Wai Ga Yesu Motumo Tumorii Abatasa Rani
“Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.”—YO. 3:36.
1, 2. Gini ndupai i akusi Ngbaõbambu Sinziri ti ni rogo 1879?
GU Ngbaõbambu Sinziri nangia ga Tanvuo 1879 aduna gupai rogoho nga: “Boro ho nawisigo Ziazia Kekeapai wenengai gupai arengbanga ka zio ngbaduniyo ya nga Kristo akpi tipa rani te.” Si agumba gu nyanyakipa pai nga: “Si naida ani bandatirani ti guhe rengbe ka sa rani ka ani naabingo gu motumo nga ga Kristo niguhe nadada gaani aingapai ya.”—Oni gedi 1 Yoane 2:1, 2.
2 Ndupai sa i akusi Ngbaõbambu Sinziri ti ni rogo 1879 nga ka songoda gu yugopai nga ga Ziazia Kekeapai tipa ga Yesu tumorii. Si afu ‘riahe ti ragoho,’ bambiko ti gu regbo re, badungu agu aboro naya aKristano nga yó atona ka kapa kuti kpio Yesu ki yawee si nga motumo tipa gaani aingapai te. (Mt. 24:45) Ti gu regbo re, badungu aboro atona ka dakuti gupai nga Mbori nakusi aboro te, nga gu berã natikango na gupai nga Mbori nakusi aboro, aboro ki mangi ingapai. Agu aboro nayawee aboro akuru nisayo, i nayawee kpotoboro nika mbakadatihe ambakada nitihe ka si aidanga i tumo rii aboro atumo ya. Gu rugute Pauro afuhe fu Timoteo naundo rani aundo gbe. Ko ayaa: “Mo bánda gu he i afu foro, ki guari pati gu kungba fura bau na kangu i aya ti ni ni zire, inahe; si du agu yo ata ida ha niingi ti gene idapase.”—1 Tim. 6:20, 21.
3. Gini asanahe si aida ani wisigihe?
3 Zanga kapa, oni aidanga ka ‘inga ti gene idapase’ te. Tipa oni kakuti gaoni idapase, si ngbaangba oni wisigi agi asanahe re: Tipagine mi aida tumorii ti ni? Ginipai Mbori na Yesu amangihe ka tumo rii aboro? Wai rengbe mi ka gbia undo be motumo tumorii nga gu rengbe ka batasa re be ga Mbori zinga?
Bata be ga Mbori Zinga
4, 5. Gine nayugo gupai nga ga Mbori zinga aima nye rii gi gbegberẽ zegino re?
4 Ziazia Kekeapai gbiati gu pangbanga du tipa aboro nayugo gupai nga, ho Adamu amangi ingapai ni, ga Mbori zinga aima ‘nye rii’ aboro. (Yo. 3:36) Ani naino gipai re ti gupai nga, boro ho rengbe ka zubo be kpio te. Ga Satana zogarago arengbanga ka batasa aboro be arungo te, na zogarago ho nga ga aboro rengbe ka fu agu ahe fu avuruhe dunduko du yó na zingoho te. (1 Yo. 5:19) Avura, na zuũ, gbiati rungo namanga aboro kindi.
5 Si tie ziazia nga, ga Yekova maku kurii gi zegino re te. Pauro ayawee ‘ga Mbori zinga niyuguyuguhe ngbangbaturũ yo sa azangasinombori dũ.’ (Rom. 1:18-20) Sidu tie, agu aboro namanga agu apai angianga sinombori ya, i ahenga gbia sangbana gayó mangaapai te. Areme, ga Mbori zinga niyuguyuguhe rogo agu apangbanga nga ga sapangbanga i aukaha wa agberãngbi kurii ga Satana zegino, na agu apangbanga re nakura rogo gu gaani awaraga du mburuhe rii Ziazia Kekeapai.—Yugo. 16:1.
6, 7. Gini sunge mbedimbedi aKristano angbembatayo nani, na ngbadimo kindi nizakizakihe fu avuru ga Satana zegino i mangi wai?
6 Ya mo gipai re nayugo gupai nga gene berewe be aboro tipa ka kusa goyo tiibe Satana Mbori ki idi naayó te? Wo duhe te. Ngbadimo kindi nizazaha tipa aboro mbakadipai dagbayó na Mbori. Mbedimbedi aKristano nga ‘amokedi kuba Kristo,’ i nangbembatayo rogo sunge tungusapai nga gu i azungodi aboro nani dagba arikaaboro dunduko kini yaa: “Oni zéresi tironi fu Mbori [“Oni mbakadipai dagbaroni na Mbori,” NW ].”—2 Kor. 5:20, 21.
