Gupai Nika Manga Rogo Ga Yekova Uru
“Gu uru nga ga Gbia si ayé wa batuka. . . . Kpotosende ki gbi, na gu mangimangi ahe du rogo.”—2 PET. 3:10.
1, 2. (a) Wai gi gbegberẽ sino raka re nika digo? (b) Gini asanahe ani ka wisigoho?
GU GBEGBERẼ sino raka du awere, i amoimburuhe rii gu bakere ziree nga, aboro rengbe arengba ka zoga kpotosende zanga Yekova apai kidu fuyó wenengai. (Tam. 2:2, 3) Ya mo guhe moiyo mburuhe rii ziree rengbe ka nyeanye kindi? Wagusa te! Wa vura duhe wo, si aidanga ani sungudi ga Satana zegino ti digi nisaha te. Yekova du nika gbarasaha ngba gu gene ko nika mangaha ngbaha na ti gako regbo. Ga Mbori diaberã tipa gi gbegberẽ zegino re nika yugo gako rurupai na nyemuse.—Tam. 92:7; Snz. 2:21, 22.
2 Gu mokedi nangia Pauro akepai ki yaa: “Gu uru nga ga Gbia si ayé wa batuka. Rogo ho angbangbaturũ asúsa ku sa yo na bakere woro ho, agu ahe du ngbangbaturũ yo si azaraga be bakere faarago, kpotosende ki gbi, na gu mangimangi ahe du rogo.” (2 Pet. 3:10) Gine nga agu “angbangbaturũ” na gu “kpotosende” pe yo paha ane re? Gini “ahe” nika zaraga be bakere faarago? Ginipai nadu rii Petero yo ho ko ayani ‘kpotosende na gu mangimangi ahe du rogo nika gbi’? Pa gbia ani akaragapai sa agi asanahe re nika unda rani ani mbakaditirani tipa gu baiiriwopai nika manga kumbatayo barambeda.
Agu Angbangbaturũ na gu Kpotosende Nika Susa Kusayo
3. Gine nga agu “angbangbaturũ” pe yó paha rogo 2 Petero 3:10, na wai si nika susa kusayo?
3 Ho Ziazia Kekeapai amangasunge ni na gu fugo nga “angbangbaturũ” nifugo masaku, si nayugopa agu azogarago du aboro kutii behe. (Yes. 14:13, 14; Yugo. 21:1, 2) Agu ‘angbangbaturũ nika susa kusayo’ re nga agu azogarago nga ga awiri aboro nga azanga sinombori. Pa susaha kusayo na “bakere woro ho” nayugo gupai nga si nika susa niipo.
4. Gine nga gu “kpotosende” pe yó paha, na wai si nika susa kusayo?
4 “Kpotosende” nayugopa gu zegino nga ga asamungu kuti Mbori. Ngbatunga gu zegino re adu ti rago Noa nga gu Yekova agbarasihe na Ime Akangbii. “Agu angbangbaturũ du ho awere na kpotosende si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori.” (2 Pet. 3:7) Yekova agbarasi azangasinombori na Ime Akangbii ti bangisa regbo, ono gu gbarasahe nika manga ti regbo “bakere gberãngbi,” si nikadu na angbazungaha ti ni. (Yugo. 7:14) Ti tonatonaha, Mbori nika sa kpoto agu abazogo yo nga ga zegino yó i gbarasi Babera Duna Bakere Ome Ti Ni, si kini yugu gupai nga ko aidanga na gu debari re te. (Yugo. 17:5, 16; 18:8) Fuo gure, ti regbo gu vura nga Aramegido, nikangia yangara papara bakere gberãngbi, Yekova nika nyasa riipa yangara ga Satana zegino.—Yugo. 16:14, 16; 19:19-21.
‘Ahe Nika Zaraga’
5. Gini ahe Petero aya si nika zaraga?
5 Gine nga “agu ahe” nika “zaraga”? “Agu ahe” Petero ape paha re nga agu ahe nasa gi zegino re si du na agu asino, aberã, na agene, gbiati asásá Mbori aidanga nani ya. “Agu ahe” re nakoda ‘gu toro nga ga zegino,’ “nga gu toro namanga pai awere rogo agu awiri yo nakeretu.” (1 Kor. 2:12; oni gedi AEfeso 2:1-3.) Ome gu “toro” re ima kio gbe rogo gi ga Satana zegino re. Si nasa aboro i niberẽ, kini sogima apai, kini fura, na kini mangiapai ngba agu agene nga ga Satana, nga gu basamungu duna rukö gbe, na ko nga ‘gu bakindo duna tandu yuge.’
