Da Nzunzu Nazoga gi Zegino Re?

ISOKE, oni agbianga tironi na abangbembatayo nga ga agu aboro ninaamanga gbegberẽ apai te. Ya mo gure nayugo gupai nga i ti ni te? Agu abangbembatayo fu amangi gbegbere apai re, i ima ino wai ka igo tiyo ka aboro ainonga yó ya, i rengbe a kaa sungo kina bambukiso yo kini fu arugute fu gayo aboro i nimangi gbegberẽ apai. Ono tie, agu apangbanga ani naagedaha dedede rogo waraga apangbanga tipa avura nga ga kere ngua, kodaba tipa marã, gbiati tuka aboro, si natingida rani naapa gu gbegbere sangbana apai nga ga gu mangaapai nga ga gi gbegbere aboro re na kini tingidi rani na gupai nga i kina ti ni. Ani naino gupai nga i kina ti ni mbiko gu gbegberẽ apai i amanga aboro nani.

Ziazia Kekeapai nagumba gupai nga Satana nga ndikidi boro, ko namangasunge na “agu apai i aina pai ti ni” na “irairapai” tipa aboro naamanga agu apai ko akpinyemuhe kina wai abangbembatayo fu amangi gbegberẽ apai ninaamanga ha. Ziazia Kekeapai nagumba gupai nga, ko “nambakada tiko ni maraika imarago.” (2 ATesaroniko 2:9, 10; 2 AKorindo 11:14) Ani naino gupai nga Bakitingbanga kina ti ni mbiko gu gbegberẽ apai ko amanga aboro nani. Ono si ima kpakara fu dungu aboro i idi kuti gupai nga gbegberẽ boro kinaho nitoro i arengbanga ka biko ya. Mbata fu ani wisigipai sirisiri tipa gupai Ziazia Kekeapai agumbaha tipa Bakitingbanga, ani wisigingo bete agu akpakarapai na agu aida nasa aboro ka i idinga kuti gupai nga Satana nga ndikidi boro ya.

◼ “Wai Mbori nyemuse arengbe ka kusa Bakitingbanga?” Wa duhe nga Ziazia Kekeapai nagumba gupai nga Mbori nga wene sino boro na nirengberengbeko, si ima kpakara fu boro ní berẽ gupai nga Mbori arengbe arengba ka kusa ngbatunga gbegberẽ boro nitoro wa gure. Gu rengo duho nga Ziazia Kekeapai agumbanga gupai nga Mbori akusi ngbatunga boro wa gure te. Kuba gure, si nafura tipa Mbori niyaa: “Ko nga Mbia, gako manga sunge du ziazia; bambiko gako apai dunduko du ni ruru sarangbanga. Mbori nga irayososopai zanga irairapai, nga irarengo ni ruru ko.”​—Pa Rugute ni Ue he 32:4; Atambuahe 5:4.

Gupai si aida ani wisigipai tipaha nga, ya mo gu rengberengbe boro Mbori akusi ní, ní arengbe ka manga kurapai kia angianga rurupai ya? Mbori aamanganga gako kusikusi ahe wa masini te, ko afu ranirii fu gako kusikusi ahe tipa i niimangi gayo siapai nitiyo. Sidu, gu ga Mbori kusikusi ahe nga amaraika gbiati aboro, i na kina rengba beyo tipa ka sia ka manga wenepai watadu gbegberẽpai. Ka si adu nga gu ga Mbori kusikusi ahe nga aboro na amaraika arengbanga ka sia ka manga gupai i akpinyemuhe nitiyo kpara kusayo ti manga rurupai te, ka gayo mangapai adunga na ndikidi rogoyo ti ni te.

