Oni Ima Rengba ka Du na Ngbarago Rogo gu Kporo Du na Aidipase Nibakiakia

“Na mo aina waĩ, kumba, si ngia mo abatasa diaro?”—1 KOR. 7:16.

ONI RENGBE KA GBIA AKARAGAPAI?

Ginipai rengbe aidipase ka mangaha tipa zereda du rogo gu kporo du aboro rogoho na apambori nibakiakia?

Wai rengbe Kristano ka undo agu agumeni aidanga na rengo ya i dihe kugume?

Ginipai rengbe kura aboro ka mangaha tipa ka undo agu awirinayo naraka rogo agu akporo du aboro rogoho na apambori nibakiakia?

1. Pa dia boro gu pangbanga nga ga Kindo kugume rengbe ka du na gini sangbanaha kurii gani aborokporo?

HO YESU akedi gako amokedi ni ti kura regbo sa, ko ayaa fuyo: “Wa oni ka ndu, oni ta tungusa pai, niya, ‘Gu ngbi nga ga ngbangbaturũ si mbedi.’” (Mt. 10:1, 7) Gi wene pangbanga re arengbe ka ye na zereda gbiati ngbarago fu agu aboro ka dihe kugume na nyanyakipaha. Ono tie, Yesu arugu gako amokedi nga dungu aboro nika soga gi gayo sunge tungusapa Kindo re asoga. (Mt. 10:16-23) Gupai igirã aigirã gbe, si nga ho boro sa dagba aborokporo asoga gu pangbanga ni nga ga Kindo.—Oni gedi Matayo 10:34-36.

2. Tipagine rengbe ani ti ni ka yawee, agu aKristano du rogo agu akporo du aboro rogoho na apambori nibakiakia rengbe arengba ka gbia ngbarago?

² Ya mo agu apekefuo Yesu du rogo agu akporo du aboro rogoho na apambori nibakiakia arengbanga ka gbia ngbarago te? Oó! Wa vura duhe nga gu rungosiro naye be aborokporo rengbe arengba ka du niʹiigirã ha ti kura aregbo, anga wo duhe dedede te. Na gu rungosiro naye be aborokporo anyenga anye kindi te. Gbe, si naru kuriipa wai agu aidipase re akaragapai sa agu azanga giatise nakura dagbatiyo na gayo aborokporo. Kurigure, Yekova naafu maku afu fu agu aboro du niruruyo fuko, na kini sayo i du na ngbarago apai ki vura du nigbegberẽhe fuyo vurũ. Aidipase rengbe ka du na ngbarago kina gu (1) ka i asadatiyo tipa kaa raka rogo pazereda na gayo aborokporo na (2) ka i asadi kaa undo gayo aborokporo i idi na ndikidi irisombori.

ONI MANGI OME TIPA ZEREDA DU KPORO

3. Tipagine si aida gu Kristano du rogo gu kporo du aboro rogoho na apambori nibakiakia mangi ome tipa zereda du kporo?

³ Tipa gu tunga nga ga rurupai rengbe ka kusa nzunzuhe dagba aborokporo, si naida na zereda. (Oni gedi Yakoba 3:18.) Ka si vura du nga ga Kristano aborokporo nani rogo ndikidi irisombori te, si naida ní mangi ome amanga tipa zereda du kporo. Wai rengbe ní ka manga gupai re?

4. Wai rengbe aKristano ka bandapa zereda kpotoyo yo?

⁴ Akristano du wa ka i bandapa gu zereda du kpotoyo yo. Gipai re naida na kparakpee nga gu rengbe ka ye na “gu zereda nga ga Mbori” adunga digidoho ti ni ya. (Frp. 4:6, 7) Ngbarago gbiati zereda naye mbiko dia ani gu inohe nga ga Yekova gbiati manga agu arugute nga ga Ziazia Kekeapai. (Yes. 54:13) Manga agu asunge du rogo dungurati gbiati tungusapai kakaka na nyanyakipaha ka ani aida kadu na ngbarago gbiati zereda. Agu aidipase naraka rogo gu kporo du aboro rogoho na apambori nibakiakia rengbe arengba ka manga agu sunge nga ga aKristano. Nikpiapai, oni bingo gupai du tipa dee kumbaari arungosi ri nikerehe nga Enza.a Ri naandu ku gene tungusapai yo kina fuo nyasa ri agu asunge nga ga kporo. Enza ayaa, “Yekova aima fu bakere maku fere ti agu aregbo dunduko mi aʹasada tire tipa ka ndu ka fura na aboro tipa wene pangbanga.” Ngbatunga agu amaku re naye na zereda, wasa, gbiati ngbarago.

