I Nake Gaani Amagazini Si Undo Angbatunga Aboro Dũ
1. Wai ruru kangara moyambu awirika Pauro?
1 A wa gu mokedi nangia Pauro anaatungusa wene pangbanga ngba dungu agene fu angbatunga “aboro dunduko,” ruru kangara moyambu nake gaani amagazini fu angbatunga aboro dunduko na gayo apambori. (1 Kor. 9:22, 23) Tipa ani naakparaka aNgbaõbambu Sinziri na Awake! wenengai, si naida ani inipa agu aboro aino i nakehe tipa yó.
2. I nake Awake! nzunzu tipa ada?
2 Awake!: I naake gi magazini re tipa agu aboro duwa agu “aboro Atenai” Pauro afura fuyo. (Amo. 17:22) Si nawira gupai nga agu aboro re aainongo agu ayugopai nga ga aKristano te, na i aagianga rogo Ziazia Kekeapai yo gbe a te. Wakina gure a, i nake Awake! tipa agu aboro ini Ziazia Kekeapai gbua tooni na aguyo ainongo ho wagu tooni ya. Si rengbe kadu nga i ainongo wiripai tipa agu ayugopai nga ga aKristano te, i abingo apambori niguhe ka boro kido kuti ni te, watadu i abingo Ziazia Kekeapai niguhe rengbe ka undo te. Gu bambatapai i ake Awake! ti ni nga ka sa agu aboro nagedaha i idi kuti gupai nga Mbori kina ti ni. Gu kurapai i akehe ti ni a nga ka sa aboro i idi kuti Ziazia Kekeapai na ki ini gupai nga aDezire Yekova kia ti kura apambori.
3. Ada i akeka agu angbatunga Ngbaõbambu Sinziri du biata re tipa yó?
3 Ngbaõbambu Sinziri: Gu Ngbaõbambu Sinziri nga ga pa-Ngirisi na kura afugo, nga gu du ramediwihe nga 1, i nakehe fu aboro dũ. Ono si gbe tipa agu aboro duadu na bete irisa tipa Mbori na tipa Ziazia Kekeapai. I ima ino bete agu apai du rogo Ziazia Kekeapai ono ka i agianga rogo agu ayugopai nga ga Ziazia Kekeapai niruruhe ya. I wakina agu aboro Pauro afura tipa yó ki ya i ‘nagunde agunde ti Mbori.’ (Amo. 13:14-16) Gu i naakusaha tipa wisigoho, nga gu du ramediwihe nga 15, i nakehe gbe tipa aDezire Yekova. Pauro aberẽ gupai nga agu aboro nika geda gako awaraga, i nga aguyo naima rugatiyo na agu apai du rogo Ziazia Kekeapai na ki ima giarogo rengo yo wenengai. (1 Kor. 1:1, 2) Wakina gure a, agu apai dunduko du rogo gu Ngbaõbambu Sinziri re, si tipa agu aboro naye tipa gaani adunguratise na i kingia agu aboro naima rugatiyo na agu afugo nga ga aDezire Yekova. Tipa gu Ngbaõbambu Sinziri nga ga pa-Zande tigaha, si nga aNgbaõbambu Sinziri ue i nakodihe sa. Si tipa wisigoho ba dunguratise yo, tipa wisigoho nisase, na tipa tungusapai nani a.
4. Tipagine si aida ti ni ani naageda amagazini ageda mbata nga agu ani naamangasunge nani ba tungusapai yo?
4 Wa vura duhe nga ani naakparaka amagazini niba-ue-ue, ani naafura na boro riipa bangisaha ho ani afuhe ni funi. Sidu tie, oni moihe nigaoni sásá kaa geda aNgbaõbambu Sinziri dunduko ho si adani ku beroni. Oni gedi Awake! ageda a ka oni rengbe nani. Ka oni amangaha wo, oni rengbe arengba kaa fu gu waraga fu boro rengbe arengba ka undo ní, watadu ka fura riipa gupai du rogo magazini rengbe arengba ka undo ní.