Oni Banda Zereda

‘Ani peke kina agu apai namanga sa zereda.’​—ROM. 14:19.

1, 2. Tipagine du zereda ti ni dagba aDezire Yekova?

SI NIKPARAPAI tipa ka gbia ndikidi zereda rogo zegino areme. Zavura kina agu aboro du rogo bangisa ngbatunga sa na kini gumba bangisa fugo, i nikparakakparaka yó rogo gayo apambori, birĩ zogarago, na mangapai. Bakere kparakparapai gu du dagba aboro zegino na ga Yekova aboro nga aguyo duni kodikodi yó wa vura duhe nga i ye “dagba rika aboro dunduko, na angbatunga yo, na aboro, na angbatunga afugo dunduko.”​—Yugo. 7:9.

² Gu zereda du dagbarani arame ayengo nitunguotunguoho te. Gi zereda re ye mbiko ani “zezeredi na Mbori” rogo gu idapase yo du ani nani rogo wiriko nga gu boro naakusuko kureko tipa ka dada gaani ingapai. (Rom. 5:1; Ef. 1:7) Kurigure, ndikidi Mbori nafu gako ziazia toro fu gako ruru amoyambu na zuzu gu toro re nga zereda. (Gara. 5:22) Gu kura ndupai nasa gupai nga ani du nikodikodi rani rogo zereda si nga, “aboro zegino” nga ani te. (Yo. 15:19) Kuba gupai nga ani naaputa tirani na agu apai nga ga birĩ zogarago, ani nakpara tirani kusayo ti ni. Ani arimisongo tirani kurogo agu avura namanga dagba aboro te mbiko ani ‘aima ta gaani abasape ni marã sopabino.’​—Yes. 2:4.

3. Gine gu zereda ani agbiaha amangaha furani, na ginihe ani nika sakapai tipaha rogo gi papara kekeapai re?

³ Gu zereda du dagbarani nibasasa nakoda kura dungu apai angianga kina zanga manga gbegberẽpai fu awirinarani sa ya. Wa vura duhe nga gu dungurati du ani rogoho na dungu angbatunga aboro rogoho nibasasa na asinoyo, ani ‘kpinyemu akuarani akpi.’ (Yo. 15:17) Gu zereda du dagbarani nasarani ani “mangi gu pai amanga ngba angba fu aboro dunduko, fu kina agu yo gbe du ku idapase yo.” (Gara. 6:10) Gu gaani zezeredi paradizo nga ga toro du ani rogoho nga guhe si aida ani bihe na nyanyakipaha na kini banda paha. Sidu tie, ani asadingo awere ka bi wai rengbe ani ka banda zereda rogo dungurati.

Ho Ani Akota Ni

4. Ginipai rengbe ani ka mangaha tipa ka manga zereda ho ingi ani pai ni kuti boro?

⁴ Gu mokedi nangia Yakoba ake gupai nga: “Ani nakota dunduko rogo dungu apai. Ka boro akota nga rogo fugoni ya, ni du ni ziazia boro.” (Yak. 3:2) Sidu, akpakarapai gbiati zanga giatise tigaha nikaa kura akura dagbarani na akuarani aidipase. (Frp. 4:2, 3) Ono tie, ka kpakarapai kuru dagba aboro, si naida i nyasi riipaha zanga fuda gu zereda nga ga dungurati. Nikpiapai, oni bingo gu rugute rengbe ani ka mangasunge nani ka ani bihe nga ani ima ingapai kuti boro.​—Oni gedi Matayo 5:23, 24.