5. Gini kpakarapai agu aidipase du rogo gu kporo du aboro rogoho na apambori nibakiakia agbiatiyo nani, na gini undo du ho tipaha?

⁵ Si naida ani mangi bakere asadatise tipa ka du rogo pazereda na agu agumerani adunga na ani ti idapase ya. Si ima rengba ka ye na kpakarapai mbiko agu apai i aida ani mangihe, si ima rengba ka tagbagatihe na gu bangua arugute nga ga Ziazia Kekeapai. Pa ka ani nyanyaki kuti gu ruru arugute nga ga Ziazia Kekeapai rengbe arengba ka ba gberarago ti beteyo, ono manga ani he wo rengbe ka sa gupai nga zereda du dagba rani naayo kumbatayo. Kina rengo ngaha nga, ka ani basa manga gupai i aidaha baraho si akuonga gu bangua arugute nga ga Ziazia Kekeapai ni ya, si rengbe arengba ka ye na kpakarapai dagbarani naayo. (Oni gedi Asanza 16:7.) Ho du ani ni rogo kpakarapai, ngbaha angba ani gbata agu arugute nga ga Ziazia Kekeapai rogo agu abuku nga ga “kangara moyambu” na be abaakumba.—Snz. 11:14.

6, 7. (a) Tipagine kura aboro naasoga gu gayo aborokporo ti ni nawisigo Ziazia Kekeapai na aDezire Yekova? (b) Ginipai rengbe gu boro nawirika Ziazia Kekeapai watadu gu ní nga Kristano ka mangaha ka gani aborokporo asoga ní?

⁶ Tipa zereda du dagba aborokporo, si naida i naakido kuti Yekova na kini wisigi agu aberã du agu agumeyo nani adunga naayo ti idapase ya. (Snz. 16:20) Zavura agu aboro nawirika Ziazia Kekeapai nivovoho, i rengbe arengba ka du na rubangirise rogo gi bangiriba re. Gu kura arogotise kinaho arengbanga ka ká na gayo abadiarogatise ti wisigo Ziazia Kekeapai ya. I rengbe ka bihe nga si niwenehe tipa gayo aborokporo. Ono tie, aguyo rengbe ka zinga azanga. Easther du awere nidezire Yekova agumba gupai nga ri “azingi nikerehe” ho kumbaari atona wisigo Ziazia Kekeapai ni na aDezire Yekova. Ri ayaa: “Mi anaabafa gako awaraga kusayo watadu ka zokoda ha.” Howard naaká na diako mbata ti wisigi Ziazia Kekeapai ayaa: “Dungu akumbakuadee nagunde nga i nika nanga adiayo i rimi kurogo sangisangi pambori. Ka kumbakudee aberã gupai nga kerepai rengbe arengba ka gbia diani, ní rengbe arengba ka zinga.”

⁷ Kangia gu boro nawisigo Ziazia Kekeapai, gani badiarogatise aidanga ní niwisigi Ziazia Kekeapai te, si naida i undo ní ka ní mbunga wisigo Ziazia Kekeapai ya. Dedede, ní rengbe ka nyasa riipa akpakarapai ka ní du nibayee ní na kini yugu irisa fu gu gani badiarogatise adunga nani ti idapase re ya. (1 Pet. 3:15) Howard ayaa, “Mi na ngbarago nga diare adu nibayee ri zanga zinga!” Diako ayaa: “Howard aaidanga mi wisigi Ziazia Kekeapai te. Ko ayawee i nananga rire yo. Kuba gupai nga mi sakipai naako, mi aidihe fuko nga gako pai rengbe arengba ka du nirengo, ono mi abingo gu gene i ananga re ngbaha te. Mi aya fuko ko gedi gu buku nga gu mi aawisigopai rogoho. Fuo geda ko ho, ko arengbanga ka tikango na gupai mi aagumbaha te. Gipai re aima zio ngbadukoyo.” Si ngbaangba ka tingidi gupai nga, gu badiarogatise angianga ndikidi idipase ya, ní rengbe ka bihe nga gani badiarogatise aberãnga pani berewe te watadu ní naida ka mbu ní ho ní andu ni ku gene agu sunge yo nga ga aKristano, ono gani badiarogatise rengbe ka fura funi rogo nyemuse na weneringise tipa ka dia gu bakabangirise re tiní kusayo.

