Rimbasa Akandoro Sa Na Babandara Sa
“Agu roni napeka re, . . . oni asúnga auru mbataabakindo bawe na ue, ka sapa ngbanga ngbatunga aYisaraere bawe na ue.”—MT. 19:28.
1. Gini ngbatunga pagume nadu dagba Yekova na atita Abarayama, na tipagine rengbe ani ti ni ka ya ko asoganga kura ngbatunga aboro asoga te?
YEKOVA aima kpinyemu Abarayama, na ki yugu ndikidi nyemuse fu atitako. Tipa agarã susi 1,500, ko anaabi agu aYisaraere naenge ti Abarayama nigako siasia aboro watadu “kparakpara ziazia rikaaboro.” (Oni gedi Pa Fu Rugute ni Ue he 7:6.) Ya mo gupai re nayugo gupai nga Yekova aaidanga na kura ngbatunga aboro tee? Oó. Ti agu aregbo re, agu aboro naangianga aYisaraere ya nadu na nyemu ka iriso Yekova, i aniʹidihe aida fuyó i koditiyo na gako kparakpara rikaaboro. Agu aboro nanaaʹaria tiyo fuo aYisaraere, i anaabiyo wakina aYisaraere. Si aidi aYisaraere nimangiyo wakina awirinayo. (Pa Mot. 19:33, 34) Na si aidi i dunduko niirisi ga Yekova andiko.—Pa Mot. 24:22.
2. Gini nyanyakipai Yesu agumbaha, na gini sanahe si akusaha?
2 Ono tie, Yesu agumba nyanyaki afugo fu agu aYuda nadu ti ragoko ki yaa: “Gu ngbi nga ga Mbori, i adía ha adia be roni, i ki fu he fu gu rika aboro nikazu kina gaha zuzuhe.” (Mt. 21:43) Ada narengbe kadu nigu vovo rikaaboro re, na gine nga sangbana gu ariapai re areme kurirani?
Vovo Rikaaboro
3, 4. (a) Ginipai gu mokedi nangia Petero agumbaha tipa gu vovo rikaaboro re? (b) Ada nga gu vovo rikaaboro re?
3 Petero aima fura ziazia tipa gu vovo rikaaboro re. Ko akepai fu akurako aKristano ki yaa: “Oni nga siasia ngbatunga aboro, nga ga bakindo aboromotumo, nga ziazia rika aboro, nga aboro du ni kina ga Mbori yo, ya oni yugu gu wene sino gbayaga nga ga gu ko nayambu roni bitimo yo ku rogo gako iiriwo imarago.” (1 Pet. 2:9) A wa i aima fura tipaha kumbatayo, agu aYuda nadi Yesu kugume ni Masiya, i nangia gu bambata aboro nada nipapara gu vovo rikaaboro re. (Dan. 9:27; Mt. 10:6) Kusa, i akodi agu aboro a naangianga aYisaraere ya kuti gu rikaaboro re, si du Petero aya ti ni wee: “Oni adu nga ni rika aboro mbata te, ono awere oni nga gu rika aboro nga ga Mbori yo.”—1 Pet. 2:10.
4 Ada Petero afura tipa yó herẽ? Ko akepai rogo gako tonatona waraga ki yaa: “[Mbori] navungu rani berewe ni gako bakere inapai ku rogo ga unga maabangirise mbiko gu zingabekpio nga ga Yesu Kristo, ku rogo gu ũkumbo azirã nga ya, agberã nga ya, agbandaka nga a ya, du ni igiigi he fu roni ngbangbaturũ yo.” (1 Pet. 1:3, 4) Sidu, gi vovo rikaaboro re nga mbedimbedi aKristano duna maabangirise ka ga ku ngbangbaturũ yo. I nga “ga Mbori Yisaraere.” (Gara. 6:16) I ayugu bange agu aYisaraere nga ga toro yo fu gu mokedi nangia Yoane ya si nga 144,000. ‘I atumo agi aboro re dagba aboro yo, i du ni amakawa fu Mbori, na fu Wiri Kandoro a’ tipa i naamangasunge “ni aboromotumo” na ‘ki zogorago naako agarã kidu 1000.’—Yugo. 5:10; 7:4; 14:1, 4; 20:6; Yak. 1:18.
Ya Mo gu Rikaaboro re Nakoda Kura Aboro?