5. Wai rengbe ani ka banda zereda ho boro naingi ni kuti rani?

⁵ Ono ginipai ka mangi ka si dunga boro ingipai kuti rani tooni? Ya mo si naida ní ye ka ho mbupai berani? 1 AKorindo 13:5 nayaa: “[Nyemuse] aberã nga gbegberẽpai kuti boro te.” Kangia boro ingipai kuti rani, si naida ani mangi zereda na ní nimbu ani pai funi na bangirani ki go ti ni, angianga ka ‘berã gbegberẽpai kuti ní ya.’ (Oni gedi AKorosaio 3:13.) Ngbaha angba ani nyasi riipa gu rukutu aingahe ngba gi gene re, mbiko gipai re nasa gupai nga ani du rogo zezeredi pagume na agu awirinarani nga aidipase na ani ki du zezeredi berãrani yo. Pa sanza gudu ho nagumba gupai nga: “Ngba ha angba . . . ka mbu pa tiandika.”​—Snz. 19:11.

6. Ginipai rengbe ani ka mangaha ka si dunga si ima mbu tipa bangirani go ti gu ingahe boro namangi rani nani?

⁶ Ono ginipai rengbe ani ka manga ka ani bihe nga gene ho wa ka ani mbupa gu ingapai re te? Ka ani mere nani nigumbarimo fu kura aboro, si dunga furani nipatatamana te. Ngbatunga gu gumbarimo re nagberesa kina pa gu zereda nga ga dungurati. Ginipai si aidaha tipa ka nyasa riipa gupai re ngba zereda? Matayo 18:15 nayaa: “Ka wirinamo ingi pai kuti ro, mo ndú, mo yúgu gani ingapai kuti ro dagba roni na ni ni sa roni. Ka ni gi paro, si wa mo gbe wirinamo fuo ro.” Wa vura duhe nga Matayo 18:15-17 nafura tipa nyanyaki ingapai, nibi gu rugute du rogo veresi 15, ngbaha angba ani ndu fuo gu boro ingipai kuti rani re tipa ka fura na ní wa ka ani karaga gaani zereda berewe kubaha.a

7. Tipagine si aida ani nyasi riipa atagbagapai ti ni niipo?

⁷ Pauro akepai nga: “Oni zingi, ka oni ingi nga ya; ka uru ti nga gaoni zinga ya. Ka oni mbákadi nga gene fu bakitingbanga ya.” (Ef. 4:26, 27) Yesu ayaa: “Mo ídi pai fu vuraro ni ipo wa du mo na ko gene.” (Mt. 5:25) Pa manga ani zereda dagbarani na boro naida na gupai nga ani nyasi riipa akpakarapai nikina boro ipo. Tipagine si aidaha ti ni wo? Mbiko mangaha wo nika sa gupai nga ka atagbagapai nyenga kuti rani wakina bagbandua ya. Ka ani mbunga rukö, kpihe, watadu agu aũkumuko du berani si za rani ti nyasa riipa agu atagbagapai nakura dagbarani ya.​—Yak. 4:1-6.

Ho Zanga Giatise Akoda Dungu Aboro Ni

8, 9. (a) Gini ngbatunga kparakpara biapai nadu rogo gu dungurati nadu Roma yo rogo bambata sa kama agarã? (b) Gini arugute Pauro afuhe fu agu aKristano nangia aRomo nibipa gayo tagbagapai?

⁸ Ti kura aregbo, zanga giatise ima rengba ka koda dungu aboro kurogoho angia kina aboro ue ya. Gere nangia gupai nadu tipa agu aKristano Pauro ake waraga fuyo Roma yo. Tagbagapai akuru dagba agu aKristano nangia aYudo na Agendiria. Bete kura aboro rogo gu dungurati re atona ka bi pa agu aboro sangbakpotoyo adu nirurungburaha na payo kusende watadu aguyo sangbakpotoyo anaaidanga ha fuyo i nimangi gu kura apai ya. Ngbatunga agi aboro re aasapangbanga akurayo riipa agu apai naabi kina ga boro diaberã ni tiní. Gini rugute Pauro afuhe fu gu dungurati re?​—Rom. 14:1-6.

