Ya Mo Oni Nasoga Irairapai?

‘Mo [Yesu], asogo irairapai.’​—EB. 1:9.

1. Ginipai Yesu ayuguhe nibipa nyemuse?

YESU KRISTO anyakasipa wai nyakipa nyemuse fu gako abawiriki ki yaa: “Vovo rugute fu mi fu roni nga, oni kpi nyemu akuaroni akpi; a wa mi akpi nyemu roni, oni kpi nyemu akuaroni a wo. Ka oni akpi nyemu akuaroni, si ka aboro ini ti ni dunduko ya gimi abawiriki nga oni.” (Yo. 13:34, 35) Yesu arugu apefuoko i yugu gu nyemuse fu akurayó nasa boro ní mbupa kura gani apai ambu ka yugo nyemuse fu kurani. Ngbatunga gu nyemuse re du i aino yó ti ni. Yesu angarasiyo berewe a nga: “Oni kpí nyemu avuraroni, ki kpari tipa aguyo narungosi roni.”​—Mt. 5:44.

2. Ginipai si aida apefuo Kristo sogoho?

² Kupati gupai nga Yesu ayugupai tipa nyemuse fu gako abawiriki, ko aruguyo a tipa gupai si aida i sogoho. Gu fugo nga: “Mo akpi nyemu rurupai, ki nisogo irairapai, [gbegberẽpai],” i apehe tipa Yesu. (Eb. 1:9; Tam. 45:7) Gipai re nayugo gupai furani nga, si naida ani sonosi nyemu rurupai ki sogo ingapai, watadu irairapai. Si ninyanyakipa pai ani ini gupai nga, gu mokedi nangia Yoane akepai ki yaa: “Gu ni ka inga pai, ni nati ndika a, ingapai nga tindika.”​—1 Yo. 3:4.

3. Nibipa soga irairapai, gini agene rogo raka yo ani ka wisigopai tipaha rogo gi kekepai re?

³ Wangia ani aKristano tie, si naida ani sana tirani nga, ‘Ya mo mi naasoga irairapai?’ Ani wisigingo wai rengbe ani ka yugo gupai nga, ani nasoga gbegberẽpai rogo gaani raka ngba agi agene du biama re nga: (1) gaani berãpai nibipa bakere mbirabuda, (2) gaani bipai tipa sangbaatoro, (3) gaani mangapai nibipa wasiro, na (4) gaani bipai tipa agu aboro nakpinyemu irairapai.

Ka Oni Dunga Nikanga fu Buda Ya

4. Tipagine Yesu anaafura ti ni zukazuka zanga gunde ho ko azahe ni ti bakere mbirabuda?

⁴ Aregbo kinaho Yesu animbiri bete imekakue ambira mbiko ko aini ya si nga gamunihe be Mbori. (Tam. 104:14, 15) Ono tie, ko aamanganga sunge na gi gamahe re ngba gbegberẽ gene nimbirako buda nibakerehe te. (Snz. 23:29-33) Ho Yesu anaafu rugute ni tipa gi mangaapai re, ko anaafura zukazuka zanga gunde. (Oni gedi Ruka 21:34.) Gbegberẽ mbirabuda ima rengba ka sa gupai nga boro mangi kere ingaapai. Sidu, gu mokedi nangia Pauro akepai ki yaa: “Ka oni kpí nga imekakue ya, si du bau rogo, ono oni hí be kina Toro.” (Ef. 5:18) Ko azungodi sosono adee a rogo dungurati ka i funga tiyo sa “bakere buda ya.”​—Tito 2:3.

