Agu Apai Yesu Agumbaha Tipa Mbori

“A nga boro sa ini da nga Wiri te, kina Mbori nga Ba; na da nga Ba, kina Wiriko ini he, na gu ni Wiriko nakpi nyemu ka yugo ho fu ni.”—RUKA 10:22.

MBATA fu vungayo Yesu auru kpotosende no niboro, ko aima raka na bako mbata tipa badungu agarã. (AKorosaio 1:15) Si atadu were, Yesu kini mo ka ino ga bako aberã, agu apai ko akpinyemuhe, gbiati gako agene. Kusa, ho Yesu ayeni ku auru kpotosende no, ko aduna rengba ka yugo rengo tipa bako. Ani rengbe ka wirika dungu apai tipa Mbori nidega ani turani kuti gupai Yesu agumbaha.

Rimo Mbori Rimo Mbori nga Yekova adu na nyanyakipaha fu Yesu. Yesu aidi aboro ini gi rimo re na ki mangisunge nani. Gu rimo nga Yesu nisaha, rogoyo nga “Yekova nga bata.” Rogo gu yuru nadumbata fu kpi Yesu, ko ape gupai fu bako rogo kpee yo nga: “Mi yugu rimoro.” (Yoane 17:26) Yesu amangisunge na rimo Mbori na ki yuguhe fu aboro. Kurapai nga, ka agu aboro naadegatuyo kuti agu apai Yesu agumbaha awiripa ino gu rengo wai du tipa Yekova zanga inoyo rimoko na gupai si arukubaha?a

Ga Mbori Bakere Nyemuse Ti kura regbo sa, Yesu akpari fu Mbori ki yaa: “Buba, . . . mo aima digo nikpi nyemu re mbata zegino nikadu.” (Yoane 17:24) Pa ino Yesu pa gu nyemuse Mbori adu nani koyo du ko ni asako ho ko aduni auru kpotosende ko yugu kina gu bangisa nyemuse re a rogo dungu wene agene.

Yesu ayugu gupai nga ga Yekova nyemuse fu aboro dunduko. Yesu ayaa: “Mbori akpi nyemu aboro akpi zegino dũ, wa ko afu bangisa Wiriko, ya gu ni ka idi pa ko ni kpi nga te, ono nyenye unga du adu be ni.” (Yoane 3:16) Gu nyemuse du Mbori nani tipa awiri aboro nibakerehe mbiko si asako ko kedi bangisa wiriko tipa ka ngbe ruru aboro be ingapai na kpio na ki fu maabangirise fuyó tipa nyenye unga. Ka ani ringbisinga bakio gako nyemuse te.—ARomo 8:38, 39.

Yesu anyakasi gu rengo du tipa Yekova nga: ko nakpinyemu airisiko dudunguroo wa du yó nibasasa dunduko. Yesu ayugupai tipa Yekova nga ko wa kina gu bangerefuo avusende ini gani avusende na ami kidu na nyanyaki para funi. (Matayo 18:12-14) Yesu aya anga bavurukporo sa ka ti ku sende zanga Yekova ini paru te. Ko ape kurapai berewe nga: “Mangerironi tigaha ni gedigedi he dunduko.” (Matayo 10:29-31) Ka si du tie nga ka bangisa bavurukporo kpanga zanga Yekova inihe te, na wai tigaha ko angera fuo airisiko kini berẽpa yó wa du yó nibasasa? Ka si du tie nga mangerirani nigedigedi he na Yekova ima inoho nibasasa, ya mo kurapai kinaho rogo gaani raka, agu ahe ani akpinyemuhe, na gaani azingo nga gu Yekova ainongo ho ya?

Gu Barani du ngbangbaturũ Yo A wa ani nibihe rogo gu kekepai ye mbata fu gere, Yesu nga bangisa wiri Mbori. Ho Yesu anaafura ni tipa Yekova, ko anaaya “Buba.” Nirengo, rogo gu bambata fugo Yesu apehe yekaru yo ho garãko aduni 12, ko ayambu Yekova nga “Buba.” (Ruka 2:49) Gu fugo nga “Buba,” i mangisunge nani rogo Akitabu Wene Pangbanga wa bara 190. Yesu afura tipa Yekova rogo dungu agene wa gu nga “Baroni,” “Barani,” gbiati “Buba.” (Matayo 5:16; 6:9; 7:21) Gupai Yesu agumbaha re nayugo gupai nga aboro ingapai rengbe arengba kadu na wene pagume dagbayo na Mbori.

Ko na inapai gbiati mbupai Yesu aini gupai nga kpakpa aboro naida Yekova inipai fuyó. Rogo gu gako sanza du tipa ingiingi paranga, ko aringbisi Yekova kuti gu bagude duna nunga nambupai fu gu wiriko ingipai ki sa gako berã. (Ruka 15:11-32) Gu fugo Yesu re nakido rani nga Yekova nangera ku ngbadu boro ingapai yo singia ní sa gani berã tipa ko inipai fu ní. Yekova na nyemu ka mbupai fu gu boro sa gani berã. Yesu ayaa: “Ya mi fu roni, kina wo i ka ngi angi ngbangbaturũ yo tipa gu boro ingapai sa ka sa gani berã, susi gu ka du tipa ruru aboro 99, ka akpi nga nyemu saberã ya.” (Ruka 15:7) Da aidanga ka mbeda na gu Mbori nga ga inapai ko re ya?

Ko ninaagia akpee Mbata fu ye Yesu ku auru kpotosende no, ko aima ino gupai nga Yekova ‘ninaagia akpee’ na ko na nyemu agu akpee airisiko afuhe. (Atambuahe 65:2) Ti regbo ga Yesu sunge tungusapai, ko ayugu wai rengbe aboro ka kpara na tipa gini apai. Ko aruguyo ki yaa: “Ka oni kpari nga ni dogodi gu kpe” ya. Ko azinahe fu aboro i kpari tipa gupai Mbori akpinyemuhe si “mángi rogo kpotosende wa . . . du he ngbangbaturũ yo.” Ani rengbe ka kpara a tipa agu ahe du ani na zingoho, ko mbupai furani ti gaani aingapai, na ki undo rani ani di be aʹasada. (Matayo 6:5-13) Yesu ayugu gupai nga Yekova naagia gu kpee agia gako amoyambu afuhe wa ba agude naagia gu kpee nga ga awirini.—Matayo 7:7-11.

Yesu ayugu rengo tipa Yekova na gu ngbatunga Mbori a nga ko. Ono kurapai adu kinaho Yesu aduna kakaka nyemu yugoho tipa Yekova, nga gu gene Yekova nika aria gi zegino re ngbaha dunduko tipa ka digisi gako ringbisapai tipa gi kpotosende re na agu aboro naraka auruhe. Si nangia meme gu pangbanga Yesu atungusihe.

[Gu rukutu kekeapai du bandu kpewaraga yo]