Gu Kodatise Nga Ga Akristano Nafu Taarimo Fu Mbori
‘Oni ke na ka kuti gu du sa nga ga Toro zikazika.’—EF. 4:3.
1. Wai agu aKristano nadu rogo bambata sa kama agarã Efesa yo afu taarimo fu Mbori?
GU KODATISE nangia ga agu aKristano nadu Efesa yo afu taarimo fu ndikidi Mbori nga Yekova. Rogo gu kumukokumuko gbata re, kura awirina adu nikumukokumuko yó na akanga beyo, aguyo ki duni akanga naadunga na ahe beyo ya. (Ef. 6:5, 9) Agu akurayo angia aYuda nawiriki rengo ti regbo ga Pauro tungusapai bambutiria yo tipa adiwi biata. Na aguyo angia airisi Diana mbata na kini mangi pa soroka. (Amo. 19:8, 19, 26) Nirengo, gu ndikidi pambori nga ga aKristano nadumbata aduna ngbatunga aboro rogoho ngba arikayo. Pauro aini gupai nga Yekova aagbia taarimo agbia be gu kodatise nangia ga aKristano rogo dungurati. Ko akepai ki yaa: “Ko dú taarimo fu ko rogo kanisa.”—Ef. 3:21.
2. Gini apai nambedi ka gbarasa gu kodatise nangia ga agu aKristano nadu Efesa yo?
2 Wa si avura du nga wene kodatise aduadu rogo gu dungurati nadu Efesa yo, apai adu kinaho nambedi ka gbarasa gu kodatise re. Pauro aya fu agu abaakumba nadu yo wee: “Akumba agúari dagba roni tigaoni a, ki nigumba irairaapai, ka gbefa abawiriki fuo yo.” (Amo. 20:30) Na berewe a, kura aKristano adu kinaho kindi nadu na ngbatunga gu toro nga ga kparakaro Pauro ayawee si “namanga pai . . . rogo agu awiri yo nakeretu.”—Ef. 2:2; 4:22.
Gu Waraga Nanyakasipa Kodatise
3, 4. Wai gu waraga Pauro akehe fu aEfeso anyakasipa kodatise?
3 Pauro aima rugatiko na gupai nga, tipa aKristano kodibeyo kini mangipai kina sa, si naida i nibasasa mangi asadatise amanga tipa kadu na kodatise. Ga Mbori toro adu kugii Pauro ko ke waraga fu aEfeso, nga gu pa kodatise adu rogo yo nibanguapai. Nikpiapai, Pauro akepai tipa ga Mbori ringbisapai “ka pora ahe apora sa dunduko kina ku rogo Kristo yo.” (Ef. 1:10) Ko aringbisipa aKristano kuti ambia du nibasasa nga gu i ame bambu nani. “Duadua ha dunduko si kpamia tihe nzunzu kina rogo ko yo, ki nisono sa ziazia yekaru rogo Gbia yo.” (Ef. 2:20, 21) Kurigure, Pauro anyakasipa gu kodatise nadu dagba aYuda na aGendiria nga aguyo nasa tiyo ni aKristano, na ki tingidi yó na gupai nga i dunduko kina Mbori amangi yó. Ko aya tipa Yekova wee ko nga “Ba, nga guko du rimo agu akporo dunduko du ngbangbaturũ yo na auru kpotosende mbiko ko.”—Ef. 3:5, 6, 14, 15, NW.
4 Wa ani ka wisigo kapita 4 nga ga AEfeso, ani nika bi ndu gupai si aida ti ni ani mangi asadatise amanga tipa kadu na kodatise, na wai Yekova aundo rani ani duna kodatise, na ginipai rengbe ka undo rani ani anye kindi nikodikodi rani. Si ngba angba ka oni gedi gu biama kapita nga ga AEfeso dunduko tipa ka gbia undo gbe.
Tipa Kadu na Kodatise Si Naida Kakaka Asadatise
5. Tipagine ga Mbori amaraika narengbe arengba ti ni ka mangasunge fuko na kodatise, na tipagine du kodatise ti ni nikpakarakpakaraha furani?
5 Pauro azungodi agu awirinako nadu Efesa yo i “nike na ka kuti gu du sa nga ga Toro zikazika.” (Ef. 4:3) Tipa ani rugutirani na ndu gupai si aida asadatise ti ni, ani wisigingo gupai du tipa ga Mbori amaraika. Anga rakiraki he ho ue auru kpotosende du kina sa te. Gipai re naundo rani ani ini gupai nga Yekova akusi gako amirioni amaraika nibakiakia angianga kina sa ya. (Dan. 7:10) Wa vura duhe wo, i nakodatiyo akoda ka mangasunge fu Yekova na i dunduko na degatuyo fuko na kini mangi gupai ko akpinyemuhe. (Oni gedi Atambuahe 103:20, 21.) AKristano tigayo wa amaraika te. I nga kpakpa aboro. Si du nasa gupai nga pa kodatise duni kpakarakpakaraha.
