Ya Mo Ziazia Kekeapai Nga Fugo Mbori?

“Ziazia Kekeapai dunduko si aye be ga Mbori Toro si ki rengbe tipa yugopai, tipa zapai, tipa ruga aboro, na tipa raba aboro rogo rurupai; ya ga Mbori boro du ziazia, aũ manga wene apai dunduko ki du be ni.”​—2 TIMOTEO 3:16, 17.

NANGBA gu fugo gu mokedi nangia Pauro agumbaha tipa Ziazia Kekeapai re! Ko aafura tipa gu papara Ziazia Kekeapai nadu ti ragoko nga gu i naayambaha nga Kuru Ndika. Ono gupai Pauro agumbaha re, si tipa agu akitabu dunduko du 66 rogo Ziazia Kekeapai, kodihe na agu ga Yesu ruru abawiriki akehe rogo bambata sa kama agarã Fuo Batikayo Kristo.

Ya mo oni naabi Ziazia Kekeapai na kikipaha wa gu Pauro anaabihe? Ya mo oni naaberã gupai nzunzu nga agu aboro nake Ziazia Kekeapai i aduni rugurugu yó be ga Mbori toro? Agu aKristano nadu rogo bambata sa kama agarã aima ida kuti gipai re. Na si nangia boro gu ida ndikidi aKristano adu nani tona ti gu regbo re ka ndu kumbatayo. Nikpiapai, rogo 14 kama agarã, Ngirisi nangia boro pambori rimoko angia John Wycliffe anaabi Ziazia Kekeapai nga “si na rengo rogo yo.” Buku sa nafura tipa gu fugo Pauro du kuari re ki yawee wadu he nga Mbori du “narugu abakeke Ziazia Kekeapai i kehe, si nasa rani ani idi kuti gupai nga agu apai dunduko Ziazia Kekeapai agumbaha, si nga kina rengo.”​—The New Bible Dictionary.

Aria Bipai Tipa Ziazia Kekeapai

Ono ti agi aregbo ani araka ti ni re, dungu aboro aidanga kuti sangba Ziazia Kekeapai te. Buku sa nayaa: “AKristano dunduko nayawee i nabi Ziazia Kekeapai na kikiipaha, na si nasayo i naamangapai ngba kura agene na i namaamburu gayó aida riihe.” (The World’s Religions) Ono agu apai i amangaha nayugo gupai nga kungbo ziree du gbua. Dungu aboro nabi Ziazia Kekeapai awere nikungbo “yugopai nga ga aboro nga gu arengbanga ka undo ya.” Wa i navura ida kuti gupai nga agu aboro nake Ziazia Kekeapai angia agu akumba nadu na bakere idapase, i nabi agu akumba re ni agu aboro gbua naʹasaditiyo nyanyakii ka sakarogo gu dudunguroapai yo nga ga Mbori, ono i aadunga na gu inohe gbiati giarogopaiyo du ani awere nani te.

Ka gumba rengo nzunzu, kina bete aboro gbua nandu kuti sangba Ziazia Kekeapai. Nikpiapai, badungu aboro nagumba gupai nga, agu arugute Ziazia Kekeapai afuhe tipa ruru mangaapai, si nga kungbo kuruapai nga gu arengbanga ka undo ti gi gaani regbo re ya. Dungu aboro nabihe nga si naida i yugu kina bete agu andiko nga ga Ziazia Kekeapai aboro akpinyemu ka giaha, na aguyo kinaho amanganga sunge nani wagu tooni ya. Kura agu aboro nayawee i nga aKristano nabasa agu arugute abasa Ziazia Kekeapai afuhe tipa meteka, bäri, biriki, gbiati kpibuda.​—1 AKorindo 6:9, 10.

Tipagine aboro amangapai ti ni wa gure? Ti tonatona 20 kama agarã, wene bawirikipai nangia Sir Charles Marston ake ndupai sa tipa gipai re rogo gako buku nga The Bible Is True. Ko ayawee aboro “naida kuti gu kungboapai [agu aboro natikango kuti sangba Ziazia Kekeapai] akekaha nikina ipo zanga wiri sakaapai.” Ya mo si arengbanga kadu nga kina gu bangisapai re namanga areme tee? Wai si aida oni naabi agu apai agu abawirikipai airisanga Ziazia Kekeapai ya agumbaha? Oni bingo gupai gu kekeapai naye fuo gere nika gumbapaha tipa gipai re.