Oni Zatironi Ti Zinga Tipa Ka ‘Diabe Gbegberẽpai’

“Abadiangba, ka oni mangi nga boro ti pai fu roni ya. . . . Oni di adia be gbegberẽpai ni wenepai.”​—ROM. 12:19, 21.

1, 2. Gini wene kpiapai aDezire Yekova amoihe?

ADEZIRE YEKOVA 34 naandu ka bi be-basunge i aakparaha, gayó tiyara kini tona pai gene si kini idi i ti rogo kura ba tiyara tipa ka mbakadaha. Si adu gbua nga i nika mbakadaha tipa saa sa, ono i ambakadihe tipa asaa 44. Aboro ki sungudihe rogo gu ba tiyara nadu ngbakungbo yo re, nga gu ba naadunga na wene riahe rogoho na ime gbiati gu kura apai ya. Badungu agu aboro naamera na gu tiyara re azingi nikerehe, kini idi ka ta airaha ata. Ono tipa agu aDezire Yekova tigayo re, i asungu zezeredii.

² Niyangaraha, agu awirina re ada ba gu dunguratise yo i aandu tipaha re, ki gbia kina yangara paparaha. Wa i avura du na mbugo, i aima sungo yo tipa bete regbo na agu awirina du rogo gu rago re. Kusa, i aini gupai nga, aboro kinaho naima kparia gayó zerangbaduse na zatise. Boro sa dagba agu aboro nadu rogo gu tiyara re aya fu airaha wee, “Ka agu aKristano nadu 34 aadunga rogo gu tiyara re ya, ka kpata amangi nikerehe ba tiyara yo.”

Ani Naraka Rogo Zingizingi Zegino

3, 4. (a) Wai kere zinga agberesa pai fu aboro, na gini regbo si atona? (b) Ya mo gene adu be Kaina ko zeresi gako zinga? Oni sakingo rogoyo.

³ Agu apai du rogo gi zegino re nasa aboro asa i du nizingizingiyo. (Batu. 7:7) Gu zinga re rengbe ka sa aboro i duna sogote dagbayó na i mangi pa zuũ. Avura namanga dagba aringara na vuru ringara nitihe, na gu kapa du aboro nani kporo naye na dungu tagbagaapai. Zinga na zuũ aima tona bakuruyo. Kere zinga asa bambata wiri Adamu nangia Kaina ko imi tameko nangia Ebere. Kaina amangi gi kerepai re si ki vura du vurũ nga Yekova aima zako ti zinga, na Yekova ki ima ya fuko ka ko mbu zinga, ko fu maku afu fuko.​—Oni gedi Bambata Pai 4:​6-8.

⁴ Wa Kaina avurangia kpakpa boro, ko arengbe arengba ka zeresa gako zinga. Ono wa ko aamanganga ha wo ya, si aruaru kure tameko du kina kuriko. Teketeke a, wangia ani kpakpa aboro, si furani nitaatapai ani mbu zinga watadu gu mangapai nga ga zinga te. Kura apai kinaho berewe nga ga gi “gbegberẽ” aregbo ani araka ti ni re nasa aboro i du nizingizingiyo. (2 Tim. 3:1) Nikpiapai, zingo marã rengbe arengba ka sa aboro i du nizingizingiyo. Aborisi na agu ariigbu naundo aborokporo nayawee bakere zingo marã nasa aboro i naazizinga azizinga, na i naamanga kereapai kpuyo yo.

5, 6. Gini bipai du zegino nani rengbe ka gberesa rani?

⁵ Kurigure, badungu agu aboro ani amangaapai naayó ‘nakpi kina nyemu tiyo,’ ki duni “airarekangose,” na “airaerã.” Si nitaatapai agi asino re rimi rani na ki sa rani nizingizingi aboro. (2 Tim. 3:2-5) Agu apai i akusaha rogo avidio na terevizioni nayugo gupai nga, irobape gbiati zuũ nga gu wene gene rengbe aboro ka mbakadapai ngbaha. Ho aboro abi vidio ni i kini bi boro ní nimangi kurani gbegberẽe, i naasungudo gu regbo guni i amanga ní gbegberẽe re nika aria tiní ka manga guni re nikerehe gbe, singia ki imi ní.

