Ga Yesu Motumo Nga “Ziazia Ũgamahe” Be Barani

1. Gu mbakadapai naadu tipa motumo tumorii nasa gini amaku si du taata?

GA Yesu Kristo motumo tumorii naye na badungu amaku. Gu mbakadapai naadu tipa fu motumo tumorii nazaka gene fu agu awiri Adamu dunduko nakpinyemu rurupai i da niyangaraha ni papara ga Mbori ngbadimokporo. Ga Yesu motumo nasaha taata furani a ani gbia gu momu nga ga raka nyeanye kindi na ngbarago. Berewe a, ga Kristo motumo namanga bakere apai kisusi gu gbua nga kafu wene raka fu aboro giasangba kumbatayo. Padu Yesu na nyemu ka kpi tipa ka songoda ga Yekova ruru mangaapai akaragapai kuti gupai naadu na nyanyakipaha tipa aboro dunduko auru kpotosende ane na ngbangbaturũ yo.​—Eb. 1:8, 9.

2. (a) Ginipai du na nyanyakipaha fu aboro ngbangbaturũ yo na auru kpotosende ane du rogo ga Yesu kparakpee yo? (Oni bi gu sura duti tonatonaha.) (b) Ginipai ani ka wisigoho rogo gi kekeapai re?

² Agarã ue mbata fu Yesu kpi na ki fu motumo tumorii, ko ayugupai fu gako abawiriki nga i naakpara niya: ‘Barani du ngbangbaturũ yo, Ani írisi rimoro airisa. Ga ngbi yé, Ani mángi rogo kpotosende wa mo akpi nyemu he, wa du he ngbangbaturũ yo.’ (Mt. 6:9, 10) Tipa ka kiiso gaani tambuahe tipa ga Yesu motumo, ani bingo gu ngbaya du dagbaha na pa ziasi rimo Mbori, gu zogarago nga ga ga Mbori Kindo, na pa digiso ga Mbori ringbisapai.

“ANI ÍRISI RIMORO AIRISA”

3. Rimo Yekova narukuba gine, na wai du Satana agberesi gu ziazia rimo re?

³ Yesu afura tipa irisa rimo Mbori watadu ziasihe ni bambatapai rogo gako kpia kparakpee yo. Rimo Yekova narukuba agu apai dunduko du tipa Ko nga padu ko ni bawene ko, ni iʹiriwo ko, na ni ziazia ko. Ti gu kura regbo Yesu aakparakpee, ko ayambu Yekova nga “Ziazia Buba.” (Yo. 17:11) Wa duhe nga Yekova ni ziazia ko, agu arugute na andiko dunduko ko akusaha ni ziaziaha. Wa vura du gipai re wo, Satana asakipai ati Edene yo nga si arunga fu Mbori ko moi arugute fu aboro te. Ho Satana ape ziree ni kuti Yekova, ko agberesi ziazia rimo Mbori.​—Bam. P. 3:1-5.

4. Wai du Yesu afubee tipa ziasi rimo Mbori?

⁴ Ono tipa Yesu tigako, ko aima kpinyemu rimo Yekova nzunzu. (Yo. 17:25, 26) Yesu afubee tipa ziasi ziazia rimo Mbori. (Oni gedi Atambuahe 40:8-10.) Gu wene gene Yesu araki gako raka auru kpotosende ngbaha ayugu gupai nga si daada na ki ruaru tipa Yekova moi arugute fu amaraika gbiati aboro. Ho Satana asa Yesu ko kpi kere iʹigirã kpio ni, Yesu anye ni ruruko fu Bako du ngbangbaturũ yo. Ho Yesu anye ni ni ruruko, ko ayugu gupai nga rengberengbe boro ima rengba ka giasangba ga Mbori ruru arugute ngba rengberengbe gene.

5. Wai du rengbe ani ka fubee tipa ka ziasi rimo Mbori?

⁵ Wai du rengbe ani ka yugoho nga ani ima kpinyemu rimo Mbori? Rogo gaani mangaapai yo. Yekova nakpinyemu gupai nga ani du ziazia. (Oni gedi 1 Petero 1:15, 16.) Gipai re nayugo gupai nga ani nairiso kina Yekova sa na ani nagiasangba ko na ngbaduraniyo dunduko. Zavura ho i arungosi rani ni, ani namanga ome tipa ka raka ringbisihe kuti gako ruru arugute na andiko. Ho ani amanga rurupai ni, ani nambu imarani si hasirago na rogo gi gene re, si kini ye na taarimo kuti rimo Yekova. (Mt. 5:14-16) Wangia ani ziazia aboro, ani nayugo gupai na gu gene ani araka gaani raka ngbaha nga, ga Yekova andiko ni bawenehe na runga ga Satana kitangbangase te. Ho ani amanga ingahe ni, a wa ani ainga ainga dunduko, ani nasa berãrani nzunzu na ki ne manga agu apai ayengo na irisa fu Yekova ya.​—Tam. 79:9.