6. Wai gu toro nga ga zegino ayugotihe?
6 Agu aboro gu toro nga ga zegino amaapai kuriyo, i nambu berãyo na ngbaduyó yo Satana ariaha, tipa i niberẽ wakina ko. Si ki tadu wo, i kini mangi kina agu apai i akpinyemuhe, zanga berãpa gupai Mbori akpinyemuhe. Ho pai akura ni si aida i mangipai sani, i namangaha nikina rukö watadu gbangbati. I airisongo agu aboro du kuriyo te. Na i nambu tiyo sa “gu nyemuhe nga ga borose, na gu nyemuhe nga ga bangirise.”—Oni gedi 1 Yoane 2:15-17.
7. Tipagine si aida ani ‘banda kpotoraniyo’ ti ni?
7 Nanyakipa wai tie si aida ani ‘banda kpotoraniyo’ nimanga ani sunge na gu tatamana naye ariyo ho ani asia gaani abakure ni, na agu abuku ani agedaha, na ambaro, gbiati gu bangiriba nga ga Internet ani aida ka wetekaha! (Snz. 4:23) Gu mokedi nangia Pauro akepai ki yaa: “Oni bánda tironi, gu boro ka gbarasa roni na gani nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.” (Koro. 2:8) Wa ga Yekova uru ambeda, si ninyanyakipa pai gbe ani irisi gu rugute re, bambiko gu bakere “faarago” nga ga ga Yekova zinga nika zaragasi “agu ahe” dunduko nga ga gi sino raka nga ga Satana re, si kini yugu gupai nga agu ahe re arengbanga ka bata be gu faarago re te. Gure natingida rani na gupai du rogo Maraki 4:1 nayaa: “Oni ngére, bambiko rago nikaye, si agbí wa gbigiwi, ho airaenda ka du ni wa kakarika na amangi gbegberẽpai dunduko; gu rago nikaye azókoda yo.”
“Kpotosende ki Gbi, na gu Mangimangi Ahe Du Rogo”
8. Wai kpotosende na agu ahe du rogoho nika “gbi”?
8 Ginipai nadu rii Petero yo ho ko ayani wee, “kpotosende ki gbi, na gu mangimangi ahe du rogo”? Gu fugo i asaha nga “gbi,” i rengbe ka saha ngba kura gene nga “kusa he gbaiga,” si kini yugupa guhe i nakusihe gbaiga mbiko i bihe nga si rẽarẽ i zoho. Gupai gu fugo Petero re ayugoho nga, ti regbo bakere gberãngbi, Yekova nika kusa ga Satana zegino gbaiga tipa gbarasaha. Gu sangbanebi nga ga Yesaya 26:21 nayaa: “Yekova nakura rogo gako ba yo ka mbusa araki auru kpotosende tipa gayo irairapai, kpotosende akúsa pa gu kure i auka ha ku auru he, si adáda nga gaha akangba berewe te.”
9. (a) Gini ahe si aida ani nehe, na tipagine? (b) Gine si aida ani sonosihe rogoraniyo, na tipagine?
9 Ti regbo ga Yekova uru, agu aboro rimisi tiyo kurogo gi zegino re na gu toro nga gaha, gayó mangapai nisaha nika yugo gini ngbatunga aboro nga yó, na i nika imo tiyo aimo dagbayó a. Si rengbe kadu nga agu amangapai nga ga zuũ moipai areme, si nagberesa berã aboro tipa gu regbo ‘be boro nika zinga kuti be kurani.’ (Zek. 14:13) Si ninyanyakipa pai tie ani ne agu avidio, abuku, ambaro nga ga vidio, gbiati gu kura apai rengbe ka rimiso agu asino kurogo rani yo du nigbegberẽhe bangiri Mbori, wa agu nga rukö gbiati nyemu zuũ. (2 Sam. 22:28; Tam. 11:5) Ono si naida ani sonosi zuzu ga Mbori ziazia toro rogoraniyo, bambiko si nga agu asino nika sa rani ani bati be gu faarago nga ga ga Mbori zinga.—Gara. 5:22, 23.
“Vovo Angbangbaturũ na Vovo Kpotosende”
10, 11. Gine nga gu “vovo angbangbaturũ” na “vovo kpotosende” pe yó paha?
