Wene Arugute Tipa Abakuparanga Na Arogotise
“Gumba mi gere . . . tipa gu pai ru aru, ya oni du zezeredi ka manga pa Gbia zanga fudifudi pai.”—1 KOR. 7:35.
1, 2. Tipagine si aida boro gbata agu arugute agbata ti ni nga ga Ziazia Kekeapai nibipa rogotise na zanga manganga rogatise?
BETE apai gbua tooni rogo raka yo ninaaye na bakere ngbarago, gberarago, watadu bakabangirise susi gu bakure du dagba kumba na dee. Rogo gi bangiri ba re, si naida ani sana Mbori tipa ko ngbe furani mbatayo. Ono gu kura nduapai kinaho a si aida ani sana Mbori ti ni tipa ko niingbe furani kumbatayo. Gu Kristano bi gupai nga rago ngba angba tiní ka nye nibakuparanga rengbe ka bi gupai nga agumeni watadu abakureani nasosoda ní tipa ní mangi rogatise. Gu kurani rengbe ka ida ka manga rogatise ono ka ní agbianga gu boro rẽ tipa ní ya. Gu kura aKristano nagbata ga Yekova rugapai tipa ka mbakadatiyo tipa rogatise. Na agu aboro mangi rogatise na abakuparanga nagbiatiyo na aasada nibipa wasiwasi kodaba.
2 Kpara kusayo ti gupai nga agi apai re rengbe ka gbarasapa gaani ngbarago, si rengbe a ka gbarasa gaani pagume na Yekova. Rogo 1 AKorindo kapita 7, Pauro afu arugute fu arogotise na abakuparanga. Gupai ko aida i mangihe nga i ndu kindi kumbatayo kaa manga rurupai, kaa mangasunge fu Yekova na kpotoyo yo dunduko, na ki ne agu apai narengbe ka gbe berãyo. (1 Kor. 7:35) Wa oni kaa makia gi ga Pauro arugute du tipa gi nyanyakipa apai re, oni bingo wai rengbe oni ka mangasunge fu Yekova gbe singia oni nga arogotise watadu abakuparanga.a
Gu Nyanyakipa Diaberã Boro na Boro Amangaha
3, 4. (a) Ginipai rengbe ka manga ti kura aregbo ka si du nga agume watadu abakure sosodi boro tipa ní mangi rogatise? (b) Wai gu si aida ga Pauro arugute undo boro tipa ní du na ruru bipai tipa rogatise?
3 A wa si adu dagba aYudo rogo bambata sa kama agarã, dungu aboro areme nabi rogatise na nyanyakipaha. Ka si du nga paranga watadu degude susi gu regbo si aida ní mangi rogatise ono ka ní amanganga ha ya, agumeni na abakureani natona kaa fu arugute funi tipa rogatise. I rengbe kaa gumba gupai funi nga si naida ní mangi bakere ome tipa ka gbia badiarogatise. I rengbe a ka gumba pa gu degude watadu kumbagude funi i abihe nga ní rẽarẽ. Gu kurapai berewe rengbeyo ka mangaha nga ka manga mbakadapai tipa i gbiatiyo. Gipai re rengbe ka ye naapa zee, ki gbarasa pagume, na ki ye na bakere rungo ku kpotoyo yo.
4 Pauro asosodanga aboro tipa i mangi rogatise watadu i nye zanga mangaha ya te. (1 Kor. 7:7) Rago aima ngba tiko ka mangasunge fu Yekova nibakuparanga, ono wa si avura duwo, ko airisi gu diaberã airisa gu kura aboro amangihe nga ka manga rogatise. AKristano areme nibasasa dunduko du na rengo beyo singia i naida ka manga rogatise watadu i aidanga ka mangaha te. Si aidanga agu akurayo sosodi yó i mangapai sa dagba agu du ue re te.
Mangasunge fu Yekova na Diabese Ho Du Boro ni Nibakuparanga
5, 6. Tipagine Pauro afura ti ni wenengai tipa abakuparanga?
5 Gupai Pauro akehe fu AKorindo naundo rani ani bi gupai nga agu aKristano nga abakuparanga, i rengbe ka mangasunge fu Mbori wenengai. (Oni gedi 1 AKorindo 7: 8.) Wa Pauro avura du nibakuparanga, ko aabingo ho nga pako nanyaki kisusi arogatise wa gu gu kura abarumbatayo rogo akanisa abi tiyo areme te. Kuba gure, ko afura tipa gu momu du be agu abatungusi wene pangbanga nga abakuparanga. Ginihe du nga gu momu re?