6. Tipagine Yekova narengbe ka bi rani ti ni nga ruru aboro wa vura du ani ni kpakpa aboro?

⁶ Riimburu gu motumo tumorii nga ga Kristo, Yekova navu agu aboro ingapai nayugo idapase rogo mangaapai yo. Ko naida agu aboro ni airisiko nga aguyo nakparatiyo fuko. Yekova natakapande mbedimbedi aKristano ni ruru awiriko na agu aboro du dagba “gu kura akandoro” ni ruru abakureako. (Yo. 10:16; Rom. 5:1, 2; Yak. 2:21-25) Sidu, zavura awere, ga Yesu motumo naundo rani ani du na wene pagume na Barani na ani fubee tipa ka ziasi rimoko.

“GA NGBI YÉ”

7. Gini amaku ga Yesu motumo azaka gene tipaha tii ga Mbori Kindo?

⁷ Rogo ga Yesu kpia kparakpee yo, ko azungodi Mbori berewe nga: “Ga Ngbi yé.” Gini ngbaya du dagba ga Yesu motumo na ga Mbori Kindo? Ga Yesu motumo nazakagene tipa i dungura agu aboro du bangeyo nga 144,000 tipa i mangisunge ni abakindo gbiati aboromotumo na Kristo ngbangbaturũ yo. (Yugo. 5:9, 10; 14:1) Yesu gbiati gu kura aboro ko nika zogarago na yo, i nika zogarago rogo ga Mbori Kindo, i nika sa gu ngbatunga aboro dunduko du na giasangba i gbia undo ti ga Yesu motumo vuru agarã yo sa kutu. Kpotosende nika da ni paradizo, na ruru aboro dunduko nika da ni rengberengbeyo, ki kodi gu papara ga Mbori ngbadimokporo du ngbangbaturũ yo na gu du auru kpotosende ane kina sa. (Yugo. 5:13; 20:6) Yesu nika fitika rii gu bakuru woo nga Satana na ki di gu gbegberẽ apai kusayo dunduko gako samungu aye na ni ku rogo zegino.​—Bam. P. 3:15.

8. (a) Wai du Yesu aundo gako abawiriki i bipa wai nyakipa ga Mbori Kindo? (b) Wai du ani asongoda ga Mbori Kindo areme?

⁸ Ho Yesu adu ni auru kpotosende, ko aundo gako abawiriki i bi pa nyaka ga Mbori Kindo. Nibasa fuo Yesu zi bapatiza, ko atakipande “gu wene pangbanga nga ga ga Mbori ngbi” ku rogo tuturũ arago. (Rk. 4:43) Ho Yesu aafura ni na gako abawiriki niyangaraha mbata fu ko ga ku ngbangbaturũ yo, ko aruguyo nga i du ni adezire ko ki da ku “digida sende yo.” (Amo. 1:6-8) Si adu nga vurube gu sunge tungusapai nga ga Kindo, aboro rogo zegino dunduko nika gbia momu ka wirikapai tipa ga Yesu motumo na ki da ni avuru ga Mbori Kindo. Areme, ani nasongoda ga Mbori Kindo ni undo ani agu awirina Kristo du auru kpotosende ni manga ani gu sunge nga ga tungusa gu wene pangbanga nga ga Kindo rogo zegino dũ.​—Mt. 24:14; 25:40.

“ANI MÁNGI . . . WA MO AKPI NYEMU HE”

9. Tipagine du du ani ti ni na kido nga Yekova nika digiso gako ringbisapai adigiso tipa ngbatunga aboro dunduko?

⁹ Ginipai du Yesu aaida ka pehe ho ko ayani wẽ: “Ani mángi . . . wa mo akpi nyemu he”? Yekova nga Bakusiahe. Bara sa ko nape gupai nga pai mangi, si namanga nibasa. (Yes. 55:11) Ko ambunga ga Satana samungu si ká na Gako ringbisapai tipa ngbatunga aboro dunduko te. Ho rago aenge ni, ga Yekova ringbisapai tipa kpotosende angia si hi be rengberengbe awiri Adamu na Eva. (Bam. P. 1:28) Ka Adamu na Eva akpi zanga vunga gude, ka gu ga Mbori ringbisapai nga i hiisi kpotosende na awiriyo re adanga ti rengo te. Sidu, tingbafuo Adamu na Eva ingipai, Yekova ambuyo i vungu agude. Vurube ga Yesu motumo, Mbori nafu momu fu agu aboro dunduko nayugo idapase i da ni rengberengbeyo na ki raki nyeanye kindi. Yekova ima kpinyemu aboro, na gako ringbisapai du nga aboro giasangba raki kina boro wai ko aaidaha ti tonatonaha.