⁹ Pauro afu arugute fu agu aboro re dunduko. Ko ape gupai fu aguyo naima rugatiyo nga i berewe tii ga Moize aNdiko te nga ka i naabingo pa awirinayo kusende ya. (Rom. 14:2, 10) Ngbatunga gu bipai re arengbe arengba ka gberesa gu pagume nadu dagba agu aboro naadu na rurungbura sangbakpotoyo na Yekova. Pauro azungodi yó nga: “Ka [oni] gbarasi nga ga Mbori sunge mbiko riahe ya. . . . Ngba nga ri pasio, na mbira imekakue, na manga gu pai ka wirinamo koto be he wa sa te.” (Rom. 14:14, 15, 20, 21) Ono tipa agu aboro sangbakpotoyo aidanga ha fuyo i nimangi kura apai ya, Pauro azayo nga ka i naabingo agu aboro namanga agu apai i aidanga ha ya wa iraira aboro nga yó ya. (Rom. 14:13) Ko ape gupai fuyo nibasasa nga ka boro “bérẽ nga pa tini susi gu pai ka ni aberã ya.” (Rom. 12:3) Fuo fuko arugute fu agu aboro tagbagapai adu dagbayo, ko akepai nga: “Ani peke kina agu apai ti ni namanga sa zereda, na agu apai ka ani sonosi akuarani na ni.”​—Rom. 14:19.

10. A wa si adu tipa gu dungurati nadu rogo bambata sa kama agarã Roma yo, ginihe si aidaha tipa aboro nyasi riipa zanga giatise dagbase?

¹⁰ Ani nakido nga gu dungurati nadu Roma yo re aima mangapai kuti ga Pauro rugute na ki mangi gu ariapai si aida i mangihe. Ho zanga giatise akura ni dagba aKristano areme, ya mo si aidanga ani asadi ka nyasa riipaha ngba zereda ringbisihe kuti agu arugute nga ga Ziazia Kekeapai te? A wa si adu tipa aRomo, agu aboro du na tagbagapai dagbatiyo areme, si naida i mangi ariapai amanga tipa ka ‘du zezeredi dagba tiyo.’​—Mk. 9:50.

Ho Si Aida Bakumba Fu Undo Ni

11. Ginipai si aida bakumba banda tiní ti ni ka si du nga Kristano naida ka fura nani riipa gu tagbagapai du dagbani na kurani?

¹¹ Ginipai rengbe ka manga ka si du nga Kristano naida ka fura na bakumba tipa gu kpakarapai du dagbani na kurani kristano watadu gumeni? Asanza 21:13 nayaa: “Gu boro nakisa tuni tipa gia kpe rungorungo boro, ni akpára a wo, ka i agía nga fugoni ya.” Si aidanga bakumba ‘kisi tuni’ ti giapai te. Ono tie, gu kura Asanza nazahe nga: “Gu boro nagumba pa gani pai mbata, ni wiri kina ruru boro, daho gu kurani ka ye ni ka wisiga ni.” (Snz. 18:17) Si naida bakumba degetuni wenengai ono ki banda tiní ti ngbe na gu boro niye ka tingidapa gu gbegberẽpai kurani namangi ní nani funi. Fuo dega bakumba tuni wenengai kuti gupai re, ní rengbe ka sana gu boro ye ka tingida gupai re singia ní ndu ki fura na guni ingipai kuti ní. Gu bakumba re rengbe arengba a ka wisigo agu arugute nga ga Ziazia Kekeapai rengbe gu boro re ka mangaha tipa ka ye na zereda.

