Oni Wirikipai Rogo Fugo Mbori Yo

Wai ga Mbori aNdiko Aundo Rani?

Gi kekeapai re nasakapai tipa agu asanahe dungu aboro naamakiaha berãyo yo na si nayugobara akaragapai kuti agu asanahe re rogo Ziazia Kekeapai. ADezire Yekova nikadu na ngbarago ka wisigo agi akaragapai re na oni.

1. Tipagine si aida ani gisangba Mbori ti ni?

Si niwenepai ani gisangba Mbori​—mbiko ko nakusi rani. Zavura Yesu, ko anaagia sangba Mbori ti aregbo dũ. (Yoane 6:38; Yugoti 4:11) Ga Mbori andiko nasa rani ani yugu gupai nga ani nakpinyemuko akpi.​—Oni gedi 1 Yoane 5:3.

Ga Yekova Mbori andiko dunduko du niwenehe tipa rani. Si nayugo gu bawene gene raka furani awere na wai rengbe ani ka gbia nyenye amosoro kumbatayo.​—Oni gedi Atambuahe 19:7, 11; Yesaya 48:17, 18.

2. Wai ga Mbori andiko aundo kpotorani?

Gu ga Mbori ndiko nazahe ti kpibuda nabanda rani be gbegberẽ akaza na béno. Bakere mbirabuda angbanga te, si rengbe ka sa boro ní mangi gbegberẽpai. (Asanza 23:20, 29, 30) Yekova asoganga mbirabuda te, ono ko naida ani mbirihe ku gene.​—Oni gedi Atambuahe 104:15; 1 AKorindo 6:10.

Yekova naza rani ti ngbaduse, bakere zinga, gbiati gbegberẽ aberã. Ka ani mangisunge na agi arugute re, ani banda kpotorani abanda.​—Oni gedi Asanza 14:30; 22:24, 25.

3. Wai ga Mbori ndiko narengbe ka banda rani?

Ga Mbori ndiko nazahe ti kodaba na gu boro angianga gaani badiarogatise ya. (AEbere 13:4) Agu arogotise nairisa gi ndiko re, i nadu nibandabanda yó na awiriyo kidu wenengai a. Ono tipa agu aboro nakodaba na agu aboro angianga gayo abadiarogatise ya, sangbanaha nga i nadia akaza, mbutise, zuũ, bakere gberarago, aguyo nanye na agude zanga gayo abadiarogatise.​—Oni gedi Asanza 5:1-9.

Ka ani ne agu apai rengbe kadu furani ni asada ka kodaba na gu boro angianga gaani badiarogatise ya, ani banda gaani pagume abanda na Mbori. Ani imisinga kura aboro te.​—Oni gedi 1 ATesaroniko 4:3-6.

4. Wai pa yugo ani irisa tipa unga aundo rani?

Agu aboro nayugo irisa tipa gu gamunihe Mbori nafuhe fuyo nga unga, i nagbia undo agbia ho i ambu agu apai ni duwa vu gundö na kura gbegberẽ apai namaa ga boro raka ngbapai. (2 AKorindo 7:1) Mbori nabi unga gu gude du kindi rukumbu yo na nyanyakipaha. (Gate 21:22, 23) Sidu, si aidanga ani ba gude niwia te. Agu aboro nabi ga Mbori bipai tipa raka na nyanyakipaha nabanda tiyo basunge yo, kporo, na ho i aora ni na tarambiri. (Pa Fu Rugute ni Ue he 22:8) Kurigure, i anginga agu ambaro namaa ga boro raka ngbapai te, mbiko unga nga gamunihe be Mbori.​—Oni gedi Atambuahe 36:9.

5. Wai pa bi ani kure niziaziaha aundo rani?

Kure niziaziaha bambiko Mbori ayaa si narukuba unga watadu mbisimo nga ga rakiraki he. (Bambata Pai 9:3, 4) Gu ga Mbori ndiko nayugo nyakapa kure na unga, si naundo rani aundo. Wai du si aundo rani? Si nasa gupai nga i mbupai furani ti gaani ingaapai.​—Oni gedi Pa Amotumo 17:11-13; AEbere 9:22.

Kure Yesu adu ninyanyakipa ha bambiko ko adu nirengberengbe ko. Yesu ayugupa gu undo naadu ti kureko fu Mbori nga gu naarukuba ungako. (AEbere 9:12) Gu kureko nauka re nasa gupai nga ani duna maabangirise tipa nyenye unga.​—Oni gedi Matayo 26:28; Yoane 3:16.

Ka oni aida ka ino kura apai tipa gipai re, oni bi kapita 12 na 13 nga ga gi buku re, si nga gu buku aDezire Yekova akusaha.