Ziazia Kekeapai Nzunzu Nga Fugo Mbori

GINIPAI nzunzu nadu bangiri gu mokedi nangia Pauro ho ko ayani wee “Ziazia Kekeapai dunduko si aye be ga Mbori Toro”? (2 Timoteo 3:16) Ko ape gupai re ka yugo gupai nga Mbori amangisunge na gako ziazia toro ka sa agu aboro nake Ziazia Kekeapai i ke gako berãpai.

Gu mokedi nangia Petero ayawee agi abakeke Ziazia Kekeapai re ‘agumba pai be Mbori, wa Ziazia Toro aruguyo.’ (2 Petero 1:21) Gipai re nasa gu mokedi nangia Pauro ko ya tipa agu akitabu du rogo Ziazia Kekeapai wee si nga gu “Ziazia Kekeapai rengbe na fu tatamana foro sa bata, mbiko gu idapase du rogo Kristo Yesu yo.”​—2 Timoteo 3:15.

Dungu aboro natikango nga Mbori nga baenge ke Ziazia Kekeapai te. Ababisira apai naatikango kini yawee Ziazia Kekeapai nga gu kitabu arunga sangbaha dunduko ya. Gure nga gupai bakusi kuruahe sendeyo nga Sir Charles Marston afura tipaha ki yawee kura aboro “aberãnga pa Ziazia Kekeapai wagu tooni te, na i natikö atiko kuti agu apangbanga du rogoho.” Gu kura aboro nayawee Ziazia Kekeapai nga “kungbo kitabu apaturẽ gbua.”

Ani Makianga Gopai

Ya mo ani rengbe ka kido kuti sangba Ziazia Kekeapai? Si ninyanyakipa pai ani diberã niruruhe tipa gipai re. Tipagine si aidaha ti ni wo? Si naidaha wo mbiko gupai nga, ka si du nga Ziazia Kekeapai na agu atingidapai rogoho naye be Mbori, si du nipa mungo furani ka zanga manga sunge nani. Ho ani abi Ziazia Kekeapai ni na nyanyakipaha, si rengbe arengba ka mbakada gaani mangaapai na gaani aida kidu niruruhe, ono ka ani abi Ziazia Kekeapai wa kungbo fugo aboro angianga fugo Mbori ya, gaani mangaapai gberẽ agberã na gaani aida kidu nikina irairaha.​—1 ATesaroniko 2:13.

Wai rengbe oni ka diaberã riipa gi pai re? Gini ngbatunga boro oni nidu naa kido kuti ní? Rengo nga, si nikpakarapai kadu na ndikidi kido kuti gu boro ini mo ní gbua tooni. Ono ho ani adia regbo ni ka ino boro wenengai, ani naye ka ino singia irarengo du nga ní na ní rẽarẽ ani kido kutini. Oni rengbe ka ino Ziazia Kekeapai a kina rogo gu bangisa gene re. Ka oni idinga nikina ipo kuti agu apai aboro aberãha watadu gu iraira bipai aboro akusaha tipa ka sa roni ka oni dunga naa kido kuti Ziazia Kekeapai ya. Oni di regbo ka makia gu gopai nasongoda gupai nga Ziazia Kekeapai “aye be ga Mbori toro.”

Gupai Amangisunge na Ziazia Kekeapai Agumbaha

Ka bangironi gonga ti gupai nga kura aboro kinaho namangasunge amanga na Ziazia Kekeapai natikango ati naapa gu rengo du rogoho ya. Buku sa nayawee badungu agu aboro nasaka sangba Ziazia Kekeapai “naya tipa Ziazia Kekeapai wee fugo wiri aboro du ngaha,” wa vura duhe nga i naya kina aKristano nga yó.​—New Dictionary of Theology.

Dungu abawisigipai tipa agu aida nga ga apambori natikango ati ki yawee Ziazia Kekeapai nga Fugo Mbori te. Nikpiapai, akurayo nayawee gu nebi nangia Yesaya nake gu kitabu nga Yesaya te. I ake gu kitabu re Yesaya naima kpi ki di badungu agarã ku sendeyo. Buku sa nafura tipa Ziazia Kekeapai gu kumba nga Lowther Clarke akehe nayawee “Ziazia Kekeapai nga sangba dungu berã aboro naraki ti aregbo nibakiakia.” Ono agu apai re nayugo gupai nga gupai Yesu Kristo na gako abawiriki agumbaha bara dunguhe ki yawee Yesaya du nake gu kitabu re, ziree du ngaha.​—Matayo 3:3; 15:7; Ruka 4:17; Yoane 12:38-41; ARomo 9:27, 29.

Gu gberẽ berewe nga abawisigipai sirisiri tipa Ziazia Kekeapai wagu ko nga J. R. Dummelow ayawee agu asangbanebi du rogo Daniere, si gbua nga “kuru apangbanga naaima digo, abakeke apai kini moihe ku dangba agu apai nika manga kumbatayo.” Berewe a, i nabasa gupai abasa Yesu apehe, ho ko ayani wee ‘ho oni ka bi gu gbegberẽ kere gbarasa rago ni, nga gu Daniere nga nebi agumba pa ha, si ru rogo ziazia ba yo.’ (Matayo 24:15) Ya mo ruhe aru aKristano idi kuti gupai nga Yesu Kristo agumba ziree, kini sa kungbo kuru apangbanga si du nisangbaanebi? Oó.

