Dungura Agu Ahe Du Ngbangbaturũ Yo Na Agu Du Auru Kpotosende No

“Gupai ngbaa tiko . . . [nga ka] dungura ahe dunduko berewe si du sa rogo Kristo yo, nga agu ahe du ngbangbaturũ yo na agu du auru kpotosende no.”—AEFESO 1:9, 10, NW.

1. Gine nga gupai ‘ngbaa ti’ Mbori tipa ngbangbaturũ na kpotosende?

ZEREDA ROGO ZEGINO DUNDUKO! Gure nga gu taasitaasipa ringbisapai nga ga Yekova, nga “Mbori zereda.” (AEbere 13:20) Mbori afu gako toro kurii gu mokedi nangia Pauro ko ke gupai ‘ngbaa ti’ ko nga ka “dungura ahe dunduko berewe si du sa rogo Kristo yo, nga agu ahe du ngbangbaturũ yo na agu du auru kpotosende no.” (AEfeso 1:9, 10, NW) Ginipai gu fugo ayugoho ziazia nga ‘dungura ahe dunduko berewe’ nga gu du rogo gi veresi re? Gu wene bawiriki Ziazia Kekeapai nga John B. Lightfoot nayaa: “Gu fugo re nayugopa gu dunguradungura ahe naabaha nga ga zegino, nga gu nika dunga berewe na kura apai ti ni kia nga agu rengbe ka ye na kparakapai ya, ono si adu nigu zegino ahe nika dungura tihe kurogoho dunduko nikpamiakpamiaha rogo Kristo yo. Ingapai na kpio, rungo na zanga diabepai gbiati mbugo, si adigo.”

“Agu Ahe Du Ngbangbaturũ Yo”

2. Ada du nga “agu ahe du ngbangbaturũ yo” si aida i dunguraha?

² Gu mokedi nangia Petero agumbapa gu iiriwo maabangirise nga ga ndikidi aKristano naabaha ho ko akepai ni ki yaa: “Ani nangera tipa vovo angbangbaturũ na vovo kpotosende, nga gu ruru apai nikanye rogo ho.” (2 Petero 3:13) Gu “vovo angbangbaturũ” kido yo paha herẽ re, si nga gu vovo tandu zogarago nga ga Masiya Kindo. “Agu ahe du ngbangbaturũ yo” Pauro afura tipaha rogo gako waraga fu AEfeso naida i dunguraha “rogo Kristo yo.” Si nga gu ringbisiringbisi bange aboro i nasia yo tipa i zogarago na Kristo ngbangbaturũ yo. (1 Petero 1:3, 4) Gi mbedimbedi aKristano du bangeyo nga 144,000 re nga aguyo i “atumo yo rogo kpotosende,” na i “atumo agi yo dagba aboro yo re,” i duni adi ũkumbo na Kristo rogo gako Kindo nga ga ngbangbaturũ.—Yugoti 5:9, 10; 14:3, 4; 2 AKorindo 1:21; AEfeso 1:11; 3:6

3. Wai rengbe yo ka yawee mbedimbedi aKristano ‘[na]sungo rogo aba ngbangbaturũ yo’ zavura ho du yo ni kindi auru kpotosende vurũ?

³ Ziazia toro nasia mbedimbedi aKristano watadu navunga yo berewe, i dani awiri Yekova nga ga toroyo. (Yoane 1:12, 13; 3:5-7) Fuo Yekova di yo ni “awirimbuti,” i kini da ni awirina Yesu. (ARomo 8:15; AEfeso 1:5) Fuo duhe wa gure, zavura ho du yo ni kindi auru kpotosende, i nayawee i ima ‘dia yo ku ariyo na ki sungusi yo dunduko nikpamiakpamia yo na Kristo Yesu rogo agu aba du ngbangbaturũ.’ (AEfeso 1:3; 2:6) I nasungo rogo gi tumbatumba ba nga ga toro re bambiko i ima “nogoda yo na gu ziazia toro i akidohe tipaha, . . . nga gu nayugo kpia gayo ũkumbo kumbatayo” du nibandabandaha tipa yo ngbangbaturũ yo. (AEfeso 1:13, 14 NW; AKorosaio 1:5) Aguyo re tie du, nga “agu ahe du ngbangbaturũ yo,” nga aguyo Yekova aima ringbisa namba yo ni agu aboro si aida i dungura yo.