6 Gu Kristano nga bakuparanga, ní rengbe ka manga gu sunge rogo ga Yekova riigbu nga gu ka guni nga rogatise arengbanga ka mangaha ya. Pauro adu na bakere momu beko nga kadu ni “ga aGendiria mokedi.” (Rom. 11:13) Oni gedi Amokedi akapita tona ti 13 kuti 20 tipa ka bi wai Pauro gbiati gu kura amokedi naadu naako azaki vovo adagbarago na adungurati rogo dungu aba. Pauro agbiatiko na dungu kpakaraapai rogo gako sunge tungusapai nga gu dungu rani nikaa gbianga tirani nani areme ya. (2 Kor. 11:23-27, 32, 33) Ono Pauro aima ida ka hi agu akpakarapai re dunduko tipa ka undo dungu aboro i da ni abawiriki, na gipai re aye na bakere ngbarago fuko. (1 Tesa. 1:2-7, 9; 2:19) Ya mo ka ko amangi gu sunge re dunduko ka ko adu na dee gbiati aborokporo beko? Wagusa te.
7. Oni funga kpiapai nga ga anakuparanga ue nga aguyo namangisunge na gayo regbo tipa agu apai nga ga Kindo?
7 Dungu agu aKristano nga abakuparanga namangasunge na gayo regbo gbe tipa ka mangasunge Kindo. Awirina ue naraka Bolivia yo du arimoyo nga Sara na Limbania nga anakuparanga andu kurogo gu kura gbaria sa nga gu i atungusanga pai rogoho ya tipa gbanga regbo tipa ka tungusapai yo. Ya mo i ambu gu zingo karaba naadu rogo gu gbaria re si nifudi yó? Sangbayo nga: “Agu ahe duwa radio na terevizioni rogo gu ba re te, sidu, he ho nagbeberã aboro ti gupai ngbatiyo gbe nga gedapai te.” Kura aboro gu gbaria re ayugu gu kuru abuku fuyo nga ga aDezire Yekova nga gu i naakusanga ha berewe ya, ono nga gu aboro aagedaha kindi rogo gu gbaria re. Si aima kpakara fu agu awirina re tipa i ndu kurogo akporo dunduko bambiko agu akporo dunduko i aarimo kurogoho, i agbia aboro rogoho na nyemu rengo. Sosono dee sa agumba gupai fuyo nga: “Wa aDezire Yekova naye ki da fuo rani no, gure nga digido zegino ima mbeda.” Fuo bete regbo, aboro atona kaa ye tipa agu adunguratise nga ga dungurati rogo gu gbaria re.
8, 9. (a) Ginipai naadu berã Pauro yo ho ko aafura ni wenengai kubara abakuparanga yo? (b) Gini amomu du be abakuparanga?
8 Rengo ngaha nga dungu arogotise kinaho nagbia wene sangbanaapai ti sunge tungusapai rogo agu adagbarago du nikpakarakpakaraha. Ono gu kura asunge kinaho agu abazakigene nga abakuparanga amangaha nga gu ka arogotise arengbanga ka mangaha ya. Ho Pauro aake gi gako waraga re ni, ko aima ino gupai nga dungu aba adu kinaho kindi si aida i tungusi wene pangbanga rogoho. Ko aida aboro dunduko gbia ngbarago kina wai a ko agbiaha. Gupai re du nasako ko fura wenengai tipa abakuparanga.
9 Wirinarani sa naraka Amerika yo agumba gupai nga: “Gu kura aboro naberã gupai nga agu aboro amanganga rogatise ya, i agbianga ngbarago te. Ono gupai bi mi he nga ndikidi ngbarago naru kuriipa ga boro wene pagume na Yekova. Wa vura duhe nga agu aboro amanganga rogatise ya nambupa dungu apai, nye nibakuparanga nga wene gamunihe ka boro mangisunge nani ngba wene gene.” Nibipa wai rengbe boro ka gbia ngbarago, ri agumba gupai nga: “Zanga manga rogatise nasa boro ní du na ngbarago, si akanga na gene be boro ti gbia ngbarago te. Mi ima ino gupai nga Yekova nayugo gako beedi nyemuse fu aboro dunduko, singia arogotise watadu abakuparanga.” Ri namangasunge Kindo awere rogo gu ba du na bakere zingo abatungusi wene pangbanga nga ga Kindo rogoho. Ka si du nga oni nga abakuparanga, ya mo oni rengbe ka mangasunge na gaoni ranirii ka kiiso gaoni sunge nga ga yugo rengo fu aboro? Oni rengbe arengba a ka bi gupai nga nye nibakuparanga nga beedi gamunihe be Yekova.