5. Gini asanahe si aida agu aboro idi ka mbirabuda sana tiyo nani?

⁵ Ka si du nga oni idi ka mbirabuda, si naida oni sana tironi nga: ‘Ya mo mi na gu bipai nga ga Yesu tipa bakere mbirabuda? Ka si du nga mi naida ka ruga kura aboro, ya mo mi aduna ranirii ka zayo ti bakere mbirabuda? Ya mo mi naambira buda si di agu abakabangirise du mi nani watadu si do gberarago tire kusayo? Bakio buda wai mi naambiraha rogo poso sa? Gi mangapai nidu nga gine ho boro naasosoda re ni mi mbiri buda nibakerehe? Ya mo mi naatikango ho boro niya ni mi nambira buda nikerehe watadu rago ni gberẽ tire?’ Ka ani fu tirani nikanga fu bakere mbirabuda, si ima rengba ka gberesa berãrani na si ki sa gupai nga ka ani mangingo wene diaberã a ya. Apefuo Kristo namanga nyanyaki asadatise ka banda gayó tandu berãpai.​—Snz. 3:21, 22.

Oni Mbu Pa Sangbaatoro

6, 7. (a) Wai Yesu amangi Satana gbiati gako adaimona? (b) Tipagine gu mangapai nga ga sangbaatoro namoipai ti ni areme?

⁶ Ho Yesu aduni auru kpotosende, ko aima ká fu Satana na gako adaimona. Ko aima diabe Satana ho ko aʹasadiko ni. (Ruka 4:1-13) Yesu asovura a kuti agu aʹasada Satana aye nani rogo gbuko yo tipa si gberesi berãko na gako mangaapai. (Mt. 16:21-23) Yesu aundo agu aboro duna wene ngbaduyó yo tipa ka i zingo ti ga adaimona gbina ya.​—Mk. 5:2, 8, 12-15; 9:20, 25-27.

⁷ Tingbafuo i moi Yesu ni Bakindo rogo 1914, ko agirisi ngbangbaturũ be gu gbegberẽ mangaapai nga ga Satana na gako adaimona. Nisangbana gipai re, Satana namanga asadatise awere susi gu nidumbata tipa ka ‘nanga aboro kpotosende no dunduko.’ (Yugo. 12:9, 10) Si airiwongo tirani ka bi gupai nga sangbaatoro namaapai na kini sono kina kumbatayo te. Ginipai rengbe ani ka mangaha tipa ka bandatirani?

8. Gini wisigotise si aida ani mangihe wa du ani nibasasa nibipa sia aũngbarago?

⁸ Ziazia Kekeapai nagumbapa gu kerepai duti sangbaatoro. (Oni gedi Pa Fu Rugute ni Ue he 18:10-12.) Satana na adaimona naingisa berã aboro rogo agu asinima, abuku, na agu ambaro nakoda gu mangapai nga ga sangbaatoro. Sidu tie, ho ani aida ka sia aũngbarago ni, si naida ani sana tirani wa du ani nibasasa nga: ‘Ya mo agu adiwi susi kusayo, mi asia ka biko agu avidio na gu ringbisapai nga ga terevizioni, ambaro, watadu ka geda agu abuku duna gu mangaapai rogoho duwa ga sangbaatoro? Ya mo mi rugutire na ndu gupai duhe ti ni ninyanyakipa pai ka ká gu mangapai nga ga sangbaatoro, watadu mi nabihe gbua taata? Ya mo mi amakianga pa wai Yekova abi agu aũngbarago mi aidaha? Ka si du nga mi ima mbugene fu gi ga Satana mangapai re, ya mo gimi nyemuse tipa Yekova na gako rurupai asa re mi sogoho?’​—Amo. 19:19, 20.

Oni Irisi ga Yesu Zahe ti Wasiwasi Mangaapai

9. Wai rengbe boro ka sonosa nyemu irairapai?

⁹ Yesu aima irisa ga Yekova rugute nibipa kodaba. Ko ayaa: “Oni ageda nga ha te? ya gu ko namangi yo ho rago aenge ni ko amangi yo ni kumba na de, ki ya, ‘Bambiko si du boro nihe bani ti ni na nani, ki ka kuti diani; i ue i ki du wa boro sa’? Si du i nadu nga ti ni ue berewe ya, i ki du adu sa. Were gu Mbori akpamia re ka boro kpara nga ha ya.” (Mt. 19:4-6) Yesu aima ino nga gupai ani anganaha nibangirani, si ima rengba kadu na ome kurirani. Ko aya rogo gu gako tungusapai nadu rii bagangara yo wee: “Oni agi he wa i agumba ha, ‘Ka mo mángi nga bari ya.’ Ono ya mi fu roni wẽ gu ni nangana de ni nyemu ri ni ima manga bari na ri kpotoni yo.” (Mt. 5:27, 28) Agu aboro nzunzu amanganga sunge na gi ga Yesu zahe re ya, i nasonosa nyemu irairapai.