12. Oni funga agu akpiapai nayugo gupai nga, ngbanga gu sa diaberã nibasa fuo boro kitingbaanga kurani te.

¹² Akpiapai gu duho biata rogo Ziazia Kekeapai nayugo ndu gupai angbanga diaberã ti ni nikina boro ipo fuo gia pai ngba bangisa boro sa ya. Potifaro aidi kuti gupai diako agumbaha fuko nga Yosefa aida ka pi nari ngbaome. Potifaro azingi zanga ruga ko tiko na gupai nzunzu namangi na ki ba Yosefa ku bambukiso yo. (Bam. P. 39:19, 20) Bakindo Davide aidi kuti gupai Ziba agumbaha fuko nga bairako nga Mefibosete ima koda tiko na avura Davide. Davide akaragapai nibasa nga: “Mo ngere, agu ahe dunduko nga ga Mefibosete, gamo du.” (2 Sam. 16:4; 19:25-27) Aboro agumbapai fu bakindo Arutasasata nga aYudo nadua ngapa Yerusarema berewe na i ima mbeda ka samungu kuti gu zogarago nga ga Paraso. Bakindo aidi kuti gu ziree re na ki rũ ndiko nga aYudo mbu dua ngapa Yerusarema. Nisangbana gipai re, aYudo ambu sunge ga Mbori yekaru. (Eza. 4:11-13, 23, 24) Si naida agu abaakumba nga aKristano pekefuo agu arugute Pauro afuhe fu Timoteo nga ka ko naasapanga ngbanga fu aboro niipo ya.​—Oni gedi 1 Timoteo 5:21, 22.

13, 14. (a) Ginipai si aida ani inihe tipa gu zanga giatise nga ga kura aboro? (b) Gine rengbe ka undo abaakumba i mangi ruru diaberã nibipa sarangbanga fu awirinayo aidipase?

¹³ Ka si vura du nga si nawira wa i dunduko ue niima rugatiyo na gupai re wenengai, si ninyanyakipa pai i ini gupai nga, ‘ka boro berẽhe ya ní ini gu pai, ní ata inongo ho wai si aida ní inihe te.’ (1 Kor. 8:2) Ya mo ani ini gu futufutuapai dunduko naaye na tagbagapai dagbayo? Ya mo ani rengbe ka inopai tipa agu aboro du rogo gupai re nibasasa? Ho abaakumba asarangbanga ni, si aidanga i mbutiyo aboro nangi yó nibiriki gbiati ziree apangbanga te! Ga Mbori basapungbanga nga Yesu Kristo nasapangbanga niruruhe? Ko “asápa nga ngbanga kuti bi pai ni bangiriko te, watadu za pai mbiko gia pai ni tuko a te.” (Yes. 11:3, 4) Kuba gure, ga Mbori toro du nangbe fu Yesu kumbatayo. Si naida agu abaakumba nga aKristano mbu ga Mbori ziazia toro si ngbe fuyo a kumbatayo.

¹⁴ Mbata fu abaakumba saringbanga fu awirinayo aidipase, si naida i kpari tipa ga Yekova toro undoyo na kini mangisunge na fugo Mbori gbiati agu awaraga naye be ‘ruru kangara moyambu’.​—Mt. 24:45.

Na Ka Boro Mangi Ingapai?

15. Gini regbo si aida ani tingidipa gu kere ingapai ini ani pai tipaha?

¹⁵ Nidu ani ni aKristano, i nangarasa rani ani naamanga zereda. Ono tie, Ziazia Kekeapai nayaa: ‘Gu tatamana naye ari yo si du na wene sino mbata, fuo gure si du na zera.’ (Yak. 3:17) Gu boro du nibayee ni, ní a na wene sino tiní, mbiko ní nasongoda gu ga Yekova arugute du tipa ruru mangapai na kini mangi agu apai ko akpinyemuhe. Kangia Kristano bi gupai nga wirinani mangi kere ingapai, si naida ní ngarasi ní tipa ní ndu ka kusaha fu abaakumba. (1 Kor. 6:9, 10; Yak. 5:14-16) Ka ní andunga ya, si naida gu Kristano inipai tipa gupai re ndu nga ní ka tingidaha fu abaakumba. Zanga tingida ani he fu abaakumba mbiko gupai gbua nga ani naida ka bandapa gu zereda du dagbarani na ní nayugo gupai nga ani nga papara gani ingapai.​—Pa Mot. 5:1; oni gedi Asanza 29:24.

