Kodatise I Aino Ndikidi Irisombori Ti Ni
“Mi amáa yo kina sa wa akandoro rogo ndugu ra.”—MIKA 2:12.
1. Wai agu ahe Mbori akusihe ayugopa gako tatamana?
BAKE apapara Atambuahe apoi kuari ki yaa: “Ako Yekova, na nge gamo mangaapai! Mo amangi he dunduko na tatamana; kpotosende hi be gamo ũkumuko.” (Tam. 104:24) Ga Mbori tatamana niyuguyuguhe rogo gupai nga, badungu amirioni angua, agbiro, na anyaa naraka mbiko akuraha. Zavura rogo boro yo, badungu akutu ahe duho tona ti gu rukutuhe ki dati gu kikindigihe nga gu namangasunge dunduko sa tipa ka sa boro ní du wenengai.
2. A wa gu sura duti kpewaraga 16 ayugoho, tipagine rengbe ani ka ya ti ni wee, pa gu kodatise nadu dagba agu aKristano nadumbata airiwo airiwo ti aboro?
2 Yekova amangi aboro i naaundo tiyo dagbatiyo tipa ka raka. Aboro na abangerayo nibakiakia, na asinoyo nibakiakia, na kidu na abirĩ-sunge tiyo nibakiakia. Kurigure, ko afu agu asino fu bambata avungurani nga gu du wakina gako tipa si undoyo i naamangapai kina sa na kini undo tiyo dagbatiyo. (Bam. P. 1:27; 2:18) Ono tie, zegino naabaha awere nikparakparaha ti Mbori na avuruhe arengbanga ka mangapai nikodatise nzunzu te. (1 Yo. 5:19) Sidu tie, wa duhe nga gu dungurati nga ga aKristano nadu rogo bambata sa kama agarã adu na akanga rogoho, anaworimo nga ga aGiriki yó, gu wene abawirikipai nangia aYuda, gbiati agu aboro nanaairiso kpiahe mbata, pa gayó kodatise adu nigupai naairiwo airiwo ti aboro.—Amo. 13:1; 17:4; 1 Tesa. 1:9; 1 Tim. 6:1.
3. Wai Ziazia Kekeapai aringbisapa gu kodatise nga ga aKristano, na gini apai ani ka wisigoho rogo gi wirikapai re?
3 Ndikidi irisombori nasa aboro i naamangapai a wa abarapa rani amangapai sa. (Oni gedi 1 AKorindo 12:12, 13.) Bete agu apai ani ka wisigoho rogo gi kekeapai re nga: Wai ndikidi irisombori akpamia aboro? Tipagine rengbe kina Yekova ti ni ka kpamia badungu amirioni aboro dagba arikaaboro dunduko? Gini apai rengbe ka gberesapa kodatise Yekova aundo rani ani dibehe? Nibipa kodatise, wai du gu ndikidi pambori nga ga aKristano kia ti gu kungbo apambori duna rimo aKristano riihe?
Wai Ndikidi Irisombori Akpamia Aboro?
4. Wai ndikidi irisombori akpamia aboro?
4 Agu aboro namanga ndikidi irisombori, i rugutiyo na gupai nga, wa duhe nga Yekova namangi ahe dunduko, ko nga gu Bakere Bakindo duho rogo zegino dũ. (Yugo. 4:11) Wa vura duhe nga ndikidi aKristano naraka rogo arago nibakiakia nga gu duna apai rogoho nibakiakia, i dunduko nandu kuti bangisa andiko nga ga Mbori na kini raki ringbisihe kuti gu bangua arugute nga Ziazia Kekeapai. Ndikidi airisimbori dunduko nayamba Yekova ayamba nzunzu nga “Barani.” (Yes. 64:8; Mt. 6:9) I dunduko nga awirina na i nangba be gu bawene kodatise bake Atambuahe ape paha ki yaa: “Oni ngére, nga gu wenepai na wenerago a ka awirina sungu sa na berã sa!”—Tam. 133:1.
5. Gini sino naye na kodatise ku dagba ndikidi airisimbori?
5 Wa vura du ndikidi aKristano nikpakpa aboro, i nairisombori nikpamiakpamiayo bambiko i ima wirika wai ka kpinyemu akurayó. Yekova nayugopai fuyó i naakpinyemu akurayó wenengai. (Oni gedi 1 Yoane 4:7, 8.) Ziazia Kekeapai nga sangba Yekova nayaa: “Oni úkadi ngbadu inapai, na weneringise, na umbasitise, na zera, na gbanga hipai; nihi pai fu akuaroni, nivu akuaroni, ka pai du bangiri gu boro kuti kura ni; wa Gbia avu roni, kina wo oni ka manga. Ku ri agi apai re dũ oni úkadi nyemuse, nga gu ũvodatise nga ga ziaziapai.” (Koro. 3:12-14) Gi ũvodatise watadu ũkpamiatise nga nyemuse re, si nga gu bangua sino i aino ndikidi aKristano ti ni. Oni nitironi, ya mo oni abingo gupai nga gi kodatise re i aino ndikidi irisombori ti ni te?—Yo. 13:35.