10. Oni gumbanga gupai namangi nayugoho nga ai boro rengbe arengba ka mbu bi agu ahe nazingisa nyemu kodaba.

¹⁰ Satana nasonosa nyemu wasiwasi kodaba rogo aboro yo vurube biko agu ahe nazingisa nyemu kodaba ti aboro. Gi zegino ani araka rogoho re ima hi behe. Si nimbumbuhe fu agu aboro nabiko agu ahe re ka dia pa agu apai i abihe re berãyo yo kusayo. Biko agu ahe re rengbe arengba ka ziobaha tiyó. Ani bingo gupai namangi Kristano sa. Ko nayaa: “Mi anaabi agu ahe nazingisa nyemu kodaba nigbuko. Mi abi tire nga mi naraka rogo gu zegino du kia ti gu ba mi airiso Yekova rogoho. Mi aini gupai nga gi mangapai re nigbegberẽhe, ono mi aberẽ gupai nga gi irisombori kindi nikina wenehe.” Gine naʹaria ga gi wirina re berã? Sangbako nga: “Wa si avura du nga gipai re aima nyaka fere mi gumbaha fu abaakumba, mi adiberã adia ka gumbaha fuyó.” Niyangaraha tie, gi wirina re ambu gi mangapai re. Fugoko berewe nga: “Fuo giriso mi gi raka be ingapai, mi abi tire nga mi ima du nirengo na wene sangbakpotoseyo.” Agu aboro nasoga irairapai, si naida i wiriki soga agu ahe nazingisa nyemu kodaba.

11, 12. Wai rengbe ani ka yugo gupai nga ani nasoga irairapai ho ani asia abia ni tipa giaha?

¹¹ Manzigo na agu afugo du rogo yo rengbe arengba kadu na bakere ome kurii gaani sino mangapai gbiati ngbaduraniyo a. Manzigo nitihe nga gamunihe be Mbori, na i aima digo nimangisunge nani rogo ndikidi irisombori yo. (Gate 15:20, 21; Ef. 5:19) Ono gi ga Satana gbegberẽ zegino re nakusa agu manzigo nataasapa wasiwasi mangapai. (1 Yo. 5:19) Wai rengbe oni ka ino singia gu manzigo oni agiaha si na agu afugo rogo yo du nigbegberẽhe watadu si niwenehe.

¹² Oni rengbe ka tonaha nisana oni tironi nga: ‘Ya mo agu abia mi agiaha nataasapa imoboro, bäri, meteka, na sengahe? Ka si du nga mi nika geda fugo agu abia re fu kura boro, ya mo si aye na gupai ku berãniyo nga mi nasoga irairapai watadu si nika yugo gupai nga ngbadureyo nigbegberẽhe?’ Ani arengbanga ka manga tirani nga ani nasoga irairapai baraho ani agia agu abia agia ni nataasapa irairapai te. Yesu ayaa: “Agu ahe nakura ngba yo, si naenga kpoto yo; ki nibirikosi boro. Bambiko kpoto yo gbegberẽ aberã niye ni, nga pa imoboro, na pa bari, na meteka, na dĩ, na gumba zire, na sengahe.”​—Mt. 15:18, 19; oni ringbisinga ha na Yakoba 3:10, 11.

