Yekova Nazogarago Ngba Ruru Gene
“Gu Ko nga Bahe ki susi nazoga gu ngbi nga ga aboro.”—DAN. 4:17.
1, 2. Gine nga bete gu nduapai nasa ga aboro zogarago si ti?
GA ABORO zogarago aima kpa ti gaha sunge! Ba tikangoho ti ni te. Gu bangua ndupai nasa gayó zogarago si ti nga i na tatamana tipa ka zoga tiyo na diabese te. Pa tigo gu zogarago nga ga aboro niyuguyuguhe areme rogo wai badungu abazogo ayugo tiyo ni agu aboro ‘nakpinyemu kina tiyo, kidu ni airakpinyemumarã, airaruka, airarekangose, agberẽngbayo, airazanga ziaziapai, aguaurundika, airasoapai, airazanga rugatise, airaerã, akpinga nyemu wenepai ya, airabiriki, na ni airaabiatise.’—2 Tim. 3:2-4.
2 Bakuru kusayo, bambata avungurani aidanga na ga Mbori zogarago te. I aberẽhe nga pa mangayó ho wo nika sa yó i du na ranirii. Ka pe rengo, gupai i amangihe nzunzu nga i atona ka ra fu Satana. Gu pa aboro du yó awere ku ngbaha re, si nga sangbana gu iraira apai gu zogarago nga ga aboro namangihe tipa sita akutu agarã tiibe Satana nga “gbia gi zegino re.” (Yo. 12:31) Buku sa nafura tipa wai du ga aboro raka areme nayawee si nipamungo ka ngera kube aboro “tipa gu zegino duna apai rogoho nirengberengbehe na ki zanga fudifudiapai.” Si nayaa: “Aboro arengbanga ka mbakada zegino si ki zanga fudifudiapai te, na asadatise a ka mangaha nakusa kina agberango, wa gu nga ka zogarago ngbaome watadu ka sovura.” (The Oxford History of the Twentieth Century) Nairiwo gu rengo gu buku re agumbaha tipa gu zogarago nga ga aboro!
3. Ginipai rengbe ani ka pehe tipa ga Mbori zogarago wa ka aAdamu na Eva ainganga pai ya?
3 Nairiwo gu kerepai bambata avungurani amangihe re nga ka ká ga Mbori wene zogarago! Rengo ngaha nga, ani ainongo wai ka ga Yekova zogarago auru kpotosende adu te wa ka aAdamu na Eva anye niruruyo fuko. Zanga kapa, wa ka aboro dunduko aidi na gu zogarago nga ga Mbori, kina nyemuse kadu dagbayó zanga kparakaro. (Amo. 10:34; 1 Yo. 4:8) Nibi gu ga Mbori tatamana adunga digidoho ti ni ya, gupai rugu ani tirani nani nga, wa ka aboro anye kina kutii ga Yekova pagbia, ka gu irairaapai gu zogarago nga ga aboro amangaha areme dunga ti ni te. Ka ga Mbori zogarago aduna diabese na ‘kini mbiisi gu nyemu ahe nga ga unga ahe dunduko.’ (Tam. 145:16) Ka gumbapai niguruhe, ga Mbori zogarago kangia wene zogarago nirengo. (Pa Rug. 32:4) Nairiwo gu kerepai naye kurii aboro mbiko soga yó ga Mbori pagbia re!
4. Bakio gu pagbia wai Mbori aidipaha fu Satana?
4 Ngbaha angba ani tingidi gupai nga, wa Yekova avura mbugene fu aboro i niizogo tiyo, si ayugongo gupai nga, ko aima mbu gu rengo duuko nani tipa ka zoga agu aboro ko akusi yó te. Mbori amangi gu bakindo Babera ngbaome nadu na ome tiko gbe ko ini gupai nga, ‘guko nga Bahe kisusi, ko nazoga gu ngbii nga ga aboro.’ (Dan. 4:17) Gizo kumbatayo, kina gupai Mbori akpinyemuhe nikaa manga. (Mt. 6:10) Rengo ngaha nga, Yekova aidihe fu Satana ko du ‘nimbori gi zegino re’ tipa wiri bete regbo tipa ka karagapai kuti gu soapai Satana akusihe tipa Yekova ya Yekova ainongo zoga aboro te. (2 Kor. 4:4; 1 Yo. 5:19) Wa si avura duwo, gene aadunga be Satana tipa ko mangipai susi gu Mbori aidipaha fuko te. (2 Peka 20:6; oni ringbisinga ha na Eyobo 1:11, 12; 2:3-6.) Natona ti gu regbo re ka da ku areme, aboro nidu kinaho ninaasia gupai nga ka ra fu ga Yekova pagbia, wa vura duhe nga i naraka rogo gu zegino bakere vura Mbori azogaha vurũ.