Dungura Ahe [Mbedimbedi AKristano] Tona

4. Wai na ti gini regbo i atona dungura “agu ahe du ngbangbaturũ yo”?

⁴ Na ngbanyaa kuti ga Yekova “ngerakuriisunge,” watadu wene gene nga ga mbakadaapai, pa dungura “agu ahe du ngbangbaturũ yo” adu nga si atona “ti digido ringbisiringbisi aregbo.” (AEfeso 1:10 NW) Gu ringbisiringbisi regbo re ada rago Pendekote rogo gu garã nangia 33 F.B.K. Nigu uru re, i auka ziazia toro kurii amokedi na kurii badona abawiriki, nangia akumba na adee. (Amokedi 1:13-15; 2:1-4) Geregu nangia gu gopai naayugo gupai nga, vovo mokido atona kaa mangasunge, sidu, gipai re nangia tonatona gu dungurati nga ga aKristano gbiati gu rikaaboro nga agu aYisaraere nga ga toroyo, “ga Mbori Yisaraere.”—AGaratio 6:16; AEbere 9:15; 12:23, 24.

5. Tipagine Yekova akusi vovo “rikaaboro” ti ni i diba ndikidi aYisaraere?

⁵ Gu Ndiko nga ga mokido Mbori amangihe na ndikidi aYisaraere, akusanga ‘kindo nga ga aboromotumo na ziazia rikaaboro’ nga gu ka mangisunge nyeanye kindi ngbangbaturũ yo te. (Gate 19:5, 6) Yesu agumba gupai fu ga aYuda abarumbatayo rogo pambori nga: “Gu ngbi nga ga Mbori, i adía ha adia be roni, i ki fu he fu gu rika aboro nikazu kina gaha zuzuhe.” (Matayo 21:43) Gu rikaaboro re, nga agu aYisaraere nga ga toroyo, nakoda mbedimbedi aKristano nga agu aboro i nadiyo kurogo vovo mokido. Agiyo re gu mokedi nangia Petero akepai fuyo ki yaa: “Oni nga siasia ngbatunga aboro, nga agu aboromotumo nga abakindo, nga ziazia rikaaboro, nga ga Mbori aboro, ya oni yugu gu wene sino gbaiga nga ga guko nayambu roni bitimo yo kurogo gako iiriwo imarago. Bambiko oni aadunga mbata ni rikaaboro te, ono oni awere niga Mbori aboro.” (1 Petero 2:9, 10, NW) Ndikidi aYisaraere adunga berewe niga Mbori aboro mokido te. (AEbere 8:7-13) A wa Yesu aima gumbaha kumbatayo, i adi gu mamu nga ga du nipapara ga Masiya Kindo re beyo ki fuhe fu gu 144,000 aYisaraere nga ga toroyo.—Yugoti 7:4-8.

I Adi Yo Kurogo gu Mokido Nga ga Kindo

6, 7. Gini kparakpara mokido Yesu amangihe na agu awirinako i avungu yo nitoro, na gine gipai re ayugoho tipa yo?

⁶ Nigu yuru Yesu asigira Ga Gbia Riahe Nga ga Nyemu, ko agumba gupai fu gako ruru amokedi nga: “Oni nga agu yo naadu na mi ho i aasadi re ni. Mi nafu ngbi fu roni a wa Buba afu he fere, oni arí riahe ki mbiri he pati gi mbisa rogo gi ngbi; oni asùnga auru ambatabakindo nisapu ngbanga fu rika aYisaraere bawe na ue.” (Ruka 22:28-30) Yesu afura herẽ tipa kparakpara mokido nga gu ko amangihe na agu awirinako du 144,000 i avungu yo nitoro, nga aguyo nika “ngarã angarã ki da ti kpio” na ki ngia ‘adibepai.’—Yugoti 2:10; 3:21.