⁶ Ngbatunga agu apai re ayugongo ga Mbori agene te, ono kina ‘gu toro nga ga zegino’ na zingizingi bairaha nga Satana. (1 Kor. 2:12; Ef. 2:2; Yugo. 12:12) Gu toro re nanyakasa kina pa mbiisa gu nyemuapai nga ga borose, na si namangasunge kia ti gu toro nga ga Mbori na zuzuhe. Gu bangua yugopai nga ga aKristano nayawee ka boro iringo bape ho i naimisi ní ni ya. (Oni gedi Matayo 5:​39, 44, 45.) Ono wai rengbe ani ka irisa gu ga Yesu rugute re wenengai gbe?

Gbegberẽ Kpiapai na Wenehe

7. Ginipai namangi mbiko gupai nga Simona na Revi aazanga tiyo ti kere zinga te?

⁷ Ziazia Kekeapai na badungu arugute rogoho nibipa zatise ti zinga, na si na dungu akpiapai a rogoho nayugopa gupai rengbe ka manga ka boro azanga tiní ti zinga ya. Oni bingo gupai namangi ho awiri Yakobo nangia Simona na Revi airibape dawiriyo ni nangia Dina mbiko Sekeme agberesi pari. ‘Rago agberẽ agberã gbe tiyo i ki zingi azinga gbe.’ (Bam. P. 34:7) Fuoho, kura awiri Yakobo atona vura kuti gu gbata re, ki gbu ahe, ki zi adee na agude. I amangi gipai re angianga mbiko gupai gbua nga i agberesipa dawiriyo ya, ono mbiko rukö a, bambiko i abihe nga payo nika paya. I abihe nga Sekeme aima ba zee tiyo na bayo nga Yakobo. Ono Yakobo abi gayó mangapai wai?

8. Ginipai gu pangbanga du tipa Simona na Revi ayugoho furani nibipa irobape?

⁸ Kina rengo du nga rago aima gberã ti Yakobo gbe ho i agberesipa Dina ni; ono wa si avura duwo, ko abira awiriko abira mbiko iro yó bape. Simona na Revi abihe nga rurupai du i amangihe re, si du i aya ti ni fu bayo wee: “Si arengbe [Sekeme] mangi fu dawirani wa fu debari?” (Bam. P. 34:31) Ono anga gure nangia digido gupai re te, bambiko rago aima gberã ti Yekova a. Fuo badungu agarã, Yakobo aya fu aSimona na Revi wee, wa i amangi kerepai nga ka imo aboro, angbatunga yó nika gbandaka agbandaka dagba agu atunga nga ga Yisaraere. (Oni gedi Bambata Pai 49:​5-7.) Ii, gayó zanga rugatise asa gupai nga rago gberẽ ti Mbori naayó gbiati bayo a.

9. Gini regbo ga Davide zinga ambedi ka sako ko mangi kerepai?

⁹ Bakindo Davide adu tigako kia. Badungu amomu nati fuko ko iribape, ono ka ko amanganga ha ya. (1 Sam. 24:3-7) Ono ti kura regbo sa, gako zinga ambedi ka sako ko mangi kerepai. Kumukokumuko kumba nangia Nabara afura gbegberẽe fu ga Davide akumba, si ki vura du vurũ nga i abanda ga Nabara rimbasa anyaa na ababanda anyaa. Ngbadu Davide aimi ko ki guari ka ndu ka manga Nabara gbegberẽe na gako aborokporo. Ho i aandu ni kua Nabara yo, paranga aoro ki tingidi gupai re fu tatamanatatamana dia Nabara nangia Abigaira, ki ya furi ri mangipai niipo. Ginipai ri amangihe? Ri arogo ahe ki oro nani ka gbia Davide. Ri ahõmbupai niumbasitise tipa gupai Nabara amangihe, na ki zungodi Davide ko gunde ti Yekova. Davide aʹaria berãko, ki yaa: “Maku dú foro tipa ga tatamana, maku dú foro naza re areme ti uka kure!”​—1 Sam. 25:2-35.