Oni Duna ga Yesu Bipai Tipa agu Aboro Nakpinyemu Irairapai

13. Wai Yesu anaabi agu aboro nanaamanga kere ingapai?

¹³ Yesu aya ko aye tipa aboro-ingapai watadu iraira aboro i sa gayó berã. (Ruka 5:30-32) Ono wai tie Yesu anaabi agu aboro nanaamanga kere ingapai? Yesu afu nyanyaki zahe ti kodatise na ngbatunga agu aboro re. (Mt. 23:15, 23-26) Ko aya ziazia berewe wee: “Agu yo naya ti re, ‘Gbia, Gbia,’ i aríma nga ku rogo gu ngbi nga ga ngbangbaturũ dunduko te; kina gu ni namanga wa Buba akpi nyemu he du ngbangbaturũ yo. Dungu aboro nikaya fere ni gu rago re [ho Mbori nikaa sapangbanga ni] wẽ, Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?” Ono ko aka agu aboro aka aidanga ka sa gayó berã ya namanga kina irairapai niyako fuyó wee: “Oni gúari pati re, amangi irairapai.” (Mt. 7:21-23) Tipagine i nika sapangbanga agu aboro re ti ni wa gure? Si nika duwo mbiko i airisanga Mbori te, na i naimisa kura aboro na gayó iraira mangapai.

14. Tipagine i naakusa boro-ingapai ti ni kusayo rogo dungurati?

¹⁴ Fugo Mbori nazinahe nga, gu boro-ingapai asanga gani berã ya, i kusi ní kusayo rogo dungurati. (Oni gedi 1 AKorindo 5:9-13.) I nakusa ní kusayo rogo dungurati gbe tipa nduapai biata: (1) ka banda rimo Yekova be gberesaha, (2) ka banda dungurati nigigirihe, na (3) ka undo gu boro-ingapai re ní sa gani berã.

15. Ka ani aida ka nye niruru rani fu Yekova, gini nyanyakipa asanahe si aida ani sana tirani nani?

¹⁵ Ya mo ani nabi agu aboro futiyo sa gbegberẽ mangapai wa gu Yesu anaabi yó? Si naida ani berẽkurii agi asanahe re: ‘Ya mo mi naaida ka koda tire na gu boro i aima kusa ní kusayo rogo dungurati watadu gu boro mbu dungurati nitini? Na ka singia kina boro mbedimbedi gumere du ani arakanga na ní kporo sa ya?’ Si rengbe arengba kadu nindikidi asada kuti gaani nyemu manga rurupai na padu ani niruru rani fu Mbori.

16, 17. Gini kpakarapai Kristano ninagude agbia tiri nani, na gine naundo ri ri mangipai ringbisihe kuti gu mbakadapai du tipa gu boro-ingapai kusiyo ni kusayo?

¹⁶ Ani bingo gupai namangi wirinarani nga gu ri ngangara wiiri sa aduadu na nyemuse tipa Yekova mbata. Kusa, ko atona ka manga irairapai zanga ko sa berãko. Sidu, i ki kusiko kusayo rogo dungurati. Nako aima kpinyemu Yekova gbe na ki ima kpinyemu wiiri a gbe, si adu furi nimbumbuhe ka mangasunge na gu zahe nga ga Ziazia Kekeapai nibipa zanga kodatise na gu boro kusiyo ní kusayo rogo dungurati.

¹⁷ Gini rugute ka oni afuhe fu gu wirinarani re? Bakumba sa aundo ri ri ini gupai nga Yekova ima rugatiko na wai gupai re afuda ri. Ko apepa wai furi rago agberẽ ti Yekova ho kura awiriko nga amaraika asamungu ni kutiko. Gu bakumba re aya furi wee, wa vura duhe nga Yekova ima ino wai rengbe igira gupai re kadu, gupai ko akpinyemuhe nga i kusi gu boro-ingapai aidanga ka saberã ní ya. Ri adi agi atingidapai re kugume na kini mangipai ringbisihe kuti gu mbakadapai du tipa gu boro kusiyo ní kusayo.a Ngbatunga gu ruru mangapai re nafu ngbarago ku kpoto Yekova yo.​—Snz. 27:11.

