Ya Mo Oni Nasa Yekova Nigaoni Kparakpara He?

“Oni gbáta gako ngbi mbata, na gako rurupai; i ki kpamia agi ahe re dunduko fu roni kuti ni.”​—MT. 6:33.

1, 2. (a) Gu ga “Mbori Yisaraere” furayo tipa ní rogo AGaratio 6:16 naru kuba ada? (b) Gu “ngbatunga aYisaraere bawe na ue” furayo tipa yó rogo Matayo 19:28 naru kuba ada?

HO ONI ageda gu rimo ni nga Yisaraere rogo Ziazia Kekeapai, ginipai ninaaye ku berãroni yo? Ya mo gupai ninaaye ku berãroni yo nga pa Yakobo wiri Yisaka, nga gu ko i aria rimoko nga Yisaraere? Watadu gupai ninaaye ku berãroni yo nga pa gu ringara aYisaraere nadumbata? Ziazia Kekeapai nafura afura a tipa agu aYisaraere nga ga toro yó. I nga agu aboro du bangeyo nga 144,000, nga aguyo i nambedi yó na ziazia toro tipa i ndu ku ngbangbaturũ yo kadu yo ni abakindo na ni aboromotumo. (Gara. 6:16; Yugo. 7:4; 21:12) Ono ani makianga pai tipa gu kparakparapai du tipa gu ngbatunga aYisaraere naadu 12 nga aguyo furayo tipa yó rogo Matayo 19:28.

² Yesu ayaa: “Ni gu rago Wiri boro ka sunga auru mbatabakindo na taarimoko, ho i ka sa ahe ni dunduko ni vovo ho, oni asúnga auru mbataabakindo bawe na ue, ka sapa ngbanga ngbatunga aYisaraere bawe na ue.” Agu ‘angbatunga aYisaraere bawe na ue’ furayo tipa yó rogo gi veresi re, i nga agu aboro ga Yesu mbedimbedi abawiriki nika sapangbanga yó na du na gu maabangirise nga ka gbia nyenye unga rogo Paradizo auru kpotosende ane. I nika gbia undo be gu sunge aboromotumo du bangeyo nga 144,000 nika mangaha.

3, 4. Gini wene kpiapai ruru mbedimbedi aKristano namoihe?

³ Wakina agu aboromotumo gbiati aRevi nadumbata, gu mbedimbedi aKristano du areme nabi gu sunge i amangaha fu Mbori nibakere momu. (Geda 18:20) Gu mbedimbedi aKristano du awere asananga he tipa dagbarago rii kpotosende ane ni gayo ũkumuko te. Kuba gure, i na maabangirise kadu ni abakindo na ni aboromotumo ngbangbaturũ yo na Yesu Kristo. I nika ndu kindi kumbatayo kaa manga gu sunge Yekova nafuhe fuyo a wa ani agedaha rogo Yugoti 4:10, 11 nga gu nafura tipa gayo sunge ngbangbaturũ yo.​—Yeze. 44:28.

⁴ Gu mbembedi aKristano du kindi auru kpotosende, i naraka gayo raka ngba gu gene nayugo gupai nga Yekova nga gayo kparakpara he. Gu momu du yó nani nga ka mangasunge fu Yekova, si na nyanyakipaha bangiri yó gbe. I na idapase kuti ga Kristo motumo tumorii na kini pekefuoko ti aregbo dunduko. Mangayo ho wo nasa gupai nga gu ‘yambahe i ayambuyo nani gbiati siahe da ti rengo.’ (2 Pet. 1:10) Agu apai du tipa yó nibasasa dunduko gbiati gayo arengba nibakiakia. Wa vura duhe wo, i amanganga sunge fu Yekova gbua tooni mbiko agu azanga rengba du yó nani te. Kuba gure, i naperesapa ga Mbori sunge mbata fu gu kura apai dunduko na kini mangihe na omeyo dũ. Na i namaa wene kpiapai fu agu aboro duna maabangirise ka raka rogo paradizo auru kpotosende ane.