5. (a) Ada nga agu aboro i nafura tipa yó ya i nga “ga Mbori Yisaraere”? (b) Tipagine duhe ti ni nga, gu fugo nga “Yisaraere,” rogoyo gbua sa te?
5 Si tie ziazia nga, gu “ga Mbori Yisaraere” Agaratio 6:16 afura tipa yó re, i nga mbedimbedi aKristano. Ono tie, ya mo apai ho Yekova amangisunge na aYisaraere rogoho si kidu nikpiapai tipa wai ko nika mangasunge na mbedimbedi aKristano ka koda kura aboro ku dagbayo? Ani rengbe ka gbia karagapai rogo gupai Yesu apehe fu gako ruru amokedi. Ko ayaa: ‘Mi nafu ngbii furoni a wa Buba afuhe fere, oni arí riahe ki mbirihe pati gi mbisa rogo gi ngbii; na oni asùnga auru ambataabakindo nisapu ngbanga ngbatunga aYisaraere bawe na ue.’ (Ruka 22:28-30) Gipai re amanga “ho i ka sa ahe ni dunduko ni vovo ho” ti regbo ga Kristo zogarago nikadu tipa agarã kutu.—Oni gedi Matayo 19:28.
6, 7. Ada nga “[gu] ngbatunga aYisaraere [du] bawe na ue” gumbayo payo rogo Matayo 19:28 na rogo Ruka 22:30?
6 Agu aKristano du bangeyo nga 144,000, i nika mangasunge ni abakindo, ni aboromotumo, na ni abasapungbanga a ti regbo ga Yesu zogarago nikadu tipa agarã kutu. (Yugo. 20:4) Ada i ka sapangbanga yó na ada i nika zogarago kuriyó? I nagumba gupai furani rogo Matayo 19:28 na Ruka 22:30 nga, i nika sapangbanga “[gu] ngbatunga aYisaraere [du] bawe na ue.” Gini aboro gi “ngbatunga aYisaraere [du] bawe na ue” re arukubayo? I narukuba agu aboro dunduko duna maabangirise ka raka auru kpotosende, nga agu aboro duna idapase kuti ga Yesu motumo ono adunga dagba gu riko nga ga aboromotumo ya. (I aakodanga ngbatunga Revi ku dagba agu angbatunga nangia ga aYisaraere nadu 12 te.) Agu aboro gi ngbatunga aYisaraere du 12 re arukubayo, i nga agu aboro nika gbia agu aundo nga ga toro be gu sunge agu aboromotumo du bangeyo 144,000 nikaa mangaha. Agi aboro angianga aboromotumo re ya, i a nga ga Mbori aboro ko akpinyemuyo na ko ima ida na gayó pai. Si daada i naabiyo wakina gu ga Mbori aboro nadumbata.
7 Fuo bi Yoane agu aYisaraere nga ga toro yo du bangeyo nga 144,000 i nanogodi he tiyo mbata fu tona bakere gberãngbii, ko abi gu “bakere rimbasa aboro” a ka boro arengbanga ka geda yó ya “dagba rika aboro dunduko.” (Yugo. 7:9) Gi rimbasa aboro re nika bata ti regbo gu bakere gberãngbii re na ki rimi kurogo ga Mbori vovo zegino yo, yo Yesu nika zoga yó ni tipa agarã kutu. Ti gu regbo re, Mbori azingisa dungu aboro i koditiyo naayó. (Yo. 5:28, 29; Yugo. 20:13) Agi aboro re dunduko “[gu] ngbatunga aYisaraere [du] bawe na ue” arukubayo. Yesu gbiati gu gako abadiazogarago du 144,000 nika sapangbanga agi aboro re.—Amo. 17:31; 24:15; Yugo. 20:12.
8. Wai duhe nga gu mangaapai naanidu rogo Uru Dada Ingapai aayugopa gupai nakoda agu aKristano du nimbedimbediyo du bangeyo nga 144,000 gbiati kura aboro?