ONI UNDOYO I DI RENGO KUGUME

8. Gini rugute Pauro afuhe fu agu aKristano adunga gayo abadiarogatise naayo ti aidipase ya?

⁸ Pauro arugu aKristano nga ka i mbunga gayo badiarogatise tipa gupai gbua nga idipase nga ní te ya.b (Oni gedi 1 AKorindo 7:12-16.) Ka gu idipase re moi gupai ku berãni yo nga gani badiarogatise ima rengba kada ni idipase rogo gu kura uru sa, si rengbe ka sa ní ní bandapa gani ngbarago wa vura duhe nga ní naraka rogo gu kporo du aboro rogoho na apambori nibakiakia vurũ. Ono ka ní aʹasada ka tungusapai fu gani badiarogatise adunga nani ti idapase ya, si naida ní du na rubangirise nibi gu kpiapai naye re.

9. Ho ani afura ni riipa Ziazia Kekeapai na gu gaani borokporo adunga na ani ti idapase ya, tipagine si aida ani du ti ni na rubangirise?

⁹ Jason adu na bakere ngbarago ho ko atona wirika rengo ni nibambataha. Ko ayaa: “Mi aaida ka fura na aboro dunduko tipa rengo.” Ho bawisigi Ziazia Kekeapai aino gupai ni nga gupai ní awirikaha nga rengo, ní rengbe ka du na ngbarago na kini idi ka fura tipaha ti aregbo dunduko. Ní rengbe ka kpinyemu gupai nga agu agumeni ainongo rengo ya, i dihe kugume nibasa, ono i arengbanga ka mangaha wo te. Sangbana gu ngbarago Jason adu nani tipa rengo angia gine na diako? Sangbari nga, “Gene aadunga bere ka mbira kandara ime beko te.” Dee sa nadi rengo kugume agarã 18 fuo kumbaari ayaa, “Mi aida ka wirika rengo yeye.” Kangia oni nawisigo Ziazia Kekeapai na gu boro gani badiarogatise aidanga na rengo ya, ngbaha angba nga oni asadi dedede ka yugo wai rengbe ní ka fura na gani badiarogatise rogo birĩ yo tipa Ziazia Kekeapai. Moize ayaa: “Gi yugopai ná wa mai, gi fura tí wa ndomo, wa moromoro mai ku ri wesewese nvuo, wa mikamika mai ku ri banambu.” (Pa Rug. 32:2) Ka ani aagumba bete agu afugo nga ga rengo funi ngba wene gene na ti wene regbo, si ngba ti kusuko dungu apai funi.

10-12. (a) Gini rugute Petero afuhe fu agu aKristano adunga gayo abadiarogatise naayo ti idapase ya? (b) Wai nawiriki Ziazia Kekeapai sa awiriki mangasunge na gu rugute du rogo 1 Petero 3:1, 2?

¹⁰ Petero afu arugute fu gu dereakumba nga aKristano naraka rogo agu akporo du aboro rogoho na gayo apambori nibakiakia. Ko akepai nga: “Oni rá fu kina akumbaroni; ya ka ngia agu yo aida nga sangba Mbori ya, i aye ka ida pa ko mbiko gaoni mangaapai. Si arengba nga oni gumba fugo te; wa i nabi gaoni rurupai du na gunde ti ni.” (1 Pet. 3:1, 2) Diakumba rengbe ka sa kumbaari ko idi na rengo kina gu ka ri agiasangbako na kini fu irisa fuko ka ko vura kaa manga ri amanga gbegberẽ vurũ. Teketeke a, gu kumbakudee nga idipase, si naida ko du na asino Mbori ti ko na kini zogo gako aborokporo rogo nyemuse ka si vura du vurũ nga diako namanga ko amanga gbegberẽ.—1 Pet. 3:7-9.