Gu Bipai Nga ga AKristano

10. Wai si aida aKristano naabipa irobape?

¹⁰ Gu pangbanga du tipa Simona na Revi gbiati Davide na Abigaira nayugo gupai nzunzu nga, Yekova aidanga na zuũ na gu zinga ka boro arugusanga ha ya te. Si nayugo gupai a nga Yekova nafu maku afu ho boro aʹasada ní ka manga zereda na akurani. Pauro akepai ki yaa: “Oni dú zezeredi na aboro dũ, kina ro tigamo ka si du wa ka mo mangi he. Abadiangba, ka oni mangi nga boro ti pai fu roni ya, kina ongo aonga fu zinga; bambiko si ni keke he ya, ‘Pa ira bape nga gimi, mi akaraga pai, Gbia nipoi wo.’ Ka vuraro du na gomoro, mo ki rigi ni ariga, ka ni du na gomoro ime, mo ki fu he afu fu ni ni mbiri he, bambiko manga mo wo, mo ka ba guta mbusa ti ni ku ri ni. Ka gbegberẽpai di nga be roni ya, oni di adia be gbegberẽpai ni wenepai.”​—Rom. 12:18-21.a

11. Wai wirina sa aini wai ka zatise ti zinga?

¹¹ Ani rengbe arengba ka mangasunge na gu rugute re. Wirina sa andu fuo bakumba ki gumba agu apai fuko gari nairasunge amanga ri nani. Ri ayawee ri amanganga pai niruruhe te, na ri nafura furi arakaya. Rago aima gberã ti gu wirina re, ri kini idi ka mbu sunge na ri. Gu bakumba re aya furi wee ka ri mangingo pai ningbaduse ya. Ko abi gupai nga, wa gu wirina re amangipai nizinga, si agberesi apai kina kumbatayo. (Tito 3:1-3) Ko aya furi wee, ka ri vura mbu sunge na gu dee re ki tonaha na kura boro, si nika ida gupai aida nga ri mbu gu gene ri amangapai ngbaha ho boro amanga ri ni gbegberẽe. Ko arugu ri ri nimangipai na gari nairasunge kina ngba gu gene ri aida gari nairasunge nimangipai na ri ngbaha, a wa Yesu arugu rani ani naamangaha. (Oni gedi Ruka 6:​31.) Gu wirina re aya ri nandu ka asadaha. Sangbanaha angia gine? Fuo bete regbo, gari nairasunge asa sinori, ri ki fu tambuahe a fu gu wirina re tipa gari sunge.

12. Tipagine rengbe gu tagbagapai nakura dagba aKristano ti ni ka igira gbe?

¹² Ho ngbatungapai akura ni wa gure dagbarani na gu boro adunga rogo dungurati ya, si airiwongo airiwo tirani gbe te. Ani ima ino gupai nga raka rogo gi zegino re nigbegberẽhe, na si naida ani niʹasadi tirani aʹasada tipa ka he amangi gbegberẽ apai i zingisi rani. (Tam. 37:1-11; Batu. 8:12, 13; 12:13, 14) Ono ho pai akura ni dagbarani na kuarani idipase, si rengbe ka igira aigira gbe. Dezire Yekova sa ayaa, “Gupai nadu fere nimbumbuhe ho mi ayeni kurogo rengo yo angia pa ida mi kuti gupai nga ga Yekova aboro nga kina kpakpa aboro a.” Ho ani ayeni rogo gbegberẽ zegino adunga na nyemuse rogoho ya, ani naberã gupai nga agu aboro du rogo dungurati dunduko nikaa manga akurayó nigu weneringise nga ga aKristano. Si ki tadu were, ho kuarani Kristano amangapai ni ngba gu gene angianga ga aKristano ya, gbe guni duna amomu beni rogo dungurati, si rengbe arengba ka imisa rani watadu ka zingisa rani. Ani rengbe ka yaa, ‘Wai rengbe pai wa gure ka manga dagba ga Yekova aboro?’ Nirengo, ngbatungapai aima manga wa gure dagba mbedimbedi aKristano ti regbo amokedi. (Gara. 2:11-14; 5:15; Yak. 3:14, 15) Wai si aida ani mangipai ho pai amanga ni wa gure?