⁷ Agu aboro du rogo gi ringbisiringbisi badona re ima mbupa gu maabangirise naabaha du tipa raka nyeanye kindi auru kpotosende ni agu aboro duna pasio gbiati kure tiikpotoyo yo. I nika zogarago na Kristo ngbangbaturũ yo, ki susungu auru ambatabakindo ka sapangbangaa ngbatunga aboro dunduko. (Yugoti 20:4, 6) Awere tie, ani makianga gu kura averesi nafura sa tipa kina gi mbedimbedi aKristano re, na nga gu nayugo ndu gupai gu “kura akandoro [avusende]” naaringa kpakuto kini mbiri imekakue ti ni ti regbo Tingidapa Kpio Yesu ya.—Yoane 10:16.

8. Gine mbedimbedi aKristano ayugoho niri yo kpakuto ti regbo Ga Gbia Riahe Nga ga Nyemu? (Oni bi gu sanduki du ti kpewaraga 15.)

⁸ Mbedimbedi aKristano rengbe ka gbia arungosi wa kina gu Kristo agbiaha na i na nyemu ka futiyo tipa kpio wa kina gu ko amangihe. Nidu Pauro niboro sa rogo gu badona re, ko agumba gupai nga ko aima mbakada tiko ka mbupa apai dũ tipa ko rengbe ka “bi Kristo . . . [ka ino] ko na gu tandu nga ga gako zingabekpio, na ngbanya rogo gako hipai.” Ii, Pauro aduna nyemu ka fu tiko ‘tipa kpio wa kina gako [Yesu].’ (AFiripoio 3:8, 10) Dungu mbedimbedi aKristano aima hi dungu arungosi ti agu akpotoyo nga ga borose be ‘gu kere mangimangi yo nafu-kpio wagu i amangi Yesu nani.’—2 AKorindo 4:10.

9. Gini kpotose gu kpakuto nga ga Tingidapa Kpio Yesu arukubaha?

⁹ Ho i aasigira Ga Gbia Riahe Nga ga Nyemu ni, Yesu ayaa: “Borore nga gere.” (Marako 14:22) Ko afura tipa ndikidi boroko, nga gu si adu nga i nika takaha na ki behe na kure. Kpakuto zanga agbooro angia wene kpiapai nga ga gu borose re. Tipagine? Bambiko rogo Ziazia Kekeapai, agbooro rengbe ka yugopa ingapai watadu gbegberepai. (Matayo 16:4, 11, 12; 1 AKorindo 5:6-8) Yesu angia rengberengbe boro, na gu kpotoko nangia ga borose adu zanga ingapai. Si du ko arengbe ka fu gu rengberengbe borose re ti ni nigu motumo nga ga mbakadapai dagbase. (AEbere 7:26; 1 Yoane 2:2) Si adu nga pa manga ko ho wo afu undo fu ruru aKristano dunduko, ka si vura du nga i namaabangirise tipa raka ngbangbaturũ yo watadu tipa nyenye unga rogo paradiso kpotosende.—Yoane 6:51.

10. Rogo gini gene du agu aboro ninaambira gu imekakue nga ga Tingidapa Kpio Yesu na ngbanyaa rogo kure Kristo?

¹⁰ Nibipa gu imekakue mbedimbedi aKristano naambiraha pati Tingidapa Kpio Yesu, Pauro akepai ki yaa: “Gu inga maku ani nafu tambuahe tipa ha, a nga gu ngbanya nga ga kure Kristo te?” (1 AKorindo 10:16) Rogo gini gene agu aboro ninaambira imekakue nidu na ‘ngbanyaa rogo kure Kristo yo’? Nirengo, i adunga na Kristo rogo fu motumo tumorii te, bambiko i nitiyo naida bata aida. Rogo gayo idapase kuti gu ome batasa aboro nga ga kure Kristo, i nainopai fuyo ti gayo ingaapai na i kini yambu yo niziazia yo tipa raka ngbangbaturũ yo. (ARomo 5:8, 9; Tito 3:4-7) Gu 144,000 aboro duni adikumbo zogarago na Kristo ‘nigirisigirisi’ yo, nikparakpara yo, nizunduzundu yo be ingapai kidu “[ni]ziazia yo,” bambiko gu kikiipa geno kure Kristo nauka. (AEbere 10:29; Daniere 7:18, 27; AEfeso 2:19) Ii, Kristo “angbe aboro ni kure[ko] fu Mbori dagba angbatungayo, na angbatunga afugoyo, na aboro, na arikaaboro dunduko, ki sa yo ni abakindo na aboromotumo tipa gaani Mbori; i ki nizogo rago auru kpotosende.”—Yugoti 5:9, 10.