5. Wai gu rengbe aKristano dunduko ka sa Yekova nigayo kparakpara he, na tipagine adunga ha ti ni nitaatapai ya?

⁵ Singia ani na maabangirise ka ga ku ngbangbaturũ yo watadu ka raka auru kpotosende ane, ani duwa ka ani ‘mbu gaani apai, ki di gaani wagiwagi ngua, ki nipekefuo Kristo.’ (Mt. 16:24) Gu badungu amirioni aboro du na gu maabangirise nga ka raka rogo Paradizo auru kpotosende nairiso Mbori na ki nipekefuo kristo wa gure. Rago angbanga tiyo ka mangasunge fu Yekova gbua tooni baraho ka i mangihe amanga ni nibakerehe te. Badungu yó nasa gayo raka si du taata na ki da ni abazakigene. Agu akurayo namangasunge abazakigene tipa bete adiwi rogo garãyo. Agu akurayo adunga gene beyo ka mangasunge ni abazakigene ya, i nafu tiyo sa sunge tungusapai nyanyaki. Ngbatunga agi aKristano re wakina Maria, nga guri nambedi ndu Yesu na wene fuo nzeme. Ko ayaa: ‘Ri mangi wene pai ti re. . . . Ri mangi he, ringbisi kina omeri na ni.’ (Mk. 14:6-8) Si arengbanga ka du furani taata tipa ani mangisunge fu Yekova na omerani dũ te bambiko ani naraka rogo gu zegino du tii ga Satana maapai. Wa vura duhe wo, ani namanga bakere ome tipa ka mangasunge fu Yekova gbe na kini kido kutiko. Ani makianga wai ani naamanga gipai re rogo abangiriba biama.

Gbata ga Mbori Ngbi Mbata

6. (a) Wai gu aboro ayugo gupai areme nga gayo kparakpara he kina rogo gi unga re? (b) Ginipai duhe ti ni niwenepai kadu na gu bipai nangia ga Davide?

⁶ Yesu ayugu gupai fu gako abawiriki nga i gbata ga Mbori ngbi gbiati gako rurupai mbata. Gupai aboro zegino amangaha areme nga kaa maa kina pa agu apai ngbatiyo mbatayo rogo gayo raka. Ziazia Kekeapai nafura tipa ngbatunga agu aboro re ki ya i nga “agu aboro du gayo pai kina rogo gi unga re.” (Oni gedi Atambuahe 17:1, 13-15.) Badungu agi aboro re aberãnga pa Yekova te. Agu apai i aberã tipaha nga wai ka raka wene raka, ka vunga agude, na ka mangasunge tipa ka mbu aũkumbo fu awiriyo. Gayo kparakpara he kina rogo gi unga re. Ono tipa Davide tigako, gupai nangba tiko gbe nga mbakada “wene rimo” na Yekova a wa wiriko agumbaha kusa nga si naida aboro dunduko mbakadi wene rimo na Yekova. (Batu. 7:1) Wakina Asafa, Davide abi gupai nga du na wene pagume na Yekova paha anyaki kisusi agu apai naadu tipa gako raka. Ko adu na ngbarago tipa kaa ta na Mbori. Ti gi gaani regbo re, badungu aKristano namoi agu apai nga ga toro mbata fu sunge-marã.

