Gu Vovo Ngbaõbambu Sinziri Rogo Pa-Ngirisi Duni Aakpuraha
Ani na bakere ngbarago ka gumba gupai furoni nga ani nika asadapai tipa garã sa kaa kusa gu kura Ngbaõbambu Sinziri rogo pa-Ngirisi nga gu duni aakpuraha rogo adiwi dunduko tona ti gu nga ga Bamburu. Si nikadu na gu kekeapai rogoho du tipa wisigoho ba adunguratise yo, na ka ba du, gu kura kekeapai aduadu a nga gu du tipa wisigoho nisase. Ani na gu kido nga gi Ngbaõbambu Sinziri re nika undo dungu aDezire Yekova rogo agu apai yo nga ga toro. Tipagine gumba ani he ti ni wo?
Pa-Ngirisi nga gu fugo dungu awirina agumbaha rogo agu aringara duwa, Fiji, Ghana, Kenya, Liberia, Nigeria, Papua New Guinea, gbiati Solomon Islands. Wa vura duhe nga agu awirina du rogo agu aringara re namangasunge amanga na gu kura afugo tipa gu kura gayo apai, pa-Ngirisi nga gu fugo i amangasunge nani dedede rogo gayo adungurati na gene sunge tungusapai yo. Ono tie, gu pa-Ngirisi i agumbaha, si taata ti gu du rogo gaani awaraga. Gu kurapai berewe a nga gu kura awirina kinaho ga kurogo agu aringara si aida i niipe kina pa-Ngirisi rogoho ono i ainongo ho wenengai te. Kurigure, rogo agu aringara re, adungurati ho rengbeyo ka ndu rogoho nga gu namanga dunguratise rogo fugoyo yo te.
Gu kekeapai ani naawisigoho rogo aposo dunduko rogo Ngbaõbambu Sinziri, si tipa ka riga rani na gu riahe nga ga toro wenengai. Sidu, tipa agu aboro dunduko du pati dunguratise gbia undo, i mbakadi gi vovo Ngbaõbambu Sinziri re niʹaakpuraha gbe, afugoho taata tipa ka giarogoyo, na i kehe ngba gu gene du taata tipa boro gedihe. Gi vovo Ngbaõbambu Sinziri re nikadu na kpotoho kia. Gu umba riiapai, agenewaraga, asanahe tipa fugöpai, gbiati asura nikadu rogoho, si nikadu wa sa na gu du rogo gu kura Ngbaõbambu Sinziri. Sidu, aboro dunduko nikaa ndu wa sa ti regbo wisigoho, singia i na gu vovoho re beyo watadu ngbatunga gu i naakusaha mbata. Kpiapai gu du kusende re nayugo wai si nika du taata ti gu i naakusaha mbata.
Ani na gu maabangirise nga gi vovo Ngbaõbambu Sinziri re nika karagapai akaraga kuti gu kpee nga ga dungu aboro nga aguyo ninaaya fu Yekova wee: “Mo fú rugatinapai fere, mi wiriki sangbaro.” (Tam. 119:73) Ani na gu kido nga dungu agu aboro ainongo pa-Ngirisi wenengai ya watadu gu rukutu agude nagumba pa-Ngirisi nikadu adu na rengba beyo kaa mbakadatiyo tipa Wisigo Ngbaõbambu Sinziri rogo aposo dunduko. Ani nafu tambuahe fu Yekova mbiko gupai nga “nyemu awirina” nasako ko nimangisunge na ‘ruru kangara moyambu’ tipa kaa fu gu riahe nga ga toro kpaima.—1 Pet. 2:17; Mt. 24:45.
Riigbu Bipasunge nga ga ADezire Yekova