11. Ginipai mbedimbedi aKristano ayugoho nimbira yo gu imekakue nga ga Tingidapa Kpio Yesu?

¹¹ Ho Yesu asigira Tingidapa kpioko ni, ko afu gu inga nadu na imekakue rogoho fu gako ruru amokedi na ki yaa: “Oni mbíri he ambira ti ngba gere dunduko; bambiko gere nga kurere nga ga vovo ndika, i niuka ha tipa roni na dungu aboro sa dia gbegberẽapai ti yo.” (Matayo 26:27, 28) Teketeke a wa kure abaʹabagara na kure ameme anaanyakasapa gu Ndiko nga ga mokido dagba Mbori na gu rikaaboro nangia agu aYisaraere nadumbata, kinawo a kure Yesu asa gupai nga gu vovo mokido Yekova arengbe ka mangaha na agu aYisaraere nga ga toroyo du ninyanyaki he, nga gu natona rago Pendekote rogo gu garã nangia 33 F.B.K. (Gate 24:5-8; Ruka 22:20; AEbere 9:14, 15) Ho i naambira gu imekakue ni narukuba gu “kure nga ga gu mokido” re, gure nga gu mbedimbedi aKristano re nayugo gupai nga i ima dia yo kurogo gu vovo mokido re na i kini gbia gaha weneapai.

12. Gini gene i bapatizi mbedimbedi aKristano rogoho kurogo ga Kristo kpio yo?

¹² Gu kurapai kinaho berewe a mbedimbedi aKristano atingidapaha. Yesu agumba gupai fu gako ruru abawiriki nga: “Gu inga mi nambira he ti ngbaha oni ambira he ti ni; na gu bapatiza i nabapatiza re na ni i abapatiza roni na ni.” (Marako 10:38, 39) Kusa, gu mokedi nangia Pauro afura tipa ‘bapatizi yo aKristano kurogo ga [Kristo] kpio yo.’ (ARomo 6:3) Mbedimbedi aKristano naraka gu raka nga ga mbupa kura gayo apai. Gayo kpio nga motumo rogo gu gene nga i ima mbu maabangiriyo tipa ka gbia nyenye unga auru kpotosende no. Gu bapatiza nga ga gi mbedimbedi aKristano re nanyasa ho i azingisa yo ni ni agu aboro nga atoro fuo kpiko yo niruru yo tipa i ‘zogorago a ni abakindo’ na Kristo ngbangbaturũ yo. —2 Timoteo 2:10-12; ARomo 6:5; 1 AKorindo 15:42-44, 50.

Pa Ri Kpakuto na Mbira Imekakue

13. Tipagine agu aboro duna maabangirise tipa raka auru kpotosende naaringa gu kpakuto ti ni na ki mbiri gu imekakue nga ga Tingidapa Kpio Yesu ya, ono tipagine i naandu ti ni ku patihe yo?