7. Gini maku wirinarani sa agbiaha mbiko maa ko pa ga Mbori ngbi mbata?

⁷ Ani dinga Jean-Claude naraka rogo gu ringara nga Central African Republic nikpiapai. Ko nga bakumba rogo dungurati na diako ti ni na agude biata. Rogo gu ringara ko araka rogoho re, pa gbia sunge ima mbu nikerehe, na ho boro agbia sunge ni, ní rengbe ka manga apai dunduko nga gu rẽ na omeni tipa ka banda gu sunge re. Uru adu ho sa bangerekuriisunge agumba gupai fu Jean-Claude nga ko tona mangasunge yuru. Ko agumba gupai fuko nga sunge nikaa tona ti ndu uru 6:30 nyemu, rogo aʹuru poso dunduko. Jean-Claude agumba gupai fuko nga kupati gupai nga si naida ko naangera angerafuo gako aborokporo rogo borose yo, si naida aida a ko naangerafuo yó rogo toro yo. Ko agumba gupai berewe a nga asunge kinaho si aida ko nimangihe rogo dungurati. Ga gu bangerekuriisunge re karagapai angia gine? Ko agumba gupai nga: “Ho si asu ni na mo mo gbia sunge, si naida bangiro go ti gu kura apai dũ, kodihe na diaro, awiro, gbiati gu kpakaraapai mo agbia tiro nani. Si naida mo fu ga regbo dunduko tipa sunge. Mo mangi siapai awere: mo nandu gene ga pambori yo watadu mo naida ka banda ga sunge?” Kangia oni kadu yo, ginipai ka oni amangihe? Gu wirinarani re aima ino gupai nga ka ko zanga gako sunge, Mbori ngere angerafuo ko. Ko aima ino gupai nga ko nikadu adu na bakere sunge ka mangaha rogo dungurati na Yekova nika ngera angerafuo gako aborokporo rogo borose yo. Rogo gu poso nangbe tifuo gipai re, ko andu tipa dunguratise nga ga bebere poso. Tifuo dunguratise, ko aguari kaa ndu ku basunge yo na kina gupai berãko yo nga i nika do ko ado ti sunge. Ti kina gu regbo ko aaberã gipai re, boro kini yambu ko rogo terefuni. Gu boro re agumba gupai nga, i ima do gu bangerekuriisunge re ti sunge. Gi wirinarani re azanganga gako sunge te.

8, 9. Wai gu rengbe ani ka wirika agu aboromotumo gbiati aRevi nadumbata tipa ka sa Yekova nigaani kparakpara he?

⁸ Isoke, ngbatungapai wa gu namangi gu wirina re aima manga roni, si ki sa gupai nga oni bakibangironi nga, ‘Mi nika manga ginipai ka diabe gu tindiro du kurire nga ga ngerafuo gimi aborokporo?’ (1 Tim. 5:8) Singia ngbatungapai wa gure amangi roni watadu si aamanganga roni te, oni ima inoho rogo gaoni raka yo nga ka oni sa Yekova nigaoni kparakpara he na kini bi gako sunge na nyanyakipaha gbe, ko ambunga roni te. Ho Yesu agumba gupai ni fu gako abawiriki nga i ‘nigbata ga Mbori ngbi mbata,’ ko akido yó nga: “I ki kpamia agi ahe re dunduko fu roni kuti ni.” Agu ahe re nakoda gu he ka boro rihe, gu ka boro mbirihe, gbiati gu ka boro vo ho.​—Mt. 6:33.

⁹ Oni berẽnga pa aRevi, i aafunga dagbarago fuyo niũkumuko ya. Wa ziazia irisombori angia gupai i aperesi paha mbatayo, i anaakido kina kuti Yekova tipa gu kura ahe. Yekova agumba gupai fuyo nga, ‘mi nga gaoni kparakpara he.’ (Geda 18:20) Wa vura duhe nga ani amanganga sunge rogo ga Mbori yekaru wagu agu aboromotumo gbiati aRevi nadumbata anaamangaha te, ani rengbe arengba ka wirika sino yó, kidu na gu kido nga Yekova nika ngera angerafuo rani. Wa ani aandu kaa dunguro kurogo yangara areme, si naida gu kido du ani nani kuti Yekova nga ko nikaa ngera angerafuo rani naasona kina kumbatayo.​—Yugo. 13:17.

Gbata ga Mbori Rurupai Mbata

10, 11. Wai gu kura aboro akido kuti Yekova nibipa sunge-marã? Oni funga kpiapai.