Ga Mbori Zogarago Kurii AYisaraere
5. Gini mozunga awiri aYisaraere amangihe na Mbori?
5 Natona ti rago Ebere ki da ti gu regbo nangia ga awiri aYisaraere, badungu aboro naima duho nanaairiso Yekova niruruyo na kini mangi agu apai ko anaazinahe i mangihe. (Eb. 11:4-22) Ti rago Moize, Yekova amangi mozunga na awiri Yakobo na i ki da kusa nigu rikaaboro nangia aYisaraere. Rogo gu garã nangia 1513 M.B.K., aYisaraere amangi mozunga na Yekova nga i ima ida ko zogo yó na i ki yaa: ‘Agu apai dunduko Yekova nigumbaha, ani amangaha amanga.’—Gate 19:8.
6, 7. Wai ga Yekova zogarago adu kurii aYisaraere?
6 Yekova aima duna ndupai beko tipa ka sia aYisaraere i du nigako aboro. (Oni gedi Pa Fu Rugute ni Ue he 7:7, 8.) Gu ndupai nasako ko sia yó adunga gbua nga ko aaida apai ngba kubarayo yo sa te, ono si akodi gako bakere pagbia, na si nyakipaha. Si adu nga aYisaraere nikadu ni adezire ka yugo Yekova fu aboro nibangisa ndikidi Mbori. (Yes. 43:10; 44:6-8) Si atadu were, Yekova kini ya fuyo: “Oni tigaoni du ni kparakpara ziazia aboro fu Yekova gaoni Mbori, ono Yekova asia roni oni du ni kparakpara rikaaboro fu ko, dagba agu aboro dunduko du auru kpotosende.”—Pa Rug. 14:2.
7 Ho Mbori anaazoga aYisaraere ni, ko aima ino gupai nga kpakpa aboro nangia yó. Ti kina gu bangisa regbo re, gako andiko adu niruruhe na si kini yugu agu asino duuko nani. Gu ga Yekova andiko ko afuhe fuyo kube Moize ayugu gupai nirengo nga ko nga ziazia boro, na niʹirazerangbaduse na nigu boro nakpinyemu ruru sarangbanga, na kidu na nyemu mbupai fu aboro. Kusa, Yosua gbiati agu aboro nadu ti ragoko anaamanga agu apai ko anaazinahe fuyó i niimangihe na i kidu rogo pazereda na kini gbia amaku nga ga toro. (Yos. 24:21, 22, 31) Gu pangbanga du tipa aYisaraere re, si nayugopa ga Yekova diabese rogo zogarago.
Ga Aboro Zogarago Aye na Gbegberẽpai
8, 9. Gini sanahe aYisaraere asanaha nibipa zogarago, na gini sangbanaha si aye nani?
8 Kusa, wo aYisaraere anaaingapai kuti Mbori dedede si kini sa gupai nga ka ko bandanga yó ya. Niyangaraha, aYisaraere asana gu nebi nangia Samuere tipa ko moi bakindo fuyó nikaa zoga yó. Yekova aya fu Samuere wee ko mangi kina gupai i akpinyemuhe re. Ono tie, Yekova agbia kurapai kuti ni nga: “I agindiga nga ro te, ono i gindiga kina re, ya ka mi du nga ni bakindo ka zoga yo ya.” (1 Sam. 8:7) Wa si avura du nga, Yekova ambugene fu aYisaraere i sia gayó bazogo nitiyo, ko aima gumba gupai fuyó nga, gu zogarago nga ga aboro, si nika ye na kina gbegberẽpai kuriyó.—Oni gedi 1 Samuere 8:9-18.
9 Vuru agu aregbo yo nga ga ga aboro raka, si aima yugopa gu rengo Yekova afura tipaha. Ho aboro atona ka zoga aYisaraere ni, si aima ye na akpakarapai fuyo, gbe, ho gayó abazogo adunga ni niruruyo ya. Nibi gu kpiapai du tipa aYisaraere re, si airiwongo tirani ka bi gupai nga, ti regbo agu zogarago nga ga aboro nga aguyo ainongo Yekova ya, gayó zogarago aayengo na wenepai nyeanye kindi te. Rengo ngaha nga, kura aboro-birĩ-zogarago naasana Mbori asana tipa ko fu maku kurii gayo bakere asadatise tipa i du rogo pazereda na ba yó ki ngba angba. Ono wai rengbe Mbori ka fu gako maku fu gu boro aranga kutii gako pagbia ya?—Tam. 2:10-12.