6. Wai pa ga Mbori Kindo aundo rani ani duna kodatise?
6 Ndikidi airisimbori nikpamiakpamiayo a mbiko gupai nga, i namaabangiriyo tipa ga Mbori Kindo nga gu nika ye ka mbakada apai dunduko fu aboro. I ini gupai nga, ga Mbori Kindo ima mbeda ka diaba agu azogarago nga ga aboro na ki fu maku fu aboro giasangbaa, i ki gbia nyenye zereda. (Yes. 11:4-9; Dan. 2:44) Ndikidi aKristano nairisa gu sangba Yesu nga: “Aboro zegino nga yo te, wa kina re adu nga ni boro zegino ya.” (Yo. 17:16) Ndikidi aKristano arimisongo tiyo kurogo gu tagbagaapai nga ga zegino te; si ki tadu were, i kini du na kodatise zavura ho du agu aboro ni i araka dagbayó rogo vura.
I Nagbia Arugute Rogo Bangisa Ba
7, 8. Rogo gini gene agu arugute nga ga Ziazia Kekeapai aundo rani ani duna kodatise?
7 Agu aKristano nadu rogo bambata sa kama agarã aduna kodatise bambiko i aagbia arugute rogo bangisa ba. I aini gupai nga, Yesu aayugopai fuyó na kini rugu dungurati nimangako sunge na riigbu bipasunge, nga gu riigbu nadu na amokedi rogoho gbiati abaakumba Yerusarema yo. Agi akumba re anaamaamburu gayó adiaberã rii Fugo Mbori na i anaakekeda agu ababiapai nanaata ata na gayó arugute kurogo adungurati rogo dungu aringara. Ziazia Kekeapai nafura tipa bete agu ababiapai re kini yaa: “Wa i andu gayo nunguro rogo abaakporo yo, i ki fu agu andika fu akanisa i ka kuti ni, gu amokedi na abaakumba arũ he nadu Yerusarema yo.”—Amo. 15:6, 19-22; 16:4.
8 Wakina gure areme a, Riigbu Bipasunge duna agu abaakumba rogoho duni mbedimbediyo nitoro naundo awirina rogo zegino dunduko i du nikpamiakpamiayo. Riigbu Bipasunge na kusa awaraga rogo dungu afugo nga gu naundo awirina. Gi riahe nga ga toro re, mburuhe rii Fugo Mbori nga Ziazia Kekeapai. Sidu, gupai i ayugoho fu aboro, si aenganga tiyo te ono ti Yekova.—Yes. 54:13.
9. Wai gu sunge Mbori afuhe furani akpamia rani?
9 Agu aKristano nga ababiapai nabanda kodatise abanda a ningbe yó mbatayo rogo sunge tungusapai. Gu toro nga ga kodatise nakpamia agu aboro namanga ga Mbori sunge, si ima duna ome gbe kisusi gu nakpamia gu kungbo aboro dunguratiyo gbua. I amoi gu dungurati nga ga aKristano angianga tipa si naamangasunge gbua wa gu bambaro aboro adunguratiyo kurogoho ya, ono si adu tipa si fu irisa fu Yekova na tipa aboro mangi gako sunge, nga sunge tungusa gu wene pangbanga ga ga Kindo, sunge sa aboro ni abawiriki, na sunge nyakasa aKristano. (Rom. 1:11, 12; 1 Tesa. 5:11; Eb. 10:24, 25) Si nasa gu mokedi nangia Pauro ko ya fu agu aKristano nadu Firipoi yo wee ko naida ka gia gupai tipa yó nga ‘i ru nyanyakii na toro sa, na berã sa, nimongo ru tipa gu idapase du ti wene pangbanga.’—Frp. 1:27.
10. Gini bete agene du ani rogoho nikpamiakpamia rani niga Mbori aboro?
10 Sidu tie, wangia ani ga Yekova aboro, ani nikpamiakpamia rani bambiko ani ima idapa gako pagbia, ani nakpinyemu awirinarani, ani namaabangirani tipa Kindo, na ani nairisa agu aboro Yekova amaa yó i naangbembatayo furani. Yekova naundo rani aundo ani mbu gu kura aberã nga gu ka rengbe arengba ka gberesapa gaani kodatise wa ka si nidu nga ko aundongo rani te.—Rom. 12:2.
