Agedi Gaani Awaraga Nasanahe . . .

Ya Mo I Nika Gbarasa gi Kpotosende re Agbarasa?

▪ Kura aboro aberẽ gupai nga i nika gbarasa gi kpotosende re rogo gu diwi nangia Tanvuo 21, 2011. Ono gipai re amanganga te. Sidu, gu bagumba pangbanga rogo radio Amerika yo nga Harold Camping agumba sangbanebi zanga si mangi. Ko agumba gupai nga, Uru Sapangbanga nika da rogo Merekoko 21, 2011 na bakere bazigizo nika manga rogo zegino naabaha, fuo adiwi bisue kusa, rogo Tanvuo 21, i ki gbarasi kpotosende.

Ono tie, i agbarasanga gi kpotosende re te. Bakusi kpotosende arengbanga ka mbuhe i gbarasihe te. Fugoko nayaa: “Mo anyakasi kpotosende, si ki ru aru kindi.”—Atambuahe 119:90.

Ono tie, kura abagedi Ziazia Kekeapai aidanga kuti gipai re te, i nagumba gupai nga i nika gbarasa gi kpotosende re na we. I namaa mburu gi gayo kango re rii gupai du rogo 2 Petero 3:7, 10 mbiko si nayaa: “Ono agu angbangbaturũ du ho awere na kpotosende si du ni igiigi he be kina gu pai re tipa we, ni bandabanda ha tipa rago sapangbanga na rago gbarasa azangasinombori. . . . Ono gu uru nga ga Gbia si ayé wa batuka. Rogo ho angbangbaturũ asúsa ku sa yo na bakere woro ho, agu ahe du ngbangbaturũ yo si azaraga be bakere faarago, kpotosende ki gbi, na gu mangimangi ahe du rogo.” Ya mo si naida ani girogo afugo Petero kina wai du he re?

Oó, si aida ani girogoyo wo te. Tipagine? Mbiko si naida gu sakarogopai yo du tipa gu veresi re duna ngbanya dagbaha na agu afugo Petero du rogo gako waraga yo gbiati agu apai du rogo Ziazia Kekeapai yo. Ka ani girogo gupai re kina wai du he re, si nika yugo gupai nga angbangbaturũ watadu haurago na agu abirioni akerekuru du rogoho gbiati gu kura ahe we nika gbarasaha mbiko gupai nga wiri paparaha gbua tooni duna amangi gbegberẽpai rogo. Ya mo oni rengbe ka zo baga awande sa naabaha mbiko gupai gbua nga bangisa wande sa gu du nigbegberẽ ru? Wagusa te. Rogoyo dunga ti ni te! Kina gu bangisapai re du tipa Yekova, ko arengbanga ka gbarasa zegino naabaha mbiko kina gupai gbua nga gako kusikusi he sa samungu te.

Kurigure, gu ngbatunga biapai re natagbagatihe na gu fugo Yesu Kristo nayaa: “Aboro maku nga bayee aboro, bambiko i adú ni adikumbo zegino.” (Matayo 5:5; Atambuahe 37:29) Ya mo gu baagude duna nyemuse rengbe ka dua bambu fu gako aborokporo kina ko kini ru berewe ka zoho? (Atambuahe 115:16) Ka pai mangingo wa gure te! Anga Yekova gbua nga Bakusiahe te ono ko a nga gu Baagude du na nyemuse.—Atambuahe 103:13; 1 Yoane 4:8.

Petero amangisunge na gu fugo nga “kpotosende” rogo masaku yo tipa rikaaboro, rogo gi bangiriba re, si tipa gbegberẽ rikaaboro. Oni kparia gupai nga, Petero apepa gu wiratise du dagbaha na gu Ime Akangbii naadu ti rago Noa. (2 Petero 3:5, 6) Ti gu regbo naadu re, kina gbegberẽ rikaaboro sa i agbarasiyo; ono kpotosende gbiati Noa na gako aborokporo, i aima bata. Teketeke a, gu fugo Petero amangisunge nani nga “angbangbaturũ,” si narukuba kurapai kia. Gu fugo nga “angbangbaturũ” narukuba gu zogarago nga ga aboro. Gi gbegberẽ aboro re gbiati agu azogarago nga ga awiri aboro i nika diaha kusayo, na gu ga Mbori zogarago nga ga ngbangbaturũ watadu Kindo ki dibaha.—Daniere 2:44.

Ya mo i nika gbarasa gi kpotosende re agbarasa? Oó. Gu he i nika gbarasaha nga gbegberẽ aboro. Kpotosende gbiati agu aboro duna asinombori tiyo nika nyeanye kindi.—Asanza 2:21, 22.