¹¹ Badungu agu akpiapai du areme nayugo ndu gupai ngba mangapai ti ni ringbisihe kina kuti ga Petero arugute. Oni bingo gupai naadu tipa Selma. Ho ri atona wisigo Ziazia Kekeapai ni na aDezire Yekova, kumbaari nga Steve aadunga na ngbarago te. Ko nakusaha niya, “Mi atona kaa zinga, kaa kpihe, na kini gunde.” Selma naya, “Zavura mbata fu mi tona wirika rengo, raka na Steve aima kpakara. Ngbaduko adu wakina ngbadi-gundö. Ho mi atona wirika Ziazia Kekeapai ni, si agarakaha gi sinoko re agaraka berewe.” Ginipai naye na ariapai?

¹² Selma natingida gupai ri awirikihe be gu Dezire Yekova nayugupai furi. Selma naya, “Rogo kura uru sa, mi aaidanga ka wirika Ziazia Kekeapai te. Gu yuru nadumbata fu gu uru re, Steve ata re ho mi aida ni ka gumba rengo fuko tipa kurapai sa, ka rago angbanga tire na gupai re ya. Fuo mi gumba gupai namangi re furi na gu bipai mi adu nani, ri aya fere mi gedi 1 AKorindo 13:4-7. Fuo geda mi he, mi atona ka berã nga, ‘Pai ho dagba gi weneapai re Steve amangingo ho fere te.’ Ono ri asana re na gu sanahe naasa re mi berẽ kia ti gu mi adu nani, ri asana re ki ya, ‘Apai wai dagba gi weneapai nga ga nyemuse re mo amangaha fu kumbaamo?’ Gimi karagapai angia, ‘He ho dagbaha yo mi amangaha te mbiko sinoko ima kpakara.’ Ri aya fere rogo zereda yo wee, ‘Selma, da naida ka da ni Kristano ane? Mo watadu Steve?’ Fuo ruga mi tire na gupai nga si naida mi aria gi berãpai, mi akpari fu Yekova tipa ko undo re mi tona ka kpinyemu Steve. Apai atona kaa ariatihe tooni tooni.” Fuo susa agarã 17, Steve adi rengo kugume.

WAI RENGBE GU KURA ABORO KA UNDO?

13, 14. Wai rengbe kura aboro rogo dungurati ka undo agu aboro naraka rogo gu kporo du aboro rogoho na gayo apambori nibakiakia?

¹³ Kina wai zezeredi mai naana kurii sende tipa ka tuda rukuruku ahe si kuru, dungu agu aboro du rogo dungurati naundo agu aKristano naraka rogo agu akporo du aboro rogoho nikparakakparaka yó i du na ngbarago. Elvina du Brazil yo ayaa, “Gu nyemuse awirinami adu nani koyo du mi ni nangia gu he naundo re mi ru nyanyaki rogo rengo yo.”

¹⁴ Ka awirina rogo dungurati du na weneringise na kini kpinyemu gu boro adunga rogo rengo yo ya, si rengbe arengba ka aria ngbaduniyo. Kumbakudee sa Nigeria yo nagi rengo fuo diako agarã nasusi 13 ayaa: “Rogo uru sa, ani aandu nunguro na Dezire Yekova sa gako tarambiri ki gberẽ gene. Ko agbata aDezire Yekova rogo gu dagbarago re, na agu aDezire Yekova re ki di rani kugume ani ki ra kina kpuyo yó. I angerefuo rani wakina agu aboro ani aima inido tirani naayo mbu rani rukutu. Si asa re mi rugutire naapa gu nyemuse nga ga aKristano diare adigi nigumbapaha fere.” Diakumba sa ringara aNgirisi yo nagi rengo fuo agarã 18 fuo gia kumbaari rengo ayaa: “ADezire Yekova anaayamba rani ani ye ka kaa ngba be riahe naayo. Mi aniidu na ngbarago ti aregbo dunduko.”c Kura kumba naada a nidezire Yekova rogo gu bangisa ringara re ayaa: “Awirina anaaye aye kaa bi rani, watadu i anaayamba rani ayamba ku kpuyo yo, na ani abi gupai nga i naberãpa rani aberã. Na gipai re adu niyuguyuguhe gbe ho mi adu ni na kaza bambungua yo, dunguyo nanaaye ka bi re.” Ya mo oni rengbe ka gbata agene tipa ka yugo ngbatunga nyemuse wa gure fu agu gumeroni adunga na oni rogo rengo yo ya?

