I Nabapatizi Boro Ti Rimo Da Na Ti Rimo Gine?

“Oni ndú . . . ki sa arikaaboro dunduko ni abawiriki, ki nibapatizi yo ku rogo rimo Mbori nga Ba na Wiri na Ziazia Toro.”​—MT. 28:19.

1, 2. (a) Ginipai namangi Yerusarema yo rago Pendekote rogo gu garã nangia 33 F.B.K.? (b) Tipagine dungu aboro azi bapatiza ti ni?

ROGO gu garã nangia 33 F.B.K. rago Pendekote, aboro aye rogo dungu aringara ku Yerusarema yo ki hí he. I aye tipa nyanyakipa pumbo. Gupai naamanganga mbata ya amangi ti gu regbo re. Fuo mangaha, gu mokedi nangia Petero amangi gumbapai nadu na iiriwo sangbanaha ti ni. Gi gako gumbapai re azi ngbadu aYuda yo bangeyo adu wa 3,000 gbiati agu aboro nasa tiyo kurogo gu pambori nga ga aYuda. Fuo gure, agi aboro re ki zi bapatiza. I agbia agi aboro re kuti aguyo nadu rogo gu dungurati nangia ga aKristano i asigiraha nivovopai ti gu regbo re. (Amo. 2:​41) Zanga kapa, dungu aboro avura ndu kupati agu aime-munga watadu adue-ime gi dungu aboro re azi bapatiza rogoho!

² Gine nasa gupai nga dungu aboro wa gure zi bapatiza ti bangisa regbo sa? Wiso rogo gu uru re, aboro agi “woro[he] si niwo awo ari yo wa ka kina bakere yuge aya ari yo.” Rogo gu vurubambu nadu kuari, ziazia toro azoro kurii ga Yesu abawiriki bangeyo aduwa 120. Tingbafuo gu regbo re, avurumbori adunguratiyo ka gia agu abawiriki re i ‘natona fura ni kura ngbatunga afugo.’ Ho i agi gupai ni Petero agumbaha kodihe na gupai ko agumbaha tipa pakpio Yesu, “ngbaduyo ki nikua akua.” Ginipai si aidi i mangihe? Petero akaragapai fuyó ki yaa: “Oni sá gaoni berã i ki bapatizi roni dunduko ti rimo Yesu Kristo . . ; oni ki di gu ũgume nga Ziazia Toro.”​—Amo. 2:1-4, 36-38.

3. Ginipai si aidi agu aYuda nasa gayó berã gbiati agu aboro nasa tiyo kurogo gu pambori nga ga aYuda mangihe rago Pendekote?

³ Oni berẽnga pa gupai nadu tipa agu aYuda gbiati agu aboro nasa tiyo kurogo gu pambori nangia ga nagi gupai Petero agumbaha. I angia agu aboro naima idapa Yekova nigayo Mbori. Na rogo kuru Ndika, i aima inopai tipa ziazia toro, nga si nga ga Mbori zaaza ome ko amangisunge nani ka kusa ahe. (Bam. P. 1:2; Abasa. 14:​5, 6; 1 Sam. 10:6; Tam. 33:6) Ono kurapai kinaho si aidi i mangihe. Si aidi i rugutiyo naapa gu boro si adu nga Mbori nika mangasunge na ní ka batasa yó. Gu boro re angia Masiya, nga Yesu. Si nangia ndu gupai Petero anyakasi gupai ti ni fuyó nga si naida i ‘bapatiza yó dunduko ti rimo Yesu Kristo.’ Mbata kusayo, Yesu azinahe fu Petero gbiati kura abawiriki tipa i naabapatizi aboro ti “rimo Mbori nga Ba na Wiri na Ziazia Toro.” (Mt. 28:19, 20) Gupai re aima duna bakere rogoyo ti ni rogo bambata sa kama agarã, na kinawo a duhe areme. Gu rogoyo re nga gine?

Ti Rimo Baa

4. Gini ariapai namangi tipa agu aboro naima duna pagume dagbayó na Yekova?

⁴ A wa ani nigumbaha mbata, agu aboro nagi ga Petero gumbapai angia agu aboro naima digo niirisi Yekova na ki ima du na pagume dagbayó naako. I aima digo nimangi asadatise kaa irisa gako andiko, na si nangia ndu gupai aguyo aye ti ni rogo kura aringara ku Yerusarema yo. (Amo. 2:5-11) Ono tie, Mbori aima manga ariapai rogo gu gene ko anaamangapai ngbaha na aboro. Ko aima gindigo aYuda ka i adunga berewe nigako siasia aboro ya; ko aaidanga berewe na gayó pai te, ka i avura kaa irisa gako aNdiko vurũ. (Mt. 21:43; Koro. 2:14) Kangia agu aboro naadegatuyo fu Petero re aaida kadu na wene pagume dagbayó na Yekova, si aidi i mangi kura apai.

