Ya Mo Boro Apenga Ziree Furoni?

PAI ho igira wa gu nga oni ini gupai nga gu boro oni naakido kutini, ní gumba ziree furoni te. Zee ima rengba ka zio roni, watadu oni ima rengba ka zinga singia ka gberã na gu boro re. Pe ziree nagbarasa pagume gbiati ramukporo; dungu amirioni adorari nainga areme be aboro mbiko pe ziree.

Oni berẽnga pa gu gberãrago rengbe oni ka du nani ka oni ini gupai nga boro aima pe ziree furoni tipa Mbori. Kangia oni nga idipase, gu ziree re ima rengba kadu na gbegberẽ sangbanaha kurii roni a wa si adu tipa agi aboro du kusende re:

● “Mi abi tire nga kanisa ima ingisa re.”​—DEANNE.

● “Rago aima gberã tire bambiko i agumba ziree fere nikerehe, na sunge aadunga berewe ti agu amaabangirise gbiati asasa mi adu nani te.”​—LUIS.

Ti gu kura aregbo, oni ima rengba ka bihe nga boro arengbanga ka gumba ziree furoni tipa Mbori te. Mbiko gupai ini oni he tipa Mbori, kina boro avunguroni, pasita, watadu wene bakurearoni naagumbaha furoni nga agu aboro oni akido kutiyo nga ka i penga ziree furoni wa gu sa te. Si rengbe ka du a nga pai kinaho oni aidi kutini tona kinaho oni adu ni kindi nitooni gude. Ya mo oni arengbanga ka ida kuti gupai nga, zavura gupai dungu aboro naidi kutini, si rengbe arengba ka du niziree te? Franklin D. Roosevelt nangia kuru bazogo nga ga Amerika ko aima ida kuti gipai re mbiko ko ayaa: “Anga dogoda bangisapai bara dunguhe rengbe ka saha si da nirengo te.”

Gini he rengbe ka undo roni oni ini singia i aima pe ziree furoni? Ti kura regbo sa, Yesu aya fu Mbori rogo kparakpee yo wee: “Ga pai nga rengo.” (Yoane 17:17) Ii, Fugo Mbori nga Ziazia Kekeapai na agu apai rogoho rengbe ka undo rani ani kpara ziree ti rengo.

Ani manginga sunge na Ziazia Kekeapai si yugu agu aziree bisue aboro agumbaha tipa Mbori. Oni nika bi wai rengbe rengo ka manga wene ariapai rogo gaoni raka yo.