5 Kparakpee Gini Ba Si Aida Ani Mangihe Rogoho, na ti Gini Regbo?
ANI naberãha nga oni aima bi gupai nga dungu apambori nanyakasa gupai nga si naida abambu kparakpee duadu nibawenehe kisusi na aregbo kidu kinaho si aida aboro naakpara ti ni. Ya mo Ziazia Kekeapai nape gupai nga si naida ba duadu nga gu aboro nikaa kpara rogo yo ti ringbisiringbisi aregbo?
Ziazia Kekeapai nape pa kura aregbo ape si aida boro kpari ti ni. Nikpiapai, mbata fu Yesu ri riahe na gako abawiriki, ko atambua Mbori rogo kpee yo. (Ruka 22:17) Na ho gako abawiriki adunguratiyo ni tipa irisombori, i akpari akpara. Sidu, i anaakparakpee kindi a wa si anidu rogo abambutiria na yekaru yo Yerusarema yo. Ga Mbori mbakadapai adu nga, yekaru ngia “bambu kparakpe tipa rikaaboro dunduko.”—Mk. 11:17.
Ho ga Mbori amoyambu adunguratiyo ni ka kparakpee na akurayó, gayó kpee rengbe arengba kadu na sangbanaha ti ni. Ka badona aboro duna berã sa ho i amanga kparakpee ni kubayo ringbisihe kuti gu bangua arugute nga ga Ziazia Kekeapai, Mbori naduadu na ngbarago. Gu kparakpee re rengbe ka sa Mbori ko mangi gupai ka ko naamanganga ha ya. (AEbere 13:18, 19) ADezire Yekova naakparakpee dedede ti aregbo gayó adunguratise. I nayamba roni na ngbarago tipa oni ye ku Bambu Kindo yo nga gu kadu mbembedii na oni tipa ka gia ngbatunga gu kpee re nitironi.
Ono tie, Ziazia Kekeapai apenga pa gu regbo si aida aboro kpari ti ni na gu ba si aida i kpari rogoho te. Ani nageda gupai rogo Ziazia Kekeapai yo tipa ga Mbori amoyambu nga, i anaakparakpee ti ai regbo na rogo ai ba. Yesu ayaa: “Ho mo ka kpara ni, mo rimi ku dimo yo, fuo kisa mo ngbadimo, mo ki kpari fu gu Bamo du rogo gbuko yo, gu Bamo nabi pai rogo gbuko ko nikafu mosoro foro.”—Matayo 6:6.
Ya mo bawene yambahe ngaha te? Oni rengbe arengba ka fura na gu Bakerepa Bakindo nga ga haurago ko ti ai regbo, singia ho du oni ni nisaroni, na kidu naa kido nga ko nika gia gaoni kpee agia. Yesu aima ino gipai re, si du ko anaagbata gene ti ni ti kura aregbo ka kparakpee nisako! Ti kura regbo sa, Yesu akpari fu Mbori yuru sasasa, tipa ko undoko ko mangi nyanyakipa diaberã.—Ruka 6:12, 13.
I akepa kura akumba na adee rogo Ziazia Kekeapai nga aguyo nakpari ho i aida ka manga nyanyaki diaberã ni watadu ho i agbiatiyo ni na akpakarapai. Ti kura aregbo, i akparikpee na fugoyo kuari, kura regbo i ki kpari kukiri, na ho i aduni nibadona, na ho i aniduni nibasasa. Gupai nyakipaha gbe nga i akparikpee. Mbori nagumba gupai fu gako amoyambu nga: “Ka oni pirigi nga ti kpara kpe ya.” (1 ATesaroniko 5:17) Ko na kakaka nyemu degatuko fu agu aboro namanga gupai ko akpinyemuhe. Ya mo anga gure nga gu bawene yambahe nga ga nyemuse be Mbori te?
Rengo ngaha nga, gi zegino re aboro rogoho nakpi kina nyemu tiyo, badunguyo nabaka kina bangiriyo singia kparakpee na nyanyakipaha ke. Oni rengbe ka sana tironi nga, ‘Ya mo kparakpee rengbe ka undo re?’
[Gu kpiahe du ti kpewaraga 9]
Ani rengbe ka kpara ti ai regbo na rogo ai ba