5, 6. Ginipai dungu agu aYuda nadu rogo bambata sa kama agarã gbiati agu aboro nasa tiyo kurogo gayó pambori amangihe tipa ka rimo pagume na Mbori?

⁵ Gu ariapai namangi re aaidanga gupai ngawee i mbu Yekova nga gu boro nafu unga fuyó te. (Amo. 4:24) Agu aboro naidi kuti gupai Petero agumbaha aini gupai tipa Yekova i aainongo ho mbata ya, nga ko nga bawene sino boro kisusi. Ko akedi Masiya ko ye ka batasa yó na kidu na nyemu ka mbupai fu aboro dunduko kodi aguyo Petero aya tipa yó wee: “Aboro aYisaraere ini . . . ni rengo ya Mbori amangi ko ni Gbia, ni Kristo, nga gi Yesu oni awagi ko re.” Ka pe rengo, agu aboro namangi agu apai Petero agumbaha, i aduna bakere ndupai beyo ka tambua Mbori tipa gupai ko amangihe fuyó!​—Oni gedi Amokedi 2:30-36.

⁶ Agu aYuda re gbiati agu aboro nasa tiyo kurogo gayó pambori arengbe ka bi gupai nga, ka i aida ka zio pagume na Mbori, si naida i biko nigu boro nika batasa aboro rogo Yesu yo. Oni rengbe ka rugatironi tie awere na ndu gupai i asa gayó berã ti ni ti gayó ingapai kodi gu nangia ga kodabee ka imo Yesu, singia i ainihe aino wo watadu i ainongo ho wo te. Na pa ruga yó tiyo naapa gipai re nasa yó i ‘nye rogo ga amokedi yugopai yo.’ (Amo. 2:42) I aima rengba ka ‘gbisa mbembedii nierã kupati gu mbatabakindo nga ga undahe’ na i aima du a na nyemu ka mangaha wo.​—Eb. 4:16.

7. Gini ariapai aboro namangihe tipa gayó bipai tipa Mbori na ki zi bapatiza ti rimo Baa?

⁷ Dungu aboro areme duna apai tipa yó nibakiakia wirikipai tipa Yekova rogo Ziazia Kekeapai. (Yes. 2:​2, 3) Agu akurayo angia agu aboro nayawee Mbori ti ni te watadu aguyo nayawee Mbori kina ti ni, ono pai ho ko amangaha na aboro te. Ono i aye ki ini gupai nga Mbori kina ti ni na i ki zi bakure naako. Gu kura aboro anaairiso Tirinita watadu dungu ambori. I ini gupai nga, kina Yekova sa nga gu Mbori Duna Tanduapai Dũ, na i nayambako awere ti rimoko. Gupai re na ngbanya kuti gupai Yesu agumbaha fu gako abawiriki nga si naida i bapatiza yó ti rimo Baa.

8. Agu aboro naainongo pai tipa gu ingapai aboro adihe ti Adamu ya, ginipai si aidi i inihe tipa Baa?

⁸ I ima ino gupai a nga i adi ingapai ti Adamu. (Rom. 5:12) Si nangia gu vovopai si aaida i idipaha nga si nga rengo. I rengbe ka ringbisapa ngbatunga agu aboro re kuti gu borokaza ainongo gupai nga ní na kaza ya. Si rengbe kadu nga wiri bete aima nayugo gupai funi nga kaza kina tiní. Mbiko wa munganga apenga gupai funi nga ní na kaza ya, ní naberã gupai nga kpotoni nikina wenehe. Ono tie, anga wo nzunzu duhe te. (Oni ringbisinga ha na 1 AKorindo 4:4.) Ono ginipai ka ní mangihe ka munganga yugupa gani kaza funi? Ya mo ní gbatanga gene husa gu kaza re tee? Wakina gure a, fuo ino ani gu rengo du tipa gu ingapai ani adihe ti Adamu, dungu rani ima ida kuti gupai nga ani “na kaza” na ki rugutiyo na gupai nga Mbori napepa fu “ziga” tipaha. Si naida gupai nga, agu aboro dunduko du tuturũu ti Mbori, i ye fuoko tipa gi “ziga” re.​—Ef. 4:​17-​19.