10 Oni gedi 2 Petero 3:13. “Vovo angbangbaturũ” nga ga Mbori Kindo du ngbangbaturũ yo, nga gu i asigiraha rogo 1914, ho “rago aGendiria” adigi ni. (Ruka 21:24) Gi zogarago re, bakindoho nga Yesu na aboro nga 144,000 nga aguyo nika zogarago naako, dunguyo naima gbia gayó mosoro ngbangbaturũ yo. Rogo gu kitabu nga Yugoti, i ringbisi gi siasia aboro re kuti gu “ziazia bakporo nga vovo Yerusarema, si nizorõ ngbangbaturũ yo yo du Mbori ni, i ambakadi he wa gu de i afongo ri nikadia kumbari.” (Yugo. 21:1, 2, 22-24) A wa gu Yerusarema nadumbata angia gu ba mbatabakindo adu rogoho Yisaraere yo, Vovo Yerusarema na gu kumba nika diari nakusa gu zogarago nga vovo zegino. Gi bakporo nga ga ngbangbaturũ re nika ‘zora ngbangbaturũ yo’ nitonaha ka mangasunge ku auru kpotosende.
11 “Vovo kpotosende” nga vovo riko nga ga aboro nga aguyo nika yugo gayó ranigose kutiibe ga Mbori Kindo. Gu paradizo nga ga toro du ga Mbori aboro awere rogoho, si nikadu rogo gi bawene “zegino nikadu” re nibawenehe gbe. (Eb. 2:5) Wai rengbe ani ka raka rogo gi vovo zegino re?
Oni Mbakaditironi Tipa ga Yekova Bakere Uru
12. Tipagine ga Yekova uru nikadu ti ni nibaiiriwopai fu zegino?
12 APauro na Petero afura tipa ga Yekova uru ki yawee si nika ye “wa iradĩ,” zanga boro ini nga si naye. (Oni gedi 1 ATesaroniko 5:1, 2.) Zavura ndikidi aKristano, nga agu aboro nasungudoho, i nika rigido arigido ti ni. (Mt. 24:44) Tipa aboro zegino, si nikadu fuyó nibaiiriwopai gbe. Pauro akepai ki yaa: “Ho i ka ya ni, ‘Zereda, ngba barani angba,’ gberãngbi ki ye ku ri yo ni ba sa, a wa imisiri pai sa gu de du na gude; i abata nga wa sa te.”—1 Tesa. 5:3.
13. Wai rengbe ani ka he sa gu fugo nga “Zereda, ngba barani angba!” si nangi rani?
13 Ho ini ka ya ni wee: “Zereda, ngba barani angba!” si nikadu wa i nape rengo, ono tie, si ananganga ga Yekova amoyambu te. Pauro akepai ki yaa: “Awirina, oni adu nga bitimo yo, gu rago ka dusia roni wa iradĩ te re. Bambiko oni nga awiri imarago dunduko, nga awiri haha rago.” (1 Tesa. 5:4, 5) Sidu tie, ani sungu rogo imarago, tuturũu ti gu bitimo nga ga zegino. Petero ayaa: “Abadiangba, wa ini oni pa agi apai re mbata, oni bánda tironi gu ingapai nga ga gbegberẽ aboro, si ka ndu ka ngbe fu roni ku mbata yo, oni ki ti pati gaoni ru nyanyaki.”—2 Pet. 3:17.
14, 15. (a) Wai Yekova nayugu gako irisa tipa rani? (b) Gini fugo naye be ga Mbori toro si aida ani berẽkuriihe wenengai?
14 Yekova apenga kina gupai gbua nga ‘ani bandatirani’ ki mburani kuho te. Kuba gure, ko irisi rani niyugo ko ‘pa agu apai’ furani nika manga kumbatayo.
15 Si nafu kina gberarago nga, kura aboro abingo agu tingidapai na nyanyakipaha i afuhe furani ki yawee ani naangera angera kindi te. I rengbe ka yaa, ‘Ani ima gia gipai re awere tipa badungu agarã.’ Ono tie, ngbatunga aberã wa gure nayugo gupai nga i nasakapai na Yekova na Wiriko, angianga kina gu riko nga ga kangara moyambu sa ya. Yekova ayaa: “Mo súngudi he.” (Abak. 2:3) Yesu ape kina gu bangisapai re ki yaa: “Oni ngére tie, bambiko oni aina nga ni gu uru gaoni Gbia ka ye te.” (Mt. 24:42) Kurigure, Petero akepai ki yaa: “Oni ka du ni gini ngbatunga aboro tipa manga ziazia apai na sinombori? Oni ki ngere tipa ye gu uru nga ga Mbori ki niipisi he!” (2 Pet. 3:11, 12) Gu riko nga ga ruru moyambu na gaha Riigbu Bipasunge ambunga tingida rani na agi apai nga rengo re te!