7 Gu mokedi nangia Pauro ayawee Yesu “nabatasa rani be gu erã [watadu zinga] nikaye.” (1 Tesa. 1:10) Ti regbo gu ga Yekova vura nga Aramegido, Ko nika gbarasa agu aboro ingapai dunduko aidanga ka sa gayó berã ya. (2 Tesa. 1:6-9) Ada nika bata? Ziazia Kekeapai nayaa: “Gu ni ka idi pa Wiri nyenye unga du adu be ni; ono gu ni ka gia nga sangba Wiri ya, ni bi nga unga te, kina ga Mbori zinga nye ri ni.” (Yo. 3:36) A wa gumbayo ho re, agu aboro dunduko nikadu niungayo kidu na idapase kuti Yesu na kuti gako motumo, i nika bata rogo ga Yekova yangara uru zinga.
Wai Motumo Tumorii Amangasunge
8. (a) Gini bawene apai nadu fu Adamu na Eva kumbatayo? (b) Wai Yekova ayugu gupai nga ko nga Mbori rurupai?
8 Mbori akusi Adamu na Eva nirengberengbe aboro. Ka i anye niruruyo fu Mbori, ka zegino hi awere be awiriyo i kini raki naayó sa na ngbarago rogo Paradizo. Ono tie, agu atitarani re ataino aino kini kuo ga Mbori ndiko. Nisangbana gipai re, Mbori asaringbanga yó sa nyenye kpio, na ki do yó kusayo rogo gu kpuyo nangia Paradizo. Ti gu regbo i avungu agude, ingapai aima gberesa payo. I atona ka gbinza na ki kpiki. Gere nayugo gupai nga Yekova napepai si ki mangi kina kuho. Ko a nga Mbori rurupai. Yekova aima ya fu Adamu wee ka i ri zuzu gu ngua ko aya ka i ringa ha ya, i kpiki akpiko, na kinawo si amangi.
9, 10. (a) Tipagine awiri Adamu akpiko ti ni? (b) Wai rengbe ani ka bata be nyenye kpio?
9 Wangia ani atita Adamu, ani adi gu kpoto tiyo duna ingapai, na ani nakpiko akpiko dunduko. Gu sarangbanga naye kurii Adamu, si akodi rani dunduko bambiko ani aenge tiko. Ani dunduko nakpiko akpiko. Ka Yekova adi kpio kusayo zanga ko fu motumo tumorii afu, ka ko adu niʹiraziree. Pauro afura tipa rani dunduko ho ko ayani wee: “Ani ini aina ya rugute du mbiko toro, ono mi tigimi du ni borose, ki du ni zizi boro fu ingapai. Ako, rungorungo boro nga mi! Da ka batasi re ti gi boro kpio re?”—Rom. 7:14, 24.
10 Kina Yekova sa narengbe ka fu guhe rengbe ka sa gupai nga ko mbupai furani ti gaani aingapai na ki batasirani be nyenye kpio. Ko amangi gipai re nikeda ko Wiriko ko akpinyemuko gbe ko ye i vunguko nirengberengbe boro, tipa ko fu ungako nimotumo tipa rani. Yesu aadunga wa Adamu naayenga nirengberengbe ko ya te. Nirengo, Yesu ‘aamanganga gbegberẽpai te.’ (1 Pet. 2:22) Ka Yesu aidi ka vunga, ka ko avungu agude ami kidu nirengberengbe ra zanga ingapai. Ono ko aaidanga ka mangaha wo te. Ko ambu tiko fu avura Mbori i imiko tipa wa ka ko sa awiri Adamu ni awiriko, ki fu nyenye unga fu agu aboro duna idapase kutiko. Ziazia Kekeapai nasakarogo gipai yo re niyaa: “Mbori du sa na azarõ sa dagba Mbori na aboro, nga gu kumba nga Kristo Yesu ni tiko, nafu tiko ni motumo tipa aboro dũ.”—1 Tim. 2:5, 6.
11. (a) Ani rengbe ka yugopa wai motumo tumorii amangasunge na gini kpiapai? (b) Wai du ome ga Yesu motumo tumorii?
11 Ani rengbe na ringbisapa wai ga Yesu motumo amangasunge kuti gupai du tipa agu aboro gbegberẽ beenge nariti gayó marã kini mbuyo na bape riyo. I zi aira gu beenge re ku bambukiso yo tipa dungu agarã. Ono tipa agu aboro i ariti gayó marã re, i nye rogo rungo, gene beyo te kinagu ka gu boro duna wene sino gbe zaki gu beenge re berewe ki karaga gayó marã fuyó tipa i gasi gu bape du riyo. Wakina gure a, Yekova Mbori na Wiriko ko akpinyemuko gbe angbe awiri Adamu ki di gayó bape riyo kusayo riipa kure Yesu. Si nasa Yoane Bafu Bapatiza ko ya tipa Yesu wee: “Oni bí, gu Wiri kandoro nga ga Mbori ru, nadia gu ingapai nga ga zegino ku sa yo!” (Yo. 1:29) Gu ingapai Yesu adiaha kusayo nga ga agu aboro duni ungayo na aguyo naima kpiko a.