13. Tipagine si aida ti ni ani asaditirani kaa mbakada gu tagbagaapai nakura dagbarani, na wai rengbe ani ka mangaha?

¹³ Gu wirina ani nifura tipa ri kuari re ayaa: “Mi atona kaa kpara fu Mbori tipa agu aboro naimisa re. Gupai re naundo aundo gbe.” A wa ani nigedihe, Yesu ayawee ani nikpari tipa agu aboro narungosi rani. (Mt. 5:44) Ka si du nga si naida ani kpari tipa agu aboro narungosi rani, anga si naida ani kpari nibakerehe gbe tipa agu awirinarani nga ga toro yó te? A wa bagude naakpinyemu gupai nga awirini du na nyemuse dagbayó, kinawo Yekova aida gu gako amoyambu du auru kpotosende du. Ani namaabangirani tipa ka raka na pazereda gbiati ngbarago nyeanye kindi, na Yekova nayugopai furani awere tipa ani rengbe ka raka wo. Ko naida ani koditirani kaa manga gako sunge. Sidu tie, si naida ani naambakada gu tagbagaapai nakura dagbarani, watadu ka ‘mbu paha’ kini ndu kumbatayo sa. (Oni gedi Asanza 19:11.) Kuba gupai nga ani turũsi tirani ti awirinarani ho fudifudiapai akura ni, si naida ani undo akuarani i nye dagba ga Yekova aboro, kidu nibandabanda yó rogo ga Yekova ‘nyenye bee.’​—Pa Rug. 33:27.

Oni Du Nibayee Roni fu Aboro Dũ

14. Wai rengbe ani ka sovura kuti Satana?

¹⁴ Satana na gako adaimona naʹasadatiyo ka gberesa akporo na adungurati tipa ka sa gupai nga ka wene pangbanga gbandakanga rogo arago ya. I naida ka sa aboro i duna kparakaro dagbayó bambiko i ini ya si rengbe ka gbarasa apai. (Mt. 12:25) Wa ani asovura kuti aSatana na adaimona, si naida ani irisi gu rugute Pauro afuhe ki yaa: “Ka ga Gbia moyambu tá nga kpata ya, ono ni du ni bayee ni fu aboro dũ.” (2 Tim. 2:24) Oni tingidi gupai nga, gaani vura “sa borose na kure te kina sa . . . rimbasa agu atoro nga ga gbegberẽpai yo.” Tipa ani dibe gi vura re, si naida ani ukadi gu ũvura nga ga toro, kodihe na “gu ũnyaka nga ga wene pangbanga zereda.”​—Ef. 6:12-18.

15. Wai si aida ani mangipai ho aboro azubo rani ni?

¹⁵ Badungu avura Yekova nazubo gako zezeredi aboro. Badunguyo namanga aDezire Yekova gbegberẽe. Aguyo nakitangbaanga rani rogo awaraga watadu ngbangayo. Yesu aya fu gako abawiriki wee gipai re nika manga amanga. (Mt. 5:11, 12) Ono wai si aida ani mangipai sani? Si aidanga ani ‘karaga gbegberẽpai kuba gbegberẽpai’ rogo fugo yo watadu rogo mangaapai yo te.​—Rom. 12:17; oni gedi 1 Petero 3:16.