8 Gi ngbanya du dagba gu mbedimbedi aKristano du bangeyo nga 144,000 na kura akandoro re, si aima du niyuguyuguhe rogo gupai nanaamanga rogo Uru Dada Ingapai. (Pa Mot. 16:6-10) Gupai si aniidihe be gbiamotumo mbata nga ko fu ‘babagara nimotumo ingapai tipa tiko, ki mangipa dada ingapai tipa tiko na tipa gako aborokporo a.’ Rogo gi gene re, Yesu namangasunge na gako motumo mbata tipa agu aboromotumo du tiibeko nga agu aboro nika mangasunge naako ngbangbaturũ yo. Berewe a, rogo Uru Dada Ingapai, i anaaye na ameme ue tipa gu ingapai nangia ga kura aYisaraere. Nibi gipai re, wa gu ngbatunga nga ga aboromotumo arukuba gu mbedimbedi aKristano du bangeyo nga 144,000, yangara aYisaraere tigayo narukuba agu aboro dunduko duna maabangirise ka raka auru kpotosende. Mangasunge na gu fugo nga “[gu] ngbatunga aYisaraere [du] 12,” ngba gi gene re naye na gu kura rogoyo nakoda agu aboro dunduko duna idapase kuti ga Yesu motumo. Bambata rogoyo nga agu aKristano du nimbedimbediyo nika mangasunge ni aboromotumo tiibe Yesu.a
9. Rogo gu yuguyugupai i afuhe fu Yezekere, aboromotumo narukuba ada, na ada agu aboro naangianga aboromotumo ya arukubayo?
9 Ani bingo gu kura kpiapai. Mbori afu yuguyugupai fu Yezekere tipa ga Mbori yekaru. (Yeze. kapita 40-48) Rogo gu yuguyugupai re, aboromotumo aamangasunge tii yekaru yo, kini fu arugute fu aboro na kini gbia arugute be Yekova. (Yeze. 44:23-31) Rogo gipai re, angbatunga aYisaraere nibakiakia aye tipa irisombori na ki fuku gayó amotumo. (Yeze. 45:16, 17) Herẽ, aboromotumo narukuba mbedimbedi aKristano, na agu aYisaraere tigayo naangianga aboromotumo ya narukuba agu aboro duna maabangirise ka raka auru kpotosende. Gu yuguyugupai re nanyakasapa gupai nga, agu ariko du ue re, i namangasunge kinakubani zanga kparakapai, ono gu riko nga ga mbedimbedi aKristano nangbembatayo.
10, 11. (a) Gini digisidigisi sangba Yesu nanyakasa gaani idapase bi ani he? (b) Gini sanahe duho tipa kura akandoro?
10 Yesu afura tipa “kura akandoro” ya ami rogo bangisa “ndugu” sa na agura nga mbedimbedi aKristano te, nga agura i ayamba ra nga “umba rika aboro.” (Yo. 10:16; Ruka 12:32) Ko ayaa: “Mi ayé aye na ami a, ami agía fugore agia; rimbasara adú adu sa, babanda akandoro ki du sa.” Nairiwo wai digisidigisi gupai re anyakasa gaani idapase! Yesu ima koda ngbatunga riko aboro awere ue, nga gu tooni riko nga ga mbedimbedi aKristano na gu bakere rimbasa nga ga kura akandoro. (Oni gedi Zekaraya 8:23.) Wa vura duhe nga kura akandoro amanganga sunge rogo gu vurukporo du ku dimoyo nga ga gu yekaru nga ga toro te, i namangasunge tigayo rogo gu vurukporo du ku zegi yo.
11 Ono wa duhe nga Yekova anaamangasunge amanga ti kura aregbo na agu aYisaraere naadunga dagba aboromotumo yo ya tipa i rukuba kura akandoro, ya mo si naida agu aboro duna maabangirise ka raka auru kpotosende ri gu kpakuto du tipa Tingida Pakpio Yesu na ki mbiri gu imekakue du tipaha? Ani bingo karagapai sa gi sanahe re.
Vovo Mokido
12. Gini vovo mbakadapai Yekova afura tipaha kumbatayo?
12 Yekova afura tipa vovo mbakadapai kumbatayo tipa gako aboro ki ayaa: “Gere nga gu mokido mi ka manga na aboro aYisaraere fuo agu arago re, . . . mi amáa gi rugute ku rogo yo yo, mi ki ke he ku ngbaduyo yo; mi ki du ni gayo Mbori, i ki du ni gimi aboro.” (Yere. 31:31-33) Rogo gi vovo mokido yo re du Yekova nika digiso gu gako akidohe ni ko amangihe na Abarayama.—Oni gedi Bambata Pai 22:18.