16. Gini ngbatunga sino si aida ani nehe, na tipagine?
16 Nirengo, “gbegberẽ moyambu” du nayawee gani Gbia naima aima. (Mt. 24:48) Gu gbegberẽ moyambu re du rogo gu riko pe yó paha rogo 2 Petero 3:3, 4. Petero akepai yo ki yaa: “Ti yangara arame airasawia nikaye ki nipeke agu apai boroyo akpi nyemu he,” kini sawia aguyo namaabangiriyo tipa ga Yekova uru. Kuba gupai nga i gbeberãyo tipa agu apai nga ga Kindo, i nagbeberãyo tipa kina agu apai i akpinyemuhe na kidu niʹairagbangbati. Si aidanga ani sonosi ngbatunga zanga giasangbaa watadu ngbatunga gbegberẽ berã wa gure te! Kuba gure, si naida ani “ini he ya gu hipai nga ga gaani Gbia si nga gene bata” nimanga ani gu sunge nga ga Kindo na sunge sa aboro ni abawiriki, na ki zanga titiko kuti gu ringbisa regbo nga ga Yekova.—2 Pet. 3:15; oni gedi Amokedi 1:6, 7.
Ani Kido Kuti gu Mbori Nga ga Bata Ko
17. Wai ruru aKristano amangipai kuti gu ga Yesu rugute nadu tipa ora Yerusarema yo, na tipagine i amangihe wo ti ni?
17 Fuo gu riivura nangia ga aRomo zi ringara Yuda rogo 66 F.B.K., ruru aKristano amangipai kuti ga Yesu rugute ki oro Yerusarema yo ho bambata momu amangi ni. (Ruka 21:20-23) Tipagine i adiberã ti ni nikina ipo? Si nawira gupai nirengo nga, i aima banda ga Yesu rugute. Zanga kapa, i aima ino gupai gayó diaberã nika ye nani a wa Yesu arugu yó. Ono i aima rugatiyo a na gupai nga ka Yekova mbunga gako ruru aboro te.—Tam. 55:22.
18. Wai gu fugo Yesu du rogo Ruka 21:25-28 aʹaria gaoni bipai tipa gu bakere gberãngbi naye re?
18 Wa kina gure a, si naida ani kido kuti Yekova na ngbaduraniyo dũ bambiko ko nikadu nigaani bata ho gi sino raka du awere re nika dani ti gu bakere gberãngbi ngbatungaha aamanganga mbata ya. Fuo tona bakere gberãngbi, ono mbata fu Yekova ye na gbarasahe kurii zegino dunduko, aboro nika “ru aru be gunde, mbiko i angera fuo agu apai nikaye ku zegino.” Ono wa avura Mbori nikaa kio be gunde, gako ruru amoyambu agundenga te. I nikaa ngi angi bambiko i nika ino gupai nga regbo batasa yó ima mbeda.—Oni gedi Ruka 21:25-28.
19. Ginipai ani ka wisigoho rogo gu kekeapai naye re?
19 Nangbaa gu bawene apai nasungudo agu aboro kparatiyo ti gi zegino re na gaha “ahe”! Ono wa ani ka bihe rogo gu kekeapai naye fuo gere, ka ani aida ka bata, kura apai kinaho si aida ani mangihe angianga kina gu sa nga ka ne gbigbitapai ya. Si naida ani sonosi agu asino nasa ngbarago ti Yekova na kini mangi agu asunge ko aida nani.—2 Pet. 3:11.
[Gu kpiahe du ti kpewaraga 17]
Wai rengbe oni ka ‘banda kpotoroniyo’ na ki nye nikparakpara roni ti zegino?
[Gu kpiahe du ti kpewaraga 18]
Wai rengbe ani ka yugo nani nga ani “ini he ya gu hipai nga ga gaani Gbia si nga gene bata”?
[Gu kpiahe du ti kpewaraga 18]
Oni Rengbe ka Sakarogoyo?
• Gine agi ahe re arukubaha?
agu ‘angbangbaturũ na kpotosende’ du awere
“agu ahe du ngbangbaturũ yo”
“vovo angbangbaturũ na vovokpotosende”
• Tipagine ani akido ti ni kuti Mbori na ngbaduraniyo dũ?