Ruhe aru tie ka gumba gupai nga, Mbori arengbanga ka fu gu momu nga ga ranirii fu gako kusikusi ahe kini ru berewe ka ká naayo ti manga gu gbegberẽpai kina yó arengbe ka sia ka mangaha te. Yesu afura tipa inga mangisunge na ranirii ho ko ayaa ni tipa Bakitingbanga wee: “Ko anye nga na rengo” te. (Yoane 8:44) Agu afugo Yesu re nayugo gupai nga gu maraika naada ni Bakitingbanga re adumbata nikina rengberengbe boro nitoro, na nigu boro naamanga “rengo” amanga mbata.a Yekova Mbori amangi gako kusikusi ahe na gu tandu nga ga sia manga wenepai watadu gbegberẽpai mbiko ko nakpinyemu yó na kidu nakido kutiyo.​—Oni bi gu sanduki nga “Ya Mo Rengberengbe Boro Arengbe ka Da Niboro Zangarengba?”

◼ “Bakitingbanga nga ga Mbori Moyambu” Tipa gu kura aboro, i nabihe nga kina Ziazia Kekeapai nagumba gipai re rogo gu kitabu nga Eyobo. Ringbisihe kuti gu kura buku sa, gu fugo nga Bakitingbanga “nata ata koyo na kono auru kpotosende,” si nafura tipa gu ngbatunga sunge agu abamoirago nangia ga Paraso yó anaamangaha, nga gu gayo Bakindo anaakeda yó genehe yo tipa i nindu ka ye na atingidapai fuko. (Eyobo 1:7) Ono tie, ka si du nga Bakitingbanga angia ga Mbori bamoirago, tipagine ko asakipai ti ni fu Mbori nga ko “nata ata koyo na kono auru kpotosende”? Gu pangbanga du rogo Eyobo, si ayugonga Satana niga Mbori moyambu te, si nayamba Bakitingbanga na gu rimo nga Satana du rogoyo nga “Basamungu” nga gu nayugo gupai nga ko nga bakere vura Mbori. (Eyobo 1:6) Wari tie gu bipai ayeni nga Bakitingbanga nga ga Mbori moyambu?

Naatona rogo bambata sa kama agarã F.B.K., agu abuku aboro akapa akapa kuti sangbaha, ngbatunga gu nga “Book of Jubilees” na “Common Rule” du tipa gu sangisangi pambori nga Qumran, si nafura tipa Bakitingbanga ya ko aasakapai na Mbori na si ki vura duwo, ko ki du kindi kutiibe Mbori. Bakeke kuru apangbanga sa nangia J. B. Russell asakipai tipa gipai re rogo gako buku yo ki ya, gu Baenge gu Pambori nga ga Aboona nangia Martin Luther afura tipa Bakitingbanga ki ya ko nga ga Mbori ũsunge, “ko wakina gu he i naakuya angua nani watadu wakina gu gita i nasopa bino nani.” Gupai Russel aida ka gumbaha nga, “gu gita re na ngbarago tipa kaa gbarasa rende kusayo,” ono si nye kina kube Mbori tipa ka digiso gupai ko akpinyemuhe. Gi ga Luther yugopai gu bawisigipai tipa agu aida nga ga apambori nangia boro Faranza nga John Calvin adihe kugume re, rago aangbanga ti dungu aidipase nani te. Wai Mbori nyemuse arengbe ka mbugene fu gbegberẽ apai si nimangi na kini saha si nimangi? (Yakoba 1:13) Gi yugopai re gbiati gu kere apai mangi rogo 20 kama agarã, sa gupai nga ka dungu aboro idinga kuti gupai nga Mbori gbiati Bakitingbanga kina ti ni ya te.

◼ “Bakitingbanga nga kungbo kpia gbegberẽpai gbua” Ka ani ya ti Bakitingbanga we ko nga kpia gbegberẽpai gbua, si mbu ambu furani ani giarogo gu kura kekeapai du rogo Ziazia Kekeapai yo. Nikpiapai, a wa saki yó pai tipaha rogo Eyobo 2:3-6, da gu Mbori aafura nani? Ya mo ko aafura na gu gbegberẽpai naadu rogo Eyobo yo, watadu ko aafura fu tiko? Kurigure, ya mo ka Mbori arengbe ka tambua Eyobo tipa gako ruru mangapai kini ru berewe ka mbu gene fu gbegberẽpai si naasada Eyobo? Ka ani ya wo du Mbori, si du wa ani nayawee Mbori nga gu gbegberẽ boro namanga aboro gbegberẽ angianga wai Ziazia Kekeapai aya tipa ko wee “irairapai ti ko wa sa te.” (Atambuahe 92:15) Ono tie, Ziazia Kekeapai nagumba gupai nga Mbori aká ka ‘taya beko’ tipa ka imisa Eyobo. Si ziazia tie nga, Bakitingbanga nga gbegberẽpai gbua watadu ko nga gbegberẽ asino du Mbori nani te, ko nga gu boro nitoro naasa tiko Nivura Mbori.