Vovo Rikaaboro Tiibe ga Mbori Zogarago
10. Tipagine Mbori asia kura aboro ti ni kuba gu gako aboro nangia aYisaraere?
10 Gu rikaaboro nangia aYisaraere aidanga ka iriso Yekova ngba ruru gene te. Niyangaraha, i aká gu boro Yekova amoi ní ni Masiya, si ki tadu were, Yekova kini mbu yó na ki sia gu dungurati nga ga mbedimbedi aKristano rogo gu garã nangia 33 F.B.K. i di bayo. Gu dungurati re nzunzu nangia gu vovo rikaaboro nadu tiibe ga Mbori pagbia. Pauro afura tipaha ya si nga “ga Mbori Yisaraere.”—Gara. 6:16.
11, 12. Gini awiratise duho dagba ndikidi aYisaraere na “ga Mbori Yisaraere” nibipa ngerakurii sunge?
11 Awiratise gbiati kparakparaapai duho dagba ndikidi aYisaraere na gu vovo yó nga “ga Mbori Yisaraere.” Gu kparakparapai duho dagbayo nga, gu dungurati nga ga aKristano na abazogo behe nga aboro te, na si afunga anyaa nimotumo tipa mbupai ti ingaapai te. Gu wiratise duho dagba agu aYisaraere nadumbata na gu dungurati nga ga aKristano nga, i na mbakadapai beyo nga ga abaakumba wagu nadumbata. (Gate 19:3-8) Agu aKristano namangasunge ni abaakumba rogo dungurati, i azoganga rimbasa akandoro azoga te. Kuba gure, i nangerafuo akandoro rogo dungurati na bakere nyemuhe na kini ngbembatayo fu ra rogo gu mangaapai nga ga aKristano. I namangapai na aboro rogo dungurati rogo nyemuse, kini fu irisa fuyó na kini bi aboro na kikiipayo.—2 Kor. 1:24; 1 Pet. 5:2, 3.
12 Pa berã ani kuriipa gu gene Mbori amangipai ngbaha na ndikidi aYisaraere gbiati “ga Mbori Yisaraere” na “kura akandoro,” si nasa rani ani duna bakere tambuahe fu Yekova tipa gu gene ko azoga aboro ngbaha. (Yo. 10:16) Nikpiapai, vuru agu aregbo yo nga ga ga aboro raka, si ayugu gupai nga, agu abazogo naazoga aYisaraere aru andiko kisusi kuriyo, tipa wenepai watadu gbegberẽhe. Gu rengo re nasa agu aboro nangbembatayo rogo apai fu aKristano i ini gupai nga, wa vura duhe nga i ni abazogo wa aguyo nadumbata te, si naida i moi wene kpiapai nga ga idapase.—Eb. 13:7.
Gu Gene Yekova Azogarago Ngbaha Areme
13. Gini nyanyakipa ariapai namangi rogo gu garã nangia 1914?
13 AKristano areme natakapandepa gupai fu zegino nga, digido gu zogarago nga ga aboro ima mbeda kada. Rogo gu garã nangia 1914, Yekova asigira gako Kindo ngbangbaturũ yo tiibe gu bakindo nga Yesu Kristo. Ti gu regbo re, ko afu pagbia fu Yesu ko “ndu ka dia be apai.” (Yugo. 6:2) Yekova aya fu gu vovo Bakindo re wee: “Mo zógo rago dagba avuraro.” (Tam. 110:2) Si nafu kina gberarago nga, aboro aidanga ka ra fu ga Yekova pagbia te. Aboro nandu kindi kumbatayo kini mangipai wa “Mbori ho te.”—Tam. 14:1.
14, 15. (a) Wai ga Mbori Kindo azoga rani areme, nibi gipai re, gini asanahe si aida ani sana tirani nani? (b) Rogo gini gene nyakipa ga Mbori pagbia areme?
14 Gu bete mbedimbedi aKristano nga “ga Mbori Yisaraere” nye kindi auru kpotosende ane, i namangasunge kindi ‘ni amokedi kuba Kristo’ wangia yó awirinako. (2 Kor. 5:20) Yesu moi yó i mangisunge rogo gu riko nga ga ruru kangara moyambu kaa fu gu riahe nga ga toro fu mbedimbedi aKristano gbiati gu rimbasa amirioni aKristano duna maabangirise ka raka auru kpotosende nyeanye kindi. (Mt. 24:45-47; Yugo. 7:9-15) Ga Yekova amaku kurii gu mbakadapai re niyuguyuguhe ziazia rogo gu kumuko nga ga toro ndikidi airisoko agbia ngbarago behe areme.