13, 14. (a) Ada nga agu aboro du rogo vovo mokido? (b) Ada nga agu aboro nagbia undo be vovo mokido na wai i ‘akakuti’ gi vovo mokido re?
13 Yesu afura tipa gi vovo mokido re rogo gu yuru nadumbata fu kpioko ho ko ayani wee: “Gi inga re, si nga vovo ndika [watadu vovo mokido] rogo kurere, nga kina gu nauka tipa roni.” (Ruka 22:20; 1 Kor. 11:25) Ya mo aKristano dunduko du rogo gi vovo mokido re? Oó. Kina bete aboro du rogoho, wa agu amokedi nambiri hee tingba gu inga re rogo gu nyemu re. I nga agu aboro du rogo gu vovo mokido re.b Yesu amangi kura mokido naayó tipa ka zogarago naayó rogo gako Kindo. (Ruka 22:28-30) I nga agu aboro nika zogarago na Yesu rogo gako Kindo ngbangbaturũ yo.—Ruka 22:15, 16.
14 Ono ginipai tigaha du tipa agu aboro nika raka auru kpotosende tiibe gu Kindo re? I nga agu aboro nika gbia undo be gu mokido re. (Gara. 3:8, 9) Wa avuranga du yó ni agu aboro du rogo gu mokido re ya, i ima ‘kakuti’ gu mokido re nimangayo agu apai gu mokido re aidaha beyo a wa gu nebi nangia Yesaya aima gumbaha kumbatayo ki yaa: ‘Gu kungba aboro nakpamiatiyo na mi nga Yekova, kaa manga pare, na ka kpinyemure, kadu nigimi amoyambu, nga aguyo dunduko naberãpa rago sabiti, ka i abasanga paha ya, ki kakuti gi zungahe nyanyakii–i mi ka ye naayó kupati gi kparakpara ziazia bagangara, ki fu ngbarago fuyó rogo gi bambu kparakpee yo.’ Fuo gure, Yekova ayaa: “I ayá ti gi bambu wẽ bambu kparakpe nga ha tipa aboro dunduko.”—Yes. 56:6, 7.
Ada Si Aida I Ri Aũtingida Pakpio Yesu?
15, 16. (a) Gine gu mokedi nangia Pauro akodihe kuti vovo mokido? (b) Tipagine si aidanga ti ni agu aboro duna maabangirise ka raka auru kpotosende ri gu kpakuto du tipa Tingida Pakpio Yesu na ki mbiri gu imekakue du tipaha ya?
15 Agu aboro du rogo vovo mokido, i duna “ngarã . . . tipa rima ku rogo ziazia ba.” (Oni gedi AEbere 10:15-20.) I nga agu aboro “nadia gu ngbi ku gume i arengba nga na wo ti ni ya.” (Eb. 12:28) Sidu tie, kina agu aboro nikadu ni abakindo na ni aboromotumo ngbangbaturũ yo na Yesu Kristo daha fuyó i mbiri hee tingba gu “inga” re, nga guhe narukuba vovo mokido. Agi aboro du rogo gi vovo mokido re, i nga agu aboro i nakido yó tipa rogatise na wiri kandoro. (2 Kor. 11:2; Yugo. 21:2, 9) Agu aboro dunduko nandu kupati Tingida Pakpio Yesu, i nandu koyo kadu ni iriʹiri adupatipai, angianga ka ri kpakuto na ka mbira imekakue ya.
16 Pauro agumba kurapai a naundo rani ani rugutirani na ndu gupai agu aboro duna maabangirise ka raka auru kpotosende adianga aũtingida Pakpio Yesu ti ni ya. Ko aya fu mbedimbedi aKristano wee: ‘A wa oni kaaniri gi kpokuta re, kini mbirihe tingba gi inga re, oni naatakapandepa ga Gbia kpio daho ko ka ye ni.’ (1 Kor. 11:26) Gini regbo ko nika “ye” ti ni? Ko nika ye ti gu regbo si ka ida ko di gu yangara boro du rogo gu rika nga ga gu dee nika dia kumba ka ga na ní ku ngbangbaturũ yo. (Yo. 14:2, 3) Si tie ziazia nga, aboro anyenga anye kaa manga gu dunguratise du tipa Ga Gbia Riahe kindi te. Gi “yangara” mbedimbedi aKristano re nikaa ri gu riahe re kindi daho i ka ga ni naabayo dunduko ku ngbangbaturũ yo. (Yugo. 12:17) Wa ka si adu nga agu aboro nika raka auru kpotosende nari gu kpakuto re ari na kini mbiri gu imekakue re, ka si idi gupai tie nga i naarihe ari kindi.