10. Wai du ga Yesu motumo nika undo agu aboro naima kpiko?

¹⁰ Na ginipai tigaha du tipa agu abirioni aboro nakpiki zanga i gbia momu ka ino Yekova na ka mangasunge fuko? Ga Yesu motumo naza gene tipa i zingisi agu aboro naima kpiko. Gu Barani nga boro nyemuse du ngbangbaturũ yo nika zingisayo azingisa berewe na ki fu momu fuyo i wirikipai tipa gako ringbisapai na ki gbia nyenye unga. (Amo. 24:15) Yekova naida aboro raki, angianga i kpiki ya. Wa duhe nga ko nga Baenge unga, ko nika du ni Ba agu aboro dunduko i nika zingisayo. (Tam. 36:9) Nairiwo wai tie si adaada Yesu yugu gupai furani nga ani kpari nga: ‘Barani du ngbangbaturũ yo.’ (Mt. 6:9) Yekova ima fu nyanyakipa sunge fu Yesu nga ga zingisa kpikpi aboro. (Yo. 6:40, 44) Rogo Paradizo, Yesu nika digiso gu gako sunge i nafuhe fuko ‘nga kadu ni zingabekpio, na ni unga.’​—Yo. 11:25.

11. Ginipai Mbori akpinyemuhe tipa “bakere rimbasa aboro”?

¹¹ Ga Yekova weneringise tipa kina bete aboro gbua te, mbiko Yesu agumba gupai nga: ‘Gu ni namanga gu pai Mbori akpi nyemu he ni nga wirinami, na dawire, na nina.’ (Mk. 3:35) Gupai Yekova akpinyemuhe nga “bakere rimbasa aboro” ka i agedanga yo ya rogo aringara dũ na angbatunga aboro na afugoyo dũ da ni airisiko. Agu aboro du na idapase kuti ga Kristo motumo na namanga gupai Mbori akpinyemuhe, i rengbe arengba kadu dagba agu aboro nika tangbayo nga: “Gaani bata ye be gaani Mbori nasunga auru mbatabakindo, na be Wiri Kandoro a!”​—Yugo. 7:9, 10.

12. Wai du du ga Yekova ringbisapai tipa aboro giasangba ni yuguyuguhe rogo kpia kparakpee yo?

¹² Ga Yekova ringbisapai tipa aboro giasangba niyugu yuguhe rogo ga Yesu kpia kparakpee yo. Na ngbaya kuti gi kparakpee re, ani mangingo ome amanga ka ziasi watadu ka irisa rimo Yekova. (Yes. 8:13) Rogo rimo Yesu yo nitihe nga “Yekova Nga Bata,” na gaani bata vurube ga Yesu motumo naye na irisa gbiati taarimo kuti rimo Yekova. I nika mangasunge na ga Mbori Kindo tipa aboro giasangba gbia undo ti ga Yesu motumo. Nirengo, kpia kparakpee nakido rani nga he ho rengbe ka sa gupai Mbori akpinyemuhe si zanga manga te.​—Tam. 135:6; Yes. 46:9, 10.

MO YUGU GAMO TAMBUAHE TIPA GA YESU MOTUMO

13. Gaani bapatiza nayugo gine?

¹³ Nyanyakipa gene sa ani ayugo gaani tambuahe ngbaha tipa ga Yesu motumo nga ka kpara tirani fu Yekova riimburu gaani idapase kuti ga Yesu motumo na ki zi bapatiza. Gaani bapatiza nayugo gupai nga “ani ni ga Gbia rani.” (Rom. 14:8) Si nayugo gupai nga ani nasana Mbori tipa wene sangbakpotoseyo. (1 Pet. 3:21) Yekova nakaragapai kuti gu sanahe re ni mangako sunge na kure Kristo ko atumo na ni ka giriso rani. Ani na bakere kido nga ko nika fu agu ahe afu dunduko furani ko nakidopaha.​—Rom. 8:32.

