangapai Yekova amangihe re, kodihe na wai ko atona tooni tooni kaa yugo gu rengo du tipa gako ringbisapai fu gako amoyambu, asa gupai nga aboro inipai tipa gako tatamana. (Rom. 11:33) He ho rengbe ka ká na gu ome du Mbori nani ti mangapai si ki zanga du na diabese te. Yekova aima duna momu beko ka yugo gako ndikidi tatamana fu gako kusikusiahe rogo gi zegino hi be wasiro, avura, iraira sarangbanga, basasangba, zanga hipai, kparakaro, na biriki re. Gu mokedi nangia Yakoba ayaa: “Gu tatamana naye ari yo si du na wene sino mbata, fuo gure si du na zera, ki du yee, ki ipi na gia kpe, ki hi be inapai na wene zuzuhe, adu nga na kparaka aberã, na biriki a ya.”—Yak. 3:17.
15 Zerangbaduse Gbiati Hipai Nigbangaha. Ka si naadunga mbiko gu zangarengba na ingapai du aboro nani ya, boro ho ka inipai tipa gu sino Yekova nga zerangbaduse gbiati hipai nigbangaha te. Pa ida Yekova ka yugo gako zerangbaduse gbiati hipai nigbangaha tipa akutu agarã asa rani ani ini gupai nga, ko namangasunge na agi asinoko re ngba wene gene, na si nga gupai nasa rani ani du na bakere ngbarago. Gu mokedi nangia Petero ayawee si naida ani “ini he ya gu hipai nga ga gaani Gbia si nga gene bata.”—2 Pet. 3:9, 15.
16. Wa duhe nga Yekova na nyemu ka mbupai furani, tipagine duhe ti ni nigupai nafu bakere ngbarago furani?
16 Ko na Nyemu Mbupai. Ani dunduko nga ingiʹingi aboro na kini koto ti aregbo dunduko. (Yak. 3:2; 1 Yo. 1:8, 9) Nairiwo gu tambuahe du ani nani mbiko Yekova ‘navu rani avu kpaima’! (Yes. 55:7) Ani wisigingo gu rengo du tipa gipai re: Pa vungayo rani niʹingiʹingi aboro na nikpakpa aboro, nasa rani ani ini gupai nga Mbori nambupai ambu ti aingapai. (Tam. 51:5, 9, 17) Pa ino ani pai tipa agu asino Yekova re nakiiso gaani nyemuse tipa ko na si kini ngarasi rani ani pekefuo gako kpiapai rogo gaani mangapai na akuarani.—Oni gedi AKorosaio 3:13.
Ndu Gupai Zegino Awoka ti Ni
17, 18. Rogo gini gene adunga ga Satana zogarago ti ni na diabese ya?
17 Tipa dungu kama agarã, gi ga Satana zegino re gbiati gako zogarago naadunga na diabese te. Rogo gu garã nangia 1991, waraga pangbanga sa akuru Putu yo nayaa: “Zegino nawoka awoka? Ii, si nawoka awoka, ono . . . si awokanga mbiko Mbori du fu mbusa fuhe te. Gu mangaapai nga ga aboro ba kaza ti zegino.” (The European) Agu afugo re nga kina boro rengo! Mbiko gu maapai nangia ga Satana kurii bambata avungurani, si asa yó i sia gupai nga ka zoga tiyo nisayo kuba mbu Yekova ko naazoga yó. Rogo gu gene re, i kini sigira gu zogarago naandu ka ti ati. Agu arungo aboro ambu behe rogo zegino dunduko, si nayugo gupai nga, ga aboro zogarago naye na kina gbegberẽ asangbanaha.
18 Ga Satana zogarago ngba ti kina aboro gbangbati. Ono wa vura duhe wo, gbangbati arengbanga ka diabe nyemuse te, mbiko mburu ga Yekova zogarago rii nyemuse. Ga Satana zogarago arengbanga ka mbakada ba aboro te, na ka ye na ngbarago a te. Ono ga Yekova zogarago tigaha du niruruhe! Ya mo gopai ho areme nayugo nani nga gipai re nga rengo? Ii, gu papara kekeapai naye fuo gere nika yugoho furani.
Ginipai Ani Nawirikihe fuo Geda Ani . . .
• ARomo 13:1, 2?
• Asanza 21:30?
• Yeremaya 10:23?
• AKorosaio 3:13?
[Gu kpiahe du ti kpewaraga 25]
Wiri undo ho aboro agbianga ha be ga Satana zogarago te
[Gu kpiahe du ti kpewaraga 25]
U.S. Army photo
[Gu kpiahe du ti kpewaraga 25]
WHO photo by P. Almasy
[Gu kpiahe du ti kpewaraga 26]
Gu ome du Yekova nani ima kio na ko ima rengba ka zingisa aboro bekpio
[Gu kpiahe du ti kpewaraga 27]
Gu nyemuse du Yekova nani gbiati ruru sarangbanga, si adu niyuguyuguhe rogo gu motumo tumorii nga ga Wiriko