15, 16. Gini he rengbe ka undo Kristano ní bandapa gani ngbarago ka kura gani aboro vura du vurũ ni agu aboro adunga nani ti idapase ya?

¹⁵ Kina rengo du ngaha nga, anga gaani abadiarogatise, agude, avungurani, watadu gu kura agumerani dunduko nika dia rengo kugume te, ka ani vura dia kina dungu agarã kuti manga weneapai fuyo na kini tungusipai fuyo rogo birĩ yo vurũ. Aguyo kinaho nyemuhe nika dunga tiyo ya watadu nika nye kindi kuti soga rani. (Mt. 10:35-37) Ono tie, ho aKristano ayugo asinombori ni, si rengbe kadu na wene sangbanaha kuriyo. Kumba sa naadunga mbata ni idapase ya agumbapai ki yaa: “Ho gu badiarogatise nga Kristano atona kaa mangasunge ni na ngbatunga gu wene asino re, ní arengbanga ka ino wai du sangbanaha na gu badiarogatise angianga idipase ya te. Ka oni mbunga undo gaoni badiarogatise ya.”

¹⁶ Ka si vurangia gumeroni aidanga na rengo te, oni rengbe arengba kadu na ngbarago. Wirina sa namangi ome tipa agarã 21 zanga kumbaari gi rengo ayaa: “Manga gupai nafu ngbarago fu Yekova, kakuti ruru mangapai, gbiati nyakasa tire rogo toro yo nga agu apai nasa re mi naabandapa gimi ngbarago. Manga agu asunge nga ga toro, wisigopai nisase, nduge kuba adunguratise yo, tungusapai, gbiati undo kura aboro rogo dungurati nga agu apai nambedisa re koyo du Yekova ni na kini ngarasi re.”—Snz. 4:23.

KA OMERONI BATINGA YA!

17, 18. Wai rengbe Kristano ka du na maabangirise zavura rogo gu kporo du aboro rogoho na gayo apambori nibakiakia?

¹⁷ Kangia oni nga ruru Kristano naraka rogo gu kporo du aboro rogoho na gayo apambori nibakiakia, ka omeroni batinga ya. Oni tingidi gupai nga, “Yekova ambú nga gako aboro te, mbiko rimoko du ni bakere he.” (1 Sam. 12:22) Ka oni zitironi kutiko, ko nikadu adu na oni. (Oni gedi 2 Pekapai 15:2.) Gaoni “ngbarago dú rogo Yekova yo.” Nirengo, ‘oni fu gaoni apai kube Yekova na ki kido kuti ko.’ (Tam. 37:4, 5) “Oni kpátagara kuti kpe kindi” na kidu naa kido nga gu Barani du ngbangbaturũ yo ko nika undo roni aundo oni hi agu akpakarapai dunduko oni kaa gbiatironi nani.—Rom. 12:12.

¹⁸ Oni zungodi Yekova tipa ko fu gako ziazia toro furoni tipa oni rengbe ka sa zereda si du kporo. (Eb. 12:14) Nirengo, oni rengbe arengba ka ye na gu zereda rengbe ka aria ngbadu agumeroni yo i idi na rengo. Oni nikadu na ngbarago gbiati zereda berãroni yo na ngbaduroniyo wa ‘oni kaa mangapai dunduko sa taasa rimo Mbori.’ (1 Kor. 10:31) Nairiwo wai ngbaha ka ino gupai nga awirinaroni kina rogo dungurati tipa ka fu undo furoni!

Footnotes

[Gu sura du ti kpewaraga 30]

Oni sia gu wene regbo rengbe oni ka sakapai tipa gaoni idapase ti ni

[Gu sura du ti kpewaraga 31]

Oni yugu gaoni nyemuse fu agu abadiarogatise nga ga agu awirina adunga ni aidipase ya