Da Nzunzu Nazoga gi Zegino Re?

Areme, badungu aboro nabihe nga ndupai ho rengbeyo ka ida padu Bakitingbanga ti ni te. Ono tie, gu riko gbegberẽ apai namanga areme, boro ho rengbe ani naya ní nasaha si nimangi kparakusayo ti Bakitingbanga te. Nirengo, pa zanga ida aboro kuti gupai nga Bakitingbanga kina ti ni asa badungu aboro i sogo Mbori na agu arugute du tipa ruru mangapai naabaha.

Gu bakeke siakasiaka wene afugo naraki rogo 19 kama agarã nangia Charles-Pierre Baudelaire akepai ki yaa: “Ga bakitingbanga birĩ nga ka sa rani ani idi kuti gupai nga ko ti ni te.” Pa igo Bakitingbanga tiko ka aboro iningo ko ya asa gupai nga aboro du na tiko kuti padu Mbori ho ti ni. Kangia Bakitingbanga ti ni te, ya mo si dunga nga Mbori du naye na gu gbegberẽ apai dunduko namanga te te? Anga kina boro gupai re Bakitingbanga aida aboro idi kutini te?

Kina wai bangbembatayo fu amangi gbegberẽ apai ninaaigo tiní, Bakitingbanga naigo tiko wa ka ko ruho kaa manga agu apai ko aida ka mangaha. Ginipai du ko aida kaa mangaha re? Ziazia Kekeapai nakaragapai niyaa: “Nga agu yo mbori gi zegino re akisi gayo aberã nga agu yo zanga idapase, ya ka gu imarago ahasa nga rago ku ri yo nga ga gu wene pangbanga nga ga gu taarimo nga ga Kristo, nga kpia Mbori, ya.”​—2 AKorindo 4:4.

Gu nyanyaki sanahe duho nga, Ginipai Mbori nika mangaha na gi gbugbu boro du kugii gbegberẽ apai dunduko re? Ani nika wisigopai tipaha rogo gu kekeapai naye fuo gere?

[Gu rukutu kekeapai du bandu kpewaraga yo]

[Gu sura du ti kpewaraga 5]

Ya mo bakitingbanga nga ga Mbori moyambu watadu ko nga basamungu kuti Mbori?

[Gu sura du ti kpewaraga 6]

Ya Mo Rengberengbe Boro Arengbe ka Da Niboro Zangarengba?

Gu rengba Mbori afuhe fu gu gako kusikusi ahe nga aboro, si ku gene. Wa vura duhe nga i akusi Adamu nirengberengbeko, si aaida ko ini gupai aino nga gu kura apai adu kinaho Mbori aambunga gene fu kpotoko si dibehe ya. Nikpiapai, ko aarengbanga ka ri biriko, zekerembia, watadu ngua zanga vuko yo woki te. Ka ko adakpa kurii gu he gizo kuari gbe kini ru ka gito yo kusende, ka ko akpi watadu ki kuadi gbegberẽ.

Teketeke a, rengberengbe boro ho watadu maraika rengbe ka gu rii gu ngbanda Mbori namoihe tipa sino mangaapai zanga gbia tiní na gbegberẽ sangbanaha te. Rogo gi gene re, ho rengberengbe boro amangasunge ni na gani ranirii ngba gbegberẽ gene, ní “nati kurogo gbegberẽpai gbiati ingapai taata.”​—Bambata Pai 1:29; Matayo 4:4.