15 Si naida boro sana ti ni na agu asanahe nga: ‘Ya mo mi naatingidapa gu tindiro si aida mi tindihe rogo gu dungurati nga ga aKristano? Ya mo mi naasongoda ga Yekova pagbia? Ya mo mi na nyemu kadu nizogo tiibe ga Yekova Kindo? Ya mo mi ima diaberã tipa kaa ndu kindi kumbatayo kaa gumbapa ga Mbori Kindo fu aboro a wa rengbe omere nani?’ Nidu ani niriko, ani nara nigorani kutii gu rugapai nga ga Riigbu Bipasunge, na kini mangipai kina kubanisa na agu abaakumba i naʹasia apai fuyó rogo dungurati. Nimanga ani pai ngba gi gene re, gure nga ani naida na ga Yekova pagbia. (Oni gedi AEbere 13:17.) Pa ra ani nigorani nasa gupai nga ani duna gu kodatise du kia ti ga agu aboro du rogo gi zegino re. Ra nigose nakusa zereda na ruru mangaapai na si kini ye a na taarimo fu Yekova, si kini yugu gupai nga, ga Yekova gene zogarago nga bawene gene kisusi.
Ga Yekova Zogarago na Diabese
16. Gini diaberã nabi aboro dunduko rogo zegino?
16 Regbo ima mbeda kada tipa i mbakadi gupai nagberẽ ati Edene yo. Sidu, awere tie nga regbo tipa aboro mangi diaberã. Si naida boro mangi diaberã, singia ní nasia ga Yekova zogarago watadu ní nanye kutiibe gu zogarago nga ga aboro. Ani na momu berani ka undo bayee aboro i mangi ruru diaberã. Bambeda kumbatayo ti regbo Aramegido, ga Yekova zogarago nika dia ba ga aboro zogarago nga gu du tiibe Satana. (Dan. 2:44; Yugo. 16:16) Ga aboro zogarago nika digo, kina ga Mbori Kindo sa kini zogorago auru kpotosende dunduko. Ka pe rengo, kina ga Yekova zogarago sa nika nye.—Oni gedi Yugoti 21:3-5.
17. Gini apai naundo bayee aboro i mangi wene diaberã nibipa zogarago?
17 Agu aboro atamanganga ndikidi diaberã tipa ka gbia ga Yekova weneringise ya, i duwa ka i kparikpee na ki wisigi agu amaku ga Mbori zogarago nika ye nani fu aboro. Gu zogarago nga ga aboro arengbanga ka dia agu aboro kusayo nakuo ndiko gbiati gu vura nga ga abamoi te. Ono tipa ga Mbori zogarago tigaha, si nika rogoda gbegberẽ aboro dunduko kusayo auru kpotosende. (Tam. 37:1, 2, 9) Gu zogarago nga ga aboro asa yó i naaso avura zanga piriga, ono ga Mbori zogarago nika sa gupai nga “vura nyasi digida kpotosende no.” (Tam. 46:9) Oni ngere, gi ga Mbori zogarago re nika sa gupai nga zereda du dagba aboro na anyaa! (Yes. 11:6-9) Zingo aũzegino gbiati agomoro ningia agu apai ninaamanga aboro tiibe gu zogarago nga ga aboro, ono ga Mbori zogarago tigaha nika dia agu apai re kusayo. (Yes. 65:21) Zavura agu abazogo duna nyemu manga agu apai ngba angba, i arengbanga ka dia akaza na kpio kusayo te. Ono ga Mbori zogarago nika sa sosono aboro ni aparanga na ki husi aborokaza. (Eyo. 33:25; Yes. 35:5, 6) Nirengo, kpotosende ada niparadizo na Mbori ki zingisi aboro bekpio.—Ruka 23:43; Amo. 24:15.
18. Wai rengbe ani ka yugo gupai nga ani idi ya ga Mbori zogarago ngbaa kisusi?
18 Ga Mbori zogarago nika mbakada agu apai dunduko Satana aye nani ho ko asa bambata avungurani ni i samungu kuti Mbori nakusi yó. Oni bingo gu gbegberẽ apai Satana namangihe tipa agarã wa 6,000, ono Mbori nika mbakada agu apai re vurube Kristo vuru agarã gbua 1,000! Si nga gu gopai nayugo gupai nga, ga Mbori zogarago ima ngba kisusi. Wangia Yesu Dezire tipa gaani Mbori, ani ima ida pako nigaani Bazogo. Wa du wo tie duhe, ani naayugongo gupai na aʹuru dunduko rogo gaani raka nga ani nga airisi Yekova, na ni avuruko na kidu na ngbarago mbiko ani nga gako aDezire. Sidu, ho momu nikaani kuru ni, ani pehe fu aboro ya, ga Yekova gene nga ga zogarago ngbaa kisusi.
Nibi Gupai Du Tipa ga Mbori Zogarago, Ginipai Wiriki Ani He be . . .
• Pa Fu Rugute ni Ue he 7:7, 8?
• 1 Samuere 8:9-18?
• AEbere 13:17?
• Yugoti 21:3-5?
[Gu kpiahe du ti kpewaraga 29]
Yekova ningia bazogo ti aregbo dunduko
[Gu kpiahe du ti kpewaraga 31]
Pa ra ani kutiibe ga Yekova zogarago nasa gupai nga ani du rogo kodatise rogo zegino dunduko