Aguyo Naaida ka Manga Rogatise
10, 11. Wai gu Yekova aundo agu aboro naida ka manga rogatise ono ata gbianga gu boro rẽ tipa yó ya?
10 Tifuo sungo ni abakuparanga tipa bete regbo, dungu ga Yekova ruru amoyambu nadiaberã tipa ka gbata badiarogatise. Wa i naima ino gupai nga si naida boro duadu ho ka nungusa yó rogo gipai re, i naasana Yekova tipa ko undoyo i gbia gu badiarogatise rẽarẽ.—Oni gedi 1 AKorindo 7:36.b
11 Ka oni aida ka manga rogatise na gu boro namangasunge fu Yekova na mbisimoni dũ, oni gumbaha fu Yekova rogo kpee yo. (Frp. 4:6, 7) Ka si vura du nga oni nika gbata gu boro re tipa gbanga regbo vurũ, ka rago gberẽnga tironi ya. Oni kido kuti gu gaani Mbori nga boro nyemuse ko undo roni oni dibe gu gberarago naye be sungo nisase re.—Eb. 13:6.
12. Tipagine si aida boro mangi bakere wisigopai amanga ti ni mbata ka kura boro gumbapa rogatise funi?
12 Ginipai rengbe ka manga ka si du nga wirina nikumba nga gu ní adunga wenengai rogo toroyo ya watadu gu boro angianga idipase ya gumbapa rogatise fu wirina nidee? Ka si mangi wo, si naida oni tingidi gupai nga, gu gberarago ka gbia roni ti manga gbegberẽ diaberã, si ka susi gu gberarago nagbia roni be sungo nisase awere. Na fuo manga oni rogatise, ka gaoni rogatise vura gberã agbera wai vurũ, oni duwa ka oni kakuti gaoni badiarogatise nyeanye kindi. (1 Kor. 7:27) Ka oni mbunga bakere nyemu manga rogatise si sa roni oni mangi gu diaberã oni nika bira tironi abira ti ni kumbatayo ya.—Oni gedi 1 AKorindo 7:39.
Oni Mbakaditironi Tipa Rogatise
13-15. Gini ngbatunga apai si aida agu aboro naberãpa rogatise fura tipaha mbata fu rogatise?
13 Wa Pauro avura gumba gupai nga si ngba gbe boro mangisunge fu Yekova nisani, ko abingo pa agu aboro namangi rogatise kusende te. Kuba gure, gu gako rugute ga Mbori toro adu kugiipa kehe re naundo arogotise tipa i dibe agu apai nagbia arogotise na gayo rogatise ki nyeanye kindi.
14 Gu kura aboro kinaho si aida i aria gayo bipai aria tipa wai i abi gupai nga gayo rogatise nikadu kumbatayo. Ho i ainido tiyo ni, i rengbe ka berã gupai nga gu nyemuse du dagbayo, si tigaha kia. I rengbe ka berã gupai nga gu ngbarago du dagbayo, boro aagbianga ha mbata te. Fuani, i ki tona gayo ramukporo na gu berã nga he ho nika dia gayo ngbarago kusayo te. Runga gu bipai re te. Rengo, gu nyemuse du dagba kumba na dee rengbe arengba ka ye na bakere ngbarago, ono anga si nga gupai rengbe ka mbakada yó tipa agu apai ninaagbia arogotise naabayo te.—Oni gedi 1 AKorindo 7:28.c
15 Dungu aboro kina ngbayo ninaazera fuo mangayo rogatise mbiko gupai nga i agianga tiyo na gayo badiarogatise riipa nyanyakipa apai te. Zanga giatise rengbe ka kura riipa sunge na marã, zambuasitise, gu ba si aida i raki rogoho, na bara wai si aida i naandu kaa bi agumeyo, gbiati agu asinoyo nga gu rengbe ka imisa gayo badiarogatise. Ho i ainido tiyo ni na gu berã nga ga rogatise, i rengbe ka berã gupai nga ndupai ho tipa i fura tipa agu apai re te, ono ka i afuranga tipaha ya, si rengbe ka ye na dungu akpakarapai kurogo gayo ramukporo gizo kumbatayo. Sidu, agu aboro naberãpa rogatise, si wenengai tipa i fura tipa agu apai re mbata fu mangayo rogatise.