6. Gini asino nika undo rani ani koditirani na awirinarani nga aguyo duna agu asino tiyo adunga tirani ya?
6 Ho kpakpa aboro aʹasadatiyo ni kadu na kodatise, si taata i gbiatiyo na akpakarapai. Nikpiapai, ka gu wirina duni bayee ko ninaada kusa ba irisombori yo kodi tiko na gu wirina ninaada bangiri regbo yo ono kini zingi niipo, ginipai ka mangi? Guni rengbe ka bihe nga sino guni re du angbanga ya ono bangiri ní ki go ti gu sino du tiní nga gu angbanga a ya. Wai rengbe agi awirina re ka mangasunge sa? Oni bingo wai gupai Pauro agumbaha berewe narengbe ka undoyo. Fuoho, oni ki berẽkurii wai gupai ko agumbaha narengbe ka sarani ani duna kodatise. Ko akepai ki yaa: “Oni tá ata si ki re are, . . . ni umbasiti na zera, na gbanga hipai, oni hi pai fu akuaroni ni nyemuse; nike na ka kuti gu du sa nga ga Toro zikazika, ni gu ũkpamiatise nga zereda.”—Ef. 4:1-3.
7. Tipagine duhe ti ni ninyanyakipa pai ani mangi asadatise kadu na kodatise na akuarani aKristano nga kpakpa aboro?
7 Pa wirika ani ka mangasunge fu Yekova na akuarani nga kpakpa aboro rogo kodatise yo nga nyanyakipa pai, bambiko gu riko nga ga ndikidi airisimbori nga borose sa. “Borose sa, Toro a sa, a wa du oni sa i ayambu roni a kuti kina gu maabangirise sa nga ga yamba roni. Gbia sa, idapase sa, bapatiza sa, Mbori sa nga Ba aboro dunduko.” (Ef. 4:4-6) I kodipa ga Yekova toro na gako amaku kuti gu bangisa kodatise nga ga wirina nga gu Yekova amangasunge nani. Ka si vura du nga boro rogo dungurati imisi ngbadurani, gini kura ba rengbe ani ka ndu kurogoho? Kura ba ho berewe rengbe ani ka ndu ku rogoho ki gi pa nyenye unga te.—Yo. 6:68.
Agu ‘Agamahe’ Nga Abaakumba
8. Ada Kristo amangasunge naayó tipa ka nyakasa rani ka ani dunga na kparakaro ya?
8 Pauro amangisunge na gupai abanzengere anaamangaha mbata tipa ka yugo wai Yesu nafu abaakumba ‘nigamahe’ tipa i naaundo aboro rogo dungurati i duna kodatise. Gu banzengere duna diabese aniyego na zizi boro ku kpuni yo tipa ní naaundo diani ti sunge. (Tam. 68:1, 12, 18) Wakina gure a, pa dia Yesu be zegino aye na dungu akanga fuko. (Oni gedi AEfeso 4:7, 8.) Wai du Yesu amangasunge na gu zizi aboro re? “Ko afu agu yo i du ni amokedi; agu yo ni anebi; agu yo ni abatungusipai; na agu yo ni amoyambu na abayugupai; sa du ga Mbori aboro nzunzu, sa gu sunge nga mangaapai, sa sonosa boro Kristo; dati kina da ani ti gu du sa nga ga idapase.”—Ef. 4:11-13.
9. (a) Wai agu ‘agamahe’ nga abaakumba aundo rani ani duna kodatise? (b) Tipagine si aida gupai ti ni nga agu aboro dunduko du rogo dungurati mangipai tipa ka sa kodatise si du rogo dungurati?
9 Agi abaakumba re namangasunge ninyemuse ka undo rani ani banda gaani kodatise. Nikpiapai, ka bakumba bi gupai nga awirina ue ‘nazingisa tiyo dagbayó,’ ko rengbe arengba ka undoyo i du na kodatise nifuko rugute fuyó “ni zera.” (Gara. 5:26–6:1) Abaakumba naundo rani ani duna nyanyaki idapase nga gu du mburuhe rii agu ayugopai nga ga Ziazia Kekeapai. I nasa dungurati si du na kodatise rogoho na kini nyaki rogo toro yo. Pauro ayawee gipai re wo tipa ‘ka ani dunga berewe ni agude, niwo ku bani niya niyuge yugopai dunduko, be ga aboro biriki, ni nangahe, ku sangba birĩingapai yo ya.’ (Ef. 4:13, 14) AKristano dunduko nibasasa si aida i mangipai tipa ka sa dungurati si du na kodatise, a wa abarapa boro dunduko nibasasa naamangasunge tipa ka sa kpotoboro si du wenengai.—Oni gedi AEfeso 4:15, 16.