Gu Imisiri Mbori na Yesu Ahihe ka Tumo Rirani
12, 13. Ginipai ani awirikaha ti gupai nga Abarayama aidi ka fu Yisaka nimotumo?
12 Ani arengbanga ka inopa gu igira nzunzu Yekova na Wiriko ko akpinyemuko gbe ahihe ka fu motumo tumorii te. Ono Ziazia Kekeapai nagumba agu apangbanga furani naundo rani ani berẽkurii gipai re wenengai. Nikpiapai, oni berẽnga pa wai Abarayama adu ho ko aandu ni ku Moriya yo, mbiko Mbori aya fuko: “Mo dí wiro, nga kina bangisa wiro nga gu ko mo akpi nyemu ko gbe, nga Yisaka, mo ki ndu ku rogo gu ringara nga Moriya, ki tumo na ko ni zozo motumo ri gu bagangara mi ka yugo ho foro.”—Bam. P. 22:2-4.
13 Abarayama ada Moriya yo fuo arame biata. Oni berẽnga pa gu wingbaduse ko adu nani ka vo be Yisaka na anduko na ki pigi ko rii gu bamotumo kinako aduaha nibeko. Oni berẽnga pa gu imisiri Abarayama adu nani wa ko atumba sape ka yera goro wiriko nani! Oni berẽnga pa wai Yisaka adu ho ko api ni rii bamotumo, kini pidi tĩtĩ basape si yere goko ko ki kpi. Ga Yekova maraika arugusi Abarayama ti imo wiriko. Gupai Abarayama amangihe nigu uru re naundo rani ani rugutirani naapa gu igira Yekova ahihe ho ko ambu ga Satana aboro ni i imi Wiriko. Pa ida Yisaka bako fuko nimotumo nayugopa wai Yesu aidi ka rungo na ka kpi tipa rani.—Eb. 11:17-19.
14. Ginipai namangi Yakobo naundo rani ani berẽkurii pa gu imisiri Yekova ahihe?
14 Ani rengbe ka inopa ga Yesu motumo a ti gupai namangi Yakobo. Gu wiriko ko akpinyemuko gbe nangia guko rimoko angia Yosefa. Mbiko gipai re, awirina Yosefa anaakpi ko akpi na kini sogo ko. Ono wa si avura duwo, Yosefa aima ida bako kedi ko ko ndu ka ino gupai nadu tipa awirinako naariga anyaa Eburone yo baturõho adu nga amairo 60. Oni berẽnga pa gu rungo Yakobo adu nani ho awiriko ayego ni na ga Yosefa baukadi fuko na kure ti ni! Ko akpari ki yaa: “Ga wire roko du; kere nya riti ko; Yosefa ni sipisipi ko ni rengo.” Gipai re aima fu kere rungo fu Yakobo ko ki kpari tipa wiriko tipa dungu arame. (Bam. P. 37:33, 34) Ho pai amanga Yekova ni, ko amanganga pai sani kina ngba gu gene kpakpa aboro amangapai sa apai ngbaha te. Ono wa vura duhe wo, pa berã ani kurii gipai namangi Yakobo re naundo rani aundo ani inipa gu imisiri Yekova adu nani ho i arungosi Wiriko ni ko akpinyemuko gbe na ki imiko ngba kere gene.
Oni Gbia Undo be Motumo Tumorii
15, 16. (a) Wai Yekova ayugu gupai nga ko aima ida na ga Yesu motumo? (b) Wai oni nagbia undo be ga Yesu motumo?
15 Yekova Mbori azingisi ruru Wiriko bekpio na gu kpoto nga ga toro. (1 Pet. 3:18) Ko akuru fu gako abawiriki tipa arame 40, kini nyakasi gayó idapase na kini mbakadiyo tipa gu bakere sunge tungusapai ko ambuhe fuyó. Fuo gure, ko aga ku ngbangbaturũ yo ki fu gu undo nadu ti kureko fu bako, tipa ko mangisunge nani ka batasa agu aboro duna ndikidi idapase kuti gako motumo tumorii. Yekova Mbori ayugu gupai nga ko aima ida na ga Yesu motumo nifuko gu sunge fu Yesu nga ga uka ziazia toro kurii gu gako abawiriki nadunguratiyo ku Yerusarema yo rago Pendekote rogo gu garã nangia 33 F.B.K.—Amo. 2:33.