16. Tipagine si aida arogotise gi tiyo agia ti ni tipa wai i nikaa diabe agu akpakarapai nagbiayo?
16 Tipa kadu na ngbarago na kidu na diabese rogo gayo ramukporo, si naida arogotise kodibee akoda ka diabe agu kpakaraapai nagbiayo. Si naida i gi tiyo agia tipa wai i nikaa ruga awiriyo na wai i nikaa ngerafuo gbinza avunguyo. Si aidanga i mbu agu akpakarapai nga ga ramukporo si kparaka yó te. Ka i amangapai kuti agu arugute nga ga Ziazia Kekeapai, i nika nyasa anyasa riipa agu akpakarapai nagbiayo, ki hi agu kaa guaringa ya, na ki raki wa sa na ngbarago.—1 Kor. 7:10, 11.
17. Gini ‘ahe nga ga zegino’ arogotise abakabangiriyo tipaha?
17 Pauro agumba kurapai tipa rogatise rogo 1 AKorindo 7:32-34. (Oni gedihe.) Arogotise “naberã pa agu apai nga ga zegino.” Agu ahe re nakoda riahe, rokoo, bambu, na gu kura ahe. Tipagine i abakabangiriyo ti ni tipa agi ahe re? Ho du wirina ni nibakuparanga, ní nafu tiní gbe ka manga sunge tungusapai. Ono ho da ní ni ni kumbakudee, si naida ní di regbo adia na diani. Kina gu bangisapai re a du tipa diakumba. Yekova ima ino gupai nga i dunduko naida gayo badiarogatise du na ngbarago. Ko ima ino gupai nga tipa ramukporo du na ngbarago, si naida i mangisunge amanga na bete gu regbo i anaadiaha mbata kaa mangasunge fuko tipa ka mbakada gayo ramukporo.
18. Gini ngbatunga ariapai nibipa dia regbo na abakure si aidaha tifuo manga rogatise?
18 Ono gu kurapai kinaho berewe. Ka si du nga i rengbe arengba ka kpara bete gu regbo i anaadiaha mbata kaa mangasunge fu Yekova tipa ka mbakada agu apai nga ga ramukporo, anga kinawo si aida i mangihe a na agu apai i anaamangaha mbata tipa kaa gbia ngbarago te? Ginipai ka mangi ka si du nga kumbakudee vura dia dee ní kini di bakere regbo kindi gene ambaro yo na abakureani, watadu diakumba vura dia kumba ri nidi bakere regbo kindi kina gene agu apai yo ngba tiri na anakureari? Si rengbe ka ba gberarago ti kura boro, ní ki bi tiní nga gani badiarogatise akpingo nyemuni te. I rengbe ka ne gi gbegberẽ sangbanapai re ka i nyakasi gayo rogatise wa kumba na dee.—Ef. 5:31.
Yekova Naida Gaani Mangapai Du Nigigirihe
19, 20. (a) Tipagine si aida arogotise bandatiyo abanda ti ni ti wasiwasi kodaba? (b) Gini gbegberẽpai rengbe ka manga ka arogotise asungongo rogo bangisa ba sa ya tipa gbanga regbo?
19 Ga Yekova amoyambu nadia berã tipa ka banda gayo mangaapai niʹiriirihe bangiri Yekova. Agu akurayo ninaadia berã tipa ka manga rogatise tipa ka ne wasiwasi kodaba. Ono tie, rogatise abandanga boro ti wasiwasi kodaba te. Ti agu aregbo i aakeka Ziazia Kekeapai ti ni, kina agu aboro naaninye rogo nyanyaki gbata naanigbia bandahe. Gu boro naanikuru kusayo na ki gbia tiní na akare, i ani rogo ahe beni dunduko watadu ki imi ní. Wakina gure a, arogotise rengbe ka banda tiyo sa be pa wasiro ka i nye kina rogo gu ngbanda nga ga kodaba Baenge pa rogatise asigiraha fuyo.