¹⁰ Yesu angarasi gako abawiriki a nga i ‘nigbata ga Mbori rurupai mbata.’ (Mt. 6:33) Tipa ani gbata ga Mbori rurupai mbata, si naida ani moi gu bipai du Mbori nani tipa gbegberẽpai na wenepai mbata fu gaani. (Oni gedi Yesaya 55:8, 9.) Gu kura aboro kinaho nanaarũ gundö mbata na kini bagi ru, aguyo awiriki sovura na kini bagi aũvura. Ono tifuo i wiriki gu rengo du rogo Ziazia Kekeapai, i aaria gayo asunge na ki rẽ tipa ka zio bapatiza.​—Yes. 2:4; 2 Kor. 7:1; Gara. 5:14.

¹¹ Andrew nga kpiapai sa dagba agu aboro re. Ho ko gbiati diako awiriki gu rengo ni du tipa Yekova, i adi berã tipa ka mangasunge fuko. Andrew aima kpinyemu gu sunge ko anaamangaha nikerehe, ono ko ambuhe. Tipagine ko ambuhe ti ni? Bambiko gu basunge ko amangasunge rogo re asongoda vura, ono ko aida ka gbata ga Mbori rurupai mbata. Ho ko ambu gu sunge re ni, ko adu na agude beko ue, marã adu beko gbua tooni nga gu narengbe ka dia bete adiwi gbua naako. Kuti gu bipai nga ga aboro, si adu wa ka i ya ‘ũkumbo’ adunga beko wa gu tooni te. Ko atona ka gbata kura sunge na kini kido kuti Yekova. Ho ko asungo ni areme kaa ngera kusayo kuti agu aregbo re, ko nabi gupai abi nzunzu nga anga be Yekova niguruhe te. (Yes. 59:1) Bambiko gupai nga Andrew na diako naraka gu raka du taata, i aima du na momu beyo ka manga sunge kindo ti aregbo dũ. Sangbako nga: “Aregbo nidu kinaho pa marã, bambu, wene kpotose, gbiati gupai nga ani nagbinza ninaaye na bakabangirise furani, ono Yekova nidu dedede barambeda na ani. . . . Ani ini gupai zanga wiri ndundu nga mangasunge fu Yekova nga gu yangara wenepai rengbe boro ka mangaha na si naye na badungu amosoro.”a​—Batu. 12:13.

12. Ginihe si aida oni du nani tipa ka maa ga Mbori rurupai mbatayo rogo gaoni raka? Oni funga agu akpiapai du rogo gaoni dagbarago.

¹² Yesu aya fu gako abawiriki wee: “Ka gaoni idapase du wa tunga musutada, oni ayá fu gi bagangara re, ‘Mo gúari erẽ koyo re;’ si ki guari; a nga pai sa ka gasi roni te.” (Mt. 17:20) Ya mo oni rengbe ka maa ga Mbori rurupai mbata ka si du nga si nika ba roni kurogo kpakaraapai? Ka oni ainongo gupai si aida oni mangihe ya, oni sana aboro rogo dungurati. Zanga kapa, ho i nikaa peka agu apangbanga ni namangi fuyo, si nika fu wasa afu furoni.

Yugo Tambuahe Tipa gu Riahe Nga ga Toro Yekova Afuhe

13. Ho ani afu tirani ni ka manga ga Yekova sunge kakaka, gini kido si aida ani du nani nibipa agu agamunihe nga ga toro?