9. Ginipai Yekova amangihe tipa aboro rengbe ka zio pagume naako?

⁹ Kangia oni aima kpara gaoni raka fu Yekova Mbori na ki zi bapatiza, oni ima ino wai ngbaa zio pagume naako. Oni ima ino bakio gu nyemuse du ko nani. (Oni gedi ARomo 5:8.) Wa Adamu na Eva avura ingapai kuti Mbori, Mbori ambunga awiriyo te, ko aguari ka mbakadapai tipa kadu na wene pagume naayó kodi rani a. Pa manga Mbori he wo aye na ima fuko wa ko abi Wiriko ko nirungo na ki kpi. Ya mo pa ino ani gipai re aundongo rani ani idipa ga Yekova pagbia na kini irisi gako andiko mbiko nyemuko du tirani tee? Kangia oni atamanganga ha wo te, oni awere tie na wene ndupai ka kpara gaoni raka fu Mbori na ki zi bapatiza.

Ti Rimo Wiri

10, 11. (a) Ginipai Yesu namangihe du furoni wa bape? (b) Ginipai oni aberãha tipa pakpio Yesu nimotumo tumorii?

¹⁰ Oni berẽnga berewe tipa gupai Petero agumbaha fu gu rimbasa aboro naadegatuyo fuko re. Ko anyakasipai fuyó ya si aaida i idipa Yesu na i ki bapatizi yó ‘ti rimo wiri.’ Tipagine pa gu bapatiza re anyaki ti ni ti gu regbo re na tipagine nyakipaha ti ni ti gi gaani regbo re? Idapa Yesu na ki zi bapatiza ti rimoko, rogoyo nga ani idipa gupai ko amangaha tipa ka undo rani ani duna wene pagume na Mbori. Si aidi Yesu kpi ti ngbunduru ngua-rungosi tipa Mbori di gu motiwa kusayo nangia ga Ndiko rii aYuda; ono gu kurapai kinaho kpioko aye nani. (Gara. 3:13) Ginipai nangiaha? Ko afu motumo tumorii tipa aboro dunduko. (Ef. 2:15, 16; Koro. 1:20; 1 Yo. 2:1, 2) Tipa Yesu rengbe ka fu gu motumo re, ko ahi iraira mangaapai, asengahe, arungosi na ki kpi niyangaraha. Ya mo oni nabi gu motumo ko afuhe re na kikiipaha? Ani ya oni angia gude du garãru 12 kini ndu nunguro rogo gu bakere kurungba rimoho angia Titanic, nga gu kurungba nasukatihe rogo gu garã nangia 1912 ti kputakputa ime na vuru gu kurungba re ki koro si ki rindo kutii ime yo. Oni namanga asadatise ka gu kurogo gu tooni kurungba du tipa batasa aboro, ono si ima hi. Ono gu kumba niima zora kurogo gu tooni kurungba re napaa kuti diako na kini karagatiko kurogo gu bakere kurungba narindo du oni rogoho na ko nadia roni kini zogo roni kurogo gu tooni kurungba du diako rogoho du tipa batasa aboro re. Fuo du pai wa gure tipa roni, oni ya wai? Nirengo, oni du adu na tambuahe tipa gu kumba re. Oni rengbe ka rugatirani awere na wai gude adu nga guko gupai re amangi tipa ko nzunzu.a Ono tipa Yesu tigako, ko amangi apai tipa roni susi gu gu kumba re amangihe. Ono tipa Yesu tigako, ko aakpingo tipa oni raki gbua tipa wiri bete agarã te, ono tipa oni gbia gu unga adunga digidoho ti ni ya.