20 Pauro afura tipa gu ngbanda re rogo 1 AKorindo 7:2-5. Kina diakumba sa du na gu momu beri nga ka kodaba na kumbaari; na kina kumbakudee sa du na gu momu beko nga ga kodaba na diako. I dunduko si aida i mangi gupai “ru,” si aidanga i gino gayo badiarogatise te. Ono tie, kura kumbakuadee na dereakumba kinaho nadia bagbanga regbo kusayo ti abadiarogatise ku gene ongoda yo watadu gene sunge-marã yo na kini gino yó ti kodaba. Oni berẽnga pa gu gberarago ka oni du nani ka si du nga gaoni badiarogatise zi ti ga Satana gbina mbiko “zanga rugatise” ki mangi bäri. Yekova nafu maku fu agu abariikporo nangerafuo gayo aborokporo zanga maa gayo rogatise ngbapai.—Tam. 37:25.
Agu Amaku Du ti Giasangba Agu Arugute nga ga Ziazia Kekeapai
21. (a) Ginipai du agu adiaberã ti ni du tipa rogatise watadu nye zanga manga rogatise nikpakarakpakaraha ka mangaha? (b) Ginipai du agu arugute ti ni du rogo 1 AKorindo kapita 7 na nyanyakipaha?
21 Agu adiaberã du tipa manga rogatise watadu nye nibakuparanga dagba gu nyanyaki adiaberã boro amangaha. Singia oni diberã ka manga rogatise watadu ka nye nibakuparanga, oni duwa ka oni gbiatironi na akpakarapai mbiko aboro dunduko du na zangarengba. Wa vura duhe nga Yekova nafu maku afu fu gako aboro, kura aregbo kinaho rago agbera tiyo mbiko agu apai namanga yó rogo gayo raka yo. Ono gu ga Pauro arugute du rogo 1 Akorindo kapita 7 rengbe ka undo rani ani dibe agu akpakarapai re. Singia oni nga arogotise watadu oni nga abakuparanga, oni dunduko nika ‘manga ha wenengai’ bangiri Yekova. (Oni gedi 1 AKorindo 7:37, 38.)d Gu sásá nga ka manga gupai nasa ngbarago ti Mbori nga gu nyanyakipa sásá rengbe boro ka da ti ni. Ka oni amanga gupai ngba tiko, ko nika undo roni oni nimangi sonakumbatayo kindi nisungudi raka rogo gako vovo zegino. Rogo gu gako vovo zegino re, gu bakure nikadu dagba adee na akumba, si adunga na fudifudiapai rogoho wa gu du areme te.
[Gu rukutu kekeapai du bandu kpewaraga yo]
a Oni bi gu buku nga The Secret of Family Happiness, kapi. 2, agenewaraga 16-19.
b Rogo gi kekeapai re, gu fugo mangiyo sunge nani nga “bakuparanga,” si nakoda akumba na adee dunduko.
c Ruru sasa gu veresi re nga: “Ono ka boro aberãha ya ní amanganga pa ngasu ní wenengai te, ka ní susi rago paranga ní, si ki du nga ní mangi rogatise, ní mangi gu ngba tiní; ní ainganga pai te; i rogo tiyo.”—New World Translation of the Holy Scriptures.
d Ruru sasa agu averesi re nga: “Ono guni naru nyanyakii kpotoniyo, ka dingisoro adunga tiní ya, ono ní kidu na tandu manga gupai ní aberãha na ní ki diberã kpotoniyo ka nye ningasuni, ní namangapai wenengai. Wa du he were tie, guni nafu ngasuni sa rogatise, ní namanga wenengai; ono guni afunga ha ya, ní namanga wenengai susi.”—New World Translation of the Holy Scriptures.
Oni Rengbe ka Karagapai Sa Agi Asanahe Re?
• Tipagine si aidanga boro sosodi kurani ti ni ní mangi rogatise ya?
• Wai rengbe oni ka mangasunge fu Yekova na gaoni regbo ho du oni ni ni abakuparanga?
• Wai gu rengbe agu aboro nainido tiyo na gu bera nga ga rogatise ka mbakadatiyo tipa agu akpakarapai nga ga rogatise?
• Tipagine adunga ha ti ni nga manga rogatise rengbe ka banda boro ti wasiwasi kodaba ya?
[Gu sura du ti kpewaraga 16]
Agu aKristano nga abakuparanga namangasunge na gayo regbo ka kiiso gayo sunge tungusapai nagbia ngbarago
[Gu sura du ti kpewaraga 18]
Gini ngbatunga ariapai si aida arogotise mangihe tifuo manga rogatise?