18, 19. (a) Pa zanga koda ani tirani na amangi irairapai nayugo gupai nga ani nasoga ginipai? (b) Ginipai rengbe ka manga ka ani nye niruru rani fu Mbori na kini ndu kuti gako mbakadapai?

¹⁸ Ka si du nga oni naagbia tironi na ngbatungapai wakina gure, oni tingidi gupai nga nunga roni namanga Yekova amanga. Pa zanga koda oni tironi na gu boro i nakusi ní rogo dungurati watadu gu boro mbu gu dunguratise nga ga aKristano nika yugo gupai nga, oni ima soga gani gbegberẽ mangapai. Ono tie, oni nayugo gupai a berewe nga, oni nakpinyemu gu boro-ingapai re mangi gupai ngbaangba. Pa ka oni kuti gaoni ruru mangapai fu Yekova rengbe arengba ka ruga ní ní sa berãni ki karaga tiní fuo Yekova.

¹⁹ Boro sa i akusi ní rogo dungurati ní ki karaga tiní berewe akepai ki yaa: “Mi na ngbarago nga Yekova nakpinyemu gako aboro kisusi na ko naida ka banda gako riigbu si nye nigigirihe. Wa vura duhe nga agu aboro angianga aDezire Yekova ya nabihe nga kusa boro kusayo rogo dungurati arunga te, si nga gupai ngbaangba.” Ya mo oni naberã gupai nga ka agu aboro du rogo dungurati na gani aborokporo aundongo ní aundo nizanga yó kodatise na ní ho i akusi ní ni ya, ka ní agumba gupai du kuari re? Pa songoda ani gu ringbisapai nga ga Ziazia Kekeapai nga gudu tipa gu boro kusiyo ní nayugo gupai nga ani nakpinyemu rurupai na ani ima ino nga kina Yekova sa duna rengo beko ka sia agu apai furani du niwenehe na gudu nigbegberẽhe.

‘Oni Sogo Gbigbitapai’

20, 21. Tipagine duhe ti ni ninyanyakipa pai ka wirika soga irairapai?

²⁰ Gu mokedi nangia Petero afu rugute ki yaa: “Oni dú na rugatise ki ningere.” Tipagine? Bambiko “wa bahu nata ki nipoi, nigbata boro ka rita ni, kina wo vuraroni nga bakitingbanga nata.” (1 Pet. 5:8) Ya mo gu boro re nikangia mo? Si naru gbe riipa wai mo awirika soga irairapai.

²¹ Anga taatapai ngaha ka wirika soga gupai du nigbegberẽ te. I avungurani na kina ingapai na ani naraka rogo gu zegino nangarasa rani ani nimangi kina agu apai borose akpinyemuhe. (1 Yo. 2:15-17) Ono tie, ka ani awirika Yesu kristo na kini sonosi dudunguro nyemuse tipa Yekova Mbori, ani rengbe arengba ka soga irairapai. Ani dinga berã adia ka ‘soga gbigbitapai,’ kidu naa kido nga Yekova “nabanda . . . gako ziazia aboro; ko ninabatasa yo be gbegberẽ aboro.”​—Tam. 97:10.

[Gu rukutu kekeapai du bandu kpewaraga yo]

Gaoni Karagapai Nga Gine?

• Ginipai rengbe ka undo rani ani wisigi gaani bipai nibipa mbirabuda?

• Gini apai rengbe ani ka mangaha ka banda tirani be sangbaatoro?

• Tipagine gberẽ biko agu ahe nazingisa nyemu kodaba ti ni?

• Wai ani ayugoho nga ani nasoga irairapai ho i nakusi gu boro ni kusa yo rogo dungurati ani akpinyemuni?

[Gu sura du ti kpewaraga 29]

Ka si du nga oni idi ka mbirabuda, ginipai si aida oni berẽkuriihe?

[Gu sura du ti kpewaraga 30]

Oni duna rugatise nibipa agu aũngbarago oni asiaha

[Gu sura du ti kpewaraga 31]

Biko agu ahe nazingisa nyemu kodaba nasonosa nyemu ginipai?