¹³ Wa duhe nga pa ri kpakuto na kini mbiri imekakue ti regbo Tingidapa Kpio Yesu nakoda agi apai re dunduko, si rengbe kadu ziazia nga, si adanga fu agu aboro duna gu maabangirise nga ga raka auru kpotosende i rihe na ki mbirihe te. Agu aboro duna gu maabangirise nga ga raka auru kpotosende rugutiyo na gupai nga, i nitiyo nga gu mbedimbedi aboro du nikpamiakpamia yo na Kristo te, watadu i a rogo gu vovo mokido Yekova amangihe na agu aboro nika zogarago na Yesu Kristo te. Wa duhe nga “inga” narukuba vovo mokido, kina agu aboro du rogo gu vovo mokido re, i nari gu kpakuto re na kini mbiri gu imekakue re. Agu aboro nangera kumbatayo tipa nyenye unga auru kpotosende nirengberengbe aboro tii gu zogarago nga ga Kindo, i nga aguyo i abapatizinga yo kurogo kpio Yesu yo ya, watadu i ayambanga yo tipa zogarago ngbangbaturũ yo a ya. Ka i mbiri gu imekakue re na ki ri gu kpakuto re, si nika yugo gupai angianga rengo tipa yo ya. Si ki ta du were, i ambiranga he na ki ri he ti regbo Ga Gbia Riahe Nga ga Nyemu te, wa vura duhe nga i nasungo asungo patihe niʹiriʹiripa adupatipai vurũ. I na tambuahe tipa agu apai Yekova amangihe fuyo dunduko rogo Wiriko yo, kodihe na mbupai fuyo riimburu gu kure Kristo nauka tipa gayo ingaapai.

14. Wai ri gu kpakuto gbiati mbira gu imekakue nga ga Tingidapa Kpio Yesu anyakasa mbedimbedi aKristano rogo toroyo?

¹⁴ Pa sia yangara gu wiri tooni namba aKristano i nayambu yo tipa zogarago na Kristo ngbangbaturũ yo ima mbeda ka rengba. Mbedimbedi aKristano nanyaka rogo toroyo nidia yo gu kpakuto gbiati imekakue du tipa Tingidapa Kpio Yesu re, daho gu gayo raka nga ga mbu kura gayo apai nika digo ni auru kpotosende. I inipa vo tiyo sa rogo kpamiatise na awirinayo nga kura mbedimbedi aDezire ni apapara kpoto Kristo. Pa ri yo gu kpakuto gbiati mbira yo gu imekakue narukuba kurahe natingida yo naapa gayo sunge ka nye niruru yo kindi dati kpio.—2 Petero 1:10, 11.

Dungura ‘Agu Ahe Du Auru Kpotosende’

15. Ada i adungura yo kupati mbedimbedi aKristano?

¹⁵ Natona rogo bebere agu agarã nangia ga 1930, gu namba nasona kina kumbatayo nga ga “kura akandoro [avusende],” adunga rogo gu “umba rika” ya, na du gayo maabangirise nga ka raka nyeanye kindi auru kpotosende, aima kodatiyo kuti mbedimbedi aKristano rogo songodayo yo. (Yoane 10:16; Ruka 12:32; Zekaraya 8:23) I aima dani agu abadiangba Yesu nga awirinako, nakakuti manga rurupai fuko, kini fu nyanyakipa undo rogo tungusa “gi wene pangbanga nga ga kindo” re nidezirepai fu arikaaboro dunduko. (Matayo 24:14; 25:40) Nimanga yo ho wo, i na mamu beyo tipa ga Kristo sapangbangaa fuyo nigako “akandoro,” ho ko ka ye ni ka sapangbangaa arikaaboro, ko amaa yo ku “kumbabeko” yo, nga gu fugo masaku nayugo gupai nga, ko ima ida na gayo apai . (Matayo 25:33-36, 46) Rogo gayo idapase kuti kure Kristo, i nikangia gu “bakere rimbasa” nika bata rogo “bakere gberãngbi.”—Yugoti 7:9-14.