Kparakparapai Nga Gine?

Oni rengbe ka sanahe nga, “Ka si vura du nga kura aboro kia nake Ziazia Kekeapai, ginipai du ti ni?” Bakerepai kina ti ni. Ka i fu waraga furoni ki yawee yangara fugo bakurearoni du, ono kusa, i kini ya gu bakurearoni re nakehe te, oni bi gu waraga re wai? Ka si du nga abangbasia abainipai ini gupai nga bawene abakureani du nake gupai i aberẽhe nga si nangia agu apai ní aidi ka gumbaha. Ya mo oni rengbe ka bi gu waraga re berewe na kikipaha? Watadu oni rengbe kadu naa kido nga kina boro gani berãpai du rogoho?

Kina wo duhe tipa Ziazia Kekeapai. Iiriwopai ngaha te ka bi agu aboro nayawee aKristano nga yó ini basa kura apapara Ziazia Kekeapai ho si afura ni tipa apai wa zanga pe ziree, pa kodaba na agu akuraha. Bara wai oni agi gupai kungba aboro nga “Ii, ono gure rogo Kuru Ndika!” na gu berãpai nga paha a nyakanga te. Gure nayugo gupai nga ziree du Pauro apehe tipa Kuru Ndika ki yawee si nga ‘Ziazia Kekeapai naye be ga Mbori Toro.’

Ono oni rengbe ka yaa, “Si aidanga boro basa gu goapai abasa nga ga wene abainipai naabayo dunduko te.” Kina rengo du! Bambiko wene abawirikipai kinaho naima undo rani ani ini kura kekeapai nga ga Ziazia Kekeapai. Si tie ziazia nga, wiri irairaapai aima rimo kurogo Ziazia Kekeapai wa i ani kehe berewe na berewe. Ono oni tingidi gupai nga, bakere kparakparapai duho dangba ino gu wiri irairaapai narimi kurogo Ziazia Kekeapai na mbu ani Ziazia Kekeapai naabaha ki yawee wiri aboro du nakehe.

Oni Kakuti Gaoni Idapase Kuti “Ziazia Kekeapai”

Mbata fu ya Pauro wee Ziazia Kekeapai aye be ga Mbori toro, ko aima yugo ndu gupai du gu Ziazia Kekeapai re ti ni na nyanyakipaha. Ko ayaa: “Rogo kusa rago . . . gbegberẽ aboro agbérã ki susi na airanangahe a, kini nangi aboro, aboro kini nangi yo a.” (2 Timoteo 3:1, 13) A wa si adu ti rago Pauro, ‘airatatamana na airarugapai’ amangisunge na “wene fugo” tipa ka nanga aboro na ki zeresi gayó ida kuti Yesu Kristo. (1 AKorindo 1:​18, 19; AKorosaio 2:​4, 8) Tipa ka gu sino raka re moingo pai kurii Timoteo ya, Pauro angarasi ko ko ‘nyé rogo agu apai ko awiriki ho ko adu ni nigude rogo Ziazia kekeapai’ naye be Mbori.​—2 Timoteo 3:​14, 15.

Kina wo duhe ninyanyakipa pai furani areme ti gi yangara arame re. Oni ini gupai nga, aboro kinaho rengbe arengba ka ingisa roni niipo na gayó “wene fugo.” Sidu, oni bandatironi nimanga oni sunge na gupai oni awirikaha rogo Fugo Mbori nga Ziazia Kekeapai a wa bambata aKristano amangihe.

ADezire Yekova nikadu na ngbarago ka undo roni oni nyakasi gaoni idapase kuti Ziazia Kekeapai. Nikpiapai, i rengbe ka undo roni oni ini wai Ziazia Kekeapai naundo aboro tona ti kina gu regbo i akehe; wai du Ziazia Kekeapai na ngbanya dagbaha na birĩ-inohe ho si afura ni tipa agu apai nga ga birĩ-inohe; wai duhe na ngbanya dagbaha tona ti bambatapai dati Yugoti; na wai agu asangbaanebi du rogoho nada ti rengo; na dungu kura apai. Oni rengbe arengba ka ke waraga fu aDezire Yekova nga agu aboro nakusa gi magazini re tipa i undo roni oni ini agu apai naundo amirioni aboro i ini gupai nga Ziazia Kekeapai nzunzu nga Fugo Mbori.

[Gu kpiahe du ti kpewaraga 5]

Gaoni diaberã nga gine nibipa kido kuti Ziazia Kekeapai?

[Gu kpiahe du ti kpewaraga 6]

Wene abawirikipai kinaho naima undo rani ani ini kura kekeapai nga ga Ziazia Kekeapai