Wai ka Mbu Rukö na Kpihe
11. Tipagine rukö akparaka aboro ti ni, na wai Yekova aundo rani ani mbu rukö?
11 Rukö nakparaka aboro. Irarukö nabi tiní nga ní kii pani kisusi kura aboro na ní nagbia ngbarago ho ní adurugo tiní ni. Gipai re ayengo na kodatise te; agu aboro nabi irarukö ní nitambua tiní, ngbaduyó rengbe arengba ka ima kuti ní. Gu bawiriki nangia Yakoba afura ziazia ki yaa: “Ngbatunga gu tambuati re du ni gbegberẽ he dunduko.” (Yak. 4:16) Si angbanga ani naabi kura aboro na payo kusende ti gaani te. Yekova duna wene kpiapai nga ga umbasitise bambiko ko namangapai na ani nga kpakpa aboro niʹumbasitise. Davide ayaa: “Ga [Mbori] undahe asa re ni bakere boro.” (2 Sam. 22:36) Fugo Mbori naundo rani ani mbu rukö; si nayugo wai furani si aida ani naaberã wenengai. Pauro asanahe ki yaa: “Da nasa roni oni du akia? Gini he du be ro Mbori afu nga ha foro ya? Ono si ngia i afu he [afu] foro, tipagine mo asambua he ti ni?”—1 Kor. 4:7.
12, 13. (a) Tipagine duhe ti ni taata furani ani kpi akuarani? (b) Ginipai rengbe ka manga ka ani duna gu bipai nga ga Yekova tipa akuarani?
12 Kpihe nga gu kurahe rengbe ka gberesapa kodatise? Wa i avungu rani nikina kpakpa aboro, ani na gupai rogoraniyo nga ga kpihe, na zavura agu aboro naima ima ni aKristano, i rengbe arengba ka kpi akurayó ti kura aregbo tipa agu ahe du beyo, tipa agu amomu du beyo, watadu tipa agu apai rengbe yó ka mangaha. (Batu. 4:4) Nikpiapai, gu wirina duna dee beko gbiati agude, ko rengbe arengba ka kpi gu wirina namangasunge Kindo ti aregbo dũ, zanga ko ini gupai nga gu wirina re rengbe arengba ka kpiko a tooni mbiko wadu ko na agude beko. Wai rengbe ani ka banda ngbatunga gu kpihe re ka si gberesinga pa kodatise ya?
13 Si naida ani tingidi gupai nga, Ziazia Kekeapai naringbisa mbedimbedi aKristano kuti abarapa boro. (Oni gedi 1 AKorindo 12:14-18.) Ka si vura du nga bangiro aboro abihe gbe angianga bagundaro ya, anga si dunduko duna kina nyanyakipaha te? Teketeke a, Yekova nabi agu aboro du rogo dungurati dunduko na payo kina sa, ka si vura du nga aguyo ho wo rimoyo ti kura aregbo. Sidu, si naida ani duna gu bipai nga ga Yekova tipa awirinarani. Kuba gupai nga ani naakpi akuarani, si naida ani naaberã payo wenengai. Ka ani amangaha wo, ani nika sa gupai nga kparakparapai du dagbarani na agu aboro du rogo agu akanisa du kina rimo aKristano gbua riihe.
Kparakaro Du Rogo Kura Akanisa
14, 15. Wai gu pambori nga ga aKristano nga zirehe akparaka?
14 Agu akanisa du kina rimo aKristano gbua kuriihe, kodatise yo wa gudu dagba ndikidi aKristano te. Bara rogo biama kama agarã, gu pambori nga ga aKristano nga zirehe aima gbandaka rogo arago gbe si ki da ti gupai nga gu bazogo nangia ga Roma ko tona kaa ngerakuriihe, si kini sa gupai berewe nga gi pambori re gbandaka rogo arago. Wa akango akuru riipa kura apai, dungu akindo nakparatihe ti Roma ki tona gaha akanisa nitihe.
15 Badungu agu akindo re asovura kuti akuraha tipa badungu akama agarã. Rogo 17 na 18 kama agarã, agu aboro nadu ringara aNgirisi yo, France yo, na Amerika yo atona ka kiisopa gayó aringara nyanyakii, kiisopa ringara kini da wakina pambori. Rogo 19 na 20 kama agarã, gupai nga ga kiisopa ringara atona ka rimo ku berã dungu aboro yo. Niyangaraha, dungu be akanisa kini tona ka kura nga gu duna rimo aKristano riihe na si nakiiso pa gaha aringara gbe. Avuru kanisa ima ndu tipa avura a ka sovura kuti agu akurayó du rogo kura aringara. Areme, gu pambori duna rimo aKristano riihe, si kparaka mbiko gaha ida na mbiko gaha aringara.