16. Ginipai rengbe ani ka wirikaha ti gu kpiapai nangia ga Yeu na Bakindo Yorama?

¹⁶ Gu pangbanga du tipa Yeu nayugo gupai nga ga Mbori rurupai napera mbata fu manga zereda na boro. Mbori akedi Yeu ko ndu ka sarangbanga kurii kua gu bakindo nagia Aba. Gu gbegberẽ Bakindo nangia Yorama nangia wiri Aba na Izebere aoro rogo gako ngbagidavura ka gbia Yeu na ki sanako nga: “Pa zereda du, Yeu?” Ga Yeu karagapai angia gine? Ko ayaa: “Gini pa zereda ka du wa ga namo pa bari ange ange kindi nga Izebere na gari pa soroka a?” (2 Aba. 9:22) Nibasa, Yeu agbe gako mboto na ki no Yorama ti ngbaduko. A wa si adu tipa Yeu, kina gu bangisapai re rengbe abaakumba ka mangaha na gu boro aidanga ka saberã ní ti ingapai ya, nga ka manga rurupai kuba banda gu zereda gbua dagbatiyo na ní. I nakusa ní kusayo rogo dungurati tipa kambu dungurati si sono rogo ga Mbori pazereda.​—1 Kor. 5:1, 2, 11-13.

17. Ginipai si aida aKristano dunduko mangihe tipa ka banda zereda?

¹⁷ Anga gu badungu atagbagapai du dagba awirina nga kina gu kere ingapai naida na kina gupai nga abaakumba fura tipaha te. Si adu niwenehe ka ani adada gu irairapai nga ga akuarani adada. Fugo Mbori nayaa: “Gu boro nadada tiandika nagbata nyemuse, ono gu ni nafuga kina gu pai kindi nakparaka wene badia.” (Snz. 17:9) Pa manga ani pai ringbisihe kuti agu afugo re rengbe naundo rani ani banda gu zereda du rogo dungurati na ki bandapa gu ngbanya du dagbarani na Yekova.​—Mt. 6:14, 15.

Banda Zereda Naye na Amaku

18, 19. Gini amaku naye be banda zereda?

¹⁸ Pa peka ani fuo ‘agu apai namanga sa zereda’ naye na badungu amaku. Si nasa gaani ngbanya na Yekova si du nibawenehe na kini sarani ani wiriki ko rogo gi gene re, na kini kodibee kuti gu pazereda du rogo gaani paradizo nga ga toro. Banda ani fuo zereda rogo dungurati naundo rani ani bi agu agene rengbe ani ka manga zereda na agu aboro ani atungusa “wene pangbanga zereda” fuyo. (Ef. 6:15) Si naundo rani a ani du nibayee rani fu aboro dunduko na kini hipai fuyo.​—2 Tim. 2:24.

¹⁹ Oni tingidi gupai a nga, “ruru aboro azinga be kpio na iraira yo a.” (Amo. 24:15) Ho gi maabangirise re ka digiso tihe ni auru kpotosende ane, amirioni aboro na angbatungayo nibasasa, na arangi yo, gbiati asino yó nika da niungayo berewe, na gipai re nika karaga rani berewe wa “ho zegino aenge” ni! (Rk. 11:50, 51) Bakere momu du nikangia ha tipa ka yugo agu agene nga ga zereda fu agu aboro i nika zingisayo bekpio. Nairiwo wai gu inohe ani agbiaha awere tipa manga zereda nikadu na bakere undo furani ti gu regbo re!

[Gu rukutu kekeapai du bandu kpewaraga yo]

Ginipai Wiriki Oni He?

• Ka ani ingipai kuti boro, wai rengbe ani ka manga pa zereda?

• Ka boro ingipai kuti rani, ginipai rengbe ani ka manga tipa ka banda zereda?

• Tipagine duhe ti ni nizingo tatamana ka ngbe na boro sa dagba agu aboro duna tagbagapai dagbayo?

• Tipagine si aidanga ti ni ani mangi zereda na gu boro aidanga ka kusa gani ingapai fu abaakumba ya?

[Gu sura du ti kpewaraga 25]

Yekova nakpinyemu agu aboro nambupai fu akurayo ngbaduyo yo