Oni Aria Berãroni
10. Wai rengbe pa wasiro ka kparaka aboro?
10 Ya mo oni bi gupai nga gu biama kapita nga ga gu waraga Pauro akehe fu aEfeso, si nayugo gupai nga yugo nyemuse rengbe ka sa gupai nga aKristano duna kodatise dagbayó? Fuo gure, si nayugo gu mangaapai nga ga nyemuse. Si nayugo gupai nga, nyemuse asanga boro ní nimangi meteka watadu pa wasiro te. Pauro arugu awirinako ki yawee ka i ‘tanga berewe wa aGendiria nata ya.’ Agu aboro re ‘afu tiyo fu wasiro.’ (Ef. 4:17-19) Gi gbegberẽ zegino ani araka rogoho re rengbe arengba ka gberesapa gaani kodatise. Aboro naba wia tipa meteka, ki ni bi abia tipaha, kini bihe nibangirise tipa ngbarago, na kini mangihe singia nigbuko watadu gbaiga. Zavura gupai nga kaa manga agu apai rengbe ka ba nyemuro ti gu boro oni ambakadanga pa rogatise na ní ya, si rengbe arengba ka zumo boro kusayo ti Yekova na ti dungurati. Gumba ani he wo mbiko gupai nga, gu mangaapai re rengbe ka sa boro nikina ipo ní mangi meteka. Gu boro naima manga rogatise namanga gupai re rengbe ka manga bäri si ki ye na gupai nga ní kparaka na gani badiarogatise gbiati awirini. Gbegberẽpai du nga gipai re! Si du Pauro aya ti ni wee: “Oni awirika nga Kristo wo te”!—Ef. 4:20, 21.
11. Gini ariapai Ziazia Kekeapai aya fu aKristano i mangihe?
11 Pauro anyakasi gupai nga ani mbu agu aberã rengbe ka gberesa rani, ki aria berãrani kuti agu apai rengbe ka sa rani ani duna kodatise na akuarani. Ko ayaa: “Oni moi gu kuru boro ku sa yo, nazirã ku sangba gu nyemuahe yo nga nangahe. Oni dú ni vovo roni rogo gu toro yo nga ga gaoni berã, ki ukadi gu vovo boro, fu yo ni ku sangba Mbori yo na rurupai na ziaziapai nga ga rengo.” (Ef. 4:22-24) Wai rengbe ani kadu ‘nivovo rani rogo gu toro yo nga ga gaani berã’? Ka ani aberãkurii agu apai ani awirikaha rogo Fugo Mbori na be gu wene kpiapai nga ga kura aKristano, na ani kidu na tambuahe tipaha, ani rengbe arengba kadu nivovo rani “ku sangba Mbori yo.”
Oni Aria Gaoni Gene Afugo
12. Wai gumba rengo aye na kodatise, na tipagine duhe ti ni nimbumbupai fu kura aboro i naagumba rengo?
12 Si ninyanyakipa apai boro naagumba rengo fu agu aboro ní asungo naayó watadu rogo dungurati. Gu fugo i agumbaha ziazia, si nakpamia aboro sa. (Yo. 15:15) Ono na ka boro gumba ziree fu wirinani? Ka gu wirinani re inihe, si ka sa gupai nga ka ní naakidongo kuti ní gbe ya. Si nga gupai Pauro aya ti ni wee: “Wa du oni dunduko oni gúmba rengo fu akuaroni, nimbu zire; bambiko ani nga apa akuarani.” (Ef. 4:25) Gu boro ziree aima nzira ngbani isoke mbu ní kindi tooni, si rengbe kadu funi nimbumbupai ní tona gumba rengo. Ono ka ní aida ka sa sinoni, rago ngba angba ti Yekova na ní, na ko undo ní aundo ní saha.
13. Ginipai pa mbu boro gbegberẽ afugo akodaha?
13 Yekova nayugopai furani ani banda irisa gbiati kodatise rogo dungurati na rogo gaani akporo niruga ani mirãrani. Pauro ayaa: “Ka gbegberẽpai kúru nga ngbaroni yo wa sa ya. . . . Iimi fugo dunduko, na zinga, na erã, na paa, gbegberẽ fugo, oni bá ha ku sa yo ti roni na sogote dunduko.” (Ef. 4:29, 31) Ka ani duna irisa tipa akuarani, si rengbe ka sa gupai nga ani naaruga mirãrani ho ani afura ni fuyó. Nikpiapai, gu kumba nafura arakaya fu diako, si naida ko aria gu bipai du ko nani tipa ri, gbe wa ko aino wai Yekova afu irisa fu adee. Mbori nambeda adee ambeda a niziazia toro tipa i ga ku ngbangbaturũ yo ni anakindo na Kristo. (Gara. 3:28; 1 Pet. 3:7) Gu dee a nasumbo kurii kumbaari, si naida ri aria gari berã wa ri awirikapai tipa wai Yesu anaavo mirãko ho aboro aake ni naako.—1 Pet. 2:21-23.