16. Ada “agu ahe du auru kpotosende” nika kodayo, na wai agiyo dunduko re nika duna mamu beyo ka dani “awiri Mbori”?

¹⁶ Gu digiso sunge nga ga sia yangara agu aboro du bangeyo nga 144,000 re nika zaka gene tipa agu “ayuge” nga ga gbarasa rago kuti ga Satana sino mangaapai auru kpotosende. (Yugoti 7:1-4) Ti regbo gu Sa Kutu AGarã Zogarago Nga ga Kristo na agu abadiangbako nga abakindo ni aboromotumo re, agu aboro i ka zingisa yo bekpio bagida yo nikaa dunga ti ni ya, akodatiyo kuti gu bakere rimbasa aboro nika bata rogo bakere gberangbii. (Yugoti 20:12, 13) Agiyo re nikadu na gu mamu beyo nga ga da nigu nyenye azogo auru kpotosende nga ga gu Kindo nga ga Masiya, nga Kristo Yesu. Ti digido gu Sa Kutu AGarã Zogarago re, i amaa agi ‘ahe du auru kpotosende’ dunduko re kurogo yangara asada. Aguyo nika yugo go gupai nga i niruru yo, i adia yo ni “awiri Mbori” nga ga kpotosende yo.—AEfeso 1:10; ARomo 8:21; Yugoti 20:7, 8.

17. Wai ga Yekova ringbisapai nikadu nidigisidigisihe?

¹⁷ Sidu, nimanga ko sunge na gako nyenye tatamana nga ga “ngerakurii pasunge,” watadu wene gene nga ga mangaapai, Yekova nika nyasa gako ringbisapai ‘ka dungura ahe dunduko berewe si du sa rogo Kristo yo, nga agu ahe du ngbangbaturũ yo na agu du auru kpotosende no.’ Gu tatamanatatamana aboro dunduko du ngbangbaturũ yo na aguyo du auru kpotosende no nikadu nidungura dungurayo rogo zereda nga ga zegino, kini ra ningbarago fu gu ruru zogarago watadu ruru pagbia nga ga gu Bakerepa Baringbisiapai nga Yekova.

18. Wai mbedimbedi aKristano gbiati abadiangbayo nika gbia mamu be du pati Tingidapa Kpio Yesu?

¹⁸ Nairiwo gu nyakasa idapase nikangia ha fu gu tooni namba nga ga mbedimbedi aKristano, gbiati agu amirioni abadiangbayo nga kura avusende, i dunguratiyo rogo Zerekpe ti rameru 12, 2006! I amanga Tingidapa Kpio Yesu a wa ko azinahe fuyo ki yaa: “Oni mangi gere nitingidi pa re.” (Ruka 22:19) Agu aboro dunduko nikadu patihe duwa ka i tingidi gupai Mbori amangihe fuyo rogo gu Wiriko ko akpinyemuko gbe, nga Kristo Yesu.

Fugöpai

• Gine nga ga Yekova ringbisapai tipa agu ahe du ngbangbaturũ yo na agu ahe du auru kpotosende no?

• Ada nga “agu ahe du ngbangbaturũ yo” na wai i adungura yo?

• Ada nga “agu ahe du auru kpotosende,” no na gini maabangirise du tipa yo?

[Gu kpiahe du ti kpewaraga 15]

‘Gu Borose Nga ga Kristo’

Rogo 1 AKorindo 10:16, 17, ho Pauro asaka rogo gupai yo nzunzu du tipa agu awirina Kristo du nimbedimbedi yo nitoro ni, ko afura tipa ‘borose’ rogo kparakpara berã. Ko ayaa: “Gu kpokuta ani nakuadi, a nga gu ngbanya nga ga boro Kristo te? Bambiko ani wa du ani ngenge ani wa kpokuta sa, boro sa, bambiko ani namongo rogo gu kpokuta du sa.” Ho mbedimbedi aKristano ari gu kpakuto ni nga ga Tingidapa Kpio Yesu, gure nga i natakapande gayo kpamiatise kurogo gu dungurati nga ga mbedimbedi aKristano, nga gu duwa borose na Kristo ni Riihe.—Matayo 23:10; 1 AKorindo 12:12, 13, 18.

Tipagine kina mbedimbedi aKristano sa naari gu kpakuto na kini mbiri gu imekakue ti ni du tipa Tingidapa Kpio Yesu?

[Gu kpiahe du ti kpewaraga 17]

Rogo ga Yekova ngerakurii-sunge, kusikusiahe dunduko ngbangbaturũ yo na auru kpotosende nikadu nikpamiakpamiaha