16. Gini ngbatunga apai nakparaka aboro rogo akanisa?
16 Rogo 20 kama agarã, gu badungu abe gu pambori nga ga aKristano atona ka asadatihe tipa ka ye na kodatise. Ono fuo dungu agarã fuo tona gi asadatise re, kina wiri bete be apambori gbua koditihe, na aboro kanisa kindi nikparakakparaka yó riipa agu apai duwa gu yugopai nga ahe akuru nisaha, pa bagude vuse yo, pa koda kumba ba na kurani, naapa maa dee mbatayo rogo akanisa. Rogo kura aringara nga ga aKristano, abarumbatayo nga ga kanisa yó naʹasadatiyo ka kpamia aboro sa niʹaria yo agu ayugopai nakparaka aboro. Ono tie, pa aria yó yugopai nga ga kanisa nasa aboro gayó idapase du nikina rurungburaha gbua na ka aboro adunga nikpamiakpamiayo ya.
Ndikidi Pambori Anyakasanga Pa Ringara Te
17. Wai nebi aya ndikidi irisombori nika kpamia aboro “ti yangara arame”?
17 Wa vura du aboro zegino awere nibakparakakparaka yó, kodatise nga guhe i aino ndikidi airisimbori ti ni. Ga Mbori nebi nangia Mika aima fura tipa gu kodatise re. “Mi amáa yo kina sa wa akandoro rogo ndugu ra.” (Mika 2:12) Mika aima gumbapa wai ndikidi irisombori nikadu nitumbatumbaha kuari ti kura angbatunga iriso, singia iriso kungbo ambori du watadu iriso ringara. Ko ayaa: “Si adú wa gere ti yangara arame ya gu bagangara nga ga ga Yekova bambu i ambákada ha ni bagbanga ha ki susi abaagangara dunduko, si adú ni tumbatumba ha ku ari ki susi agangara dunduko; aboro andú koyo, Bambiko aboro dunduko ata ni ba sa sa na rimo gayo mbori, ono ani atá na rimo Yekova gaani Mbori.”—Mika 4:1, 5.
18. Ndikidi irisombori naundo aboro i mangi gini ariapai?
18 Mika agumbapa wai a ndikidi irisombori nika kpamia agu aboro nadumbata na sogote dagbayó. Ko ayaa: “Dungu arikaaboro ayé, ki ya: ‘Oni yé, ani ndú ku ri ga Yekova bagangara yo, ku rogo ga ga Yakoba Mbori bambu yo; ya ko rugu rani na gako asino ani ki nipeke gako agene.’ . . . I atáka gayo abasape ni marã sopabino, na gayo abaso ni marã kuya ngua; rikaaboro amó nga basape kuti gu rikaaboro te, i awírika nga pa sovura berewe a te.” (Mika 4:2, 3) Gu badungu aboro nambu iriso kungbo ambori watadu iriso aringara kini ye ka iriso Yekova, i nakodatiyo na awirinayo du rogo zegino dũ. Mbori naruga yó ngba agu agene nga ga nyemuse.
19. Pa koda badungu amirioni aboro tiyo rogo ndikidi irisombori nga gopai tipa ginipai?
19 Gu kodatise du dagba ndikidi aKristano areme, si kia na si nayugo gupai ziazia nga, Yekova nangbembatayo kindi fu gako aboro rogo gako toro yo. Aboro dagba arikaaboro dunduko nakodatiyo wai si aamanganga mbata auru kpotosende ya. Gipai re namanga nidigisidigisi sangba gupai du rogo Yugoti 7:9, 14, na si nayugo gupai nga ga Mbori amaraika ima mbeda ka za beyo ti agu “ayuge” nika gbarasa gi gbegberẽ zegino re. (Oni gedi Yugoti 7:1-4, 9, 10, 14.) Ati wene momu du nga ani du nikodikodi rani na awirinarani du rogo zegino dũ? Wai rengbe ani dunduko nibasasa ka fubee tipa kodatise? Gere nga gupai ani ka wisigoho rogo gu kekeapai ngbefuo gere.
[Gu kpiahe du ti kpewaraga 16]
Aboro ngba arikayo dunduko nasatiyo ni aKristano rogo bambata sa kama agarã
[Gu kpiahe du ti kpewaraga 18]
Wai pa koda oni tironi ka dua Bambu Kindo asa gupai nga oni duna kodatise?
[Gu kpiahe du ti kpewaraga 17]
Gaoni Karagapai Nga Gine?
• Wai ndikidi irisombori akpamia aboro?
• Wai rengbe ani ka banda kpihe si andu ka gberesapa gaani kodatise?
• Tipagine aringara akparakanga ndikidi airisimbori ti ni ya?