¹³ Ka oni aabi gaoni momu nga ga mangasunge fu Yekova na nyanyakipa ha, oni duadu na gu kido nga ko nika ngera angerafuo roni rogo borose na rogo toro yo a kina wai ko aangerafuo aRevi. Oni berẽnga kuriipa Davide. Wa ko avura du simbia yo, ko aakido kindi kuti Mbori tipa ko naangerafuo ko. Ani ima rengba a ka kido kuti Yekova zavura ho ani abi gupai ni nga gene berani berewe te. Oni tingidi gupai nga ho Asafa “arimi ni ku rogo ga Mbori kparakpara ziazia ba,” ko aza ka inopai wenengai tipa gupai naafuda ko. (Tam. 73:17) Wakina gure a, si naida ani kido kuti Yekova ko fu gu he furani ani aidaha tipa wa ka ani ruho ka banda gaani pagume naako. Manga ani he wo nika yugo gupai nga ani nabi gu momu du ani nani nga ka mangasunge fu Yekova na nyanyakipaha, ka si vura du nga kina gine mangi rani vurũ. Gure a nika sa gupai nga ani moi Yekova nigaani kparakpara he.

14, 15. Ginipai si aida ani mangihe ho i amanga ariapai ni rogo gu gene ani agirogo veresi mbata ngbaha, na tipagine?

¹⁴ Ya mo oni naakido kuti Yekova ho ko aundo roni ni oni gi tironi na gu “dudungura apai nga ga Mbori” du rogo Ziazia Kekeapai? (1 Kor. 2:10-13) Gupai gu mokedi nangia Petero amangihe ho Yesu agumba gupai ni fu gako abawiriki nga: “Ka oni ari nga pasio Wiri boro ki mbiri kureko ya, unga du nga kpotoroni yo te” nga wene kpiapai furani. Bambiko gupai nga gu kura abawiriki aberẽhe tigayo nga boro Yesu aida i ri pasioko ari na ki mbiri kureko, i agumba gupai nga: “Nyanyaki pai nga gere; da ka gi he?” I ‘akaragatiyo’ ti pekafuoko. Ono Petero agumba gupai nga: “Gbia, ani andú koyo du da ni? Wa du mo du agu apai be ro nga ga nyenye unga.”​—Yo. 6:53, 60, 66, 68.

¹⁵ Petero agianga tiko wenengai na gupai Yesu agumbaha tipa pari pasioko na mbira kureko re te. Ono ko akido kuti gupai nga Yekova du naamangasunge na Yesu tipa ka yugo rengo fu aboro. Ho i amanga ariapai ni rogo gu gene ani agirogo gu yugopai nga ga Ziazia Kekeapai mbata ngbaha, ya mo oni naamanga ome ka ino ndu gupai mangiyo gu ariapai re ti ni? (Snz. 4:18) Agu awirina naadu Beroya yo rogo bambata sa kama agarã “adi pai wenengaĩ ka berã ha, niwisigi Ziazia Kekeapai na uru.” (Amo. 17:11) Wirika ani gayo kpiapai nika sa rani ani bi gaani sunge fu Yekova na nyanyakipaha gbe, naapa du ko nigaani kparakpara he.

Manga Rogatise Sa Kina Rogo Gbia Yo

16. Wai gu rengbe Mbori kadu nigaani kparakpara he nibipa gu rugute du rogo 1 AKorindo 7:39?

¹⁶ Gu kura bangiriba si aida aKristano banda ga Yekova ringbisapai rogoho ku berãyo yó nga mangapai kuti gu rugute du rogo Ziazia Kekeapai nagumba gupai nga aboro mangi rogatise sa “kina rogo Gbia yo.” (1 Kor. 7:39) Badungu aboro nasia gupai nga ka nye zanga manga rogatise kuba gupai nga ka kuo gi ga Yekova rugute re. Yekova nangera wenengai fuo ngbatunga agu aboro re. Ginipai Davide amangihe ho ko adu ni nisako na ka boro adunga ho ka undo ko ya? Ko ayaa: ‘Mi naukaga gi baka bangirise bara bangiriko [Mbori], mi nayugo pa gi fudifudipai fu ko. Ho he namaka torore ni.’ (Tam. 142:1-3) Yeremaya amangisunge fu Yekova niruruko tipa dungu agarã nibakuparanga. Kura aregbo aanidu kinaho ko anaarungo arungo be padu ko nisako. Oni rengbe ka wirikapai tipa gako kpiapai rogo kapita 8 nga ga gu buku nga God’s Word for Us Through Jeremiah.