14. Gini gbegberẽpai rengbe zinga ka ye nani?
14 Gu kurapai berewe mbedi ambeda na gbegberẽ afugo nga, zanga zatise ti zinga. Gipai re rengbe arengba ka kparaka aboro a. Zinga wakina we. Si rengbe ka rera ki zokodi arago gbegberẽe. (Snz. 29:22) Gu boro ruhe aru funi ní yugupa gu rago gberẽ tiní, si naida ní zatini aza ti zinga ní andu ka gberesa pagume. Si naida aKristano nimbupai ambu fu akurayó, zanga zio pai ku ngbaduyó yo watadu kaa fura berewe tipa gupai namangi. (Tam. 37:8; 103:8, 9; Snz. 17:9) Pauro arugu aEfeso ki yaa: “Oni zingi, ka oni ingi nga ya; ka uru ti nga gaoni zinga ya. Ka oni mbákadi nga gene fu bakitingbanga ya.” (Ef. 4:26, 27) Ka boro azanga tiní ti zinga ya, si rengbe arengba ka fu momu fu Bakitingbanga ko rũ tunga kparakaro na ki tudi apai rogo dungurati.
15. Ginipai rengbe ka manga ka ani di guhe angianga gaani ya?
15 Padu ani na irisa tipa agu ahe nga ga akuarani nasa gupai asa nga kodatise du rogo dungurati. Pauro ayaa: “Gu ni nanidĩ he ka ni dĩ nga he berewe ya.” (Ef. 4:28) Ga Yekova aboro naa kido kuti akurayo. Ka Kristano di guhe angianga gani ya, ní rengbe arengba ka gberesapa gu kodatise du dagba awirina.
Nyemu Mbori Nakpamia Rani
16. Wai rengbe ani ka gumba wene afugo tipa ka nyakasa gaani kodatise?
16 Gupai nasa aKristano i duna kodatise dagbayó nga, nyemu Mbori du nafõngbaduyo yo i nimangi akurayó ninyemuse. Padu ani na tambuahe tipa ga Yekova weneringise nasa rani ani mangi asadatise ka manga sangba gu rugute nayaa: “[Oni gumba] ngbatunga gu pai ngba angba sa nyakasa ho zingoho nidu ni, si fu undahe fu agu yo nagia ha. Ringironi ngbá angba fu akuaroni, yee kpotoroni yo, oni nivú akuaroni avu, a wa Mbori avu roni rogo Kristo yo a.” (Ef. 4:29, 32) Yekova nambupai ambu fu kpakpa aboro nga ani. Wa duhe tie were, ya mo si aidanga ani naambupai ambu fu akuarani ho ani abi gayó zangarengba ni te?
17. Tipagine si aida ani asaditirani ti ni ka nye nikpamiakpamia rani?
17 Gu kodatise nga ga ga Mbori aboro nafu taarimo afu fuko. Gako toro namangasunge rogoraniyo ngba dungu agene tipa ka sa rani ani nye nikpamiakpamia rani. Ani naida kaa mangapai sa na gu toro re. Pauro akepai ki yaa: “Ka oni rúngosi nga ga Mbori Ziazia Toro ya.” (Ef. 4:30) Kodatise nga gu nyanyakipahe si aida ani bandaha abanda. Si naye na ngbarago fu agu aboro dunduko du rogoho na kini fu taarimo fu Yekova. ‘Sidu tie, oni wíriki Mbori, wadu oni ni awiri manguse. Oni ki nita rogo nyemuse yo.’—Ef. 5:1, 2.
[Gu kpiahe du ti kpewaraga 20]
Aboro ngba arikayo nikpamiakpamiayo
[Gu kpiahe du ti kpewaraga 23]
Ginipai gberẽ ti ba nyemuro ti boro?
[Gu kpiahe du ti kpewaraga 22]
Gaoni Karagapai Nga Gine?
• Gini aberã rengbe ka banda kodatise rogo dungurati?
• Wai rengbe gaani mangaapai ka banda kodatise rogo dungurati?
• Wai rengbe gaani afugo ka undo rani ani naamangapai sa na akuarani?