¹¹ Wai oni adu ho oni aini gupai ni Wiri Mbori amangihe tipa roni? (Oni gedi 2 AKorindo 5:​14, 15.) Zanga kapa, oni adu na bakere tambuahe. Gupai re asa roni oni kpara gaoni raka fu Mbori na ‘ka oni adunga niunga roni fu tironi berewe ya, ono fu guko nakpi tipa roni ki zingi berewe.’ Pa zio boro bapatiza ti rimo Wiri nayugo gupai nga ní idipa gupai Yesu amangihe tipa ní na ki idipa gako pagbia wangia ko “Iraunga.” (Amo. 3:15; 5:31) Mbata kusayo, oni aadunga na pagume dagbaroni na Mbori te, na ka oni adunga a na maabangirise ya. Ono fuo oni du na idapase kuti gu kure Yesu Kristo nauka na ki zi bapatiza, oni aye ki zi pagume na Mbori. (Ef. 2:12, 13) Gu mokedi nangia Pauro akepai ki yaa: “Oni, [Mbori] azeresi roni awere, nakpara ti ko tigaoni mbata ni avurako na gaoni berã mbiko gaoni gbegberẽ mangaapai, rogo boro pasioko mbiko kpio, ko ka fu roni ziazia zanga sirõ na zanga gu pai ka i rugu roni ti ni barangba ko.”​—Koro. 1:21, 22.

12, 13. (a) Fuo zio oni bapatiza ti rimo Wiri, ginipai si aida oni mangihe ka boro imisi ngbaduroni? (b) Wangia oni gu Kristano zi bapatiza ti rimo Yesu, ginipai si aida oni mangihe?

¹² Wa i avura bapatizi roni ti rimo Wiri, oni abi gupai nga gaoni ingapai kina kubaha. Pa ruga oni tironi na gupai re naundo roni na aʹuru dunduko. Nikpiapai, ka boro fu gberarago furoni, si naida oni tingidi gupai nga oni dunduko nga aingipai. Oni dunduko si aida i mbupai furoni, na oni dunduko si aida oni naambupai fu aboro. (Mk. 11:25) Tipa ka nyakasapa gipai re, Yesu afu kpiapai tipaha: Kumba aambupa gu bape gako kanga adihe beko bakioho adu nga ataranda 10,000 (rukutu marã feda nga 60 amirioni). Kusa, gu kanga re aambunga pa gu gako bape kurako kanga adihe beko te nangia rukutu marã afeda gbua 100. Yesu agumbapa gupai gu kpiapai re ayugoho: Si ngawee Yekova ambunga pai fu gu boro aidanga ka mbupai fu kurani ya te. (Mt. 18:23-​35) Nirengo, zio boro bapatiza ti rimo Wiri nayugo gupai nga, gu boro re ima idapa ga Yesu pagbia na ní naʹasada tiní kaa manga agu apai ko anaayugoho kodi gu nga ní du na nyemu ka mbupai fu akurani.​—1 Pet. 2:​21; 1 Yo. 2:6.

¹³ Wa duhe nga oni nga kpakpa boro, oni arengbanga ka wirika mangapai wa Yesu teketeke te. Wa vura duhe wo, oni naida ka wirika Yesu a wa rengbe omeroni nani ringbisihe kuti wai oni nafu tironi na ngbaduroniyo dunduko fu Mbori. Gipai re nakoda asadatise ka mbu kuru asino ono kini ukadi vovo borose. (Oni gedi AEfeso 4:​20-​24.) Ho du oni ni na irisa tipa bakurearoni, si nawira oni nawirika wene asinoni awirika. Teketeke a, si naida oni wiriki Kristo kini mangi agu apai ko anaayugoho.

14. Ginipai si aida oni mangihe ka yugo gupai nani nga oni ima idapa ga Yesu pagbia wangia ko Bakindo ngbangbaturũ?

¹⁴ Gu kura gene kinaho rengbe oni ngbaha ka yugo gupai nga oni ima giarogo gupai zio bapatiza ti rimo Wiri Mbori ayugoho. Mbori ‘amoi ahe dunduko kutii ndu Yesu, ki fu ko ko du kurii ahe dunduko fu kanisa.’ (Ef. 1:22) Wa duhe tie were, si naida oni naabi gu gene na irisa Yesu anungusa agu aboro ngbaha kpara gayó raka fu Yekova. Kristo namangasunge na kpakpa aboro rogo dungurati nga agu abaakumba i asia yó. I namaa agu abaakumba re tipa i sa “ga Mbori aboro [i du] nzunzu, sa gu sunge nga mangaapai, sa sonosa boro Kristo.” (Ef. 4:11, 12) Ka bakumba boro vura manga ingapai, Yesu ima rengba ka mbakada gupai re ti gako regbo na ngba gu gene daa bangiriko. Pai ho nagasa ko te mbiko ko nga Bakindo rogo gu Kindo nga ga ngbangbaturũ. Oni aidanga kuti gupai re tee?