17. Ginipai wirinarani sa ninakuparanga naamanga ha tipa kaa diabe gu gberarago naye be sungo nisase?

¹⁷ Gu kura wirinarani sa nidee du Amerika yo agumba gupai nga: “Mi aadianga berã ka nye ni nakuparanga te, ka gu wirina kuru ki idi ka diare nga gu ko rẽarẽ, mi diko adia. Navungu re angianga boro ndikidi idapase ya aasadi ka sosoda re tipa mi di kina gu kumba ka kuru. Mi asana ri singia ri aidaha aida aboro bira ri ka mi di kina gu kumba ka kuru gi rogatise kini ndu ka gberã kumbatayo. Fuo bete regbo kusa, wa ri abi gupai nga mi namangasunge amanga, kini ngere angerafuo tire, na kidu adu na ngbarago, ri ambu sosoda re tipa mi mangi rogatise.” Gi wirinarani re, kura aregbo kinaho rago naagberã agbera tiri be sungo nisase. Ri afura tipa gupai ri naamangaha ti agu aregbo re ki ya, “Mi naasada ka kido kuti Yekova. Ka ko mbunga re te.” Ginipai naundo ri tipa ri kido kuti Yekova? Gari karagapai nga: “Kparakpee ima undo re mi niibi Yekova ni ndikidi boro na kini biko nga ko barambeda na mi. Wa duhe nga gu boro nga Bahe Kisusi rogo zegino dunduko nadegatuni adega kuti gi kpee, tipagine ka rago angbanga ti ni tire ya?” Wa du ri naa kido kuti gupai du rogo Ziazia Kekeapai nagumba gupai nga: “Fu he ngba ti dia ha,” sangbari nga: “Mi naasada ka fu tire tipa kaa undo kura aboro, zanga ida gupai nga i mangipai fere mbiko gu undo mi afuhe fuyo. Ho mi aberã gupai ni nga, ‘Ginipai rengbe mi ka mangaha tipa ka undo gi boro re?’ Kpotore yo nahi ahi dunduko be ngbarago.” (Amo. 20:35) Nirengo, Yekova nga gari kparakpara he, na ri nagbia bakere ngbarago be gu momu du ri nani nga kaa mangasunge fuko.

18. Wai gu rengbe oni ka da ni ga Yekova kparakpara he?

¹⁸ Ka ginipai vura kaa manga roni amanga wai vurũ, oni ima rengba ka sa Yekova nigaoni kparakpara he. Wa oni kaa mangaha wo, oni nikadu adu dagba gu gako aboro nga aboro ngbarago. (2 Kor. 6:16, 17) Manga oni he wo rengbe ka sa gupai nga oni du ni ga Yekova kparakpara he a wa gu kura aboro adu bakuru kusayo. (Oni gedi Pa Fu Rugute ni Ue he 32:9, 10.) Kina wai aYisaraere adu ni ga Yekova kparakpara he dagba kura aringara bakuru kusayo, kinawo a rengbe ko ka sa roni nigako kparakpara he na ki ngerefuo roni wenengai.​—Tam. 17:8.

[Gu rukutu kekeapai du bandu kpewaraga yo]

Gaoni Karagapai Nga Gine?

Wai gu rengbe oni ka sa Yekova nigaoni kparakpara he

• nigbata oni ga Mbori ngbi gbiati rurupai mbata?

• nibi oni gu riahe nga ga toro na nyanyakipaha?

• nibanda oni gu ga Mbori zinahe nga oni mangi rogatise kina rogo Gbia yo sa?

[Gu sura du ti kpewaraga 16]

Yekova nada nigaani kparakpara he ka si du nga ani peresipa gako sunge mbatayo.

[Gu sura du ti kpewaraga 18]

Ga Yeremaya kpiapai nangarasa rani gbe