‘I Adu Nigimi Aboro’
17, 18. Wai gu sangbanebi du rogo Yezekere 37:26, 27 adigi?
17 Yekova afura kumbatayo tipa gu kpamiatise du dagba gako aboro ki yaa: “Mi amanga mokido nga ga zereda na yo; si adu ni nyenye mokido na yo; mi ki fu maku fu yo ki ngeesi yo, mi ki moi gi kparakpara ba dagba yo nye anye kindi. Gi baraka adu na yo; mi ki du ni gayo Mbori, i ki du ni gimi aboro.”—Yeze. 37:26, 27.
18 Ga Mbori aboro dunduko duna momu ka gbia undo be digisidigisi gi mokido nga ga zereda re. Ii, Yekova ima kido pazereda fu gako amoyambu dunduko nga aguyo nagiasangbako. Aboro nabi zuzu gako toro abi ziazia tiyo. Gako bamotumo gu du dagbayó, nga ziazia irisombori. I nga gako aboro nirengo, mbiko i aima mbu ngbatunga airisokpiaahe dunduko ono kini irisi kina Yekova sa.
19, 20. Ada i nakodi yó ku dagba agu aboro Yekova ayambayo nga “gimi aboro,” na gine vovo mokido naye nani?
19 Nairiwo wai si afu ngbarago furani ka bi gupai nga ariko ue nga ga akandoro ima kpamia tihe! Wa vura duhe nga bakere rimbasa aboro na maabangirise ka ndu ku ngbangbaturũ yo te, i na ngbarago ka kodatiyo na aguyo nandu. I ima kakuti ga Mbori aYisaraere. Pa mangayó ho were nasa Yekova ko naayamba yó ‘nigako aboro’ mbiko i ye ku dagba gako amoyambu. I du nga agu aboro gi sangbanebi re adigo kutiyó. Si nayaa: “Dungu arikaaboro nikakpamia tiyo kuti Yekova ni gu uru re, i ki du ni gimi aboro; mi ki niraki dagba[yó].”—Zek. 2:11; 8:21; Oni gedi Yesaya 65:22; Yugoti 21:3, 4.
20 Yekova sa agi apai re si mangi mbiko vovo mokido. Dungu agu aboro naangianga ga Mbori aboro ya, i ima ye awere ki sa tiyo nigako aboro. (Mika 4:1-5) I ima diaberã ka kakuti gu mokido re kini irisi agu arugute du tipaha. (Yes. 56:6, 7) Wa i amanga gipai re, kodihe na ga Mbori aYisaraere, i nagbia ngbarago mbiko gu zereda du dagba ga Mbori aboro. Gi zereda re dunga nigaoni awere na nyeanye kindi!
[Gu rukutu kekeapai du bandu kpewaraga yo]
a Wakina gure a, i nafura tipa mbedimbedi aKristano ni “dungurati.” (Eb. 12:23) Gu fugo nga “dungurati,” si rengbe kadu na dungu arogoyo ti ni. Gu kura rogoyo nga aKristano dunduko, zanga bipa gu maabangirise du yó nani.—Oni bi gu Ngbaõbambu Sinziri nangia ga Merekoko 1, 2007, kpewaraga 9-11.
b Yesu nga azarõ rogo gu mokido re, angianga gu boro du rogo mokido ya. Wa duhe nga ko nga azarõ, si ziazia nga ko aaringa gu kpakuto na ki mbiri gu imekakue nadu tipa tingida pakpioko te.
[Gu kpiahe du ti kpewaraga 32]
Oni Natingidaha?
• Ada nga “[gu] ngbatunga aYisaraere [du] bawe na ue” gu mbedimbedi aKristano du bangeyo nga 144,000 nika sapangbanga yó?
• Ginipai nakoda mbedimbedi aKristano na kura akandoro rogo vovo mokido?
• Ya mo si naida aKristano dunduko ri gu kpakuto du tipa Tingida Pakio Yesu na ki mbiri gaha imekakue?
• Gini kpamiatise i afura tipaha kumbatayo namanga ti gi gaani regbo re?