15. Kangia oni ataziongo bapatiza te, gini amaku rengbe oni ka maabangironi tipaha fuo zio oni he?

¹⁵ Kurigure, kura aboro atakparanga tiyo fu Yekova na ki zi bapatiza te. Kangia wo duhe tipa roni, ya mo oni nabi gupai nga, pa ida oni pa Wiri Mbori nga gu rurupai si aida oni mangihe? Pa bapatiza yó roni ti rimo Wiri Mbori nika ye na dungu amaku furoni.​—Oni gedi Yoane 10:​9-​11.

Ti Rimo Ziazia Toro

16, 17. Pa zio boro bapatiza ti rimo ziazia toro nga gine?

¹⁶ Pa zio boro bapatiza ti rimo ziazia toro nga gine? A wa ani niima gumbaha mbata, agu aboro nagi gupai Petero agumbaha ti rago Pendekote aima rugatiyo naapa guhe nga ziazia toro. Gopai aima du barabangiriyo nga Mbori namangasunge kindi na ziazia toro. Petero angia boro sa dagba agu aboro ‘nahiki be ziazia toro, i ki tona fura ni kura ngbatunga afugo, wa toro afuhe fuyo i nigumbaha.’ (Amo. 2:4, 8) Gu fugo nga “ti rimo” watadu “ku rogo rimo,” si ayugongo gupai ngawee gu rimo re nga rimo boro te. Nikpiapai, dungu apai aboro amangaha areme “ti rimo irangbii,” ono irangbii nga boro te. I namanga agu apai re na gu pagbia nga ga irangbii. Teketeke a, gu boro i abapatizi ní ti rimo ziazia toro, ní nakparia gupai nga, si nga ga Yekova zaaza ome, angianga boro ya. Gu boro nazio gu bapatiza re, ní ima kparia gupai ziazia toro amangaha ka digiso ga Mbori ringbisapai.

¹⁷ Ya mo wa ye oni ki wisigi Ziazia Kekeapai, oni ainongo pai tipa ziazia toro tee? Nikpiapai, oni ye ki kparia gupai nga, i ake Ziazia Kekeapai mbiko gu ome nga ga ziazia toro. (2 Tim. 3:​16) Wa oni aasona rogo toro yo, si nawira oni aima aruga tironi na gupai nga ‘Baroni du ngbangbaturũ yo nagama ziazia toro fu agu aboro nasanako tipaha.’ (Ruka 11:13) Si nawira oni ima kparia gupai a nga, ziazia toro namangapai rogo gaoni raka. Ka singia oni kindi napido gu regbo i ka bapatizi roni ti ni ti rimo ziazia toro, amaku gu duho napido roni wa oni nika gbia ziazia toro, mbiko Yesu ayawee Mbori nagamaha agama.

18. Gini amaku agu aboro agbiaha nazio bapatiza ti rimo ziazia toro?

¹⁸ Si areme ziazia nga, Yekova nanungusa gu dungurati nga ga aKristano na gako toro. Gu toro re naundo rani wa du ani nibasasa rogo agu apai ani amangaha. Ho ani azio bapatiza ni ti rimo ziazia toro, si naida ani idipa gupai si amangaha rogo gaani raka na kini mangipai kina sa nani. Kura aboro aruganga tiyo na wai rengbe ani ka raka ringbisihe kuti gaani kparatise fu Yekova te na i aruganga tiyo a na wai ziazia toro aundo rani te. Ani nika wisigo gipai re rogo gu kekeapai du fuo gere.

[Gu rukutu kekeapai du bandu kpewaraga yo]

[Gu kpiahe du ti kpewaraga 12]

Gu baigo kuruahe du Yerusarema yo naidipaha

[Gu kpiahe du ti kpewaraga 12]

Gini ngbatunga pagume vovo abawiriki adu nani dagbayó na Mbori tingbafuo Pendekote rogo gu garã nangia 33 F.B.K.?

[Gu kpiahe du ti kpewaraga 15]

Oni Natingidaha?

• Pa bapatizi yó boro ti rimo Baa nga gine?

• Pa bapatizi yó boro ti rimo Wiri nga gine?

• Ginipai rengbe oni ka mangaha ka yugo nani nga oni ima rugatironi na wai nyakipa zio boro bapatiza ti rimo Baa na ti rimo Wiri?

• Pa bapatiza yó boro ti rimo ziazia toro nga gine?