16, 17. Ginipai nagbia kura dungurati sa?

¹⁶ Ka Satana vura ye na kina gini apai kuti rani, ka ani ‘adiabe be gbegberẽpai niwenepai,’ ani mangi wene dezirepai amanga. Nikpiapai, dungurati sa du rogo kisanga du bangiri gu bariwara ime nga Pasifiki afu marã tipa bambu tipa ka Tingida Pakpio Yesu tiihe. Fuo ino aboro kanisa gipai re, i aya fu gayó aboro wee i dunguratiyo kutii gu bambu re tipa irisombori ti kina gu bangisa regbo si adu nga aDezire Yekova nika dunguratiyo kuho ti ni. Si kita duwo, baira aborisi kini ya fu agu aboro kanisa re i mbu gu bambu re fu aDezire Yekova. Ono ho regbo adani, gu bambu re ahi na kina aboro kanisa na i ki ima tona gayó irisombori.

¹⁷ Ho gu borisi re aidi ni ka do agu aboro kanisa re ngbaome, baira gu kanisa re aye fuo gaani bakumba sa ki sanako ki yaa: “Pai kinaho oni aida ka mangaha ane rogo gi nyemu re?” Ho gu bakumba re apepa Tingida Pakpio Yesu ni fuko, ko ayaa: “Akoo, mi naainongo nga wo duhe te!” Si kina kungbako, borisi kini yaa: “Wa ani niima gumbaha furoni wiso!” Zee azi gu baira kanisa re ko ki aria tiko koyo du gu bakumba ni re ki momu tooni ti ngbako ki yaa: “Oni ka manga wai awere? Bambu ima hi be aboro. Oni ka mbu borisi ambu ko do rani?” Ko aʹaria apai nibirĩ si duwa aDezire Yekova du naye ka fuda yó, ono ho duhe ni nga i du naye ka fuda aDezire Yekova! Ginipai awirinarani amangihe?

18. Wai awirina amangipai sa wingbaa, na sangbanaha angia gine?

¹⁸ Agu awirinarani re afu aminiti 30 fu agu aboro kanisa re i nyasi gayó irisombori, fuoho, i kini mangi gayó dunguratise nga ga Tingida Pakpio Yesu. Gu irisombori nga ga agu aboro re aima dia regbo gbe susi gu i afuhe fuyó, ono fuo ga yó, awirina kini mangi gayó dunguratise. Rogo gu uru naye fuoho, irangbii adungura abaakumba tipa ka ino gupai namangi. Fuo inoyo rengo, i aya fu agu aboro kanisa re i gbandaka gupai rogo arago nga, baira kanisa du nangia ingahe, angianga aDezire Yekova ya. Agu abaakumba nga ga irangbii yó re afu tambuahe fu aDezire Yekova tipa gayó zerangbaduse ti regbo fudifudipai. Wa agu awirina re aʹasaditiyo kadu ‘zezeredii na aboro dũ,’ si aima kusa wenepai.

19. Gini kurahe rengbe ka sa gupai nga ani duna pazereda?

¹⁹ Gu kurahe rengbe ka undo rani ani nye na pazereda dagbarani nga, gumba iriiri afugo. Gu kekeapai naye fuo gere nika yugo guhe furani nga iriiri fugo, na wai rengbe ani kadu nani?

[Gu rukutu kekeapai du bandu kpewaraga yo]

[Gu kpiahe du ti kpewaraga 18]

Mangapai niweneringise rengbe ka aria berã aboro

[Gu kpiahe du ti kpewaraga 20]

Oni Rengbe ka Sakarogoyo?

• Tipagine du aboro areme ti ni rogo zegino nizingizingiyo?

• Gini apangbanga du rogo Ziazia Kekeapai nayugopa asangbana zatise ti zinga, na asangbana zanga zatise ti zinga?

• Ka kuarani idipase imisi rani, ginipai si aida ani mangihe?

• Wai si aida ani mangipai ho aboro zegino azubo rani ni?