16 Nibasa, agu apefuo Kristo ziazia toro azoro kuriyó re atona ka zinahe fu aboro i zi bapatiza nirimo Yesu Kristo tipa Mbori mbupai fuyó ti gayó aingapai na ki bati be gako zinga. (Oni gedi Amokedi 2:38-40.) Tona ti gu regbo re kada ku awere, badungu amirioni aboro dagba arikaaboro dunduko narimo pagume na Mbori mbiko gayó idapase kuti ga Yesu motumo tumorii. (Yo. 6:44) Awere tie, ani naida ka ino karagapai sa asanahe ue, nga: Ya mo boro ho dagbarani i afu gu maabangirise nga ga nyenye unga funi mbiko gani wene mangaapai? Ya mo ani rengbe ka zanga gi maabangirise re berewe fuo gbia ani he?
17. Wai si aida oni naabi gu bakere maku nga kadu nibakurea Mbori?
17 Ga Yesu motumo nga guhe ani arẽnga arẽ tipaha ya. Badungu amirioni aboro areme da ni abakurea Mbori mbiko i na idapase kuti gu motumo re, na i na maabangirise ka gbia nyenye unga auru kpotosende. Ono tie, ani arengbanga ka nye rogo gu pa bakure re zanga ani mangipai amanga te. Tipa ani bati be gu ga Mbori zinga naye, ani duwa ka ani yugu gaani bakere tambuahe tipa gu ‘tumori du rogo Kristo Yesu yo.’—Rom. 3:24; oni gedi AFiripoio 2:12.
Oni Naayugo Gaoni Idapase Kindi
18. Duna idapase kuti ga Yesu motumo tumorii nakoda ginipai?
18 Gu bangua veresi nga ga gi kekeapai re nga Yoane 3:36 nayugo gupai nga duna idapase kuti Gbia Yesu Kristo nakoda giasangbako. Gaani tambuahe tipa tumorii nafõngbaduraniyo ani raki ringbisihe kuti ga Yesu yugopai, kodihe na gupai ko ayuguhe tipa ruru mangaapai na gbegberẽ mangaapai. (Mk. 7:21-23) “Ga Mbori zinga naye” kurii agu aboro dunduko asanga berãyo ti ngbatunga agu apai nga meteka, onyaonya afugo, na bibiriko mangaapai dũ, nga gu nakoda biko wasiwasi apai ya.—Ef. 5:3-6.
19. Ani rengbe ka yugo gaani idapase kuti ga Yesu motumo tumorii rogo gini agene?
19 Si naida gaani tambuahe tipa ga Yesu motumo tumorii sa rani ani fu tirani sa ‘manga gu ziazia apai nga ga sinombori.’ (2 Pet. 3:11) Si naida ani kpara bakere regbo tipa kaa kparakpee dedede, tipa wisigopai nisase, tipa nduge ku ba adunguratise yo, tipa gu irisombori nga ga aborokporo, na tipa tungusapai wenengai. Na “ka bangironi gó nga ti manga wene pai na fuka ahe ya; bambiko ngbatunga gi rũhe re, si ngba ti Mbori.”—Eb. 13:15, 16.
20. Gini ngbatunga amaku agu aboro duna idapase kuti ga Yesu motumo tumorii nika gbiaha kumbatayo?
20 Nairiwo gu ngbarago ani kadu nani ho ga Yekova zinga nika ye ni kurii gi gbegberẽ sino raka re, bambiko ani nayugo idapase kuti ga Yesu motumo tumorii na kini ndu kumbatayo na gaani tambuahe tipa ha! Rogo ga Yekova vovo zegino nga gu ko naa kido paha, ani kadu na gu tambuahe nika nyeanye kindi tipa gi bawene mbakadapai batasi rani be ga Mbori zinga re.—Oni gedi Yoane 3:16; Yugoti 7:9, 10, 13, 14.
[Gu kpiahe du ti kpewaraga 19]
Ngbadimo kindi nizazaha tipa aboro mbakadipai dagbayó na Yekova
[Gu kpiahe du ti kpewaraga 21]
Berãkurii agu apai nadu tipa Abarayama, Yisaka, na Yakobo rengbe ka undo rani ani inipa gu igira Mbori ahihe ka batasa rani
[Gu kpiahe du ti kpewaraga 22]
Gaoni Karagapai Nga Gine?
• Tipagine ani aida tumorii ti ni?
• Ginipai Mbori amangihe tipa ka tumorii aboro?
• Gini aundo ani agbiaha ti ga Yesu motumo tumorii?
• Wai ani ayugo gaani idapase kuti motumo tumorii?