14. Tipagine i azinahe ti ni furani nga ani kpinyemu akuarani?

¹⁴ Gini kura gene rengbe ani ka yugo gaani tambuahe tipa ga Yesu motumo ngbaha? Wa duhe nga agu apai dunduko Yekova amangaha du na nyemuse rogoho, gako nyemupai du nga airisiko dunduko yugu nyemuse ni bangua sinoyo. (1 Yo. 4:8-11) Ani nayugo gupai nga ani naida kadu ni “awiri gu [Barani] du ngbangbaturũ yo” ho ani akpinyemu kura aboro ni. (Mt. 5:43-48) Gu rugute nga ka kpinyemu kura aboro, si nga ue rugute fuo gu nga ka kpinyemu Yekova. (Mt. 22:37-40) Nyanyakipa gene sa ani ayugo gaani nyemuse ngbaha fu kura aboro nga ka irisa gu zinahe nga ga tungusa gu wene pangbanga nga ga ga Mbori Kindo. Ho ani ayugo nyemuse ni fu kura aboro, gure nga ani nayugo kpia ga Mbori taarimo. Nirengo, nyemu Mbori nadu “ti rani nzunzu” ho ani airisa gu zinahe ni nga ka kpinyemu kura aboro, gbe awirinarani.​—1 Yo. 4:12, 20.

GA YESU MOTUMO NAYE NA ‘ZEREDA YO DU GBIA NI’

15. (a) Gini amaku ani agbiaha awere be Yekova? (b) Gini amaku napido rani?

¹⁵ Mbori nambupai furani ti gaani aingapai dũ ka ani du na idapase kuti ga Yesu motumo. Fugo Mbori nakido rani nga i rengbe arengba ka “gbandaka” gaani aingapai. (Oni gedi Amokedi 3:19-21.) A wa ani abihe kusayo, Yekova nadia gako amoyambu du ni mbedimbedi yo na toro ni awiriko riimburu ga Yesu motumo. (Rom. 8:15-17) Tipa agu aboro tigayo nga “kura akandoro,” si wa ka i ya Yekova ima gba waraga na rimoyo ti ni nga ko nika dia yo ni awiriko. Tingbafuo ani da ni rengberengbe rani na ki bati ti regbo yangara asada, ka pepai ni masaku, Yekova nika du na bakere ngbarago ka maa fuobeko ti gu waraga re na ki di rani ni agu awiriko du auru kpotosende no. (Rom. 8:20, 21; Yugo. 20:7-9) Yekova nakpinyemu awiriko nyeanye kindi. Gu undo aboro nika gbiaha ti ga Yesu motumo nika nye anye kindi. (Eb. 9:12) Gi gamunihe re ho paha nika gberã te. Boro ho watadu tandu ho rengbe ka diaha berani kusayo te.

16. Wai du ga Yesu motumo aundo rani ani du na ranirii nzunzu?

¹⁶ Pai ho rengbe Bakitingbanga ka mangaha tipa ka ká na agu aboro dunduko saberã yo ka i danga niyangaraha ni papara ga Yekova aborokporo ya te. Yesu aye ku auru kpotosende na ki kpi “bara sa” kindi. Rogo gi gene re, i aima tumo motumo tumorii bara sa kindi. (Eb. 9:24-26) Si nadia gu gbarasarimo kusayo dunduko ani adihe ti Adamu. Mbiko ga Kristo motumo, ani ima bata be gu sunge kanga nga ga gi zegino du kutiibe Satana re, na ani arakanga berewe ni gunde be kpio te.​—Eb. 2:14, 15.

17. Ginipai ga Yekova nyemuse ayugoho foro?

¹⁷ Ga Mbori akidohe dunduko nika daada ti rengo. Kina wai agu andiko nga ga kusikusiahe amanga zanga kpa, Yekova nika manga agu apai amanga dunduko ko na kidopa ha furani. Ko aʹarianga tiko te. (Mara. 3:6) Yekova ima fu bakere ahe furani kisusi gu gamunihe gbua nga ga raka. Ko ima fu gako nyemuse furani. “Ani ini gu ga Mbori nyemuse du ti ko sa rani ki idi pa ha. Mbori nga nyemuse.” (1 Yo. 4:16) Kpotosende dunduko nika da ni bawene paradizo, na agu aboro dunduko du auru kpotosende nika yugo kpia ga Mbori nyemuse. Ani kodinga fugo rani akoda sa na ga Mbori ruru aboro du ngbangbaturũ yo ni ya: “Maku dú fu gaani Mbori, na taarimo, na tatamana, na tambuahe, na irisa, na ome, na tandu, nye anye kindi! Amina.”​—Yugo. 7:12.