Oni Mbedi Na Mbori

Ya Mo Mbori Rengbe ka Sa Gako Berã?

Abasapungbanga 2:​11-​18

WANGIA ani kpakpa aboro, ani naabira tirani abira ti kura aregbo ki sa gaani berã. Nikpiapai, rago rengbe arengba ka gberã tirani ho ani nabi gupai ni nga ani mangi irairapai. Ziazia Kekeapai nafura tipa Yekova ya ko naasa gako berã asa ti kura aregbo. Ono boro rengbe ka yaa, ‘Mbori nga rengberengbe boro, ko naamanganga irairapai te!’ Rogo gini gene rengbe Mbori ka sa gako berã? Gu karagapai du tipa gipai re naundo rani ani rugutirani na gu kura iiriwopai sa tipa Yekova nga: Ko nga boro wakina rani apai nafõko afõ ngbadukoyo. Na agu apai ani amangaha, si rengbe arengba ka fu ngbarago fuko watadu gberarago. Ani kparianga agu apai du nikekehe rogo Abasapungbanga 2:​11-​18.

Gu kitabu nga Abasapungbanga nafura tipa gu vunduvunduapai nanaamanga rogo gu pangbanga nadu tipa aYisaraere. Gi pangbanga re amangi ho aYisaraere atona raka ni Kanana yo nga gu ringara Mbori akidopa fuhe fu Abarayama. Tipa dungu kama agarã tingbafuo gu regbo re, gupai nanaamanga tipa aYisaraere kini fugu tihe nga i anisamungu, Yekova ki gindigo yó fu avurayo, agi avurayo re ki rungosi yó nisangbana gayó samungu. Si anitadu were, i ki zungodi tiyo fu Yekova, nungayo ki mangiko, ko ki batasiyo.a

Samungu. Sino aKanano amerefuo aYisaraere i ki “mbu Yekova” ki tona ka pekafuo gu kura ambori, “ki nimangi pa aBara na pa Asetorete.”b Pa mbuyo iriso Yekova asayo i da ni abasamungu kutiko. Si anitadu were, aYisaraere kini “gara ga Yekova zinga ku ri yo” nga gu Mbori nabatasi yó ringara Ezipeta yo!​—Veresi 12, 13; Abasapungbanga 2:1.

Rungosi. AYisaraere i anaaimisa ngbadu Yekova nigayo gbegberẽ mangapai, ko kini mbuyo kube avurayo zanga banda yó berewe. Si anitadu were, aYisaraere kini ti “ku be abagbarasiyo,” nga agu aboro nanaamanga yó kini gbu ahe beyo rogo gayó ringara.​—Veresi 14.

Zungoditise. Ho aYisaraere anaagbiatiyo ni na kere arungosi, i anibira tiyo ti gu gbegberẽ apai i anaamangaha na ki kpari fu Mbori tipa ko undoyo. Gi gayó zungoditise re anidu niyuguyuguhe ho i ‘anauko ni be agu aboro nanaamanga yó.’ (Veresi 18) Zungoditise fu Mbori nga gupai i anaamanga ha amanga kindi. (Abasapungbanga 3:​9, 15; 4:3; 6:​6, 7; 10:10) Ga Mbori karagapai aningia gine kuti gi gayó zungoditise re?

Bata. Ho Yekova anaagia uko aYisaraere ni, ‘nungayo animangiko.’ Buku sa nayaa: “Ho Yekova anaagia uko aYisaraere ni, ko anisaberãko ti gu mbusa ko anifuhe fuyó ki aria tiko kuti gu nga ka batasa yó.” Mbiko ga Yekova inopai, ko “animoi abasapungbanga” tipa i batasi gako aboro be avurayo.​—Veresi 18.

Ya mo oni rugutironi na ndu gupai nanaasa Mbori ko nisa gako berã? Si adu wo mbiko gako aboro anisa gayó berã. Oni berẽnga ha ngba gi gene re: Gu bagude duna nyemuse rengbe ka ruga wiriko isoke ki ká na gu kura apai beni. Ono fuo gu wiriko re sa gani berã ti gupai re, ko nabihe nga si daada ko mbu fu mbusa funi.

Ginipai gi pangbanga re ayugoho furani tipa Yekova? Gupai si ayugoho nga, ka boro mangi ingapai niwia, si naimisa ngbaduko aimisa, ono gu boro nasa gani berã ti gani ingapai, ko nainopai aino funi. Gaani mangapai rengbe arengba ka ba gberarago ti Yekova watadu ka fu ngbarago fuko. Si naida ani wiriki wai rengbe ani ka ‘fu ngbarago fu Yekova.’ (Asanza 27:11) Ani abiranga tirani tipa manga ani he wo te.

[Gu rukutu kekeapai du bandu kpewaraga yo]